TILE 23
“Bɛmaa Mengilehile Me Edwɛkɛ Ne Anu”
Pɔɔlo hilehilele nɔhalɛ ne anu hilele menli bie mɔɔ ɛva ɛya la nee Sanhedelin ne
Ɔgyi Gyima ne 21:18–23:10 azo
1, 2. Duzu a maanle Pɔɔlo hɔle Gyɛlusalɛm a, na ngyegyelɛ boni mɔ a ɔyiale ye wɔ ɛkɛ a?
GYƐLUSALƐM! Pɔɔlo lua ye gua ngyikyi mɔɔ menli ɛyi zolɛ la azo bieko. Suakpole biala ɛnle azɛlɛ ye azo mɔɔ kɛzi Gyihova nee ye menli ne lile la anwo edwɛkɛ dɔɔnwo hɔle zo wɔ ɛkɛ tɛla Gyɛlusalɛm a. Sua ne azo amra dɔɔnwo anye die zɔhane tetedwɛkɛ ne anwo kpalɛ. Pɔɔlo ze kɛ Kilisienema dɔɔnwo mɔɔ wɔ ɛkɛ la ɛlɛfa bɛ nwo ado bɛ tetedwɛkɛ ne azo somaa, ɔti bɛnyɛ nzenzaleɛ mɔɔ nee Gyihova bodane ne yia la. Mɔɔ Pɔɔlo wɔ Ɛfɛsɛse la, ɔnwunle kɛ sua ne azo amra hyia nwonane afoa nu nee sunsum nu moalɛ, ɔti ɔzile kpɔkɛ kɛ ɔbazia yeahɔ ɛkɛ. (Gyi. 19:21) Ɛnee ɔze kɛ ɔbayia ngyegyelɛ ɛdeɛ, noko yeangakyi kpɔkɛ mɔɔ ɔzile kɛ ɔbazia yeahɔ ɛkɛ ne la.
2 Duzu a akee dole Pɔɔlo wɔ Gyɛlusalɛm a? Ngyegyelɛ ne bie vi Kelaese ɛdoavolɛma bie mɔ mɔɔ Pɔɔlo anwo adalɛ edwɛkɛ mɔɔ bɛdele la gyegye bɛ la ɛkɛ ne a rale a. Noko Kelaese agbɔvolɛ a vale ngyegyelɛ ne dɔɔnwo rale a. Bɛbɔle Pɔɔlo somolɛ, bɛbole ye na bɛnwunlonwunlanle ye kɛ bɛku ye. Ngyegyelɛ ɛhye mɔ mɔɔ bamaa ɛkɛ ne ayɛ begyebegye la noko bamaa Pɔɔlo anyia adenle ahilehile ye diedi nu. Mɛlɛbɛnwoaze, akɛnrasesebɛ nee diedi mɔɔ ɔvale ɔlile ngyegyelɛ ɛhye mɔ anwo gyima la le neazo kɛnlɛma maa Kilisienema ɛnɛ. Maa yɛnlea deɛmɔti ɔle zɔ la.
“Bɛbɔle Ɔ Bo Bɛwulale Nyamenle Anyunlunyia” (Gyima ne 21:18-20a)
3-5. (a) Nwane mɔ a Pɔɔlo hɔyiale bɛ wɔ Gyɛlusalɛm a, na duzu a bɛzuzule nwo a? (b) Duzu a yɛsukoa yɛfi Gyɛlusalɛm mgbanyima mɔɔ Pɔɔlo nee bɛ hɔyiale la anu a?
3 Mɔɔ Pɔɔlo nee ɔ gɔnwo mɔ hɔdwule Gyɛlusalɛm la, ye alehyenlɛ nu bɛhɔnwunle mgbanyima mɔɔ wɔ asafo ne anu la. Bɛambɔ ɛzoanvolɛma mɔɔ ɛnee tɛbɔ ɛkɛ la aluma; bie a zɔhane mekɛ ne ɛnee bɛ muala bɛvi ɛkɛ na bɛlɛyɛ ɛzonlenlɛ gyima ne wɔ ewiade ɛleka ngakyile. Noko ɛnee Gyisɛse adiema Gyemise tɛbɔ ɛkɛ. (Gal. 2:9) Ɔbayɛ kɛ Gyemise a yɛle ebianutɛnlavolɛ wɔ mekɛ mɔɔ “mgbanyima ne mɔ amuala” nee Pɔɔlo yiale la.—Gyi. 21:18.
