1, 2. Duzu ati a ɔnzi Pɔɔlo anwo kɛ bɛlɛyɛ ye kpɔdekpɔde wɔ Gyɛlusalɛm a?

 BƐLIELE Pɔɔlo bɛvile menli bie mɔɔ ɛva ɛya la asa anu wɔ Gyɛlusalɛm na bɛdole ye efiade bieko. Ɔnyɛ Pɔɔlo mɔɔ bɔ mɔdenle la azibɛnwo kɛ bɛlɛyɛ ye kpɔdekpɔde wɔ Gyɛlusalɛm a. Bɛhanle kɛ “efiadelalɛ nee anwongyelelɛ” ɛlɛkendɛ ye wɔ suakpole zɔhane azo. (Gyi. 20:22, 23) Ɛnee Pɔɔlo ɛnze debie fɔɔnwo mɔɔ bado ye la ɛdeɛ, noko ɛnee ɔze kɛ ɔbahɔ zo yeanwu amaneɛ wɔ Gyisɛse duma nu.​—Gyi. 9:16.

² Kilisiene ngapezonli bie bɔbɔ bɔle Pɔɔlo kɔkɔ kɛ bɛbakyekye ye na bɛaye ye bɛawula “maanle maanle ne anu amra asa anu.” (Gyi. 21:4, 10, 11) Dwuuma bie bɔle mɔdenle kɛ bɛku ye, na yeangyɛ biala, ɛnee ɔzɔho kɛ Sanhedelin ne anu amra ‘bahu’ Pɔɔlo ɔluakɛ ɛnee bɛlɛsu edwɛkɛ bie mɔɔ yeha la anwo kpolera. Kɛkala Pɔɔlo la efiade yɛɛ Wulomu sogyama ɛlɛsinza ye na ɔnrɛhyɛ biala ɔbayia sɔnea dɔɔnwo yɛɛ bɛbado ye ɛzonle. (Gyi. 21:31; 23:10) Nɔhalɛ nu, ɛzoanvolɛ Pɔɔlo hyia anwosesebɛmaanlɛ kpalɛ!

3. Nienwu a yɛnyia anwosesebɛ yɛfa yɛyɛ yɛ edwɛkɛhanlɛ gyima ne a?

³ Wɔ awieleɛ mekɛ ɛhye anu, yeze kɛ “bɛdabɛ mɔɔ bɛkulo kɛ bɛfa nyamenlezonlenlɛ kpalɛ bɛbɔ bɛ ɛbɛla kɛ Kelaese Gyisɛse ɛdoavolɛma la amuala, bɛbayɛ bɛdabɛ noko kpɔdekpɔde.” (2 Tim. 3:12) Mekɛ ɛlɛkɔ la, yɛbahyia anwosesebɛmaanlɛ amaa yɛahola yɛahɔ zo yɛayɛ daselɛlilɛ gyima ne. Nea kɛzi yɛ nye sɔ edwɛkɛ mɔɔ ka ahonle mɔɔ le ye mekɛ nu ɛdeɛ mɔɔ “akɛlɛ nɔhavo nee badwema ne” maa yɛnyia wɔ yɛ mbuluku ne mɔ anu nee ayia ne mɔ abo la! (Mat. 24:45) Gyihova ɛmaa yɛnyia anwodozo kɛ edwɛkpa ne anwo agbɔvolɛ ɛnrɛli konim. Bɛnrɛhola bɛnrɛhu ye azonvolɛ kɔsɔɔti yɛɛ bɛnrɛhola bɛnrɛmaa bɛnrɛgyakyi bɛ edwɛkɛhanlɛ gyima ne. (Aye. 54:17; Gyɛ. 1:19) Na ɛzoanvolɛ Pɔɔlo noko ɛ? Asoo ɔnyianle anwosesebɛmaanlɛ amaa yeahɔ zo yeali daselɛ bɔkɔɔ ɔnva nwo dwazotia ɔ? Saa ye zɔ a, ɛnee ɔnyianle ye wɔ ni, na kɛzi ɔyɛle ye nyɛleɛ wɔ nwo ɛ?

4, 5. Anwosesebɛmaanlɛ boni a Pɔɔlo nyianle a, na duzu ati a ɛnee ɔle ye mekɛ nu ɛdeɛ a?

