NEA ɛtane ko mɔɔ ɛlɛkɔ zo a! Bɛlɛku Gyisɛse. Bɛva ye bɛhenda baka zo. Bɛva pɛlɛko bɛbobɔ ɔ sa nee ɔ gyakɛ anu. Duzu ati a awie bahulo kɛ ɔkɛyɛ Gyisɛse debie zɛhae a?

Kɛmɔ menli bie mɔ kpɔ Gyisɛse la ati ɔ. Ɛze bɛ menli holɛ ɔ? Bɛ nuhua ko a le anwumabɔvolɛ atisesebɛ Seetan Abɔnsam. Yemɔ a le ahenle mɔɔ manle Adam nee Yive yɛle Gyihova anwo anzosesebɛ a. Na Seetan a le ahenle mɔɔ manle Gyisɛse kpɔvolɛma ne yɛle ɛtane kpole ɛhye a.

Kolaa na bɛava Gyisɛse bɛabɔ baka ne anu wɔ ɛke bɔbɔ la, ye kpɔvolɛma ne hilele ye nyane kpalɛ. Ɛkakye kɛzi bɛhɔle Gɛtesɛmani tola ne anu na bɛhyele ye bɛ nee ye hɔle la? Kpɔvolɛma zɔhane a le nwane mɔ? Bɛmɛ a le ɛzonlenlɛ nu adekilevolɛma ne mɔ. Maa yɛnlea mɔɔ zile bieko la.

Mekɛ mɔɔ ɛzonlenlɛ nu adekilevolɛma ne hyele Gyisɛse la, ye ɛzoanvolɛma ne nriandile. Bɛgyakyile Gyisɛse angomekye bɛmanle ye kpɔvolɛma ne, ɔluakɛ ɛzulolɛ hanle bɛ. Noko ɛzoanvolɛ Pita nee Dwɔn angɔ moa biala. Bɛdoale bɛ kɛ bɛkɛnwu mɔɔ kɛzi Gyisɛse anwo zo la.

Ɛsɔfoma ne vale Gyisɛse hɔle nrenya kpanyinli Anase mɔɔ ɛnee mekɛ bie le ɛsɔfo kpanyinli ne la sua nu. Menli ne angyɛ wɔ ɛkɛ ne. Akee bɛvale Gyisɛse bɛhɔle Kayafase mɔɔ le ɛsɔfo kpanyinli ne la sua nu. Ɛnee ɛzonlenlɛ nu adekilevolɛma dɔɔnwo ɛyia ye sua nu ɛkɛ ne.

Bɛlile ye edwɛkɛ wɔ Kayafase sua nu ɛke. Bɛvale menli bɛrale bɛmanle bɛrabɔle adalɛ bɛdole Gyisɛse abo. Ɛzonlenlɛ nu adekilevolɛma ne amuala hanle kɛ: ‘Ɔwɔ kɛ bɛku Gyisɛse.’ Akee bɛtotole nyɛlɛ ɔ nyunlu, na bɛbole ye.

Mekɛ mɔɔ ɛhye mɔ amuala ɛlɛkɔ zolɛ la, ɛnee Pita wɔ alie nwo nehane. Ɛnee maanle nu yɛ ɛyɛlɛ, yemɔti menli ne huanle senle. Mekɛ mɔɔ bɛgyigyi senle ne anwo bɛlɛte la, sonvolɛ raalɛ bie nleanle Pita, na ɔzele kɛ: ‘Ɛnee nrenya ɛhye noko boka Gyisɛse anwo.’

Pita buale kɛ: ‘Kyɛkyɛ, memboka bɛ!’

Menli hanle hilele Pita fane nsa kɛ ɛnee ɔboka Gyisɛse anwo. Noko Pita yele biala anloa kɛ ɔnle nɔhalɛ. Pita hanle ɛhye mɔɔ tɔ zo nsa ne la, Gyisɛse dole ɔ nye nleanle ye. Pita nlunle ɔ nwo kpole wɔ adalɛ ɛhye anwo na ɔvindele ɔhɔzunle.

