1-6. Ka anwubielɛ mɔɔ kile kɛ Alasevolɛ ne mɔ ɛlɛka edwɛkɛ ne wɔ tɛnlabelɛ ngakyile nu la.

 REBECCA, Dasevolɛ kakula bie mɔɔ wɔ Ghana la vale ye sukulu ɛkɛ ne yɛle ye azɛlɛsinli mɔɔ ɔdi daselɛ wɔ ɛkɛ a. Ɛnee dahuu ɔfa yɛ mbuluku ne mɔ bie ɔgua ye sukulu baage ne anu. Saa bɛlɛdie bɛ menle a, ɔkpondɛ ndenle ɔdua zo ɔdi ɔ gɔnwo mɔ sukuluma daselɛ. Rebecca nee ɔ gɔnwo mɔ dɔɔnwo bɔle Baebolo ɛzukoalɛ bo.

² Wɔ Madagascar bɔra ne mɔɔ wɔ Africa nyiakɛ nehane la azo, ɛnee adekpakyelɛma nwiɔ dua ewia nu pɛ adenle mayɛlɛ 15 kɔ namule bie mɔɔ te ɔ nwo la azo. Ɛnee bɛ nee menli dɔɔnwo mɔɔ anye die nɔhalɛ ne anwo la sukoa Baebolo ne wɔ ɛkɛ.

³ Amaa bɛahola bɛali menli mɔɔ de Paraguay nee Paraná azule ne anloa daselɛ la, Alasevolɛ mɔɔ wɔ Paraguay la nee menli 15 mɔɔ vi maanle ngakyile zo la dule bɛ nwo maanle na bɛbobɔle ɛlɛne. Ɛlɛne kpole ne kola fa menli 12. Ɛlɛne ɛhye mɔɔ bɛkola bɛda nu la boale Belemgbunlililɛ nolobɔlɛma mɔɔ bɔ mɔdenle la maanle bɛholale bɛhanle edwɛkpa ne wɔ ɛleka mɔɔ ɛkɛ ne ɛhɔlɛ yɛ se la.

⁴ Alasevolɛ mɔɔ bɛwɔ Alaska la vale nwolɛ adenle lile menli mɔɔ baneɛnlea ɛkɛ ne wɔ wuluwulu mekɛ nu la daselɛ. Ɛnee saa ɔdwu wuluwulu mekɛ nu na nyɛvolɛ mɔɔ vi maanle ngakyile zo la fa meli ba ɛkɛ a, Alasevolɛ mɔɔ wɔ sua ne azo la fa Baebolo mbuluku mɔɔ wɔ aneɛ ngakyile nu la maa wɔ meli agyinlaleɛ ɛkɛ ne. Wɔ zɔhane ɛleka ne ala, alopile boa bɛ maa bɛbɔ edwɛkpa ne nolo wɔ namunamu mɔɔ te ɔ nwo la azo, ɛhye ɛmaa bɛbɔ edwɛkpa ne nolo wɔ Aleut, Athabascan, Tsimshian nee Tlingit azua ne mɔ azo.

⁵ Ɛnee Larry mɔɔ de Texas mɔɔ wɔ U.S.A. la lɛ azɛlɛsinli titili bie​—ɛnee ɔde ɛleka mɔɔ bɛnea menli mɔɔ ɛyɛ mgbanyinli la. Ɔnva nwo kɛ esiane ti Larry de ehwili nu la, ɛnee ɔbɔ ɔ nwo mɔdenle. Ɛnee ɔka Belemgbunlililɛ edwɛkpa ne, mɔɔ bie a le anyelazo mɔɔ ɔlɛ kɛ wɔ Nyamenle Belemgbunlililɛ ne anu ɔbadia bieko la anwo edwɛkɛ ɔkile menli mɔɔ wɔ ɛkɛ ne la.​—Aye. 35:5, 6.

