SAA ɛnee wɔwu yɛɛ bɛdwazole wɔ bɛrale ngoane nu a, anrɛɛ kɛzi ɛ nli bade nganeɛ ɛ? Anrɛɛ ɔ nye balie kpole! Noko asoo awie mɔɔ kɛwu la bahola ara ngoane nu bieko ɔ? Bie ɛzi ɛlɛ ɔ?

Nea nrenya ne mɔɔ gyi ɛke la, nee raalɛ ne nee kakula ekyi ne. Nrenya ne a le ngapezonli Yilaegya. Raalɛ ne le kunlavolɛ mɔɔ vi suakpole Zalefate azo, na kakula nrenya ne le ɔ ra. Kenle ko bie kakula ne anwo dole ye. Anwodolɛ ne rayɛle anwonyane kpole na nzinlii ɔwule. Yilaegya zele raalɛ ne kɛ: ‘Fa kakula ne maa me.’

Yilaegya vale kakula ne mɔɔ ɛwu la vole ɛbolɔnsam ne azo na ɔvale ye ɔdole ɛkpa ne azo. Akee ɔyɛle asɔne kɛ: ‘O Gyihova, maa kakula ne ɛrɛla ngoane nu bieko.’ Kakula ne bɔle ɔ bo kɛ ɔdie ɛnwomenle! Ɛkɛ ne ala Yilaegya vale kakula ne dwule aze na ɔzele raalɛ ne kɛ: ‘Nea, ɛ ra ne ɛde kpɔkɛ!’ Ɛhye ati a ɔ nli anye ɛlie kpole la.

Gyihova ngapezonli bieko mɔɔ anwo hyia la a le Yilaehya. Ɛnee ɔsonle kɛ Yilaegya boavolɛ. Na amozii Gyihova luale Yilaehya noko anwo zo ɔyɛle nwanwane ninyɛne. Kenle ko Yilaehya hɔle suakpole Hyunɛm azo, na raalɛ bie yɛle ye moalɛ kpole bie. Amozii raalɛ ne wole kakula nrenya.

Kenle ko nwonlomɔ, mekɛ mɔɔ ɛnee kakula ne ɛnyi la anzi, ɔdoale ɔ ze mɔɔ ɛnee ɔlɛyɛ gyima la wɔ ɛya ne anu. Arɛlevilɛ nu ala kakula ne deanle nu kɛ: ‘Me ti!’ Mekɛ mɔɔ bɛvale ye bɛrale sua nu la, kakula ne wule. Nea alɔbɔlɛ mɔɔ hanle ɔ nli a! Ndɛndɛ ne ala ɔhɔvɛlɛle Yilaehya.

Mekɛ mɔɔ Yilaehya rale la, ɔvale kakula ne mɔɔ ɛwu la ɔhɔle sua ne anu. Ɔzɛlɛle Gyihova, na ɔbutule kakula ne anwo zo. Yeangyɛ kakula ne anwo yɛle wuluwulu, na ɔnwuasinle fane nsuu. Nea kɛzi ɔ nli anye liele mekɛ mɔɔ ɔnwunle kɛ ɔ ra ne ɛnyia ngoane la!

Menli dɔɔnwo ɛwu. Ɛhye ɛmaa bɛ mbusua nee agɔnwolɛma ɛli nyane dɔɔnwo. Yɛnlɛ tumi mɔɔ yɛkola yɛmaa mɔwuamra dwazo a. Noko Gyihova lɛ zɔhane tumi ne. Amozii yɛbazukoa kɛzi ɔbava menli mgbe mgbe dɔɔnwo yeazia yeara ngoane nu bieko la anwo debie.