TILE 25
“Medo Me Edwɛkɛ Ne Memaa Siza!”
Pɔɔlo yɛle kɛzi bɛgyinla edwɛkpa ne anzi la anwo neazo
Ɔgyi Gyima ne 25:1–26:32 azo
1, 2. (a) Tɛnlabelɛ boni a Pɔɔlo wɔ nu a? (b) Kpuya boni a Pɔɔlo edwɛkɛ mɔɔ ɔdole ɔmaanle Siza la maa yɛbiza a?
SOGYAMA ɛlɛsinza Pɔɔlo kpalɛ wɔ Sizalia. Ɛvolɛ nwiɔ mɔɔ ɛpɛ nu mɔɔ ɔhɔle Dwudiya la, Dwuuma bɔle mɔdenle fane nsa kɛ bɛku ye wɔ kenle ekyi bie anu. (Gyi. 21:27-36; 23:10, 12-15, 27) Badwu ɛke, ye agbɔvolɛ asa ɛtɛkanle ye, noko bɛ sa nu ɛtɛtole. Mɔɔ Pɔɔlo nwunle kɛ ɔyɛ biala a bɛ sa baha ye la, ɔhanle ɔhilele Amɛnlado Fɛsetɛse kɛ: “Medo me edwɛkɛ ne memaa Siza!”—Gyi. 25:11.
2 Asoo Gyihova liele kpɔkɛ mɔɔ Pɔɔlo zile kɛ yedo ye edwɛkɛ ne yemaa Siza la ɔdole nu? Mualɛ ne anwo hyia yɛdayɛ mɔɔ yɛlɛdi Nyamenle Belemgbunlililɛ ne anwo daselɛ bɔkɔɔ wɔ awieleɛ mekɛ ɛhye anu la kpalɛ. Ɔwɔ kɛ yɛnwu ye saa Pɔɔlo yɛle neazo maanle yɛ wɔ kɛzi ‘bɛdua mɛla adenle zo bɛfa edwɛkɛ ne bɛsie ɛkɛ ne’ la anu a.—Fel. 1:7.
‘Megyi Ndɛnebualɛ Ebia Ne Anyunlu’ (Gyima ne 25:1-12)
3, 4. (a) Duzu ati a Dwuuma ne hanle kɛ bɛva Pɔɔlo bɛrɛla Gyɛlusalɛm a, na kɛ ɔyɛle mɔɔ bɛangola bɛangu ye ɛ? (b) Kɛzi Gyihova boa ye azonvolɛ ɛnɛ kɛ mɔɔ ɔyɛle ɔmaanle Pɔɔlo la ɛ?
3 Mɔɔ Fɛsetɛse yɛle Wulomu amɛnlado mɔɔ nea Dwudiya azo la, ye kenle nsa anzi ɔhɔle Gyɛlusalɛm. a Ɛsɔfo kpanyinli ne nee mgbanyima ne mɔ bɔle Pɔɔlo somolɛ hilele ye wɔ ɛkɛ ne kɛ Pɔɔlo ɛyɛ ɛtane kpole kpalɛ. Ɛnee bɛze kɛ amɛnlado fofolɛ ne kulo kɛ anzodwolɛ tɛnla ɔdaye nee Dwuuma kɔsɔɔti avinli. Ɔti bɛzɛlɛle Fɛsetɛse kɛ: Fa Pɔɔlo bɛla Gyɛlusalɛm na bɛli ye edwɛkɛ wɔ ɛke. Noko ɛnee bɛze mɔɔ bɛkulo kɛ bɛyɛ la. Ɛnee Pɔɔlo agbɔvolɛ ɛlɛbɔ adwenle kɛ saa ɔvi Sizalia ɔlɛba Gyɛlusalɛm a bɛbahu ye wɔ adenle nu. Fɛsetɛse bɔle bɛ edwɛkɛ ne guale na ɔhanle kɛ: “Saa bɛnea na amgba nrenyia ne ɛyɛ debie ɛtane a ɛnee bɛmaa bɛ mgbanyima ne mɔ nee me ɛhɔ [Sizalia] na bɛhɔha bɛ edwɛkɛ ne.” (Gyi. 25:5) Ɔti, ye fane nwiɔ mɔɔ Pɔɔlo nyianle ɔ ti la ɛne.