⁶ Amaa Alasevolɛ mɔɔ wɔ Mandalay ahola ahɔ nyianu wɔ Myanmar sɔlɔ la, bɛvale ɛlɛne bɛpɛle kenle nsa adenle. Kɛmɔ bɛlɛ ɛhulolɛ kɛ bɛbabɔ  edwɛkpa ne nolo la ati, ɛnee bɛfa yɛ mbuluku ne mɔ bie bɛsia bɛ nwo na bɛava bɛamaa menli gyɛne mɔɔ ɛlɛtu adenle la. Saa ɛlɛne ne gyinla sua anzɛɛ namule bie azo a, bɛyɛ ye ndɛndɛ bɛdwu aze na bɛfa mbuluku bɛkɔmaa. Too mɔɔ Belemgbunlililɛ nolobɔlɛma ne kazia ara la ɛnee menli fofolɛ ɛvo ɛlɛne ne mɔɔ bɛbahola bɛali bɛ daselɛ a.

7. Ndenle boni mɔ a Gyihova azonvolɛ dua zo di Nyamenle Belemgbunlililɛ ne anwo daselɛ a, na bɛ bodane a le duzu?

⁷ Kɛ mɔɔ mediema mrenyia nee mraalɛ mɔɔ bɛha bɛ nwo edwɛkɛ la neazo ekyi ne kile la, Gyihova azonvolɛ mɔɔ bɔ mɔdenle la “[ɛlɛdi] Nyamenle Belemgbunlililɛ ne anwo daselɛ bɔkɔɔ” wɔ ewiade amuala. (Gyi. 28:23) Bɛkɔ menli azua nu, bɛ nee bɛ tendɛ wɔ gua zo, bɛkɛlɛ bɛ kɛlata yɛɛ bɛfɛlɛ bɛ wɔ fonu zo. Saa bɛde kale nu, bɛlɛkɔ akpɔsa anzɛɛ bɛlɛdie bɛ menle wɔ gyima nu a, bɛbɔ mɔdenle bɛkpondɛ ndenle bɛdua zo bɛdi Nyamenle Belemgbunlililɛ ne anwo daselɛ. Bɛdua ndenle ngakyile zo, noko bɛlɛ bodane ko ne ala​—kɛ bɛbɔ edwɛkpa ne nolo wɔ ɛleka biala mɔɔ bɛbanwu menli ne la.​—Mat. 10:11.

8, 9. (a) Duzu ati a anyuhɔlɛ mɔɔ Belemgbunlililɛ edwɛkɛhanlɛ gyima ne ɛlɛnyia la yɛ nwanwane a? (b) Kpuya mɔɔ yɛ anyelielɛ la boni a yɛbazuzu nwo a, na kɛ ɔkɛyɛ na yɛanyia nwolɛ mualɛ ɛ?

⁸ Kengavolɛ, ɛboka Belemgbunlililɛ nolobɔlɛma apenle dɔɔnwo mɔɔ ɛlɛka edwɛkɛ ne wɔ maanle mɔɔ bo 235 azo la anwo ɔ? Saa ɔle zɔ a, ɛnee ɛboka nwo bie a Belemgbunlililɛ edwɛkɛhanlɛ gyima ne ɛlɛnyia anyuhɔlɛ zɔhane a! Mɔɔ yɛhola yɛyɛ wɔ ewiade amuala la yɛ nwanwane. Gyihova Alasevolɛ yia ngyegyelɛ ngakyile mɔɔ anu yɛ se​—arane ne mɔ bɔbɔ fa bɛ sa to bɛ gyima ne azo yɛɛ bɛyɛ bɛ kpɔdekpɔde ɛdeɛ​—noko bɛlɛdi Nyamenle Belemgbunlililɛ ne anwo daselɛ bɔkɔɔ bɛahile menli mɔɔ wɔ maanle maanle kɔsɔɔti anu la.

⁹ Kpuya mɔɔ yɛ anyelielɛ mɔɔ ɔwɔ kɛ yɛsuzu nwo la ɛne, Duzu ati a ngyegyelɛ biala, bɔbɔ dwazotia mɔɔ vi Seetan ɛkɛ ne la ɛtɛkolale ɛtɛsile Belemgbunlililɛ edwɛkɛhanlɛ gyima ne mɔɔ ɛlɛnyia anyuhɔlɛ la adenle a? Amaa yɛabua kpuya zɔhane la, maa yɛnlea mɔɔ zile wɔ ɛvoya mɔɔ limoa Y.M. anu la. Ɔboalekɛ gyima mɔɔ bɛbɔle ɔ bo wɔ zɔhane mekɛ ne la a Gyihova Alasevolɛ mɔɔ wɔ ɛkɛ ne ɛnɛ la ɛlɛtoa zo a.

