ASOO ɛkakye kɛ wɔde mgbavolɛ nsa ɛhye anwo edwɛkɛ ɛlɛ ɔ? Ɛhɛe, bɛmɛ a le Daneɛle agɔnwo mɔ mɔɔ kpole kɛ bɛkɛli aleɛ mɔɔ ɛnee ɔnle kpalɛ ɔmmaa bɛ la. Babelɔnma vɛlɛle bɛ Hyeedelake, Mihyake yɛɛ Abɛdenɛgo. Na akee nea bɛ. Duzu ati a bɛmbɔ bɛ ti aze bɛmmaa ananze totohyia ɛhye kɛmɔ awie biala ɛlɛyɛ la ɛ? Maa yɛnlea ɛ.

Asoo ɛkakye mɛla ne mɔɔ Gyihova mumua ne hɛlɛle mɔɔ bɛfɛlɛ ye Mɛla Bulu ne la ɔ? Mɔɔ lumua la se: ‘Mmasonle nyamenle gyɛne biala kɛ me ngome ala.’ Mgbavolɛ ne mɔ mɔɔ wɔ ɛke la ɛlɛdi mɛla ɛhye azo, ɔnvane nwolɛ kɛ ye ɛyɛlɛ yɛ se la.

Babelɔn belemgbunli, Nɛbukadenɛza, ɛdo ɛsalɛ ɛvɛlɛ menli mɔɔ lɛ dibelɛ mgbole la dɔɔnwo kɛ bɛrazonle ananze ɛhye mɔɔ yezie la. Kɛ ɔhanle ɔhilele menli ne amuala la ɛne: ‘Saa bɛte kɛ bɛlɛbɔ aweɛne ne mɔ, getaa ngakyile yɛɛ gyɛne biala a, awie biala ɛbɔ ɔ ti aze ɛzonle ezukoa nvutuke ananze ɛhye. Awie biala mɔɔ ambɔ ɔ ti aze anzonle la, bɛbavuandi ye bɛado sendɔlɔra nu bɛayela ye ɛkɛ ne ala.’

Mɔɔ Nɛbukadenɛza dele kɛ Hyeedelake, Mihyake nee Abɛdenɛgo ambɔ bɛ ti aze la, ye ahonle futule kpole. Ɔmanle bɛvɛlɛle bɛ bɛrale. Ɔmanle bɛ adenle bieko kɛ bɛbɔ bɛ ti aze. Noko mgbavolɛ ne mɔ vale bɛ nwo dole Gyihova anwo zo. Bɛbuale Nɛbukadenɛza kɛ: ‘Yɛ Nyamenle ne mɔɔ yɛsonle ye la kola die yɛ. Na saa yeanlie yɛ bɔbɔ a yɛnrɛbɔ yɛ ti aze yɛnrɛmaa wɔ ezukoa nvutuke ananze ne.’

Nɛbukadenɛza dele ɛhye la, ɔvale ɛya kpole kpalɛ. Ɛnee sendɔlɔra bie bikye ɛkɛ ne ala na ɔhanle kɛ: ‘Bɛhua sendɔlɔra ne bɛmaa ye ɛzɔlɛ ɛyɛ kpole ɛdɛla dɛba ɛdeɛ ne mɔ fane nsuu!’ Akee ɔmanle menli kekahilii mɔɔ wɔ ye ɛlɔnema ne anu la kyekyele Hyeedelake, Mihyake nee Abɛdenɛgo na bɛvuandinle bɛ bɛguale sendɔlɔra ne anu. Sendɔlɔra ne le kpole la ati ɔyelale mrenya kekahilii ne mɔ ɔhunle bɛ. Na boni a dole mgbavolɛ nsa ne mɔɔ bɛvuandinle bɛ bɛguale nuhua la ɛ?

Belemgbunli ne nleanle sendɔlɔra ne anu, na ye ahonle dule kpole. Ɔbizale kɛ: ‘Ayi mɔ, na tɛ menli nsa a yɛkyekyele bɛ yɛvuandinle bɛ yɛguale senle ne anu a?’

Ye sonvolɛma ne buale kɛ: ‘Ɔle nɔhalɛ.’

Ɔhanle kɛ: ‘Noko menwu menli nna kɛ bɛluolua senle ne anu. Bɛtɛkyekyele bɛ, yɛɛ senle ne ɛnyela bɛ. Na mɔɔ tɔ zolɛ nna la zɔho bozonle.’ Belemgbunli ne bikyele sendɔlɔra ne na ɔdeanle nu kɛ: ‘Hyeedelake! Mihyake! Abɛdenɛgo! Anwuma Anwuma Nyamenle ne sonvolɛma, bɛvinde bɛrɛla!’

Mɔɔ bɛvindele bɛrale la, awie biala nwunle ye kɛ bɛ nwo ɛleka biala ambu ɛbonle. Akee belemgbunli ne hanle kɛ: ‘Ayɛlɛyelɛ ɛha Hyeedelake, Mihyake yɛɛ Abɛdenɛgo Nyamenle ne! Yezoa ye anwumabɔvolɛ yemaa yeralie bɛ ɔluakɛ bɛdule bɛ gye kɛ bɛnrɛbɔ bɛ ti aze bɛnrɛzonle nyamenle biala kɛ bɛ ɛdeɛ ne ala.’

Asoo ɛhye ɛnle nɔhalɛ mɔɔ yɛdi yɛamaa Gyihova la anwo neazo kɛnlɛma mɔɔ ɔwɔ kɛ yɛdi ɔ nzi a?