4 Pɔɔlo bizale bɛ ahye na “ɔbɔle ɔ bo ɔhanle ninyɛne mɔɔ Nyamenle luale ye ɛzonlenlɛ gyima ne azo yɛle ye wɔ maanle maanle ne mɔ anu la amuala ɔhilele bɛ.” (Gyi. 21:19) Edwɛkɛ ɛhye maanle mgbanyima ne mɔ anwosesebɛ kpalɛ. Ɛnɛ noko, saa yɛte kɛzi gyima ne ɛlɛnyia anyuhɔlɛ wɔ maanle gyɛne nu la a, ɔmaa yɛ nye die kpalɛ.—Mrɛ. 25:25.
5 Bie a mekɛ hɔle bie la, Pɔɔlo hanle ndoboa mɔɔ ɔ nee ye vi Europe rale la anwo edwɛkɛ. Ɔbayɛ kɛ ɛlɔlɛ mɔɔ mediema mɔɔ wɔ moamoa la lale ye ali la maanle Pɔɔlo tievolɛma ne anye liele kpalɛ. Ɔluakɛ, mɔɔ mgbanyima ne mɔ dele Pɔɔlo edwɛkɛ ne la, kɛlɛtokɛ ne ka kɛ: “Bɛbɔle ɔ bo bɛwulale Nyamenle anyunlunyia”! (Gyi. 21:20a) Ɛnɛ noko, saa mediema fa moalɛ mɔɔ le ye mekɛ nu ɛdeɛ la maa menli mɔɔ esiane ɛdo bɛ anzɛɛ bɛ nwo ɛdo bɛ kpole la, na bɛka edwɛkɛ mɔɔ maa anwosesebɛ la bɛkile bɛ a bɛ nye die.
Menli Dɔɔnwo ‘Tɛdi Mɛla Ne Azo’ (Gyima ne 21:20b, 21)
6. Ngyegyelɛ boni a bɛhanle nwolɛ edwɛkɛ bɛhilele Pɔɔlo a?
6 Akee mgbanyima ne mɔ hanle hilele Pɔɔlo kɛ ngyegyelɛ bie ɛlɛkɔ zo wɔ Dwudiya mɔɔ fale ɔ nwo a. Bɛhanle kɛ: “Adiema, wɔnwu kɛ Dwuuma apenle apenle dɔɔnwo le diedima, noko bɛ muala bɛdi Mɛla ne azo. Noko bɛde ɛ nwo edwɛkɛ kɛ ɛlɛkilehile Dwuuma mɔɔ wɔ maanle maanle ne anu la kɛ bɛmmadi Mosisi Mɛla ne azo, na ɛlɛka kɛ bɛmmapɛ bɛ mra mrenyiazo anzɛɛ bɛmmadi yɛ amaamuo ne azo.” a—Gyi. 21:20b, 21.
7, 8. (a) Adwenle mɔɔ ɛndenrɛ la boni a ɛnee Dwuu Kilisienema dɔɔnwo lɛ a? (b) Duzu ati a Dwuu Kilisienema adwenle zɔhane mɔɔ ɛndenrɛ la ɛngile kɛ bɛkpɔkye ɛ?
7 Duzu ati a ɛnee Kilisienema dɔɔnwo tɛdi Mosisi Mɛla ne azo ɔnva nwo kɛ yepɛ nu ɛvolɛ mɔɔ bo 20 la ɛ? (Kɔl. 2:14) Wɔ 49 Y.M., ɛzoanvolɛma nee mgbanyima mɔɔ yiale Gyɛlusalɛm la hɛlɛle kɛlata hɔmaanle asafo ne mɔ na bɛhilehilele nu bɛhilele bɛ kɛ ɔngyia kɛ diedima mɔɔ vi maanle maanle ne anu la pɛ bɛ mrenyiazo anzɛɛ di Mosisi Mɛla ne azo. (Gyi. 15:23-29) Noko bɛanga Dwuu diedima mɔɔ bɛ nuhua dɔɔnwo ande ɔ bo kɛ ɔnle kɛ bɛdi Mosisi Mɛla ne azo bieko la anwo edwɛkɛ wɔ kɛlata ne anu.
