GYISƐSE ɛgyinla kɛ ɔdie ye ɛnwomenle wɔ bula bie azo wɔ Samɛlea. Ye ɛdoavolɛma ne ɛhɔ sua zo kadɔ aleɛ. Raalɛ ne mɔɔ Gyisɛse ne ye ɛlɛtendɛ la ɛra kɛ ɔbado bula ne bie. Ɔzele ye kɛ: ‘Maa me nzule ne bie meno.’

Ɛhye zinle raalɛ ne anwo kpole. Ɛze deɛ mɔɔ ɔti ɔzinle ɔ nwo la ɔ? Ɔboalekɛ Gyisɛse le Dwuunli, na raalɛ ne le Samɛleanli la ati ɔ. Na Dwuuma dɔɔnwo ɛngulo Samɛleama edwɛkɛ. Bɛ nee bɛ ɛndendɛ bɔbɔ! Noko ɛnee Gyisɛse kulo menli kɔsɔɔti. Yemɔti ɔzele kɛ: ‘Saa ɛze ahenle mɔɔ ɛlɛsɛlɛ wɔ nzule ne la a, anrɛɛ wɔbiza ye wɔmaa yemaa wɔ ngoane nzule.’

Raalɛ ne zele kɛ: ‘Yɛmenle, na ɛnlɛ bokiti, yɛɛ bula ye noko anu kɔ. Na ɛnee nienwu yɛɛ ɛnyia ngoane nzule ne a?’

Gyisɛse hilehilele nuhua kɛ: ‘Saa ɛno bula ɛhye anu nzule ne bie a nzuhɔne bahu wɔ bieko. Noko nzule ne mɔɔ mebava meamaa la kola maa sonla tɛnla aze dahuu.’

Raalɛ ne zele kɛ: ‘Yɛmenle, maa me nzule ɛhye bie! Na nzuhɔne angu me bieko. Na eza meara ɛke kɛ mebaza nzule.’

Ɛnee raalɛ ne dwenle kɛ Gyisɛse ɛlɛka nzule kpalɛ nwo edwɛkɛ. Noko ɛnee ɔlɛka nɔhalɛ ne mɔɔ fane Nyamenle nee ye belemgbunlililɛ ne anwo la anwo edwɛkɛ. Nɔhalɛ ɛhye le kɛ ngoane nzule la. Ɔkola ɔmaa sonla nyia dahuu ngoane.

Gyisɛse akee hanle hilele raalɛ ne kɛ: ‘Kɔvɛlɛ ɛ hu na ɛ nee ye bɛrɛla.’

Raalɛ ne buale kɛ: ‘Mengya nrenya.’

Gyisɛse buale kɛ: ‘Saa ɛse ɛngya nrenya a ɛnee ɛle nɔhalɛ. Na ɛdawɔ mumua ne wɔhɔ agyalɛ nnu, yɛɛ nrenya ne bɔbɔ mɔɔ ɛ nee ye de kɛkala la tɛ ɛ hu ɔ.’

Ɔzinle raalɛ ne anwo, ɔluakɛ ɛhye kɔsɔɔti le nɔhalɛ. Kɛzi Gyisɛse nwunle ninyɛne ɛhye mɔ ɛ? Ɛhɛe, ɔboalekɛ Gyisɛse a le Ahenle ne mɔɔ bɛbɔ ɔ nwo Ɛwɔkɛ mɔɔ Nyamenle zoanle ye la, na Nyamenle manle ɔnwunle edwɛkɛ ɛhye. Mekɛ ɛhye anu Gyisɛse ɛdoavolɛma ne ziale rale, na ɔyɛle bɛ azibɛnwo kpole kɛ ɔ nee Samɛleanli raalɛ ɛlɛtendɛ la.

Duzu a yɛsukoa yɛfi ɛhye mɔ amuala anu a? Ɔkile kɛ Gyisɛse atiakunlu le kɛnlɛma wɔ menli kɔsɔɔti anwo. Na ɔwɔ kɛ yɛdayɛ noko yɛyɛ zɔ. Ɔnle kɛ yɛdwenle kɛ menli bie ɛnle kpalɛ ɔluakɛ asolo kɛ bɛsi bɛde la ati. Gyisɛse kpondɛ kɛ menli kɔsɔɔti nwu nɔhalɛ ne mɔɔ kɔ dahuu ngoane nu la. Na ɔwɔ kɛ yɛdayɛ noko yɛnyia ɛhulo kɛ yɛkɛboa menli yɛkɛmaa bɛkɛzukoa nɔhalɛ ne.