10. Gyima boni a Gyisɛse dule ɔ nwo maanle yɛle a, na duzu a ɛnee ɔze ye wɔ gyima ɛhye anwo a?

¹⁰ Gyisɛse mɔɔ bɔle Kilisiene asafo ne abo la dule ɔ nwo maanle bɔle Nyamenle Belemgbunlililɛ ne anwo edwɛkpa ne nolo; ɔvale ye mekɛ amuala ɔyɛle. Mekɛ bie ɔhanle kɛ: “Ɔwɔ kɛ mebɔ Nyamenle Belemgbunlililɛ ne anwo edwɛkpa ne nolo wɔ azua mɔɔ ɛha la noko azo, ɔluakɛ ɛhye ati a bɛzoanle me a.” (Luku 4:43) Ɛnee Gyisɛse ze kɛ ɔ ngomekye ɔnrɛhola ɔnrɛyɛ gyima mɔɔ ɔlɛbɔ ɔ bo la ɔnrɛwie. Ɔka ekyii ɔwu la, ɔhanle kɛ bɛbabɔ edwɛkpa ne nolo “wɔ maanle maanle kɔsɔɔti anu.” (Maake 13:10) Noko ɛnee kɛzi bɛbayɛ ye ɛ, yɛɛ nwane mɔ a bayɛ a?

11. Gyima kpole boni a Gyisɛse vale maanle ye ɛdoavolɛma a, na moalɛ boni a bɛbanyia amaa bɛahola bɛayɛ a?

 ¹¹ Mɔɔ Gyisɛse wule na ɔdwazole la, ɔyele ɔ nwo ɔhilele ye ɛdoavolɛma ne na ɔmaanle bɛ gyima kpole bie kɛ: “Yemɔti, bɛhɔ, bɛyɛ maanle maanle kɔsɔɔti anu menli me ɛdoavolɛma, bɛzɔne bɛ wɔ Selɛ ne, Ralɛ ne nee sunsum nwuanzanwuanza ne duma nu, bɛhilehile bɛ bɛmaa bɛli ninyɛne kɔsɔɔti mɔɔ meha mehile bɛ la azo. Na nea! me nee bɛ lua dahuu kɔkpula mekɛ ɛhye awieleɛ.” (Mat. 28:19, 20) Edwɛkɛ “me nee bɛ lua” maa ɔda ali kɛ Gyisɛse baboa ɛdoavolɛma ne yeamaa bɛaha edwɛkɛ ne na bɛayɛ ɛdoavolɛyɛlɛ gyima ne. Ɛnee bɛbahyia moalɛ ɛhye ɔluakɛ Gyisɛse hanle dole ɛkɛ ne kɛ “maanle maanle kɔsɔɔti bakpɔ bɛ.” (Mat. 24:9) Ɛnee ɛdoavolɛma ne bahola anyia moalɛ avi ɛleka gyɛne. Kolaa na Gyisɛse ahɔ anwuma la, ɔhanle kɛ sunsum nwuanzanwuanza ne bamaa bɛ anwosesebɛ yeamaa bɛali daselɛ “bɛahɔdwu azɛlɛ ye azo ɛleka biala.”​—Gyi. 1:8.