4 Gyihova luale Awulae Gyisɛse Kelaese anwo zo boale Pɔɔlo wɔ ye sɔnea kɔsɔɔti anu. Kakye kɛ Gyisɛse hanle hilele Pɔɔlo wɔ ɛnyelɛzodeɛnwunlɛ nu kɛ: “Nyia akɛnrasesebɛ!” (Gyi. 23:11) Ɛnɛ, Nyamenle azonvolɛ yia ngyegyelɛ dɔɔnwo yɛɛ bɛnwulonwunla bɛ. Gyihova ɛnzi ngyegyelɛ ne mɔ adenle noko ɔmaa yɛ nrɛlɛbɛ nee anwosesebɛ mɔɔ yɛfa yɛgyinla ɔ nloa la. Yɛbahola yɛava yɛ nwo yɛado “tumi bedevinli” ne mɔɔ yɛ ɛlɔlɛ Nyamenle ne fa maa la azo dahuu.—2 Kɔl. 4:7.
5. Kɛzi Fɛsetɛse nee Pɔɔlo lile ɛ?
5 Mekɛ ekyi pɛle nu la, Fɛsetɛse ‘hɔdɛnlanle ndɛnebualɛ ebia nu’ wɔ Sizalia. b Pɔɔlo nee menli mɔɔ bɔle ye somolɛ la ragyinlanle ɔ nyunlu. Pɔɔlo hanle bɛ somolɛ ne mɔɔ ɛngyi kpɔkɛ zo la anwo edwɛkɛ kɛ: “Metɛyɛle ɛtane biala mɔɔ tia Dwuuma Mɛla ne anzɛɛ ɛzonlenlɛsua ne anzɛɛ Siza a.” Ɛnee ɛzoanvolɛ ne ɛnli fɔlɛ ɔti ɔwɔ kɛ bɛgyakyi ye. Duzu a Fɛsetɛse bayɛ a? Kɛmɔ ɛnee ɔkulo kɛ ɔnyia Dwuuma ne anyunlu ɛlolɛ la ati, ɔbizale Pɔɔlo kɛ: “Ɛkulo kɛ ɛkɔ Gyɛlusalɛm na bɛkɔdi edwɛkɛ ne wɔ me nyunlu wɔ ɛkɛ ɔ?” (Gyi. 25:6-9) Nzuzulɛ ɛtane boni ɛne! Saa bɛfa Pɔɔlo bɛkɔ Gyɛlusalɛm a, menli mɔɔ ɛbɔ ye somolɛ la a babua ye ndɛne a na anrɛɛ bɛbahu ye. Mekɛ ɛhye ɛdeɛ, ɛnee Fɛsetɛse kulo menli nyunlu ɛlolɛ tɛla kɛ ɔbabua ndɛne fɔɔnwo. Ɛnee amɛnlado Pɔnteɛse Paelɛte ɛlimoa ɛva bie ɛyɛ pilizanli titili bie. (Dwɔn 19:12-16) Ndɛnebuavolɛma mɔɔ wɔ ɛkɛ ne ɛnɛ la noko bahola amaa maanyɛlɛma anyia bɛ nwo zo tumi. Ɔti saa kɔɔto bie di Nyamenle menli ne edwɛkɛ na daselɛ biala mɔɔ yɛbava yɛamaa bɛ la anzi bɛbua yɛ fɔlɛ a ɔnle kɛ ɔsi yɛ nwo.
6, 7. Duzu ati a Pɔɔlo dole ye edwɛkɛ ne maanle Siza a, na neazo boni a ɔyɛle ɔmaanle Kilisienema ɛnɛ a?