⁴ Mɔɔ bɛliele ɛzoanvolɛ Pɔɔlo bɛvile Sanhedelin ne asa anu la, ye nɔsolɛ nu bɛmaanle ye anwosesebɛ mɔɔ ɔhyia nwo kpole la. Baebolo ne ka kɛ: “Awulae ragyinlanle ɔ nwo ɛkɛ na ɔhanle kɛ: ‘Nyia akɛnrasesebɛ! Na kɛ mɔɔ wɔli me nwo daselɛ bɔkɔɔ wɔ Gyɛlusalɛm la, zɔhane ala a ɔwɔ kɛ ɛdi me nwo daselɛ wɔ Wulomu a.’” (Gyi. 23:11) Edwɛkɛ mɔɔ maa anwosesebɛ mɔɔ Gyisɛse hanle la maanle Pɔɔlo nyianle anwodozo kɛ bɛbalie ye. Ɛnee ɔze kɛ bɛbabɔ ɔ nwo bane too yeahɔdwu Wulomu na yeanyia adenle yeali Gyisɛse anwo daselɛ wɔ ɛkɛ ne.

⁵ Anwosesebɛmaanlɛ mɔɔ Pɔɔlo nyianle la le ye mekɛ nu ɛdeɛ. Ye alehyenlɛ nu, Dwuu mrenyia mɔɔ bo 40 la “bɔle adwenle ɛtane na bɛlile amonle kɛ bɛnrɛli yɛɛ bɛnrɛnlo kɔkpula kɛ bɛbahu Pɔɔlo.” Dwuuma mɔɔ ‘bɔle adwenle ɛtane ɛhye na bɛhanle ndane ne’ la maa yɛnwu kɛ ɛnee bɛkulo kɛ bɛku Pɔɔlo. Ɛnee bɛdie bɛdi kɛ saa bɛanyɛ mɔɔ bɛha la a ɔbayɛ amowa anzɛɛ munzule yeamaa bɛ. (Gyi. 23:12-15) Kpɔkɛ mɔɔ bɛbɔle, mɔɔ ɛsɔfo mgbanyinli ne mɔ nee mgbanyima ne mɔ liele dole nu la a le kɛ, bɛfa Pɔɔlo bɛarɛlɛ Sanhedelin ne kɛ asɛɛ bɛbizebiza ye edwɛkɛ ne anu kpalɛ la. Noko ɛnee menli bie zia adenle nu mɔɔ bɛbahu Pɔɔlo a.

6. Kɛ ɔyɛle mɔɔ adwenle mɔɔ bɛbɔle kɛ bɛku Pɔɔlo la anyɛ boɛ ɛ, na kɛzi edwɛkɛ ɛhye le neazo kpalɛ maa mgbavolɛ nee mbɛlɛra ɛ?

⁶ Noko Pɔɔlo awozoa ne dele kpɔkɛ mɔɔ bɛbɔle la, na ɔbɔle Pɔɔlo amaneɛ. Pɔɔlo noko maanle kpavolɛ ne hɔhanle edwɛkɛ ne hilele Wulomu sogya kpanyinli Kolɔdeɛse Lesease. (Gyi. 23:16-22) Nɔhalɛ nu, Gyihova kulo mgbavolɛ nee mbɛlɛra mɔɔ le kɛ Pɔɔlo awozoa ne mɔɔ bɛambɔ ye duma, mɔɔ da akɛnrasesebɛ ali na bɛfa Nyamenle menli ne boɛyɛlɛ bɛdimoa bɛ ɛdeɛ nyunlu, na bɛbɔ mɔdenle bɛboa Belemgbunlililɛ gyima ne la edwɛkɛ.

7, 8. Ngyehyɛleɛ boni a Kolɔdeɛse Lesease yɛle vale bɔle Pɔɔlo anwo bane a?