8 Asoo adwenle zɔhane mɔɔ ɛnee Dwuu diedima ne lɛ la ɛmmaa bɛnfɛta kɛ bɛyɛ Kilisienema ɔ? Kyɛkyɛ! Tɛ kɛ ɛnee bɛle awozonlezonlenlɛma yɛɛ bɛlɛkɔ zo bɛali amaamuo adalɛ bie anzi a. Gyihova a vale zɔhane Mɛla ne mɔɔ ɛnee hyia Dwuu diedima ne la maanle bɛ a. Ɛnee debie biala ɛnle nu mɔɔ le sunsum ɛtane nyɛleɛ a yɛɛ nvonleɛ biala ɛnle nwo. Noko ɛnee Mɛla ne fale ngyekyeleɛ dɛba ne anwo yɛɛ Kilisienema wɔ ngyekyeleɛ fofolɛ ne abo. Ɛnee Mɛla ngyekyeleɛ ne azo ɛlilɛ ɛngyia bieko wɔ nɔhalɛ ɛzonlenlɛ nu. Ɛnee Dwuu Kilisienema mɔɔ tɛdi Mɛla ne azo la ɛnde ngyehyɛleɛ fofolɛ ne mɔɔ Kilisiene asafo ne ɛlɛdua zo azonle la abo yɛɛ bɛnlɛ anwodozo wɔ nu. Ɛnee ɔwɔ kɛ bɛkakyi bɛ adwenle bɛmaa ɔ nee nɔhalɛ ne mɔɔ bɛlɛda ye ali ngyikyi ngyikyi la yia. b—Gyɛ. 31:31-34; Luku 22:20.
“Mɔɔ Bɛlɛkeha Ye Wɔ Ɛ Nwo La Ɛnle Nɔhalɛ” (Gyima ne 21:22-26)
9. Duzu a Pɔɔlo hanle ye wɔ Mosisi Mɛla ne anwo a?
9 Na Pɔɔlo anwo edwɛkɛ mɔɔ bɛlɛkeha kɛ ɔlɛkilehile Dwuuma mɔɔ wɔ maanle maanle ne mɔ anu la kɛ “bɛmmapɛ bɛ mra mrenyiazo anzɛɛ bɛmmadi yɛ amaamuo ne azo” la noko ɛ? Ɛnee Pɔɔlo le ɛzoanvolɛ maa maanle maanle ne anu amra, na bɛdabɛ a ɔhanle kɛ ɔngyia kɛ bɛdi Mɛla ne azo a. Eza ɔhanle kɛ awie biala mɔɔ babɔ mɔdenle kɛ ɔdi diedima mɔɔ wɔ maanle maanle ne anu la adwenle yeamaa bɛapɛ bɛ mrenyiazo bɛava bɛahile kɛ bɛdi Mosisi Mɛla ne azo la ɛvo. (Gal. 5:1-7) Pɔɔlo hanle edwɛkpa ne bie noko hilele Dwuuma mɔɔ wɔ azuamgbole mɔɔ ɔhɔle ɛkɛ la azo la. Ɔbayɛ kɛ ɔhilehilele nu ɔhilele bɛdabɛ mɔɔ bɛdiele ye la kɛ Gyisɛse ewule ne ɛmaa Mɛla ne ɛkpa nwo, ɔti tɛ Mɛla ne azo ɛlilɛ a maa awie yɛ tenlenenli a, emomu ɔlua diedi zo.—Wlo. 2:28, 29; 3:21-26.