6 Kɛmɔ Fɛsetɛse kulo kɛ ɔnyia menli nyunlu ɛlolɛ la ati anrɛɛ Pɔɔlo ngoane bahola avi ɔ sa. Ɔti Pɔɔlo hilele kɛ ɔle Wulomunli mɔɔ mɛla bɔ ɔ nwo bane a. Ɔhanle ɔhilele Fɛsetɛse kɛ: “Megyi Siza ndɛnebualɛ ebia ne anyunlu, ɛleka mɔɔ ɔwɔ kɛ bɛdi me edwɛkɛ la. Metɛyɛle Dwuuma ɛtane biala, kɛ mɔɔ ɛdawɔ noko ɛlɛnwu ye wienyi la. . . . Medo me edwɛkɛ ne memaa Siza!” Ɛnee saa awie to ye edwɛkɛ maa Siza a ɔngola ɔngakyi ye. Fɛsetɛse zile zo wienyi kɛ: “Wɔdo wɔ edwɛkɛ ne wɔmaa Siza a; ɛnee Siza ɛkɛ ne a ɛbahɔ a.” (Gyi. 25:10-12) Pɔɔlo yɛle neazo maanle Kilisienema ɛnɛ wɔ mekɛ mɔɔ ɔvale ye edwɛkɛ ɔhɔdole kɔɔto kpole nyunlu la. Saa dwazotiama ‘dua mɛla zo fa ngyegyelɛ ba’ Gyihova Alasevolɛ anwo zo a, yɛdua mɛla mɔɔ wɔ ɛkɛ ne la azo yɛbɔ edwɛkpa ne anwo bane. c—Edw. 94:20.
7 Ɔti, mɔɔ Pɔɔlo lale efiade ɛvolɛ nwiɔ wɔ mekɛ mɔɔ ɔtɛyɛle ɛtane biala la, bɛmaanle ye adenle kɛ ɔhɔha ye edwɛkɛ ne wɔ Wulomu. Noko ɛnee tumivolɛ bie kulo kɛ ɔnwu Pɔɔlo kolaa na yeahɔ.
Bɛdi edwɛkɛ bɛtia yɛ a yɛfa yɛkɔ kɔɔto kpole nu
“Meanyɛ Anzosesebɛ” (Gyima ne 25:13–26:23)
8, 9. Duzu ati a Belemgbunli Agelepa rale Sizalia a?
8 Mɔɔ Fɛsetɛse dele kɛ Pɔɔlo ɛdo ye edwɛkɛ ne ɛmaa Siza la, ɔ nzi mekɛ ekyi anu Belemgbunli Agelepa nee ɔ diema raalɛ Bɛnise “rakpɔlale” amɛnlado fofolɛ ne. d Wɔ tete Wulomu, ɛnee saa bɛkpa amɛnlado fofolɛ bie a mgbanyima kɔkpɔla ye. Agelepa rakpɔlale Fɛsetɛse wɔ mekɛ mɔɔ bɛkpale ye kɛ amɛnlado la amaa bɛ mu nwiɔ bɛ agɔnwolɛvalɛ ne anu ayɛ se na bɛaboa bɛ nwo kenle bie.—Gyi. 25:13.
9 Fɛsetɛse hanle Pɔɔlo anwo edwɛkɛ hilele Belemgbunli Agelepa na ɔ nye liele nwo. Aleɛ hyenle la, tumivolɛma nwiɔ ne dɛnlanle aze kɛ bɛtie ye. Noko bɛ tumi ne nee bɛ anwoziezielɛ hyeleenyi ne anga ahonle kɛ edwɛkɛ mɔɔ pilizanli ne mɔɔ gyi ɛkɛ ne baha la.—Gyi. 25:22-27.
10, 11. Kɛzi Pɔɔlo hilele kɛ ɔbu Agelepa ɛ, na ɔ nwo edwɛkɛ boni a ɔhanle ɔhilele belemgbunli ne a?