⁷ Mɔɔ bɛhanle kpɔkɛ mɔɔ bɛbɔ bɛtia Pɔɔlo bɛhilele Kolɔdeɛse Lesease mɔɔ nea sogyama 1,000 anwo zo la, ndɛndɛ ne ala ɔyɛle ngyehyɛleɛ ɔmaanle sinzavolɛma 470​—sogyama, sogyama mɔɔ to atwɛ yɛɛ sogyama mɔɔ tɛnla mgbɔnwɔ zo​—zieziele bɛ nwo na bɛ nee Pɔɔlo hɔle Sizalia wɔ zɔhane nɔe ne anzodwolɛ nu. Saa bɛdwu ɛkɛ a, ɔwɔ kɛ bɛfa ye bɛkɔmaa Amɛnlado Filese. a Ɛnee Dwuuma bie mɔ de Sizalia mɔɔ le Wulomu maanzinli ne suakpole la azo ɛdeɛ, noko ɛnee maanle maanle ne anu amra dɔɔnwo wɔ ɛkɛ. Ɛnee anzodwolɛ wɔ ɛkɛ ɔluakɛ ɛnee ɔnle kɛ Gyɛlusalɛm mɔɔ menli dɔɔnwo dwazo tia ɛzonlenlɛ gyɛne na bɛyɛ basabasa la. Ɛnee eza Wulomu sogyama mɔɔ bɛwɔ Dwudiya la ɔfese kpole ne wɔ Sizalia.

⁸ Kɛ mɔɔ Wulomuma mɛla kile la, Lesease hɛlɛle kɛlata hɔmaanle Filese  ɔvale ɔhilele edwɛkɛ ne anu ɔhilele ye. Lesease hanle kɛ mɔɔ ɔnwunle kɛ Pɔɔlo le Wulomunli la, ɔliele ye ɔvile Dwuuma mɔɔ kulo kɛ “bɛku ye” la asa anu. Lesease eza hanle kɛ “[yeannwu] debie biala mɔɔ maa ɔfɛta ewule anzɛɛ efiadedolɛ” a, noko kɛmɔ bɛbɔ Pɔɔlo anwo kpɔkɛ kɛ bɛku ye la ati, ɔlɛfa ye yearɛlɛ Filese amaa yeadie menli mɔɔ dole ye ɛzonle ne la edwɛkɛ na yeabua nwolɛ ndɛne.​—Gyi. 23:25-30.

9. (a) Kɛzi bɛtietiale fanwodi mɔɔ Pɔɔlo lɛ kɛ Wulomunli la azo ɛ? (b) Duzu ati a yɛbahola yɛahile kɛ yɛle maanlema amaa yɛanyia banebɔlɛ a?

⁹ Asoo mɔɔ Lesease hɛlɛle la amuala le nɔhalɛ? Kyɛkyɛ. Ɔbayɛ kɛ ɛnee ɔkpondɛ kɛ ɔdie anyunlunyia. Tɛ kɛ ɔnwunle kɛ ɛzoanvolɛ Pɔɔlo le Wulomunli la ati a ɔliele ye a. Eza Lesease ambɔ zo kɛ ɔmaanle bɛvale “kyeenyi nwiɔ bɛguale” Pɔɔlo yɛɛ nzinlii ɔhanle kɛ “bɛbo ye na bɛbizebiza ye edwɛkɛ.” (Gyi. 21:30-34; 22:24-29) Ɔti Lesease nee Pɔɔlo anli ye kɛ Wulomunli la. Ɛnɛ noko Seetan dua menli mɔɔ yɛ kyengye wɔ bɛ ɛzonlenlɛ nwo la anwo zo ɔmaa bɛyɛ yɛ kpɔdekpɔde na bɛtietia yɛ fanwodi mɔɔ yɛlɛ la azo. Noko, Nyamenle menli bahola ahile kɛ bɛle maanlema amaa mɛla mɔɔ wɔ ɛkɛ ne la abɔ bɛ nwo bane kɛ mɔɔ Pɔɔlo yɛle la.

10. Ɛzonle kpole boni mɔ a bɛdole Pɔɔlo a?