10. Kɛzi Pɔɔlo hilele kɛ ɔdwenle awie mɔ nganeɛdelɛ nwo wɔ Mɛla ne nee mrenyiazo ɛpɛlɛ ne anwo ɛ?
10 Noko, Pɔɔlo dele bɛdabɛ mɔɔ bɛkulo kɛ bɛkɔ zo bɛdi Dwuuma amaamuo zo, le kɛ gyima mɔɔ bɛnyɛ wɔ Ɛnwomenlelielɛ kenle anzɛɛ bɛnli aleɛ bie mɔ la edwɛkɛ bo. (Wlo. 14:1-6) Yɛɛ yeanli mrenyiazo ɛpɛlɛ nwo mɛla biala. Nɔhalɛ nu, Pɔɔlo pɛle Timote mɔɔ ye papa le Gilikinli la mrenyiazo amaa Dwuuma anga ɔ nwo edwɛkɛ biala. (Gyi. 16:3) Ɛnee mrenyiazo ɛpɛlɛ ne le awie biala ati anwo kpɔkɛzilɛ. Pɔɔlo hanle hilele Galeehyeama ne kɛ: “Saa yɛpɛ yɛ mrenyiazo o, yɛtɛpɛle o, ɔngyia, mɔɔ hyia la a le diedi mɔɔ fa ɛlɔlɛ yɛ gyima la.” (Gal. 5:6) Noko saa awie kulo kɛ ɔdi Mɛla ne azo la ati ɔmaa bɛpɛ ye mrenyiazo anzɛɛ ɔnyia adwenle kɛ ɔpɛ ye mrenyiazo a yɛɛ Gyihova balie ye ado nu a, ɛnee ɔkile kɛ ɔnlɛ diedi.
11. Duzu a mgbanyima ne mɔ hanle kɛ Pɔɔlo ɛyɛ a, na boni a anrɛɛ ɔnrɛyɛ a? (Eza nea ɔbodwɛkɛ.)
11 Edwɛkɛ mɔɔ ɛnee bɛlɛkeha la ɛnle nɔhalɛ ɛdeɛ, noko ɛnee ɔgyegye Dwuu diedima ne. Ɛhye ati mgbanyima ne mɔ hanle hilele Pɔɔlo kɛ: “Yɛlɛ mrenyia nna wɔ ɛke mɔɔ bɛbɔ ɛwɔkɛ a. Ɛ nee bɛ ɛhɔ na bɛhɔde bɛ nwo kɛ mɔɔ amaamuo ne kile la na tua nwolɛ kakɛ ne, amaa bɛakpa bɛ ti enrinli. Akee awie biala banwu ye kɛ mɔɔ bɛlɛkeha ye wɔ ɛ nwo la ɛnle nɔhalɛ, emomu ɛbɔ ɛbɛla kpalɛ yɛɛ ɛdi Mɛla ne noko azo.” c—Gyi. 21:23, 24.
12. Duzu a Pɔɔlo yɛle vale hilele kɛ ɔdie edwɛkɛ mɔɔ Gyɛlusalɛm mgbanyima ne mɔ hanle la ɔto nu a?
12 Anrɛɛ Pɔɔlo bahola aha kɛ tɛ ngyegyelɛ ne a le adalɛ edwɛkɛ mɔɔ bɛlɛkeha ye wɔ ɔ nwo la, emomu Dwuu diedima ne mɔɔ bɛkulo kɛ bɛdi Mosisi Mɛla ne azo la ɔ. Noko ɛnee ɔkulo kɛ ɔyɛ nzenzaleɛ wɔ mekɛ ala mɔɔ ɔntia Nyamenle ngyinlazo la. Ɛnee yelimoa yehɛlɛ kɛ: “Menyɛle me nwo kɛ mewɔ mɛla bo memaanle bɛdabɛ mɔɔ bɛwɔ mɛla bo la wɔ mekɛ mɔɔ medame mumua ne menle mɛla bo la, amaa meanyia bɛdabɛ mɔɔ bɛwɔ mɛla bo la.” (1 Kɔl. 9:20) Wɔ mekɛ ɛhye anu, Pɔɔlo nee Gyɛlusalɛm mgbanyima ne mɔ yɛle adwenle na ɔyɛle ɔ nwo kɛ ‘ɔwɔ mɛla bo’ la. Mɔɔ ɔyɛle la le neazo kɛnlɛma maa yɛ ɛnɛ kɛ, ɔwɔ kɛ yɛ nee mgbanyima ne mɔ yɛ adwenle na ɔnle kɛ yɛyɛ kyengye kɛ mɔɔ yɛkulo la ala a yɛbayɛ a.—Hib. 13:17.
Saa edwɛkɛ bie ɛntia Ngɛlɛlera ne anu ngyinlazo bie a, Pɔɔlo die to nu. Ɛdawɔ noko ɛ?
“Ɔnfɛta Kɛ Ɔtɛnla Aze!” (Gyima ne 21:27–22:30)
13. (a) Duzu ati a Dwuuma bie mɔ yɛle basabasa wɔ ɛzonlenlɛsua ne anu a? (b) Kɛzi bɛliele Pɔɔlo ɛ?