10 Pɔɔlo vile ɛbulɛ nu lale Belemgbunli Agelepa ase kɛ yemaa ye adenle kɛ ɔha ye edwɛkɛ ɔhile ye la, na ɔhanle kɛ belemgbunli ne ze Dwuuma amaamuo nee bɛ kpolerazulɛ ne mɔ amuala kpalɛ. Akee Pɔɔlo hanle ɔdaye mumua ne ɔ nwo edwɛkɛ kɛ: “Ɛnee meboka Falasiima eku ne mɔɔ yɛ se la anwo.” (Gyi. 26:5) Kɛmɔ ɛnee Pɔɔlo le Falasiinli la ati, ɛnee ɔ nye la kɛ Mɛzaya ne bara. Kɛkala mɔɔ yerayɛ Kilisienenli la, ɔlɛfa akɛnrazilɛ yeaha kɛ Gyisɛse Kelaese a le ahenle mɔɔ bɛva mekɛ tendenle bɛhendɛ ye la. Pɔɔlo nee menli mɔɔ bɔle ye somolɛ la die di kɛ Nyamenle bamaa ɛwɔkɛ mɔɔ ɔbɔle bɛ nenyia mɔ la ara nu, na diedi ɛhye ati a bɛlɛdi Pɔɔlo edwɛkɛ wɔ kenle zɔhane a. Ɛhye maanle Agelepa nyianle ɛhulolɛ kpole kɛ ɔbadie ye. e
11 Pɔɔlo hanle amumuyɛ mɔɔ ɔyɛle Kilisienema mekɛ bie la anwo edwɛkɛ kɛ: “Mame, ɛnee medie medi kɛ ɔwɔ kɛ meyɛ ninyɛne dɔɔnwo metia Gyisɛse mɔɔ vi Nazalɛte la duma ne. . . . Menvale bɛ nwo ɛya kpole la ati mengɔle azuamgbole ngakyile zo bɔbɔ kɛ mekayɛ bɛ kpɔdekpɔde.” (Gyi. 26:9-11) Pɔɔlo anwudu edwɛkɛ ne anu. Ɛnee menli dɔɔnwo ze kɛzi ɔyɛle Kilisienema amumuyɛ la. (Gal. 1:13, 23) Bie a Agelepa dwenlenle nwolɛ kɛ, ‘Duzu a maanle nrenyia ɛhye hakyile a?’
12, 13. (a) Kɛzi Pɔɔlo hanle ye ɛhakyilɛ ne anwo edwɛkɛ ɛ? (b) Kɛzi ɛnee Pɔɔlo ‘ɛlɛto ɔ gyakɛ awɔ kpɔma nloa ɛ’?
12 Pɔɔlo buale ye wɔ edwɛkɛ bieko mɔɔ ɔhanle la anu kɛ: “Kenle ko bie, ɛnee melɛkɔ Damasekɛse ɔluakɛ ɛsɔfo mgbanyinli ne mɔ maanle me tumi na bɛzoanle me kɛ mengɔnyɛ gyima ko ne ala bie wɔ lɔ, mɔɔ melua adenle nu na bɛbɔle ewiazo bulu nee nwiɔ la, O Nana, menwunle kɛ wienyi bie mɔɔ ta tɛla sɛnzɛne ne la vi anwuma rabɔle yiale me nee menli mɔɔ nee me lua la. Na mekɛ mɔɔ yɛ muala yɛpɛle yɛfinle la, mendele ɛnelɛ bie kɛ ɔlɛka yeahile me wɔ Hibulu aneɛ nu kɛ: ‘Sɔɔlo, Sɔɔlo, duzu ati a ɛlɛyɛ me kpɔdekpɔde ɛ? Ɛkɔ zo ɛto ɛ gyakɛ ɛwɔ kpɔma nloa a, ɛboda ɛ nwo.’ Noko menganle kɛ: ‘Yɛmenle, ɛdawɔ nwane ɔ?’ Na Awulae zele me kɛ: ‘Medame Gyisɛse mɔɔ ɛlɛyɛ me kpɔdekpɔde la ɔ.’” f—Gyi. 26:12-15.
