KOLAA na Devidi awu la, ɔvale ngyehyɛleɛ mɔɔ vi Nyamenle ɛkɛ ne mɔɔ kile kɛzi ɔwɔ kɛ bɛsi Gyihova ɛzonlenlɛ sua ne la anwo ngɛlata ɔmanle Sɔlɔmɔn. Wɔ ye belemgbunlililɛ ne ɛvolɛ ne mɔɔ tɔ zo nna la anu, Sɔlɔmɔn bɔle ɔ bo kɛ ɔsi ɛzonlenlɛ sua ne, na ɔlile ɛvolɛ nsuu nee foa kolaa na bɛawie ye si. Menli apenle apenle yɛle ɛzonlenlɛ sua ne anwo gyima, na bɛzɛkyele ezukoa dɔɔnwo wɔ nwolɛ; ɔluakɛ bɛvale ezukoa nvutuke nee dwɛtɛ fufule dɔɔnwo a bɛzile a.

Ɛzonlenlɛ sua ne lɛ ekpumgbunli nwiɔ, kɛmɔ ɛnee ɛdanlɛ sua ne de la. Noko ekpumgbunli ɛhye mɔ le ɛdanlɛ sua ne ɛdeɛ ne mɔnwo nwiɔ. Sɔlɔmɔn manle bɛvale ngyekyeleɛ ɛlɛka ne bɛziele ɛzonlenlɛ sua ne suakunlu ekpumgbunli ne anu, na bɛvale ninyɛne mɔɔ ɛha mɔɔ ɛnee wɔ ɛdanlɛ sua ne anu la bɛguale ekpumgbunli ɛhendeɛ ne anu.

Bɛwiele ɛzonlenlɛ sua ne si la, bɛlile ɛvoyia kpole bie. Sɔlɔmɔn hotole ɛzonlenlɛ sua ne anyunlu na ɔyɛle asɔne, kɛmɔ ɛnwu ye wɔ nvoninli ne anu la. Sɔlɔmɔn zele Gyihova kɛ: ‘Anwuma nehane tɛtɛtɛlɛlɛ ne bɔbɔ ɛnzo lɔ, na akee ɛzonlenlɛ sua ekyi ɛhye. Noko akee, O me Nyamenle, anrɛɛ tie wɔ menli saa bɛkakyi bɛ nye wɔ ɛke na bɛsɛlɛ wɔ a.’

Sɔlɔmɔn wiele asɔne ne yɛ la, senle vi anwuma rale. Ɔyelale nane afɔle ne mɔɔ bɛziezie la amuala. Na wienyi kpole bie mɔɔ vi Gyihova ɛkɛ ne la rayile ɛzonlenlɛ sua ne anu. Ɛhye kile kɛ ɛnee Gyihova ɛlɛtie, na ɔ nye liele ɛzonlenlɛ sua ne nee Sɔlɔmɔn asɔneyɛlɛ ne anwo. Akee ɛzonlenlɛ sua ne ragyinlanle ɛdanlɛ sua ne agyakɛ anu na ɔrayɛle ɛleka mɔɔ menli ne basonle a.

Sɔlɔmɔn bule ye manle ne wɔ nrɛlɛbɛ nu mekɛ tendenle, na menli ne anye liele kpalɛ. Noko Sɔlɔmɔn gyale mraalɛ dɔɔnwo vile maanle ngakyile mɔɔ bɛnzonle Gyihova la azo. Ɛnwu ko kɛ ɔlɛsonle abaaba ne ɔ? Awieleɛ ne Sɔlɔmɔn aye mɔ manle ɔzonlenle awozonle dɔɔnwo. Asoo ɛze mɔɔ zile mekɛ mɔɔ Sɔlɔmɔn yɛle ɛhye la ɔ? Yeannea menli ne mɔ anwo zo kpalɛ bieko. Ɔ ti rayɛle se, na menli ne anye anlie bieko.

Ɛhye manle Gyihova vale Sɔlɔmɔn anwo ɛya na ɔzele ye kɛ: ‘Mebalie belemgbunlililɛ ne meavi ɛ sa nu na meava meamaa awie fofolɛ. Menrɛyɛ ɛhye wɔ wɔ mekɛ zo, emomu mebalie ye wɔ mekɛ mɔɔ ɛ ra nrenya ɛlɛdi ebia la. Noko menrɛlie belemgbunlililɛ ne amuala wɔ ɛ ra ne asa nu.’ Maa yɛnlea kɛzi ɛhye zile la.