FOA 5
Babelɔn Nlɔnu Kɔdwu Gyɛlusalɛm Bane Ne Ɛkyekyelɛ Bieko
Yizilayɛma ne yiale bɛ diedi ne anwo sɔnea dɔɔnwo wɔ mekɛ mɔɔ bɛhyele bɛ nuokɛ bɛhɔle Babelɔn la. Bɛvuandinle Hyeedelake, Mihyake nee Abɛdenɛgo bɛguale sendɔlɔra nu, noko Nyamenle yele bɛ vindele mɔɔ ɛnee bɛ nye gyi zo a. Nzinlii, mɔɔ Midiama nee Pɛhyeama honle vale Babelɔn wiele la, bɛvale Daneɛle bɛdole awenade tunli nu, noko Nyamenle eza bɔle ɔ nwo bane ɔlua awenade ne mɔ mɔɔ ɔtotole bɛ nloa anu la azo.
Awieleɛ kolaa ne, Saelɛse, Pɛhyea belemgbunli ne manle Yizilayɛma nyianle bɛ ti. Bɛhyele bɛ nuokɛ bɛhɔle Babelɔn la, ye ɛvolɛ 70 anzi ala a bɛziale bɛrale bɛ maanle nu a. Ninyɛne mɔɔ lumua mɔɔ bɛyɛle wɔ mekɛ mɔɔ bɛziale bɛrale Gyɛlusalɛm la anu ko a le kɛ bɛbɔle Gyihova ɛzonlenlɛ sua ne ɛzilɛ bo. Noko akee, yeangyɛ biala yɛɛ agbɔvolɛ manle bɛgyakyile bɛ gyima ne a. Yemɔti bɛziale bɛrale Gyɛlusalɛm la ye ɛvolɛ kɛyɛ 22 anzi yɛɛ akee bɛwiele ɛzonlenlɛ sua ne si a.
Mɔɔ doa ye la, yɛsukoa adenle mɔɔ Ɛzela dule ziale rale Gyɛlusalɛm razieziele ɛzonlenlɛ sua ne la anwo debie. Bɛzile ɛzonlenlɛ sua ne bɛwiele la ye ɛvolɛ kɛyɛ 47 anzi a ɔyɛle ɛhye a. Akee wɔ Ɛzela adendulɛ ne anzi ɛvolɛ 13, Nihɛmaya boale manle bɛkyekyele Gyɛlusalɛm bane ne mɔ mɔɔ ɛnee ɛgologolo ɛgua la. Foa NNU ne ka ɛvolɛ 152 anwo tetedwɛkɛ toonwo mɔɔ ba yɛ mekɛ ye azo.
WƆ FOA ƐHYE
EDWƐKƐ 78
Ɛsalɛ Bie Kɛlɛ Bane Ne Anwo
Ngapezonli Daneɛle hilele edwɛkɛ agbɔkɛ nna mɔɔ yɛ ɛzulolɛ la abo.
EDWƐKƐ 79
Daneɛle La Awenade Tunli Nu
Bɛbua Daneɛle ewule fɔlɛ noko anrɛɛ ɔbahola yeayɛ nwolɛ debie ɔ?
EDWƐKƐ 80
Nyamenle Menli Fi Babelɔn
Mekɛ mɔɔ Pɛhyea Belemgbunli Saelɛse lile Babelɔnma anwo zo konim la ɔmanle ngapezo bie rale nu, na kɛkala noko ɔlɛmaa ngapezo gyɛne noko ara nu.
EDWƐKƐ 81
Nyamenle Moalɛ Nu Anwodozo
Yizilayɛma ɛbulu sonla mɛla zo amaa bɛadie Nyamenle. Asoo Nyamenle bayila bɛ ɔ?
EDWƐKƐ 82
Mɔdekae Nee Ɛseta
Ɛnee Belemgbunli Raalɛ Vahyetae anwo yɛ fɛ noko Belemgbunli Ahazelɔse vale Ɛseta ziele ɔ gyakɛ anu. Duzu ati ɔ?
EDWƐKƐ 83
Gyɛlusalɛm Bane Ne
Wɔ mekɛ mɔɔ bɛlɛto bane ne la, ɛnee ɔwɔ kɛ gyimayɛvoma ne fa dadeɛ nee atwɛ sia bɛ nwo na bɛsinza.