MEKƐ mɔɔ Pita nee Dwɔn vile nla ne mɔɔ ɛnee Gyisɛse la nuhua la azo la, ɔhale Mɛle angomekye wɔ ɛkɛ ne. Ɔbɔle ɔ bo kɛ ɔsu. Akee ɔhanle ɔ nwo aze ɔnleanle nla ne anu, kɛmɔ yɛnwunle ye wɔ nvoninli ko ne anu la. Ɔnwunle anwumabɔvolɛma nwiɔ wɔ ɛkɛ ne! Bɛbizale ye kɛ: ‘Duzu ati a ɛlɛsu a?’

Mɛle buale kɛ: ‘Bɛrava me Awulae bɛhɔ, na mennwu ɛleka mɔɔ bɛhɔdo ye a.’ Akee Mɛle hakyile ɔ nwo na ɔnwunle nrenya bie. Nrenya ne bizale ye kɛ: ‘Nwane a ɛkpondɛ ye a?’

Ɛnee Mɛle dwenle kɛ nrenya ne a le ahenle mɔɔ nea tola ne azo la, na bie a yemɔ a yeye Gyisɛse funli ne a. Yemɔti ɔzele ye kɛ: ‘Saa ɛdawɔ yɛɛ ɛrayele ye ɛhɔle a, ka na kile me ɛleka mɔɔ ɛhɔdole ye la.’ Noko, ɛnee nrenya ɛhye a le Gyisɛse. Yeva sonlabaka fofolɛ mɔɔ Mɛle ɛnnwu ye la. Noko mekɛ mɔɔ ɔbɔle ye duma ɔvɛlɛle ye la, Mɛle nwunle ye kɛ Gyisɛse ɔ. Ɔnriandile na ɔhɔhanle ɔhilele ɛdoavolɛma ne kɛ: ‘Menwu Awulae!’

Mɔɔ aleɛ ne hɔle ɔ nyunlu ekyii wɔ kenle ne anu, mɔɔ ɛnee ɛdoavolɛma nwiɔ bie ɛlɛkɔ namule ne mɔɔ bɛfɛlɛ ye Ɛmeeyɛse azo la, nrenya bie rabokale bɛ nwo. Ɛnee nyane kpole ɛha ɛdoavolɛma ne ɔluakɛ bɛhu Gyisɛse la ati. Noko wɔ mekɛ mɔɔ bɛlɛkɔ la, nrenya ne hilehilele bɛ ninyɛne dɔɔnwo vile Baebolo ne anu mɔɔ manle bɛ rɛle kyekyele a. Awieleɛ kolaa, mɔɔ bɛdɛnlanle aze kɛ bɛdi debie la, ɛdoavolɛma ne nwunle nrenya ɛhye kɛ Gyisɛse ɔ. Akee Gyisɛse minliminlinle, na ɛdoavolɛma nwiɔ ɛhye yɛle ye ndɛndɛ ziale hɔle Gyɛlusalɛm kɛ bɛkaha ɔ nwo edwɛkɛ bɛahile ɛzoanvolɛma ne.

Mɔɔ zɔhane deɛ ne ɛlɛkɔ zolɛ la, Gyisɛse eza yele ɔ nwo hilele Pita. Mɔɔ menli mɔɔ ɛha la dele ɛhye la bɛ nye liele. Akee ɛdoavolɛma nwiɔ ɛhye hɔle Gyɛlusalɛm na bɛhɔnwunle ɛzoanvolɛma ne. Bɛdabɛ noko bɛhanle kɛzi Gyisɛse yele ɔ nwo hilele bɛ wɔ adenle ne azo la bɛhilele bɛ. Na mekɛ mɔɔ bɛ nloa wɔ zo bɛlɛka ɛhye anwo edwɛkɛ la, ɛze debie ɛzulolɛ ko mɔɔ ɔzile a?

Nea nvoninli ne. Gyisɛse vindele sua ne anu ɛkɛ ne, wɔ mekɛ mɔɔ ɛnee bɛdo anlenkɛ ne anu bɔbɔ la. Nea kɛzi ɛdoavolɛma ne anye ɛlie a! Asoo kenle zɔhane ɛnrɛyɛ anyelielɛ? Badwu mekɛ ɛhye anu asoo ɛbahola wɔadia fane dodo mɔɔ Gyisɛse ɛye ɔ nwo ali ɛhile ye ɛdoavolɛma ne la? Wɔdia fane nnu ɔ?

Ɛnee ɛzoanvolɛ Tɔmase ɛnle ɛkɛ ne a Gyisɛse yele ɔ nwo hilele bɛ a. Yemɔti ɛdoavolɛma ne hanle hilele ye kɛ: ‘Yɛnwu Awulae!’ Noko Tɔmase hanle kɛ kyesɛ ɔnwu Gyisɛse kolaa na yealie yeali. Ye kenle mɔtwɛ anzi ɛdoavolɛma ne yiale nuhua bieko wɔ sua mɔɔ bɛdo nuhua la anu, na mekɛ ɛhye anu ɛnee Tɔmase boka bɛ nwo. Arɛlevilɛ nu ala, Gyisɛse vindele sua ne anu ɛkɛ ne. Na akee Tɔmase liele lile.