13 Kolaa na Pɔɔlo anyia ɛnyelɛzodeɛnwunlɛ ɛhye la, ɛnee ‘ɔlɛto ɔ gyakɛ yeawɔ kpɔma nloa.’ Kɛ mɔɔ nane to ɔ gyakɛ wɔ kpɔma ti a ɔboda ɔ nwo la, zɔhane ala a ɛnee Pɔɔlo noko ɛlɛboda ɔ nwo wɔ sunsum nu ɔlua Nyamenle ɛhulolɛdeɛ mɔɔ ɔlɛdwazo yeatia la ati. Gyisɛse mɔɔ bɛdwazo ye mɔɔ yele ɔ nwo hilele Pɔɔlo wɔ Damasekɛse adenle zo la maanle nrenyia ɛhye mɔɔ lɛ ahonle kpalɛ noko yevo adenle la hakyile ye adwenle.—Dwɔn 16:1, 2.
14, 15. Duzu a Pɔɔlo hanle ye wɔ nzenzaleɛ mɔɔ ɔyɛle wɔ ye ɛbɛlabɔlɛ nu la anwo a?
14 Nɔhalɛ nu, Pɔɔlo yɛle nzenzaleɛ dɔɔnwo wɔ ye ɛbɛlabɔlɛ nu. Mekɛ mɔɔ ɔlɛtendɛ yeahile Agelepa la ɔhanle kɛ: “Meanyɛ anzosesebɛ wɔ anwuma ɛnyelɛzodeɛnwunlɛ ne anwo, emomu, menlimoale menganle edwɛkɛ ne mengilele bɛdabɛ mɔɔ bɛwɔ Damasekɛse la, yɛɛ akee bɛdabɛ mɔɔ bɛwɔ Gyɛlusalɛm nee Dwudiya maanle ne anu amuala yɛɛ maanle maanle ne mɔ, kɛ bɛnlu bɛ nwo na bɛrɛla Nyamenle ɛkɛ na bɛyɛ ninyɛne mɔɔ kile anlubɛnwo la.” (Gyi. 26:19, 20) Pɔɔlo vale ɛvolɛ dɔɔnwo yɛle gyima mɔɔ Gyisɛse Kelaese vale maanle ye wɔ ɛnyelɛzodeɛnwunlɛ nu wɔ zɔhane ewia ne la. Duzu a vi nu rale a? Menli mɔɔ diele edwɛkpa ne mɔɔ Pɔɔlo bɔle ye nolo la nlunle bɛ nwo vile bɛ ɛbɛlatane nee bɛ nyɛleɛ ɛtane nwo na bɛrale Nyamenle ɛkɛ. Menli ɛhye mɔ rayɛle maanlema kpalɛ na bɛlile mɛla zo.
15 Noko ɛnee ninyɛne mgbalɛ ɛhye mɔ anwo ɛngyia Dwuuma mɔɔ dwazo tia Pɔɔlo la. Pɔɔlo hanle kɛ: “Ɛhye ati a Dwuuma ne hyele me wɔ ɛzonlenlɛsua ne anu na bɛbɔle mɔdenle kɛ bɛku me la. Noko kɛmɔ menyia Nyamenle moalɛ ne la ati, mehɔ zo meli menli mɔɔ lɛ dibilɛ nee mɔɔ bɛnlɛ bie la daselɛ too yeradwu ɛnɛ.”—Gyi. 26:21, 22.
16. Kɛ ɔkɛyɛ na yɛazukoa Pɔɔlo wɔ mekɛ mɔɔ yɛlɛka yɛ diedi ne anwo edwɛkɛ yɛahile ndɛnebuavolɛma nee tumivolɛma la ɛ?
16 Kɛ nɔhalɛ Kilisienema la, ɔwɔ kɛ ‘yɛsiezie yɛ nwo mekɛ biala kɛ yɛkɛbua awie biala mɔɔ kɛbiza’ yɛ diedi ne anwo edwɛkɛ la. (1 Pita 3:15) Saa yɛlɛka yɛ diedi ne anwo edwɛkɛ yɛahile ndɛnebuavolɛma nee tumivolɛma a yɛbahola yɛazukoa adenle mɔɔ Pɔɔlo luale zo dendɛle hilele Agelepa nee Fɛsetɛse la amaa yeaboa yɛ. Saa yɛka ye wɔ ɛbulɛ nu yɛkile bɛ kɛ Baebolo ne anu nɔhalɛ ne ɛmaa yɛ nee menli mɔɔ tie yɛ la ɛbɛlabɔlɛ ɛyɛ kpalɛ a, bie a ɔbamaa mgbanyima ɛhye mɔ anye alie yɛ nwo.
