KENLE ko Gyisɛse hanle hilele nrenya bie kɛ ɔwɔ kɛ ɔkulo ɔ gɔnwo. Nrenya ne bizale Gyisɛse kɛ: ‘Me gɔnwo a le nwane?’ Ɛnee Gyisɛse ze mɔɔ nrenya ɛhye ɛlɛdwenle nwolɛ la. Ɛnee nrenya ne dwenle kɛ menli mɔɔ bɛ nwo nane nee bɛ ɛzonlenlɛ le kɛ ye ɛdeɛ ne la ala a le ɔ gɔnwo mɔ a. Yemɔti maa yɛnlea mɔɔ Gyisɛse hanle hilele ye la.

Ɔdwu mekɛ ne bie a Gyisɛse bu ɛrɛlɛ fa kilehile. Ɛhye bie a ɔyɛle a. Ɔbule ɛrɛlɛ ɔvanenle Dwuunli nee Samɛleanli bie anwo. Yɛlumua yɛzukoa kɛ Dwuuma dɔɔnwo ɛngulo Samɛleama edwɛkɛ. Edwɛkɛ mɔɔ Gyisɛse hanle la ɛne:

Kenle ko ɛnee Dwuunli bie ɛlɛtolo ahɔ Gyɛleko. Na ɔhɔdɔle nwule avinli. Bɛliele ɔ nwo ezukoa na bɛbolo ye bɛmanle asɛɛ ɔwule bɔkɔɔ.

Nzinlii, ɛsɔfo bie mɔɔ le Dwuunli la vale adenle ne azo. Ɔnwunle nrenya ne mɔɔ bɛbole ye la. Duzu a ɛdwenle kɛ ɔyɛle a? Ɔbule ahane ɔhɔle. Akee awie bieko mɔɔ ɔsonle Nyamenle kpalɛ la vale adenle ne azo. Ɔle Levaenli. Ɔgyinlanle ɔ? Kyɛkyɛ, ɔdaye noko yeangyinla yeamboa nrenya ne mɔɔ bɛbodɛboda ye la. Ɛkola ɛnwu ɛsɔfo ne nee Levaenli ne kɛ bɛlua adenle ne azo bɛlɛkɔ.

Noko nea ahenle mɔɔ ɔwɔ nrenya ne mɔɔ bɛbodɛboda ye la anwo ɛke la. Ɔle Samɛleanli. Na ɔlɛboa Dwuunli ne. Ɔlɛfa ayile yeayɛ ye nganlɛ ne mɔ anyunlu. Akee, ɔvale Dwuunli ne ɔhɔle ɛleka mɔɔ ɔbahola yealie ye ɛnwomenle na yeade kpɔkɛ la.

Mɔɔ Gyisɛse hanle ye edwɛkɛ ne wiele la, ɔbizale nrenya ne mɔɔ bizale ye kpuyia ne la kɛ: ‘Ɛnee menli nsa ye ɛdawɔ ɛnea a boni a yɛle agɔnwolɛ manle nrenya ne mɔɔ bɛbole ye la ɛ? Ɛsɔfo ne, Levaenli ne anzɛɛ Samɛleanli ne ɔ?’

Nrenya ne buale kɛ: ‘Samɛleanli nrenya ne ɔ. Ɔhilele ahunlunyele ɔmanle nrenya ne mɔɔ bɛbole ye la.’

Gyisɛse zele kɛ: ‘Wɔha nɔhalɛ. Yemɔti ɛdawɔ noko kɔ na kɔyɛ zɔhane ala.’

Asoo ɛ nye ɛnlie kɛ Gyisɛse si kilehile la anwo? Saa yɛtie mɔɔ Gyisɛse ka wɔ Baebolo ne anu la a yɛbahola yɛazukoa ninyɛne mɔɔ anwo hyia la dɔɔnwo, ɔnle zɔ ɔ?