ASOO ɛze ahenle mɔɔ la azɛlɛ ne anwo la? Sɔɔlo ɔ. Kakye kɛ, yemɔ a nleanle menli mɔɔ hunle Sitivin la adɛladeɛ ne azo a. Nea wienyi zɔhane mɔɔ ɛlɛta la! Duzu a ɛlɛsi a?

Bɛhunle Sitivin bɛwiele la, Sɔɔlo lile bɛ ti kɛ ɔkpondɛ Gyisɛse ɛdoavolɛma ne yeazɛkye bɛ. Ɔwolole azua nu ɔhɔhwenle bɛ ɔvindele ɔmanle bɛguale bɛ efiade. Ɛdoavolɛma ne anu dɔɔnwo nriandile hɔle azua azua gyɛne zo na bɛbɔle ɔ bo bɛbɔle “edwɛkpa” ne anwo nolo wɔ ɛkɛ ne. Noko Sɔɔlo hɔle azua azua gyɛne zo kɛ ɔkakpondɛ Gyisɛse ɛdoavolɛma ne. Kɛkala ɔlɛkɔ Damasekɛse. Na ɔlua adenle ne azo la, debie ɛzulolɛ mɔɔ zile la ɛne:

Arɛlevilɛ nu ala wienyi mɔɔ vi anwumanyunlu la rabɔle yiale Sɔɔlo. Ɔpɛle ɔfinle kɛmɔ yɛnwu ye wɔ ɛke la. Akee ɛnelɛ bie zele kɛ: ‘Sɔɔlo, Sɔɔlo! Duzu ati a ɛlɛyɛ me kpɔdekpɔde a?’ Menli mɔɔ nee Sɔɔlo lua la nwunle wienyi ne na bɛdele ɛnelɛ ne, noko bɛande mɔɔ ɔhanle la abo.

Sɔɔlo bizale kɛ: ‘Awulae, ɛdawɔ nwane ɔ?’

Ɛnelɛ ne buale kɛ: ‘Medame a mele Gyisɛse mɔɔ ɛlɛyɛ ye kpɔdekpɔde la.’ Gyisɛse zele ɛhye ɔboalekɛ saa Sɔɔlo yɛ Gyisɛse ɛdoavolɛma kpɔdekpɔde a, Gyisɛse te nganeɛ kɛ ɔdaye mumua ne a bɛlɛyɛ ye kpɔdekpɔde a.

Sɔɔlo akee bizale kɛ: ‘Awulae, duzu a menyɛ a?’

Gyisɛse zele kɛ: ‘Dwazo na kɔ Dɛmasekɛse. Ɛkɛ ne a bɛbaha debie mɔɔ ɔwɔ kɛ ɛyɛ la bɛahile wɔ a.’ Mekɛ mɔɔ Sɔɔlo dwazole na ɔbukele ɔ nye la, ɛnee ɔngola ɔnwu ɛhwee. Ɛnee ɔ nye ɛzi! Yemɔti menli mɔɔ nee ye lua la sosɔle ɔ sa bɛ nee ye hɔle Dɛmasekɛse.

Gyisɛse akee dendɛle hilele ye ɛdoavolɛma ne mɔɔ wɔ Dɛmasekɛse la anu ko na ɔzele ye kɛ: ‘Ananayase, Dwazo. Kɔ kpalɛ ne mɔɔ bɛfɛlɛ ye Fɔɔnwo la azo. Kɔ Dwudase sua nu na biza awie bie mɔɔ bɛfɛlɛ ye Sɔɔlo la. Meye ye kɛ ɔrayɛ me sonvolɛ titile.’

Ananayase diele ye. Mekɛ mɔɔ ɔnwunle Sɔɔlo la, ɔvale ɔ sa ɔguale ɔ ti zo na ɔzele ye kɛ: ‘Awulae ɛzoa me ɛ nwo ɛke amaa wɔanwu debie bieko na sunsum nwuanzanwuanza ne ara ɛ nwo zo.’ Ɛkɛ ne ala debie mɔɔ le kɛ fɛlɛ nwo abonle la vi Sɔɔlo anye zo guale aze, na ɔnwunle debie bieko.

Bɛvale Sɔɔlo bɛlile gyima kpole bɛmanle ɔhanle edwɛkɛ ne ɔhilele maanle dɔɔnwo anu menli. Bɛravɛlɛle ye ɛzoanvolɛ Pɔɔlo, mɔɔ yɛbazukoa ɔ nwo debie dɔɔnwo la. Noko mɔɔ lumua la, maa yɛnlea deɛ mɔɔ Nyamenle zoanle Pita kɛ ɔhɔyɛ la.