¹⁰ Mɔɔ Pɔɔlo wɔ Sizalia la, ‘bɛvale ye bɛhɔdole efiade wɔ Hɛlɔdo belemgbunli sua nu ɛkɛ’ ne kɛ bɛkendɛ bɛamaa menli mɔɔ dole ye ɛzonle ne la vi Gyɛlusalɛm ara. (Gyi. 23:35) Kenle nnu anzi, Ɛsɔfo Kpanyinli Ananayase nee lɔya bie mɔɔ bɛfɛlɛ ye Tɛtɛlɛse yɛɛ mgbanyima bie mɔ rale. Tɛtɛlɛse limoale hanvole Filese wɔ mɔɔ ɔlɛyɛ yeamaa Dwuuma la anwo, bie a ɔhanle ɛhye amaa Filese ati anu ayɛ ye fɛ na yeanyia ɔ nyunlu ɛlolɛ. b Akee Tɛtɛlɛse hɔle edwɛkɛ ne azo na ɔhanle kɛ Pɔɔlo le “agyegyeamra, na ɔmaa Dwuuma mɔɔ wɔ azɛlɛ ye azo amuala la te atua, yɛɛ ɔli Nazalɛtema eku ne anyunlu. Eza ɔbɔle mɔdenle kɛ ɔgua ɛzonlenlɛsua ne anwo evinli, yemɔti yɛhyele ye.” Dwuuma mɔɔ ɛha la “noko bɔle ye somolɛ kɛ ɛhye mɔ amuala le nɔhalɛ.” (Gyi. 24:5, 6, 9) Ɛzonle mɔɔ bɛdole ye kɛ, ɔlɛmaa menli ne ade atua, ɔli eku bie mɔɔ anwo yɛ ɛzulolɛ la ati yɛɛ yegua ɛzonlenlɛsua ne anwo evinli la le anyebolo edwɛkɛ mɔɔ maa bɛkola bɛbua ye ewule fɔlɛ a.

11, 12. Kɛzi Pɔɔlo bɔle ɛzonle mɔɔ bɛdole ye la guale ɛ?

¹¹ Akee bɛmaanle Pɔɔlo adenle kɛ ɔdendɛ. Ɔbɔle ɔ bo kɛ: “Ɔyɛ me fɛ kɛ mekɛ me edwɛkɛ” la. Ɔbɔle somolɛ ne mɔ ɔguale. Ɛnee Pɔɔlo ɛtɛguale ɛzonlenlɛsua  ne anwo evinli yɛɛ ɔtɛmaanle menli ne ɛtɛtele atua. Ɔhanle kɛ ɔvile Gyɛlusalɛm la, ‘ɛvolɛ dɔɔnwo ɛpɛ nu’ yɛɛ ɔvale “ahyɛlɛdeɛ” a ɔrale a​—ndoboa mɔɔ bɛfa bɛamaa Kilisienema mɔɔ bɛlɛdi ehyia ɔlua ɛhɔne nee kpɔdekpɔdeyɛlɛ ne ati la. Pɔɔlo zile zo kɛ kolaa na yeawolo ɛzonlenlɛsua ne anu la, ɛnee ‘yemaa ɔ nwo ɛde’ yɛɛ yebɔ mɔdenle kɛ ɔbanyia adwenle mɔɔ anu te la “wɔ Nyamenle nee menli nyunlu.”​—Gyi. 24:10-13, 16-18.

¹² Noko Pɔɔlo liele dole nu kɛ “adenle ne mɔɔ bɛmɛ bɛfɛlɛ ye eku la azo a” ɔlɛdua yeava ɛzonlenlɛ nwuanzanwuanza yeamaa ye nenyia mɔ Nyamenle ne a. Noko ɔhanle kɛ ɔdie “ninyɛne mɔɔ wɔ Mɛla ne anu nee mɔɔ Ngapezoma ne hɛlɛle la amuala” ɔdi. Na ɔlɛ anyelazo kɛ “bɛbadwazo tenlenema nee bɛdabɛ mɔɔ bɛnle tenlenema la bɛavi ewule nu” kɛ mɔɔ menli mɔɔ bɔle ye somolɛ ne noko lɛ la. Akee Pɔɔlo hanle kɛ bɛva ɛzonledolɛ ne anwo daselɛ bɛrɛla: “Maa mrenyia mɔɔ wɔ ɛke la ɛha ɛtane mɔɔ menyɛle wɔ mekɛ mɔɔ ɛnee megyi Sanhedelin ne anyunlu la, edwɛkɛ kokye ɛhye a mendeanle nu menganle wɔ mekɛ mɔɔ ɛnee megyi bɛ avinli la kɛ: ‘Kɛmɔ medie medi kɛ bɛbadwazo mowuamra la ati a bɛlɛbua me ndɛne ɛnɛ wɔ ɛ nyunlu a!’”​—Gyi. 24:14, 15, 20, 21.