12. Kpuya mɔɔ anwo hyia la boni mɔ a ɔwɔ kɛ yɛbiza a, na duzu ati a ɔwɔ kɛ yɛnyia nwolɛ mualɛ a?

¹² Akee ɔwɔ kɛ yɛbiza kpuya bie mɔ mɔɔ anwo hyia la: Asoo Gyisɛse ɛzoanvolɛma nee ɛvoya mɔɔ limoa la anu Kilisienema gyɛne vale bɛ gyima ne anyebolo zo ɔ? Asoo Kilisienema ekpunli ekyi ɛhye holale lile Nyamenle Belemgbunlililɛ ne anwo daselɛ bɔkɔɔ wɔ mekɛ mɔɔ bɛyiale kpɔdekpɔdeyɛlɛ mɔɔ anu yɛ se la? Asoo amgba Gyihova gyinlanle bɛ nzi na ɔvale ye sunsum nwuanzanwuanza ne ɔboale bɛ wɔ ɛdoavolɛyɛlɛ gyima ne anu ɔ? Bɛbua kpuya ɛhye mɔ nee gyɛne wɔ Ɛzoanvolɛma Gyima buluku ne anu. Ɔhyia kɛ yɛnwu mualɛ ne mɔ. Duzu ati ɔ? Gyisɛse bɔle ɛwɔkɛ kɛ bɛbadoa gyima mɔɔ ɔbɔle ɔ bo la azo bɛahɔdwu “mekɛ ɛhye awieleɛ.” Ɔti ɔle nɔhalɛ Kilisienema kɔsɔɔti yɛɛ yɛdayɛ mɔɔ yɛde awieleɛ mekɛ ɛhye anu la gyima. Ɛhye ati yɛ nye die nwo kɛ yɛbanwu tetedwɛkɛ mɔɔ bɛyɛ nwolɛ kɛlɛtokɛ wɔ Gyima buluku ne anu la.

13, 14. (a) Nwane a hɛlɛle Gyima buluku ne a, na ɔnyianle ye edwɛkɛ ne ɔvile ni? (b) Duzu a Gyima ne ka nwolɛ edwɛkɛ a?

¹³ Nwane a hɛlɛle Gyima buluku ne a? Bɛambɔ ahenle mɔɔ hɛlɛle buluku ne la duma wɔ nu, noko edwɛkɛ mɔɔ ɔvale ɔbɔle ɔ bo la maa ɔda ali kɛ ahenle mɔɔ hɛlɛle Luku Edwɛkpa ne la a hɛlɛle a. (Luku 1:1-4; Gyi. 1:1, 2) Ɔti ɔvi mɔlebɛbo ne ala, menli ɛlie ɛdo nu kɛ Luku, mɔɔ le “ayileyɛvolɛ kulovolɛ” nee tetedwɛkɛ kɛlɛvolɛ la a hɛlɛle Gyima ne a. (Kɔl. 4:14) Buluku ne ka ninyɛne mɔɔ sisile wɔ ɛvolɛ 28 anu la anwo edwɛkɛ, ɔvi mekɛ mɔɔ Gyisɛse hɔle anwuma wɔ 33 Y.M. kɔdwu kɛyɛ 61 Y.M. mɔɔ bɛdole Pɔɔlo efiade wɔ Wulomu la. Kɛzi Luku kakyi edwɛkɛ ne fi “bɛ” ɔyɛ ye “yɛ” la kile kɛ ɛnee ɔwɔ ɛkɛ ne bie a edwɛkɛ ne anu dɔɔnwo sisile a. (Gyi. 16:8-10; 20:5; 27:1) Ɔda ali kɛ Luku mɔɔ yɛ neɛnleanu kpalɛ la nyianle ye edwɛkɛ ne dɔɔnwo vile Pɔɔlo, Baanabase, Felepe nee menli gyɛne mɔɔ ɔbobɔle bɛ aluma la ɛkɛ.

¹⁴ Duzu a Gyima ne ka nwolɛ edwɛkɛ a? Luku limoale hɛlɛle mɔɔ Gyisɛse hanle  nee mɔɔ ɔyɛle la anwo edwɛkɛ wɔ ye Edwɛkpa ne anu. Noko wɔ Gyima ne anu, Luku hɛlɛle mɔɔ Gyisɛse ɛdoavolɛma hanle nee mɔɔ bɛyɛle la anwo edwɛkɛ. Ɔti, Gyima ne ka menli mɔɔ yɛle gyima ɛsesebɛ ɔnva nwo kɛ ɛnee menli bu bɛ kɛ “bɛnze nwoma yɛɛ bɛnlɛ dibilɛ” la anwo edwɛkɛ. (Gyi. 4:13) Ye sikalɛ nu, edwɛkɛ mɔɔ sunsum ne hanle Luku maanle ɔhɛlɛle la fale kɛzi Kilisiene asafo ne bɔle ɔ bo nee kɛzi ɔnyinle la anwo. Gyima ne maa yɛnwu kɛzi ɛvoya mɔɔ limoa Kilisienema hanle edwɛkɛ ne la​—ndenle mɔɔ bɛluale zo bɛhanle nee bɛ subane mɔɔ bɛlale ye ali la. (Gyi. 4:31; 5:42) Ɔsi kɛzi sunsum nwuanzanwuanza ne boale bɛ maanle bɛbɔle edwɛkpa ne nolo la azo. (Gyi. 8:29, 39, 40; 13:1-3; 16:6; 18:24, 25) Gyima ne si Baebolo ne anu edwɛkɛ titili ne, mɔɔ le Nyamenle duma ne mɔɔ ɔbalua Belemgbunlililɛ ne mɔɔ Kelaese bali zolɛ tumi la azo yeade nwolɛ la azo, na ɔmaa yɛnwu kɛzi bɛbɔle Belemgbunlililɛ edwɛkɛ ne nolo ɔnva dwazotia mɔɔ anu yɛ se la.​—Gyi. 8:12; 19:8; 28:30, 31.

