1, 2. Nwanwane debie boni a Pita nee Dwɔn yɛle ye wɔ ɛzonlenlɛsua ne anlenkɛ kpole ne anloa a?

 EWIA ɛlɛbɔ menli dɔɔnwo ne. Dwuuma mɔɔ kulo nyamenlezonlenlɛ la nee Kelaese ɛdoavolɛma ɛlɛkɔ ɛzonlenlɛsua ne anu. Ɔnrɛhyɛ na “mekɛ mɔɔ bɛfa bɛyɛ asɔne” la adwu. a (Gyi. 2:46; 3:1) Pita nee Dwɔn boka menli dɔɔnwo ne mɔɔ ɛlɛwolo ɛzonlenlɛsua ne anlenkɛ ne mɔɔ bɛfɛlɛ ye Kɛnlɛma anu la anwo. Menli ne adawubɔlɛ nee bɛ gyakɛ abo ɛmaa dede bie ɛlɛkɔ zo yɛɛ nrenyia bie mɔɔ bɛwole ye abubura la ɛlɛsɛlɛzɛlɛ bɛdabɛ mɔɔ bɛlɛkɔ ɛzonlenlɛsua ne anu la debie.​—Gyi. 3:2; 4:22.

² Mɔɔ ɔka ekyii Pita nee Dwɔn dwu nrenyia ne mɔɔ sɛlɛzɛlɛ debie la anwo ɛkɛ ne la ɔbɔle ɔ bo kɛ ɔsɛlɛ bɛ ezukoa. Ɛzoanvolɛma ne gyinlanle, na ɛnee nrenyia ne anye la kɛ bɛbamaa ye debie. Pita hanle kɛ: “Dwɛtɛ fufule nee nvutuke, yemɔ menlɛ bie, emomu mɔɔ melɛ ye la a mefa meamaa wɔ a. Ɔlua Gyisɛse Kelaese mɔɔ vi Nazalɛte la duma nu, mese wɔ kɛ, dwazo tia!” Nea kɛzi edwɛkɛ ne zinle menli ne anwo wɔ mekɛ mɔɔ Pita zɔle nrenyia abubura ne asa na ɔdwazole ɔgyinlanle wɔ mekɛ mɔɔ limoa wɔ ye ɛbɛlabɔlɛ nu la! (Gyi. 3:6, 7) Ɛbahola wɔapɛ ye nvoninli wɔ wɔ adwenle nu kɛ nrenyia ne ɛlɛnea ɔ gyakɛ ne mɔɔ bɛyɛ ye ayile la na ɔlɛtia wɔ mekɛ mɔɔ limoa la ɔ? Ɔnyɛ nwanwane kɛ ɔbɔle ɔ bo ɔwuluwulule na ɔyele Nyamenle ayɛlɛ la!

3. Ahyɛlɛdeɛ mɔɔ tɛla biala la boni a nrenyia ne mɔɔ ɛnee le abubura la nee menli dɔɔnwo ne nyianle a?

³ Menli dɔɔnwo ne mɔɔ anye ɛlie la nriandile hɔle Pita nee Dwɔn anwo ɛkɛ wɔ Sɔlɔmɔn Abenlana ne anu. Gyisɛse gyinlanle ɛkɛ ne mekɛ bie hilehilele na ɛleka ko ne ala a Pita maanle bɛnwunle mɔɔ zile la azo nvasoɛ a. (Dwɔn 10:23) Ɔvale debie mɔɔ sonle bolɛ tɛla dwɛtɛ fufule anzɛɛ nvutuke la ɔmaanle nrenyia ne mɔɔ ɛnee le abubura la nee menli dɔɔnwo ne. Ahyɛlɛdeɛ ɛhye ɛnle kpɔkɛdelɛ ala. Ɔle nwolɛ adenle mɔɔ bɛamaa bɛanlu bɛ nwo, bɛahakyi bɛ ɛbɛlabɔlɛ na bayɛ “ngoane Adekilevolɛ Kpanyinli,” Gyisɛse Kelaese mɔɔ Gyihova ɛkpa ye la ɛdoavolɛma a.​—Gyi. 3:15.

4. (a) Edwɛkɛ boni a nwanwane adenle mɔɔ bɛluale zo bɛyɛle ayile la bava ara a? (b) Kpuya nwiɔ boni mɔ a yɛbabua a?