13-15. Duzu ati a kɛzi Pɔɔlo lile tumivolɛma ne daselɛ la le neazo kpalɛ maa yɛ a?

¹³ Saa yɛ nɔhalɛ ɛzonlenlɛ ti bɛfa yɛ bɛkɔ tumivolɛma anyunlu a, Pɔɔlo yɛle neazo kɛnlɛma maanle yɛ mɔɔ ɔwɔ kɛ yɛdi ɔ nzi a. Bie a bɛbado yɛ ɛzonle kɛ yɛmaa menli yɛ basabasa, yɛdwazo yɛtia arane anzɛɛ yɛboka “eku bie mɔɔ anwo yɛ ɛzulolɛ” la anwo. Pɔɔlo anga mɛlɛbɛla edwɛkɛ kɛ Tɛtɛlɛse la anva amkpondɛ amɛnlado ne anyunlu ɛlolɛ. Pɔɔlo ziele ɔ nwo dii yɛɛ ɔbule ye. Ɔvale nrɛlɛbɛ ɔlile gyima na ɔlile daselɛ kɛnlɛma mɔɔ anu la ɛkɛ  la. Pɔɔlo hanle kɛ “Dwuuma bie mɔɔ bɛvi Ehyea maanzinli nu” mɔɔ dole ye ɛzonle kɛ yegua ɛzonlenlɛsua ne anwo evinli la ɛnle ɛkɛ na mɛla ne kile kɛ ɔwɔ kɛ bɛba na ɔtie mɔɔ bɛlɛ bɛka la.​—Gyi. 24:18, 19.

¹⁴ Pɔɔlo anzulo kɛ ɔbali ye diedi ne anwo daselɛ. Pɔɔlo vale akɛnrazilɛ hanle diedi mɔɔ ɔlɛ wɔ ewudwazo ne anu la anwo edwɛkɛ bieko, ɛhye a vale mgbonde rale wɔ mekɛ mɔɔ ɔgyi Sanhedelin ne anyunlu la. (Gyi. 23:6-10) Mekɛ mɔɔ Pɔɔlo ɛlɛkilehile ye edwɛkɛ ne anu la, ɔzile ewudwazo anyelazo ne azo. Duzu ati ɔ? Ɔluakɛ ɛnee Pɔɔlo ɛlɛdi Gyisɛse nee ye ewudwazo ne anwo daselɛ na ɛnee dwazotiama ne ɛnlie ɛndo nu. (Gyi. 26:6-8, 22, 23) Nɔhalɛ nu, ewudwazo ne​—Gyisɛse anu diedi nee ye ewudwazo ne titili​—a ɛva kpolerazulɛ ne ɛra a.

¹⁵ Yɛbahola yɛava akɛnrazilɛ yɛali daselɛ kɛ Pɔɔlo la yɛɛ yɛbahola yɛanyia anwosesebɛ yeavi edwɛkɛ mɔɔ Gyisɛse hanle hilele ye ɛdoavolɛma la anu: “Me duma ne ati, menli kɔsɔɔti bakpɔ bɛ. Noko mɔɔ kɛgyinla nu kɛhɔ awieleɛ la bɛbalie ye ngoane.” Ɔwɔ kɛ yɛdwenle mɔɔ yɛbaha la anwo ɔ? Kyɛkyɛ, ɔluakɛ Gyisɛse bɔle yɛ ɛwɔkɛ kɛ: “Saa bɛ nee bɛ ɛlɛkɔ bɛahɔye bɛ bɛamaa a, bɛmmadwenledwenle mɔɔ bɛbaha la anwo; na mɔɔ bɛbava bɛamaa bɛ wɔ dɔnehwele zɔhane anu la, bɛha yemɔ ala, ɔluakɛ tɛ bɛmɛ a bɛbadendɛ a, emomu sunsum nwuanzanwuanza ne.”​—Maake 13:9-13.