15. Yɛneɛnlea Gyima buluku ne anu a kɛzi ɔbaboa yɛ ɛ?

¹⁵ Nɔhalɛ nu, saa yɛneɛnlea Gyima buluku ne anu a ɔbamaa ye nye alie na yɛ diedi nu amia! Saa yɛsuzu Kelaese ɛdoavolɛma akɛnrazilɛ nee bɛ mɔdenlebɔlɛ ne anwo a, ɔbaha yɛ ahonle kpalɛ. Ɔbamaa yɛazukoa diedi mɔɔ yɛ mediema mɔɔ wɔ ɛvoya mɔɔ limoa la anu lale ye ali la. Ɔbamaa yɛaziezie yɛ nwo na yɛawie yɛ gyima mɔɔ bɛva bɛmaa yɛ kɛ ‘yɛhɔ, yɛyɛ menli ɛdoavolɛma’ la. Bɛziezie buluku ɛhye mɔɔ ɛlɛkenga la kɛ ɔboa wɔ ɔmaa ɛzukoa Gyima buluku ne kpalɛ.

16. Bodane nsa mɔɔ ɔti bɛyɛle buluku ɛhye la a le boni mɔ?

¹⁶ Bodane titili boni ati a bɛyɛle buluku ɛhye a? Bodane nsa mɔɔ ɔti bɛyɛle buluku ɛhye la a le kɛ (1) ɔmaa yɛnyia anwodozo kpole kɛ Gyihova a ɛlɛdua sunsum nwuanzanwuanza ne azo yeamaa yɛayɛ edwɛkɛhanlɛ gyima ne a, (2) ɔmaa yɛnlea neazo mɔɔ Kelaese alimoa ɛdoavolɛma yɛle la amaa yɛava mɔdenlebɔlɛ yɛayɛ yɛ ɛzonlenlɛ gyima ne, yɛɛ (3) ɔmaa ɛbulɛ mɔɔ yɛlɛ yɛmaa Gyihova ahyehyɛdeɛ ne nee menli mɔɔ li edwɛkɛhanlɛ gyima ne nee asafo ne anyunlu la ɛyɛ kpole.

17, 18. Kɛzi bɛhyehyɛ buluku ɛhye anu ɛ, na ninyɛne boni mɔ a wɔ nu mɔɔ ɛlɛfa wɔayɛ ɛ ti anwo debiezukoalɛ a ɔbaboa wɔ a?

¹⁷ Kɛzi bɛhyehyɛ buluku ɛhye anu ɛ? Ɛbanwu kɛ ɔle foa mɔtwɛ, foa ko biala ka Gyima buluku ne foa bie anwo edwɛkɛ. Adile mɔɔ doa zo la ɛnga Gyima ne anu ngyehyɛnu ne mɔ anwo edwɛkɛ nidizo, emomu ɔmaa yɛnwu ɛzukoalɛdeɛ mɔɔ wɔ edwɛkɛ mɔɔ bɛyɛ nwolɛ kɛlɛtokɛ wɔ foa zɔhane anu yɛɛ ɔboa yɛ ɔmaa yɛnwu kɛzi yɛbava mɔɔ yɛbazukoa la yɛayɛ gyima la. Wɔ tile ko biala mɔlebɛbo, bɛha bodane mɔɔ tile zɔhane gyi zo nee Ngɛlɛlera mɔɔ maa yɛnwu Gyima ne foa mɔɔ yɛbazuzu nwo la.