 ⁴ Ɛnee ɔle kenle titili! Bɛyɛ awie ayile na kɛkala ɔkola ɔtia. Menli apenle dɔɔnwo nyianle nwolɛ adenle mɔɔ bamaa bayɛ bɛ ayile wɔ sunsum nu amaa bɛayɛ mɔɔ sɔ Nyamenle anye la. (Kɔl. 1:9, 10) Bieko, mɔɔ zile la bamaa edwɛkɛ kpole ara Kelaese nɔhalɛ ɛdoavolɛma nee menli mɔɔ lɛ tumi mɔɔ babɔ mɔdenle kɛ bɛsi Belemgbunlililɛ edwɛkɛhanlɛ gyima ne mɔɔ Gyisɛse se bɛyɛ la adenle la avinli. (Gyi. 1:8) Duzu a yɛbahola yɛazukoa yɛavi adenle mɔɔ Pita nee Dwɔn​—mɔɔ “bɛnze nwoma yɛɛ bɛnlɛ dibilɛ”​—luale zo lile menli dɔɔnwo ne daselɛ la anu a? b (Gyi. 4:13) Na kɛ ɔkɛyɛ na yɛazukoa adenle mɔɔ bɛ nee ɛdoavolɛma mɔɔ ɛha la luale zo gyinlanle dwazotia nloa la ɛ?

5. Duzu a yɛbahola yɛazukoa yɛavi kɛzi Pita nee menli ne dendɛle la anu a?

⁵ Pita nee Dwɔn dwazole gyinlanle menli ne anyunlu, na ɛnee bɛze kɛ ɔtɛkyɛle biala bɛ nuhua bie mɔ hanle kɛ bɛhu Gyisɛse. (Maake 15:8-15; Gyi. 3:13-15) Dwenle akɛnrasesebɛ mɔɔ Pita nyianle wɔ mekɛ mɔɔ ɔhanle kɛ ɔluale Gyisɛse duma nu a ɔyɛle nrenyia abubura ne ayile la anwo nea. Pita hanle nɔhalɛ mɔɔ wɔ nu la. Ɔmaanle menli ne nwunle ye wienyi kɛ bɛboka nwolɛ bie a bɛhunle Kelaese a. Noko Pita anva bɛ nwo ɛya, ɔluakɛ ɛnee “bɛnze yɛɛ bɛyɛle a.” (Gyi. 3:17) Ɔdendɛle ɔhilele bɛ kɛ ɔ mediema na ɔvale ye adwenle ɔziele mɔɔ Belemgbunlililɛ edwɛkɛ ne bamaa bɛanyia la azo. Saa bɛnu bɛ nwo na bɛnyia diedi wɔ Kelaese anu a, “anwodɔlɛ mekɛ” vi Gyihova ɛkɛ bara. (Gyi. 3:19) Ɔwɔ kɛ yɛdayɛ noko yɛfa akɛnrazilɛ yɛka Nyamenle ndɛnebualɛ ne mɔɔ ɛlɛba la anwo edwɛkɛ wienyi. Noko ɔnle kɛ yɛtendɛ yɛtia menli anzɛɛ yɛbua bɛ ndɛne. Emomu, yɛbu menli mɔɔ yɛka edwɛkɛ ne yɛkile bɛ la kɛ bɛbahola bɛarayɛ yɛ mediema, na yɛfa yɛ adwenle yɛsie mɔɔ Belemgbunlililɛ edwɛkɛ ne bamaa bɛanyia la azo kɛ mɔɔ Pita yɛle la.

6. Kɛzi Pita nee Dwɔn lale mɛlɛbɛnwoaze ali ɛ?

⁶ Ɛnee ɛzoanvolɛma ne bɛlɛ bɛ nwo aze. Bɛanlie nwanwane debie mɔɔ bɛyɛle la anwo nganvolɛ. Pita hanle hilele menli ne kɛ: “Duzu ati a bɛlɛnea yɛ kpoonwu kɛ asɛɛ yɛdayɛ yɛ tumi anzɛɛ yɛ nyamenlezonlenlɛ kpalɛ ti a yɛmaa yedia ɛ?” (Gyi. 3:12) Ɛnee Pita nee ɛzoanvolɛma ne mɔɔ ɛha la ze kɛ debie kpalɛ biala mɔɔ bɛhola bɛyɛ wɔ bɛ ɛzonlenlɛ gyima ne anu la, Nyamenle sunsum ne a ɛboa bɛ a na tɛ bɛ anwosesebɛ ɔ. Ɛhye ati, bɛvale mɔɔ bɛholale bɛyɛle la amuala anwo nganvolɛ bɛmaanle Gyihova nee Gyisɛse.