16, 17. (a) Kɛzi Filese lile Pɔɔlo edwɛkɛ ne ɛ? (b) Duzu ati a ɔbayɛ kɛ ɛzulolɛ hanle Filese a, noko kɛmɔti a ɔhɔle zo ɔnwunle Pɔɔlo ɛ?

¹⁶ Ɛnee tɛ ɛhye a le mekɛ mɔɔ limoa mɔɔ Amɛnlado Filese ɛde Kilisienema diedi ne anwo edwɛkɛ a. Kɛlɛtokɛ ne ka kɛ: “Filese ze Adenle ɛhye [duma mɔɔ ɛnee bɛfa bɛfɛlɛ alimoa Kilisienema la] anwo edwɛkɛ kpalɛ la ati, ɔdule edwɛkɛ ne ɔziele na ɔhanle kɛ: ‘Mekɛ biala mɔɔ sogya kpanyinli Lesease kɛra la, mebazi bɛ edwɛkɛ ɛhye anwo kpɔkɛ.’ Na ɔhanle ɔhilele sogya kpanyinli ne kɛ ɔva nrenyia ne ɔhɔdo efiade noko anrɛɛ ɔmaa ɔnyia fanwodi ekyi, na ɔmaa ɔ gɔnwo mɔ adenle bɛboa ye.”​—Gyi. 24:22, 23.

¹⁷ Mekɛ bie anzi, Filese nee ɔ ye Dulusela mɔɔ le Dwuunli la rale na ɔmaanle bɛhɔvɛlɛle Pɔɔlo kɛ “ɔraha Kelaese Gyisɛse anu diedi nwo edwɛkɛ ɔmaa ɔdie.” (Gyi. 24:24) Noko mɔɔ Pɔɔlo hanle “tenleneyɛlɛ nee bɛ nwo zo ɛhomonlɛ nee ndɛnebualɛ mɔɔ bara la anwo edwɛkɛ la, ɛzulolɛ hanle Filese,” ɔbayɛ kɛ ye adwenle gyegyele ye ɔlua ninyɛndane mɔɔ ɛnee ɔlɛyɛ la ati. Ɔti ɔmaanle bɛvale Pɔɔlo bɛhɔle na ɔhanle kɛ: “Wɔmɔ kɔ, na saa menyia adenle a mebazoa meamaa bɛaravɛlɛ wɔ bieko.” Filese hɔle zo nwunle Pɔɔlo fane dɔɔnwo, tɛ kɛ ɛnee ɔkpondɛ kɛ ɔsukoa nɔhalɛ ne, emomu ɛnee ɔ nye la kɛ Pɔɔlo bamaa ye belaebo.​—Gyi. 24:25, 26.

18. Duzu ati a Pɔɔlo hanle “tenleneyɛlɛ nee bɛ nwo zo ɛhomonlɛ nee ndɛnebualɛ mɔɔ bara la anwo edwɛkɛ” hilele Filese nee ɔ ye a?

 ¹⁸ Duzu ati a Pɔɔlo hanle “tenleneyɛlɛ nee bɛ nwo zo ɛhomonlɛ nee ndɛnebualɛ mɔɔ bara la anwo edwɛkɛ” hilele Filese nee ɔ ye a? Kakye kɛ ɛnee bɛkpondɛ kɛ bɛnwu mɔɔ kile kɛ awie lɛ “Kelaese Gyisɛse anu diedi” la. Ɛnee Pɔɔlo ze kɛ bɛmbɔ ɛbɛla kpalɛ, bɛ ti yɛ se yɛɛ bɛle nzisi na ɛnee ɔkpondɛ kɛ bɛnwu mɔɔ ɔwɔ kɛ Gyisɛse ɛdoavolɛma yɛ la wienyi. Mɔɔ Pɔɔlo hanle la maanle Filese nee ɔ ye nwunle kɛ ngakyile kpole wɔ Nyamenle tenlene ngyinlazo ne mɔ nee ɛbɛla mɔɔ bɛlɛbɔ la avinli. Anrɛɛ ɔwɔ kɛ ɛhye boa bɛ maa bɛnwu kɛ alesama kɔsɔɔti babu mɔɔ bɛdwenle nwo, mɔɔ bɛka nee mɔɔ bɛyɛ la anwo mgbonda bɛahile Nyamenle. Na Nyamenle ndɛnebualɛ ne hyia kpalɛ tɛla ndɛne mɔɔ bɛbabua Pɔɔlo la. Ɔnyɛ nwanwane kɛ “ɛzulolɛ hanle Filese” la!

