NEA mbaka ndendenle, felawɔse ngɛnlɛma nee awoka mgbole ne mɔ. Asoo ɔmmaa ɛke ɛnyɛ ahomeka? Nea kɛzi weɛlɛ ne ɛlɛdi aleɛ wɔ kakula nrenya ne asa nu la. Na nea awenade ne mɔ nee mgbɔnwɔ ne mɔ mɔɔ gyigyi ndile ne azo wɔ nehane la. Ɛnrɛhulo kɛ ɛkɛdɛnla ɛleka mɔɔ ɔle kɛ ɛke la ɔ?

Nyamenle kpondɛ kɛ ɛtɛnla azɛlɛ ye azo dahuu wɔ paladaese bie anu. Na ɔmkpondɛ kɛ ɛnwu nyane nee amaneɛ mɔɔ menli nwu ye ɛnɛ la bie. Ɛwɔkɛ mɔɔ Baebolo ne bɔ bɛdabɛ mɔɔ bɛbadɛnla paladaese fofolɛ ne anu la ɛne: ‘Nyamenle nee bɛ badɛnla. Ewule anzɛɛ ɛzunlɛ anzɛɛ nyane ɛnle ɛkɛ ne bieko. Alumua ninyɛne ne mɔ ɛze ɛhɔ.’

Gyisɛse banlea anwu ye kɛ nzenzaleɛ nwanwane ɛhye bara. Ɛze mekɛ ne ɔ? Ɔbayɛ zɔ, wɔ mekɛ mɔɔ ɔbaye ɛtaneyɛlɛ kɔsɔɔti nee ɛtanevolɛma yeavi azɛlɛ ye azo la. Kakye kɛ mekɛ mɔɔ Gyisɛse wɔ azɛlɛ ye azo la ɔyɛle menli mɔɔ ewule ngakyile wɔ bɛ nwo la ayile, na ɔdwazole menli ɔvile ewule nu bɔbɔ. Gyisɛse yɛle ɛhye vale hilele mɔɔ ɔbayɛ ye wɔ azɛlɛ ye azo amuala wɔ mekɛ mɔɔ yerayɛ Nyamenle belemgbunlililɛ ne azo Belemgbunli la.

Dwenle kɛzi azɛlɛ ye azo paladaese fofolɛ ne anu ɛdɛnlanlɛ bayɛ anyelielɛ la anwo nea! Gyisɛse nee menli mɔɔ ɔbakpa bɛ la bie mɔ, bali tumi wɔ anwuma. Menli ɛhye mɔ mɔɔ bali tumi la banlea kɛ awie biala mɔɔ wɔ azɛlɛ ye azo la anye balie. Maa yɛnlea mɔɔ ɔhyia kɛ yɛyɛ amaa yɛanwu ye kɛ Nyamenle bamaa yɛanyia dahuu ngoane wɔ ye paladaese fofolɛ ne anu la.