13 Ninyɛne angɔ ye boɛ wɔ ɛzonlenlɛsua ne anu. Kenle mɔɔ mrenyia ne mɔ fa ade bɛ nwo la ɛlɛba awieleɛ la, Dwuuma bie mɔɔ vi Ehyea la nwunle Pɔɔlo na bɛbɔle ye somolɛ kɛ yeva maanle maanle ne anu amra bie yera ɛzonlenlɛsua ne anu, na bɛmaanle menli ne bɔle ɔ bo yɛle basabasa. Saa Wulomu sogya kpanyinli ne anlie Pɔɔlo a, anrɛɛ bɛbole ye bɛhunle ye. Noko sogya kpanyinli ne vale ye dole efiade. Ɔvi kenle zɔhane, Pɔɔlo lale efiade ɛvolɛ mɔɔ bo nna kolaa na bɛaye ye. Noko ɛnee ye ngyegyelɛ ne ɛtɛwiele. Mɔɔ sogya kpanyinli ne bizale Dwuuma ne deɛmɔti bɛlɛbo Pɔɔlo la, bɛdeɛdeanle nu na bɛbɔle ye somolɛ ngakyile. Dede mɔɔ ɛnee bɛlɛyɛ la ati sogya kpanyinli ne ande mɔɔ bɛlɛka la. Awieleɛ bɔkɔɔ ne, ɛnee ɔwɔ kɛ bɛye Pɔɔlo bɛfi ɛkɛ. Mɔɔ ɔka ekyii Pɔɔlo nee Wulomu sogyama ne dwu ɛleka mɔɔ sogyama ne de la, Pɔɔlo zele sogya kpanyinli ne kɛ: “Mesɛlɛ wɔ, maa me adenle maa mendendɛ mengile menli ne.” (Gyi. 21:39) Sogya kpanyinli ne maanle ye adenle na ɔvale akɛnrasesebɛ ɔhilehilele ye diedi ne anu.
14, 15. (a) Duzu a Pɔɔlo hilehilele nu hilele Dwuuma ne a? (b) Duzu a Wulomu sogya kpanyinli ne yɛle amaa yeanwu deɛmɔti Dwuuma ne ɛva ɛya la ɛ?
14 Pɔɔlo bɔle ɔ bo kɛ: “Bɛmaa mengilehile me edwɛkɛ ne anu.” (Gyi. 22:1) Pɔɔlo hanle ye edwɛkɛ ne wɔ Hibulu nu, na ɛhye maanle menli ne yɛle koonwu. Ɔhilehilele deɛmɔti yerayɛ Kelaese ɛdoavolɛ la anu wienyi ɔhilele bɛ. Wɔ ye edwɛkɛ ne anu, ɔluale nrɛlɛbɛ adenle zo ɔhanle edwɛkɛ mɔɔ Dwuuma ne kulo a bɛbahola bɛayɛ nwolɛ neɛnleanu la. Gameeleɛle mɔɔ ɛlie duma la hilele Pɔɔlo debie, yɛɛ dɛba ne ɛnee Pɔɔlo yɛ Kelaese ɛdoavolɛma ne kpɔdekpɔde, ɔbayɛ kɛ ɛnee menli mɔɔ wɔ ɛkɛ ne la bie mɔ ze ɛhye. Noko mɔɔ ɔlɛkɔ Damasekɛse la, ɔnwunle Kelaese mɔɔ bɛdwazo ye la wɔ ɛnyelɛzodeɛnwunlɛ nu na ɔdendɛle ɔhilele ye. Menli mɔɔ nee Pɔɔlo lua la nwunle wienyi ne yɛɛ bɛdele ɛnelɛ ne, noko bɛande edwɛkɛ ne abo. (Gyi. 9:7; 22:9) Nzinlii, ɔ gɔnwo mɔ zɔle ɔ sa vale ye hɔle Damasekɛse ɔluakɛ ɛnee ɛnyelɛzodeɛnwunlɛ ne ɛmaa ɔ nye ɛzi. Mɔɔ bɛdwule ɛkɛ ne la, nrenyia bie mɔɔ bɛfɛlɛ ye Ananayase mɔɔ Dwuuma ne ze ye kpalɛ wɔ zɔhane maanzinli ne anu la luale nwanwane adenle zo maanle Pɔɔlo nwunle debie bieko.