19, 20. (a) Saa yɛkɔ daselɛlilɛ na yɛyia menli mɔɔ yɛ bɛ nwo kɛ bɛ nye die nɔhalɛ ne anwo noko bɛlɛbɔ ɛbɛla mɔɔ bɛkulo la a duzu a ɔwɔ kɛ yɛyɛ a? (b) Kɛzi yɛkola yɛnwu kɛ ɛnee tɛ Filese agɔnwo a le Pɔɔlo ɛ?

¹⁹ Bie a yɛbayia menli mɔɔ bɛle kɛ Filese la wɔ daselɛlilɛ nu. Bie a mɔlebɛbo ne, bɛbayɛ kɛ bɛ nye die nɔhalɛ ne anwo, noko bɛkulo mɔɔ bɛlɛyɛ la ala. Ɔwɔ kɛ yɛnea boɛ wɔ mekɛ mɔɔ yɛlɛboa menli zɛhae mɔ la. Noko, yɛmaa bɛnwu Nyamenle tenlene ngyinlazo ne mɔ kɛ mɔɔ Pɔɔlo yɛle la. Bie a nɔhalɛ ne baha bɛ ahonle. Noko, saa yɛnwu kɛ bɛtɛyɛle bɛ adwenle kɛ bɛgyakyi bɛ nyɛleɛ ɛtane ne a, yɛgyakyi bɛ na yɛkɔkpondɛ bɛdabɛ mɔɔ bɛkulo kɛ bɛnwu nɔhalɛ ne la.

²⁰ Yɛnwu mɔɔ wɔ Filese ahonle nu la wɔ edwɛkɛ ɛhye anu: “Mɔɔ ɛvolɛ nwiɔ pɛle nu la, Pɔseɛse Fɛsetɛse ralile Filese agyakɛ anu; na kɛmɔ ɛnee Filese kpondɛ kɛ ɔnyia Dwuuma anyunlu ɛlolɛ la ati, ɔgyakyile Pɔɔlo wɔ efiade ne.” (Gyi. 24:27) Ɛnee tɛ Filese agɔnwo a le Pɔɔlo. Ɛnee Filese ze kɛ menli mɔɔ li “Adenle Ne” anzi la ɛnle maamɔvoma yɛɛ bɛnde atua. (Gyi. 19:23) Eza ɔze kɛ Pɔɔlo ɛtɛtonle Wulomuma mɛla biala. Noko kɛmɔ Filese kpondɛ kɛ “ɔnyia Dwuuma anyunlu ɛlolɛ” la ati, ɔgyakyile Pɔɔlo wɔ efiade ne.

21. Mɔɔ Pɔseɛse Fɛsetɛse rayɛle amɛnlado la, duzu a dole Pɔɔlo a, na duzu a ɔbayɛ kɛ hɔle zo maanle Pɔɔlo anwosesebɛ a?

²¹ Kɛ mɔɔ yɛnwu ye wɔ ngyɛnu mɔɔ li awieleɛ wɔ Gyima ne tile 24 anu la, mekɛ mɔɔ Pɔseɛse Fɛsetɛse ralile Filese agyakɛ anu la ɛnee Pɔɔlo tɛda efiade. Ɔti bɛbɔle ɔ bo kɛ bɛdi Pɔɔlo edwɛkɛ na ɔhɔle tumivolɛma dɔɔnwo anyunlu. Nɔhalɛ nu, ɛzoanvolɛ ɛhye mɔɔ lɛ akɛnrasesebɛ la ‘hɔle arelemgbunli nee amɛnladoma anyunlu.’ (Luku 21:12) Kɛ mɔɔ yɛbanwu ye la, nzinlii ɔlile tumivolɛ kpole mɔɔ ɛnee wɔ ye mekɛ zo la daselɛ. Wɔ ɔ muala anu, Pɔɔlo diedi ne anga aze. Yɛdie yɛdi kɛ ɔnyianle anwosesebɛ wɔ Gyisɛse edwɛkɛ ɛhye anu: “Nyia akɛnrasesebɛ!”