“Ɛmaa Meayɛ Kilisienenli” (Gyima ne 26:24-32)
17. Kɛzi Fɛsetɛse yɛle ye nyɛleɛ wɔ Pɔɔlo edwɛkɛ ne anwo ɛ, na kɛzi menli da subane ko ne ala bie ali ɛnɛ ɛ?
17 Mɔɔ mgbanyima nwiɔ ne ɛlɛtie Pɔɔlo edwɛkɛ ne mɔɔ tɔ ɛnzolɛ nu la ɔhanle bɛ ahonle kpalɛ. Yɛ mɔɔ zile la nzonlɛ: “Na mɔɔ Pɔɔlo ɛlɛka ɛhye mɔ ava ahilehile ye edwɛkɛ ne anu la, Fɛsetɛse deanle nu kɛ: ‘Pɔɔlo, ɛlɛbɔ ɛlane! Nwomazukoalɛ dɔɔnwo ɛlɛmaa wɔabɔ ɛlane!’” (Gyi. 26:24) Kɛzi Fɛsetɛse deanle nu la maa ɔda ali kɛ ɔlɛ subane mɔɔ menli da ye ali ɛnɛ la bie. Menli dɔɔnwo bu menli mɔɔ kilehile Baebolo ne anu nɔhalɛ ne la kɛ bɛle kyengye. Menli mɔɔ ɛzukoa nwoma kpole wɔ ewiade ye anu la bu mowuamra mɔɔ bɛbadwazo bɛ la anwo edwɛkɛ mɔɔ wɔ Baebolo ne anu la kɛ ɔyɛ se kɛ bɛbalie bɛali.
18. Kɛzi Pɔɔlo buale Fɛsetɛse ɛ, na duzu a Agelepa yɛle a?
18 Noko Pɔɔlo buale amɛnlado ne kɛ: “Anyunlunyianli Fɛsetɛse, membɔ ɛlane, emomu melɛka nɔhalɛ edwɛkɛ mɔɔ nrɛlɛbɛ wɔ nu la. Nɔhalɛ nu, belemgbunli ne mɔɔ melɛtendɛ meahile ye mɔɔ menzulo la ze ninyɛne ɛhye mɔ kpalɛ . . . Belemgbunli Agelepa, ɛdie Ngapezoma ne ɛdi ɔ? Meze kɛ ɛdie bɛ ɛdi.” Agelepa buale kɛ: “Mekɛ ekyi ɛhye ala anu ɛmaa meayɛ Kilisienenli.” (Gyi. 26:25-28) Saa Agelepa edwɛkɛ ne vi ye ahonle nu o anzɛɛ ɔnvi ye ahonle nu o, yɛbahola yɛaha kɛ mɔɔ ɔhanle la da ali kɛ Pɔɔlo edwɛkɛ ne hanle ye ahonle.
19. Kpɔkɛ boni a Fɛsetɛse nee Agelepa bɔle ye wɔ Pɔɔlo anwo a?
19 Akee Agelepa nee Fɛsetɛse dwazole vale hilele kɛ bɛdie edwɛkɛ ne bɛwie. “Mɔɔ bɛlɛkɔ la, bɛbɔle ɔ bo bɛhanle kɛ: ‘Nrenyia ɛhye ɛtɛyɛle debie mɔɔ fɛta ewule anzɛɛ efiadedolɛ a.’ Agelepa zele Fɛsetɛse kɛ: ‘Saa nrenyia ɛhye ando edwɛkɛ ne ammaa Siza a, anrɛɛ ɔwɔ kɛ bɛgyakyi ye.’” (Gyi. 26:31, 32) Ɛnee bɛze kɛ nrenyia ne mɔɔ ragyinlanle bɛ nyunlu ɛkɛ la ɛnli fɔlɛ. Bie a akee bɛbanyia Kilisienema anwo adwenle kpalɛ.