7, 8. (a) Duzu ahyɛlɛdeɛ a yɛbahola yɛava yɛamaa menli a? (b) Kɛzi ‘ninyɛne kɔsɔɔti mɔɔ bɛbayɛ ye fofolɛ’ la anwo ɛwɔkɛ ne ɛlɛba nu ɛnɛ ɛ?

⁷ Ɔhyia kɛ yɛda mɛlɛbɛnwoaze zɛhae bie ali wɔ yɛ Belemgbunlililɛ edwɛkɛhanlɛ gyima ne anu. Nɔhalɛ nu, Nyamenle sunsum ne ɛmmaa Kilisienema ɛnyɛ menli ayile wɔ nwanwane adenle zo ɛnɛ. Noko akee, yɛbahola yɛaboa menli  yɛamaa bɛanyia diedi wɔ Nyamenle nee Kelaese anu na bɛanyia ahyɛlɛdeɛ ko ne ala mɔɔ Pita vale maanle la bie​—bɛbahola bɛava bɛ ɛtane bɛahyɛ bɛ na bɛanyia anwodɔlɛ mɔɔ vi Gyihova ɛkɛ la. Ɛvolɛ biala, menli apenle dɔɔnwo die nwolɛ adenle ɛhye to nu na bɛsɔne bɛ kɛ Kelaese ɛdoavolɛma.

⁸ Nɔhalɛ nu, yɛde mekɛ mɔɔ “bɛbayɛ ninyɛne kɔsɔɔti fofolɛ” mɔɔ Pita hanle nwolɛ edwɛkɛ la anu. Kɛ mɔɔ “Nyamenle luale ye tete ngapezoma nwuanzanwuanza ne mɔ anwo zo hanle” la, bɛvale Belemgbunlililɛ ne bɛziele ɛkɛ wɔ anwuma wɔ 1914. (Gyi. 3:21; Edw. 110:1-3; Dan. 4:16, 17) Yeangyɛ, Kelaese bɔle ɔ bo kɛ ɔnea yeamaa bava nɔhalɛ ɛzonlenlɛ bazie ɛkɛ ne bieko wɔ azɛlɛ ye azo. Ɔlua ɛhye ati, menli mgbe dɔɔnwo ɛra sunsum nu paladaese ne anu na bɛrayɛ Nyamenle Belemgbunlililɛ ne maanlema. Bɛye bɛ subane dɛba ne mɔɔ ɛkpɔlɔ la bɛgua na bɛva “subane fofolɛ” ne mɔɔ bɛbɔle ye wɔ Nyamenle ɛhulolɛ zo la bɛwula. (Ɛfɛ. 4:22-24) Kɛ mɔɔ nrenyia abubura ne mɔɔ bɛyɛle ye ayile ɛdeɛ ne de la, Nyamenle sunsum ne a ɛmaa bɛhola bɛyɛ gyima kpole ɛhye a na tɛ sonla ɔ. Ɔwɔ kɛ yɛfa akɛnrazilɛ yɛka Nyamenle Edwɛkɛ ne na yɛkilehile menli kpalɛ kɛ Pita la. Nyamenle sunsum ne a bamaa yɛaboa menli na bɛarayɛ Kelaese ɛdoavolɛma a na tɛ yɛ anwosesebɛ ɔ.

9-11. (a) Duzu a Dwuu mgbanyima ne mɔ yɛle wɔ edwɛkɛ mɔɔ Pita nee Dwɔn hanle la anwo a? (b) Kpɔkɛ boni a ɛzoanvolɛma ne bɔle a?