¹⁸ Ninyɛne gyɛne wɔ buluku ɛhye anu mɔɔ baboa wɔ wɔ ɛ ti anwo Baebolo ɛzukoalɛ nu a. Edwɛkɛ mɔɔ sisile wɔ Gyima buluku ne anu la anwo nvoninli  ngɛnlɛma baboa wɔ yeamaa wɔava wɔ adwenle wɔapɛ mɔɔ ɛnee ɔlɛkɔ zo la nvoninli wɔ mekɛ mɔɔ ɛlɛsuzu Baebolo ne anu edwɛkɛ ne anwo la. Ɛlɛka bie mɔ wɔ adile dɔɔnwo anu mɔɔ baboa wɔ yeamaa wɔanwu edwɛkɛ gyɛne mɔɔ fale nwo la. Nlɛka ne bie mɔ ka Baebolo nu sonla bie mɔɔ ɔfɛta kɛ ɛsukoa ye diedi la anwo edwɛkɛ. Bie mɔ noko ka ɛleka, ninyɛne, amaamuo anzɛɛ awie mɔ mɔɔ bɛha bɛ nwo edwɛkɛ wɔ Gyima ne anu la anwo edwɛkɛ dɔɔnwo.

19. Kpuya boni mɔ a mekɛ ɛlɛkɔ la ɔwɔ kɛ yɛbiza yɛ nwo a?

¹⁹ Buluku ɛhye bahola aboa wɔ yeamaa wɔabiza ɛ nwo kpuya bie mɔ. Ɔnva nwo mekɛ tendenle mɔɔ wɔva wɔbɔ Belemgbunlililɛ ne nolo la, ɔle kpalɛ kɛ mekɛ ɛlɛkɔ la ɛneɛnlea ninyɛne mɔɔ anwo hyia wɔ wɔ ɛbɛlabɔlɛ nu nee kɛzi ɛbu Kilisiene ɛzonlenlɛ gyima ne la anu. (2 Kɔl. 13:5) Biza ɛ nwo kɛ: ‘Melɛmaa me ɛzonlenlɛ gyima ne ahyia me ɔ? (1 Kɔl. 7:29-31) Asoo melɛfa anwodozo nee mɔdenlebɔlɛ meabɔ edwɛkpa ne nolo ɔ? (1 Tɛs. 1:5, 6) Asoo melɛbɔ mɔdenle biala wɔ edwɛkɛhanlɛ nee ɛdoavolɛyɛlɛ gyima ne anu ɔ?’​—Kɔl. 3:23.

20, 21. Duzu ati a yɛ gyima ne anwo hyia ndɛndɛ a, na duzu a ɔwɔ kɛ yɛbɔ kpɔkɛ kɛ yɛbayɛ a?

²⁰ Bɛmaa yɛhakye kɛ bɛmaa yɛ gyima mɔɔ anwo hyia la​—kɛ yɛha edwɛkɛ ne na yɛmaa menli ɛrayɛ ɛdoavolɛma. Aleɛ ɛlɛkye dwo la, ɛnee kɛzi gyima ɛhye anwo hyia ndɛndɛ la ɛlɛyɛ kpole. Ewiade ɛhye awieleɛ ne ɛlɛbikye ndɛndɛ. Menli dɔɔnwo ngoane la esiane nu tɛla mekɛ biala. Yɛnze menli dodo mɔɔ bɛ subane kile kɛ bɛfɛta dahuu ngoane mɔɔ bɛbadie yɛ edwɛkɛ ne a. (Gyi. 13:48) Noko ɔle yɛ gyima kɛ yɛbaboa bɛ nuhua ko biala kolaa na yeaha amozi.​—1 Tim. 4:16.

²¹ Ɔti ɔhyia kɛ yɛsukoa neazo mɔɔ Belemgbunlililɛ nolobɔlɛma mɔɔ bɔ mɔdenle la yɛle ye wɔ ɛvoya mɔɔ limoa la anu la. Ɔrɛla ye kɛ buluku ɛhye mɔɔ ɛlɛsukoa la bamaa wɔava mɔdenlebɔlɛ nee akɛnrazilɛ kpole wɔaha edwɛkɛ ne. Na ɔmaa kpɔkɛ mɔɔ wɔbɔ kɛ “[ɛbali] Nyamenle Belemgbunlililɛ ne anwo daselɛ bɔkɔɔ” la anu ɛmia.​—Gyi. 28:23.