15 Pɔɔlo doale zo hanle kɛ mɔɔ ɔziale ɔhɔle Gyɛlusalɛm la, Gyisɛse yele ɔ nwo hilele ye wɔ ɛzonlenlɛsua ne anu. Mɔɔ ɔhanle ɛhye la, Dwuuma ne vale ɛya na bɛdeɛdeanle nuhua kɛ: “Ye nrenyia ɛhye fi azɛlɛ ye azo, ɔluakɛ ɔnfɛta kɛ ɔtɛnla aze!” (Gyi. 22:22) Amaa sogya kpanyinli ne alie Pɔɔlo la, ɔmaanle bɛvale ye bɛhɔle ɛleka mɔɔ sogyama ne de la. Ɛnee sogya kpanyinli ne kulo kɛ ɔnwu deɛmɔti Dwuuma ne ɛva Pɔɔlo anwo ɛya la, ɔti ɔhanle kɛ ɔwɔ kɛ bɛbo ye na bɛbizebiza ye edwɛkɛ. Noko Pɔɔlo hanle kɛ ɔle Wulomunli na ɔbizale bɛ saa Wulomu mɛla maa adenle kɛ bɛkola bɛbo ye a. Ɛnɛ noko Gyihova azonvolɛ dua mɛla mɔɔ bɔ bɛ nwo bane la azo gyinla bɛ diedi ne anzi. (Nea ɛlɛka ɛhye mɔ, “ Wulomu Mɛla Boa Wulomuma” yɛɛ “ Yɛ Mekɛ Ye Azo Kɔɔto Edwɛkɛ Ngakyile.”) Mɔɔ sogya kpanyinli ne dele kɛ Pɔɔlo le Wulomunli la, ɔnwunle kɛ ɔwɔ kɛ ɔdua adenle fofolɛ zo ɔte edwɛkɛ ne abo kpalɛ. Aleɛ hyenle la, ɔmaanle Sanhedelin ne, Dwuuma kɔɔto kpole ne yiale na ɔvale Pɔɔlo ɔrale ɛkɛ.
“Mele Falasiinli” (Gyima ne 23:1-10)
16, 17. (a) Ka mɔɔ zile wɔ mekɛ mɔɔ Pɔɔlo dendɛle hilele Sanhedelin ne la. (b) Mɔɔ bɛbɔle Pɔɔlo la, kɛzi ɔyɛle mɛlɛbɛnwoaze nwo neazo ɛ?
16 Pɔɔlo bɔle ye edwɛkɛ ne abo wɔ Sanhedelin ne anyunlu kɛ: “Mediema, meva adwenle mɔɔ anu te kpalɛ la a mebɔ me ɛbɛla wɔ Nyamenle anyunlu too a yeradwu ɛnɛ a.” (Gyi. 23:1) Noko bɛammaa ye adenle. Kɛlɛtokɛ ne ka kɛ: “Mɔɔ ɔhanle ɛhye la ɛsɔfo kpanyinli Ananayase zele bɛdabɛ mɔɔ bɛgyigyi ɔ nwo ɛkɛ ne la kɛ bɛbɔ ɔ nloa ne azo.” (Gyi. 23:2) Ɔnle edwɛkɛ kpalɛ fee! Ɛhye kile kɛ ɔlɛ Pɔɔlo anwo adwenle ɛtane, ɔkulo kɛ ɔbu ye kɛ ɔle adalɛ mɔɔ ɔngyia daselɛ biala a! Ɔnyɛ nwanwane kɛ Pɔɔlo hanle kɛ: “Nyamenle babɔ wɔ, wɔmɔ nabalabanli. Ɛde ɛke kɛ ɛbua me ndɛne kɛ mɔɔ Mɛla ne kile la noko ɛto Mɛla ne wɔaha kɛ bɛbɔ me ɔ?”—Gyi. 23:3.