20. Duzu a vi tumivolɛma mɔɔ Pɔɔlo lile bɛ daselɛ la anu rale a?
20 Tumivolɛma mɔɔ bɛ nwo edwɛkɛ wɔ kɛlɛtokɛ ɛhye anu la anu biala anlie Belemgbunlililɛ ne anwo edwɛkpa ne ando nu. Asoo nrɛlɛbɛ wɔ nu kɛ ɛzoanvolɛ Pɔɔlo hɔle mrenyia ɛhye mɔ anyunlu la ɔ? Ɛhɛe, nrɛlɛbɛ wɔ nu. Pɔɔlo mɔɔ ‘bɛvale ye bɛhɔle arelemgbunli nee amɛnladoma anyunlu’ wɔ Dwudiya la maanle ɔlile Wulomu mgbanyima mɔɔ anrɛɛ ɔbayɛ se kɛ bɛbade edwɛkpa ne la daselɛ. (Luku 21:12, 13) Eza ye anwubielɛ nee ye nɔhalɛlilɛ wɔ sɔnea mekɛ nu maanle ɔ mediema mrenyia nee mraalɛ diedi nu yɛle se.—Fel. 1:12-14.
21. Saa yɛbɔ mɔdenle wɔ Belemgbunlililɛ gyima ne anu a debie kpalɛ boni a bavi nu ara a?
21 Ɛnɛ noko kɛ ɔde la ɛne. Saa yɛbɔ mɔdenle wɔ Belemgbunlililɛ gyima ne anu ɔnva nwo sɔnea nee dwazotia mɔɔ yɛyia la a, bie a ninyɛne mgbalɛ bavi nu ara. Yɛbahola yɛali arane mgbanyima mɔɔ bie a anrɛɛ ɔbayɛ se kɛ bɛbade edwɛkpa ne la daselɛ. Saa yɛfa nɔhalɛlilɛ yɛgyinla kpundii a ɔbamaa yɛ mediema mrenyia nee mraalɛ anwosesebɛ na yeamaa bɛava akɛnrazilɛ bɛali Nyamenle Belemgbunlililɛ ne anwo daselɛ bɔkɔɔ.
a Nea ɛlɛka “ Wulomu Amɛnlado Pɔseɛse Fɛsetɛse”.”
b Ɛnee bɛfa “ndɛnebualɛ ebia ne” bɛsie bama zo. Ebia ne mɔɔ bɛkpogya ye la maa bɛbu ndɛne mɔɔ ndɛnebuavolɛ ne kɛbua la kɛ bɛngakyi ye yɛɛ ɔwɔ kɛ bɛdie bɛto nu. Paelɛte dɛnlanle ndɛnebualɛ ebia nu wɔ mekɛ mɔɔ ɔlɛdi Gyisɛse edwɛkɛ la.
c Nea ɛlɛka mɔɔ se “ Nɔhalɛ Ɛzonlenlɛ Nwo Edwɛkɛ Mɔɔ Yɛva Yɛhɔ Kɔɔto La.”
d Nea ɛlɛka mɔɔ se “ Belemgbunli Hɛlɔdo Agelepa II.”
e Kɛmɔ Pɔɔlo le Kilisienenli la ati ɛnee ɔdie ɔdi kɛ Gyisɛse a le Mɛzaya ne a. Dwuuma mɔɔ kpole Gyisɛse la ɛnee bu Pɔɔlo kɛ ɔle kpɔkyevolɛ.—Gyi. 21:21, 27, 28.
f Baebolo nwo abɔlɔba bie hanle “ewiazo bulu nee nwiɔ” mɔɔ Pɔɔlo hanle kɛ ɛnee ɔlɛtu adenle la anwo edwɛkɛ kɛ: “Kyesɛ adendulɛnli bie kpondɛ ye ndɛndɛ kpalɛ tɛ ye zɔhane a ɔbalie ɔ menle wɔ ewiazo ɔlua wuluwulu ti. Ɛhye kile kɛzi Pɔɔlo anye bolole kɛ ɔbayɛ menli ne kpɔdekpɔde la.”