Wɔ Yalɛ nwonlomɔ mɔɔ sɛnzɛne ne ɛlɛbɔ ɔ bo avinde la, ɛsɔfoma ne vale Gyisɛse hɔle bɛ ayia ɛleka kpole ne mɔɔ bɛfɛlɛ ye Sanhedelene asalo la, ɛkɛ ne. Wɔ ɛke bɛbɔle kpɔkɛ wɔ mɔɔ bɛbayɛ ye la anwo. Bɛvale ye bɛhɔmanle Pɔnteɔse Paelɛte, mɔɔ nea Dwudiya maanzinli ne azo la.

Ɛsɔfoma ne hanle hilele Paelɛte kɛ: ‘Nrenya ɛhye ɛnle sonla kpalɛ. Ɔwɔ kɛ bɛku ye.’ Mɔɔ Paelɛte bizebizale Gyisɛse edwɛkɛ wiele la, ɔhanle kɛ: ‘Mennwu ɛtane biala mɔɔ nrenya ye ɛyɛ a.’ Akee Paelɛte vale Gyisɛse hɔmanle Hɛlɔdo Antipase. Hɛlɔdo a nea Galeli azo a, noko ɔde Gyɛlusalɛm. Hɛlɔdo noko annwu ɛtane biala mɔɔ Gyisɛse ɛyɛ a, yemɔti ɔziale ɔvale ye ɔhɔmanle Paelɛte.

Ɛnee Paelɛte kpondɛ kɛ ɔgyakyi Gyisɛse. Noko ɛnee Gyisɛse kpɔvolɛma ne kpondɛ kɛ bɛgyakyi pilizanli gyɛne emomu bɛmaa ɔkɔ. Nrenya ɛhye a le Balabase mɔɔ le awule la. Mɔɔ Paelɛte vale Gyisɛse vindele alie nwo la ɛnee akee asɛɛ bulu nee nwiɔ ɛbɔ. Ɔzele menli ne kɛ: ‘Bɛnlea! Bɛ belemgbunli ne!’ Noko ɛsɔfo mgbanyima ne mɔ deɛdeanle nuhua kɛ: ‘Fa ye kɔ! Ku ye! Ku ye!’ Yemɔti Paelɛte gyakyile Balabase, na bɛhɔhunle Gyisɛse.

Bɛbɔle Gyisɛse baka nu Yalɛ ewiazo. Ɛnnwu bɛ wɔ nvoninli ne anu, noko bɛbɔ amumuyɛma nwiɔ baka nu mɔɔ bɛku bɛ a, ko wɔ Gyisɛse fema zo yɛɛ ko noko wɔ ye bɛne zo. Ɔhale ekyii na Gyisɛse awu la, amumuyɛma ne anu ko hanle hilele ye kɛ: ‘Saa ɛkɔ wɔ belemgbunlililɛ ne anu a kakye me.’ Na Gyisɛse buale kɛ: ‘Mebɔ wɔ ɛwɔkɛ kɛ ɛbaboka me nwo wɔ Paladaese.’

Asoo zɔhane ɛwɔkɛ ne ɛnyɛ nwanwane? Asoo ɛze paladaese ne mɔɔ ɛnee Gyisɛse ɛlɛka nwolɛ edwɛkɛ la? Ɛnee nienwu a paladaese ne mɔɔ Nyamenle yɛle ye mɔlebɛbo ne la wɔ a? Ɛhɛe, ɛnee ɔwɔ azɛlɛ ye azo. Na mekɛ mɔɔ Gyisɛse bali tumi kɛ belemgbunli wɔ anwuma la, ɔbava nrenya ɛhye yeazia yeara ngoane nu yeamaa yeanyia Paladaese fofolɛ ne mɔɔ bara azɛlɛ ye azo la anu anyelielɛ. Asoo ɔnle kɛ yɛ nye die nwolɛ ɔ?