DEVIDI hunle Golayate la anzi, Yizilayɛ safohyenle Abenɛɛ vale ye rale Sɔɔlo anyunlu. Sɔɔlo anye liele Devidi anwo kpalɛ. Ɔyɛle ye safohyenle wɔ ye ɛlɔnema ne anwo azo na ɔvale ye ɔhɔdɛnlanle ye aako nu.

Amozii, mekɛ mɔɔ Yizilayɛma sia avi bɛ nee Filisitiama konle nu ara la, mraalɛ ne mɔ dole edwɛne kɛ: ‘Sɔɔlo ɛhu apenle apenle, na Devidi ɛhu apenle apenle bulu.’ Ɛhye manle Sɔɔlo vale ɛya, ɔluakɛ bɛwulale Devidi anyunlunyia bɛdɛlale ɔdaye Sɔɔlo. Noko Sɔɔlo ara nrenya Dwɔnatan annyia zɔhane adwenle ne. Ɔhulole Devidi kpalɛ, na zɔhane ala yɛɛ Devidi noko hulole ye a. Yemɔti bɛbɔle bɛ nwo ɛwɔkɛ kɛ bɛbayɛ agɔnwolɛ dahuu.

Devidi ze sanwule bɔ kpalɛ, na Sɔɔlo kulo edwɛne ne mɔɔ ɔbɔ la. Noko kenle ko Sɔɔlo nungule ɛhwenlɛ ne manle ɔyɛle debie ɛtane bie. Mekɛ mɔɔ Devidi ɛlɛbɔ ye sanwule ne la Sɔɔlo vale ye atwɛ ne na ɔdole, ɔhanle kɛ: ‘Mebɛtɛ Devidi wɔ bane ne anwo!’ Noko Devidi hwenle ɔ nwo ɛkɛ ne na atwɛ ne anga ye. Amozii Sɔɔlo dole atwɛ ne bieko kɛ ɔfa yeawɔ Devidi na ɔvonle. Ɔti Devidi nwunle kɛ ɔwɔ kɛ ɔnea ɔ nwo boɛ.

Ɛkakye ɛwɔkɛ ne mɔɔ Sɔɔlo bɔle la ɔ? Ɔhanle kɛ ɔbava ɔ ra raalɛ ne yeamaa nrenya ne mɔɔ ɔkɛhu Golayate la agyalɛ. Amozii Sɔɔlo hanle hilele Devidi kɛ ɔbahola yeagya ɔ ra raalɛ Maekale, na emomu ɔwɔ kɛ ɔdumua ɔku ye agbɔvolɛ Filisitiama ne anu 100. Suzu nwolɛ nea! Ɛnee Sɔɔlo lɛ anyelazo kɛ Filisitiama ne bahu Devidi. Noko bɛangola ye ku ɔti Sɔɔlo vale ɔ ra raalɛ ne manle Devidi gyale ye.

Kenle ko Sɔɔlo hanle hilele Dwɔnatan nee ye azonvolɛ ne mɔ kɔsɔɔti kɛ ɔkulo kɛ ɔku Devidi. Noko Dwɔnatan zele ɔ ze kɛ: ‘Mmafa ɛ sa ɛka Devidi. Ɔtɛyɛle ɛtane biala ɔtɛtiale wɔ. Emomu, debie biala mɔɔ ɔyɛle la, ɔvale ɔzonlenle wɔ. Ɔvale ye ngoane ɔdole esiane nu na ɔhunle Golayate, na ɛnwunle ye la, ɛlile fɛlɛko.’

Sɔɔlo diele ɔ ra ne na ɔbɔle ɛwɔkɛ kɛ ɔnrɛyɛ Devidi ɛtane biala. Bɛvale Devidi bɛrale bieko, na ɔzonlenle Sɔɔlo kɛmɔ ɔyɛ ye dɛba ne ala la. Noko akee, kenle ko, mekɛ mɔɔ Devidi ɛlɛbɔ ye sanwule ne la, Sɔɔlo dole ye atwɛ ne hɔle Devidi anwo zo. Devidi yele ɔ nwo ɛkɛ, na atwɛ ne hɔwɔle bane ne anu. Ye fane nsa ne azo ɛne! Devidi nwunle kɛ ɔwɔ kɛ ɔnriandi!

Kenle ko zɔhane nɔsolɛ ne Devidi hɔle ɔdaye mumua ne ye sua nu. Sɔɔlo zoanle menli kɛ bɛhɔhu ye. Ɛnee Maekale ze kpɔkɛ mɔɔ ɔ ze ɛbɔ la. Yemɔti ɔzele ɔ hu kɛ: ‘Saa ɛnɛ nɔe wɔanriandi a, bɛbava wɔ funli ɛhyema.’ Yemɔti nɔe ne Maekale boale Devidi manle ɔvale nvɛzɛlɛ nu ɔnriandile ɔhɔle. Ɛnee ɔwɔ kɛ Devidi fa ɔ nwo sie ɛleka ngakyile kɛyɛ ɛvolɛ nsuu amaa Sɔɔlo annwu ye.