⁹ Pita ɛdendɛlɛ ne nee nrenyia ne mɔɔ ɛnee le abubura la ɛdeɛdeanlɛ nee ye ɛwuluwululɛ ne maanle dede ekyi rale. Ɔti ɛzonlenlɛsua ne azo neavolɛ ne​—awie mɔɔ bɛkpa ye kɛ ɔbɔ menli ne anwo bane la​—nee ɛsɔfo mgbanyima ne mɔ hɔle kɛ bɛkanlea mɔɔ ɛlɛkɔ zo la. Ɔbayɛ kɛ mrenyia ɛhye mɔ le Sadusiima, bɛle maanyɛlɛ eku bie mɔɔ lɛ tumi na bɛlɛ ezukoa la anu amra. Bɛboa bɛmaa anzodwolɛ ba maanle ne nee Wulomuma avinli, bɛkpo Falasiima mɛla mɔɔ bɛhyehyɛ la yɛɛ bɛnlie ewudwazo ne bɛnli. c Nea kɛzi bɛvale ɛya kpole wɔ mekɛ mɔɔ bɛnwunle kɛ Pita nee Dwɔn ɛlɛfa akɛnrazilɛ aha Kelaese ewudwazo ne anwo edwɛkɛ la!

¹⁰ Dwazotiama mɔɔ bɛva ɛya la hyele Pita nee Dwɔn hɔguale bɛ efiade na bɛvale bɛ bɛrale Dwuuma kɔɔto kpole ne anyunlu wɔ ye alehyenlɛ nu. Wɔ tumivolɛma ɛhye mɔ anye zo, ɛnee Pita nee Dwɔn ‘ɛnze nwoma yɛɛ bɛnlɛ dibilɛ’ na bɛnlɛ adenle kɛ bɛkilehile wɔ ɛzonlenlɛsua ne anu. Bɛangɔ ɛsɔfo sukulu biala. Noko akɛnrasesebɛ nee anwodozo mɔɔ bɛvale bɛdendɛle la zinle menli mɔɔ wɔ kɔɔto ɛkɛ ne la anwo. Duzu a maanle Pita nee Dwɔn holale hilehilele zɔhane a? Debie ko mɔɔ boale bɛ la a le kɛ “ɛnee bɛ nee Gyisɛse a lua a.” (Gyi. 4:13) Bɛ Menle ne hilehilele kɛ awie mɔɔ lɛ tumi la, ɛnee ɔnle kɛ mɛla kilehilevolɛma ne la.​—Mat. 7:28, 29.

¹¹ Kɔɔto ne duale ɛzoanvolɛma ne kɛ bɛmmaka edwɛkɛ ne. Mekɛ zɔhane,  ɛnee tumi wɔ edwɛkɛ mɔɔ kɔɔto ne baha la anu. Wɔ dapɛne ekyi mɔɔ ɛpɛ nu la anu mɔɔ Gyisɛse hɔgyinlanle kɔɔto ɛhye anyunlu la, nuhua menli ne hanle kɛ: “Ɔfɛta ewule.” (Mat. 26:59-66) Noko, ɛzulolɛ anga Pita nee Dwɔn. Bɛvale akɛnrasesebɛ nee ɛbulɛ bɛgyinlanle menli ɛhye mɔɔ bɛlɛ ezukoa, bɛze nwoma na bɛlɛ tumi la anyunlu bɛhanle kɛ: “Saa ɔle kpalɛ wɔ Nyamenle anyunlu kɛ yɛkɛdie bɛ na tɛ Nyamenle a, ɛnee bɛdabɛ bɛbua. Na yɛmɛ, yɛnrɛhola yɛnrɛgyakyi ninyɛne mɔɔ yɛnwu ye nee mɔɔ yɛde la anwo edwɛkɛ ɛhanlɛ.”​—Gyi. 4:19, 20.