17 Mɔɔ hɔle zo la zinle menli mɔɔ gyigyi ɛkɛ ne la bie mɔ anwo—tɛ mɔɔ dole Pɔɔlo la, emomu mɔɔ Pɔɔlo hanle la! Bɛhanle kɛ: “Ɛyɛ Nyamenle ɛsɔfo kpanyinli ne aholoba ɔ?” Kɛzi Pɔɔlo buale bɛ la maa yɛnwu kɛ ɔbɛlɛ ɔ nwo aze yɛɛ ɔdi Mɛla ne azo. Ɔhanle kɛ: “Mediema, menze kɛ ɔle ɛsɔfo kpanyinli ɔluakɛ bɛhɛlɛ kɛ, ‘Mmatendɛ ɛtia kpanyinli mɔɔ nea wɔ menli ne la.’” d (Gyi. 23:4, 5; Ɛzɛ. 22:28) Akee Pɔɔlo nyianle adwenle fofolɛ. Mɔɔ Pɔɔlo nwunle kɛ Sanhedelin ne anu amra le Falasiima nee Sadusiima la ɔhanle kɛ: “Mediema, mele Falasiinli, Falasiima ara. Kɛmɔ medie medi kɛ bɛbadwazo mowuamra la ati a bɛlɛbua me ndɛne a.”—Gyi. 23:6.
Saa yɛ nee menli mɔɔ wɔ ɛzonlenlɛ gyɛne nu la ɛlɛtendɛ a, yɛka debie mɔɔ yɛ muala yɛ adwenle yia wɔ nwolɛ la anwo edwɛkɛ kɛ mɔɔ Pɔɔlo yɛle la
18. Duzu ati a Pɔɔlo hanle kɛ ɔle Falasiinli ɛ, na kɛzi yɛbahola yɛazukoa ye wɔ tɛnlabelɛ zɛhae bie anu ɛ?
18 Duzu ati a Pɔɔlo hanle kɛ ɔle Falasiinli a? Ɔvi Falasiinli abusua nu, ɔti ɔle “Falasiima ara.” Eza ɛnee menli dɔɔnwo bu ye kɛ ɔle Falasiinli. e Noko duzu ati a Pɔɔlo hanle kɛ ɔ nee Falasiima yɛ adwenle wɔ diedi mɔɔ bɛlɛ ye wɔ ewudwazo ne anu la anwo a? Ɛnee Falasiima die di kɛ saa awie wu a ye ɛkɛla ne wɔ ɛkɛ na tenlenema ɛkɛla badɛnla aze bieko kɛ menli la. Ɛnee Pɔɔlo ɛnlie ɛnli kɛ ɔle zɔ. Ɛnee ɔdie ewudwazo ne mɔɔ Gyisɛse hanle nwolɛ edwɛkɛ la ɔdi. (Dwɔn 5:25-29) Noko ɛnee Pɔɔlo nee Falasiima ne yɛ adwenle kɛ saa sonla wu a ɔbadɛnla aze bieko, Sadusiima ɛnlie ɛhye ɛnli. Yɛbahola yɛalua adenle ko ne ala azo yɛ nee Katelekema anzɛɛ Protestantma azuzu edwɛkɛ nwo. Yɛbahola yɛaha kɛ yɛdie Nyamenle yɛdi kɛ bɛdabɛ la. Bie a ɛnee bɛdie Nsa-Ko Nyamenle ne bɛdi noko yɛmɛ yɛdie Nyamenle kokye ne mɔɔ Baebolo ne ka ɔ nwo edwɛkɛ la a yɛdi a. Noko yɛ muala yɛdie yɛdi kɛ Nyamenle wɔ ɛkɛ.
19. Duzu ati a Sanhedelin ne ayia ne yɛle kpolerazulɛ a?
19 Pɔɔlo edwɛkɛ ne maanle Sanhedelin ne anu hyɛle nwiɔ. Kɛlɛtokɛ ne ka kɛ: “Basabasayɛlɛ kpole bie rale, na mɛla kilehilevolɛma mɔɔ bɛboka Falasiima ne anwo la dwazole na bɛbɔle ɔ bo bɛzule kpolera kyengye kɛ: ‘Yɛnnwu nvonleɛ biala wɔ nrenyia ɛhye anwo, noko saa sunsum anzɛɛ anwumabɔvolɛ bie dendɛle hilele ye a—.’” (Gyi. 23:9) Sadusiima anye anlie edwɛkɛ mɔɔ bɛhanle kɛ bie a anwumabɔvolɛ dendɛle hilele Pɔɔlo la anwo fee, ɔluakɛ bɛnlie anwumabɔvolɛma bɛnli! (Nea ɛlɛka “ Sadusiima Nee Falasiima.”) Dede ne akee yɛle kpole kpalɛ ɔti ɛnee ɔwɔ kɛ Wulomu sogya kpanyinli ne die Pɔɔlo bieko. (Gyi. 23:10) Noko ɛnee Pɔɔlo ngoane la esiane nu. Duzu a bado ɛzoanvolɛ ne a? Yɛbazukoa nwolɛ edwɛkɛ dɔɔnwo wɔ tile mɔɔ doa zo la anu.
