OO! OO! Boni a ɛlɛsi wɔ ɛke a? Kpavolɛ ne mɔɔ la azɛlɛ nwo ɛke la ɛboda kpole ɔ? Nea! menli mɔɔ vi sua ne anu ɛlɛfinde la ko a le Pɔɔlo! Ɛnwu Temɔte noko wɔ ɛkɛ ne ɔ? Asoo kpavolɛ ne vi nvɛzɛlɛ ne anu a dɔle aze a?

Ɛhɛe, mɔɔ zile la ala ɛne. Ɛnee Pɔɔlo ɛlɛtendɛ ahile mediema ne mɔ mɔɔ wɔ Tulowase ɛke la. Ɛnee ɔze kɛ ɔnrɛnwu bɛ bieko wɔ mekɛ tendenle bie anu ɔboalekɛ ɛnee ye alehyenlɛ ne ɔbava ɛlɛne yeahɔ. Yemɔti ɔhɔle zolɛ ɔdendɛle dedee alevinli mu nwiɔ avinli.

Kpavolɛ ɛhye mɔɔ bɛfɛlɛ ye Yutekɛse la ɛnee de nvɛzɛlɛ ne anloa, na ɔlafele. Ɔvi nvɛzɛlɛ ne mɔɔ wɔ ɛbolɔnsam nzɛzo nsa ne azo la anu ɔdɔle aze! Yemɔti ɛkola ɛnwu deɛ mɔɔ ɔti menli ne ɛyɛ basaa la. Mɔɔ menli ne manle kpavolɛ ne zo la, ɛnee ɔle kɛ mɔɔ bɛzuzule la ala. Ɛnee yewu!

Mɔɔ Pɔɔlo nwunle ye kɛ kpavolɛ ne ɛwu la, ɔbutule ɔ nwo zo na ɔbɛlale ye. Akee ɔzele kɛ: ‘Bɛgyakyi mɔɔ bɛlɛyɛ la. Ɔtɛwule!’ Na amgba noko ɛnee ɔtɛwule! Ɔle nwanwane debie! Pɔɔlo ɛmaa yenyia ngoane bieko! Menli dɔɔnwo ne anye liele.

Bɛ muala bɛhɔle anwuma ne bieko na bɛhɔlile aleɛ. Pɔɔlo hɔle zo dendɛle hilele menli ne toonwo alehyenlɛ. Noko ɛbahola wɔalie wɔali kɛ Yutekɛse anlafe bieko! Akee Pɔɔlo, Temɔte yɛɛ bɛdabɛ mɔɔ bɛ nee bɛ ɛlɛtu adenle ne la hɔvole ɛlɛne ne anu. Ɛze ɛleka mɔɔ ɛnee bɛlɛkɔ a?

Ɛnee bɔ zo mɔɔ Pɔɔlo ɛlɛfa ye edwɛkɛhanlɛ adendulɛ mɔɔ tɔ zo nsa la yeara awieleɛ a, na ɛnee ɔlɛba sua nu. Wɔ adendulɛ ɛhye anu ɛnee Pɔɔlo ɛdɛnla Ɛfɛsɛse sua ne angomekye azo ɛvolɛ nsa. Yemɔti ɛnee adendulɛ ɛhye bɔbɔ le tendenle tɛla ye adendulɛ ne mɔɔ tɔ zo nwiɔ la.

Mekɛ mɔɔ ɛlɛne ne vile Tulowase la, ɔhɔgyinlanle ekyii wɔ Maelitɛse. Kɛmɔ ɛkɛ ne nee Ɛfɛsɛse anwa biala la ati, Pɔɔlo zoanle manle bɛhɔvɛlɛle mgbanyima mɔɔ wɔ asafo ne anu la kɛ bɛrɛla Maelitɛse amaa yeahola yeadendɛ yeahile bɛ mɔɔ li awieleɛ a. Nzinlii, mɔɔ mekɛ dwule kɛ ɛlɛne ne kɔ la, nea alɔbɔlɛ mɔɔ ɔyɛle bɛ kɛ bɛnwunle kɛ Pɔɔlo ɛlɛkɔ a!

Awieleɛ kolaa ne ɛlɛne ne ziale rale Sizalia. Mekɛ mɔɔ Pɔɔlo wɔ ɛdoavolɛ Felepe sua nu wɔ ɛke la, ngapezonli Agabɛse bɔle Pɔɔlo kɔkɔ. Ɔzele kɛ saa Pɔɔlo kɔ Gyɛlusalɛm a bɛbado ye efiade. Na amgba noko, mɔɔ zile la ɛne. Akee mɔɔ Pɔɔlo lale efiade ɛvolɛ nwiɔ wɔ Sizalia la, bɛvale ye bɛhɔle Wulomu kɛ bɛkali ye edwɛkɛ wɔ Wulomuma tumivolɛ Siza anyunlu. Maa yɛnlea mɔɔ zile wɔ Wulomu adendulɛ ne anu la.