ASOO ɛze deɛ mɔɔ ɔti nrenya ɛhye ɛlɛtete ye tɛladeɛ ne anu la ɔ? Gyihova a zele ye kɛ ɔyɛ a. Nrenya ɛhye a le Nyamenle ngapezonli Ahaegya. Ɛze awie mɔɔ le ngapezonli la ɔ? Ɔle sonla mɔɔ Nyamenle ka ninyɛne mɔɔ bazi kenlebie la anwo edwɛkɛ kile ye a.

Wɔ ɛke Ahaegya ɛlɛtendɛ ahile Gyɛlɔbowam. Gyɛlɔbowam le nrenya bie mɔɔ Sɔlɔmɔn manle ɔyɛle ye suazilɛ gyima ne bie a. Mekɛ mɔɔ Ahaegya yiale Gyɛlɔbowam wɔ adenle ne azo la, Ahaegya yɛle azibɛnwo debie bie. Ɔyele tɛladeɛ fofolɛ ne mɔɔ ɔwula la na ɔsuosuanle nuhua ngyebangyeba 12. Ɔzele Gyɛlɔbowam kɛ: ‘Die tɛladeɛ azinli azinli ye anu 10 fa.’ Ɛze deɛ mɔɔ ɔti Ahaegya vale azinli 10 manle Gyɛlɔbowam a?

Ahaegya hilele nuhua kɛ Gyihova balie belemgbunlililɛ ne avi Sɔlɔmɔn asa nu. Ɔhanle kɛ Gyihova bava mbusua 10 amaa Gyɛlɔbowam. Ɛhye kile kɛ mbusua nwiɔ pɛ a baha amaa Sɔlɔmɔn ara nrenya Rilihɔbowam ali bɛ nwo zo tumi a.

Mekɛ mɔɔ Sɔlɔmɔn dele mɔɔ Ahaegya hanle hilele Gyɛlɔbowam la, ɔvale ɛya kpole. Ɔbɔle mɔdenle kɛ ɔku Gyɛlɔbowam. Na Gyɛlɔbowam nriandile hɔle Yigyibiti. Mekɛ guale nu ekyii la Sɔlɔmɔn wule. Ɔlile ebia ɛvolɛ 40, na akee bɛyɛle ɔ ra nrenya Rilihɔbowam belemgbunli. Wɔ Yigyibiti, Gyɛlɔbowam dele kɛ Sɔlɔmɔn ɛwu, ɔti ɔziale ɔrale Yizilayɛ.

Rilihɔbowam ɛnle belemgbunli kpalɛ. Ɔhilele menli ne nyane bɔbɔ ɔdɛlale mɔɔ ɔ ze Sɔlɔmɔn yɛle la. Gyɛlɔbowam nee menli titile bie hɔle Belemgbunli Rilihɔbowam ɛkɛ ne na bɛzɛlɛle ye kɛ ɔbɔ mɔdenle na ɔ nee bɛ ɛli wɔ adenle kpalɛ zo. Noko akee Rilihɔbowam andie. Akee bɔbɔ avuanyi alumua deɛ ne. Yemɔti menli ne vale Gyɛlɔbowam ziele mbusua 10 ne azo belemgbunli, na Rilihɔbowam hɔle zo yɛle mbusua nwiɔ ne mɔɔ le Bɛngyaman nee Dwuda la azo belemgbunli.

Gyɛlɔbowam angulo kɛ ye menli ne kɔsonle wɔ Gyɛlusalɛm wɔ Gyihova ɛzonlenlɛ sua ne anu. Ɔti ɔyɛle ezukoa nvutuke nlankɛ mralɛ nwiɔ na ɔmanle mbusua 10 belemgbunlililɛ ne zonlenle bɛ. Yeangyɛ biala basabasayɛlɛ nee ɛtanelilɛ bule maanle ne anu.

Ngyegyelɛ noko wɔ mbusua nwiɔ belemgbunlililɛ ne anu. Rilihɔbowam ralile ebia ne la yeandwu ɛvolɛ nnu yɛɛ Yigyibiti belemgbunli rale kɛ ɔ nee Gyɛlusalɛm baho a. Ɔvale agudeɛ dɔɔnwo ɔvile Gyihova ɛzonlenlɛ sua ne anu ɔhɔle. Ɔti mekɛ ekyi bie ala yɛɛ ɛzonlenlɛ sua ne yɛle kɛmɔ ɛnee ɔde wɔ mekɛ mɔɔ bɛzile la a.