a Kɛmɔ ɛnee Dwuu Kilisienema ne anwo zonle la ati, ɔbayɛ kɛ ɛnee asafo dɔɔnwo yia wɔ awie mɔ azua nu amaa bahola bɛali bɛ sunsum nu ngyianlɛ nwo gyima.
b Ɛvolɛ ekyi anzi, ɛzoanvolɛ Pɔɔlo hɛlɛle Hibuluma kɛlata ne na ɔmaanle bɛnwunle kɛzi ngyekyeleɛ fofolɛ ne le kpalɛ tɛla dɛba ne la. Wɔ kɛlata ne anu, ɔmaanle ɔlale ali wienyi kɛ ngyekyeleɛ fofolɛ ne ɛmaa dɛba ne ɛpɛ nu. Pɔɔlo maanle bɛ ngilenu mɔɔ tɔ ɛnzolɛ nu mɔɔ bɛbava bɛabua Dwuuma mɔɔ tɛdi Mosisi Mɛla ne azo la, eza ɔbayɛ kɛ ye ngilenu ne maanle Kilisienema bie mɔ mɔɔ ɛnee bɛgyi Mosisi Mɛla ne azo kyengye la diedi nu mianle.—Hib. 8:7-13.
c Mbɔlɔba bie mɔ ka kɛ mrenyia ne mɔ bɔle ɛwɔkɛ kɛ bɛbayɛ Nazalaema. (Nɔm. 6:1-21) Nɔhalɛ nu, ɛnee Mosisi Mɛla ne mɔɔ maa bɛkola bɛbɔ zɔhane ɛwɔkɛ ne la ɛkpa nwo. Noko bie a Pɔɔlo nyianle adwenle kɛ nvonleɛ ɛnle nwo kɛ mrenyia ne mɔ bali ɛwɔkɛ mɔɔ bɛbɔ Gyihova la azo. Ɔti nvonleɛ ɛnle nwo kɛ ɔ nee bɛ bahɔ na yeadua nwolɛ kakɛ. Yɛnze ɛwɔkɛ mɔɔ mrenyia ne mɔ bɔle la, noko kɛzi ɔde ye biala la, anrɛɛ Pɔɔlo ɛnrɛlie ɛnrɛdo nu kɛ bɛbɔ nane afɔle (le kɛ mɔɔ Nazalaema yɛ la) bɛva bɛde mrenyia ne mɔ anwo bɛvi ɛtane nwo. Kɛmɔ Kelaese bɔle afɔle mɔɔ di munli la ati, nane afɔlebɔlɛ ɛhye mɔ ɛngola ɛnkyikyi ɛtane bieko. Yɛnze mɔɔ Pɔɔlo yɛle la amuala, noko yɛze kɛ ɔnrɛyɛ debie mɔɔ ɔbagyegye ye adwenle la ɛlɛ.
d Bie mɔ ka kɛ ɛnee Pɔɔlo ɛnnwu debie kpalɛ la ati a yeannwu ɛsɔfo kpanyinli ne a. Anzɛɛ bie a ɔvile Gyɛlusalɛm la ɛhyɛ ɔti ɔnze ahenle mɔɔ ɛnee le ɛsɔfo kpanyinli wɔ mekɛ zɔhane la. Anzɛɛ bie a menli ne zonle la ati Pɔɔlo annwu ahenle mɔɔ hanle kɛ bɛbɔ ye la.
e Wɔ ɛvolɛ 49 Y.M., mɔɔ ɛnee ɛzoanvolɛma nee mgbanyima ne mɔ ɛlɛsuzu nwo saa ɔwɔ kɛ maanle maanle ne anu amra di Mosisi Mɛla ne azo la, bɛhanle kɛ ɛnee Kilisienema mɔɔ wɔ ɛkɛ ne la bie mɔ boka “Falasiima eku ne anwo na bɛrayɛ diedima.” (Gyi. 15:5) Ɔda ali kɛ, ɛnee diedima zɔhane mɔ le Falasiima yɛɛ bɛrayɛ Kilisienema a.