12. Duzu a bahola aboa yɛ yeamaa yɛanyia akɛnrasesebɛ nee anwodozo a?

¹² Ɛlɛ akɛnrasesebɛ zɛhae bie ɔ? Saa ɛnyia adenle kɛ ɛbali menli mɔɔ lɛ ezukoa, bɛhɔ sukulu mgbole anzɛɛ bɛlɛ tumi la daselɛ a, kɛzi ɛte nganeɛ ɛ? Na saa wɔ mbusuafoɔ, ɛ gɔnwo mɔ sukuluma anzɛɛ gyimayɛvoma golo ɛ nwo ɔlua wɔ diedi ne ati ɛ? Ɛzulolɛ ka wɔ ɔ? Saa ɔle zɔ a, ɛbahola wɔali ɛzulolɛ ne anwo gyima. Mekɛ mɔɔ Gyisɛse wɔ azɛlɛ ye azo la ɔhilehilele ye ɛzoanvolɛma kɛzi bɛbava anwodozo nee ɛbulɛ bɛahilehile bɛ diedi ne anu la. (Mat. 10:11-18) Mɔɔ bɛdwazole Gyisɛse la, ɔbɔle ye ɛdoavolɛma ɛwɔkɛ kɛ ɔbahɔ zo yeaboka bɛ nwo “dahuu kɔkpula mekɛ ɛhye awieleɛ.” (Mat. 28:20) Gyisɛse ɛlɛdua “akɛlɛ nɔhavo nee badwema ne” anwo zo yeahilehile yɛ kɛzi yɛbali yɛ diedi ne anwo daselɛ la. (Mat. 24:45-47; 1 Pita 3:15) Bɛyɛ ɛhye ɔlua ngilehilelɛ mɔɔ yɛ sa ka ye wɔ debiezukoalɛ bo, le kɛ Yɛ Kilisiene Ɛbɛlabɔlɛ Nee Yɛ Ɛzonlenlɛ yɛɛ ninyɛne le kɛ “Baebolo Kpuya Mɔɔ Bɛbua” edwɛkɛ ne mɔ mɔɔ wɔ jw.org azo la azo. Ɛlɛfa ninyɛne ɛhye mɔ wɔali gyima kpalɛ ɔ? Saa ɛyɛ ye zɔ a, wɔ akɛnrasesebɛ ne bayɛ kpole. Na kɛ mɔɔ ɛzoanvolɛma ne yɛle la, debie biala ɛnrɛhola ɛnrɛmaa ɛnrɛgyakyi Baebolo ne anu nɔhalɛ ne mɔɔ wɔnwu ye nee mɔɔ wɔde la anwo edwɛkɛ ɛhanlɛ.

13, 14. Saa yɛyia dwazotia a, duzu a ɔwɔ kɛ yɛyɛ a, na duzu ati ɔ?

¹³ Mekɛ mɔɔ bɛgyakyile Pita nee Dwɔn ala la, bɛ nee asafo ne anu amra yiale. “Bɛmaanle bɛ ne zo na bɛbɔle nu bɛzɛlɛle Nyamenle” kɛ ɔmaa bɛ akɛnrasesebɛ ɔmaa bɛhɔ zo bɛha edwɛkɛ ne. (Gyi. 4:24) Ɛnee Pita ze ye kpalɛ kɛ nrɛlɛbɛ  ɛnle nu kɛ ɔbava ɔ nwo yeado ye tumi zo wɔ mekɛ mɔɔ ɔlɛbɔ mɔdenle yeayɛ Nyamenle ɛhulolɛdeɛ la. Ɔtɛkyɛle biala, ɔvale ɔ nwo ɔdole ɔ nwo zo ɔhanle ɔhilele Gyisɛse kɛ: “Saa bɛ muala bɛkpo wɔ bɔbɔ a, me ngome ɛdeɛ, menrɛkpo wɔ ɛlɛ!” Noko kɛ mɔɔ Gyisɛse hanle la, sonla nwo ɛzulolɛ maanle Pita kpole ɔ gɔnwo nee ye kilehilevolɛ ne. Na Pita zukoale debie vile ye nvonleɛ ne anu.​—Mat. 26:33, 34, 69-75.

¹⁴ Ɛhulolɛ mɔɔ ɛlɛ kɛ ɛbali Kelaese anwo daselɛ la angomekye ɛnrɛboa wɔ. Saa dwazotiama bɔ mɔdenle kɛ bɛsɛkye wɔ diedi ne na bɛamaa wɔagyakyi edwɛkɛhanlɛ ne a, sukoa Pita nee Dwɔn neazo ne. Sɛlɛ Gyihova kɛ ɔmaa wɔ anwosesebɛ. Kpondɛ moalɛ fi asafo ne anu amra ɛkɛ. Ka ngyegyelɛ mɔɔ ɛlɛyia la anwo edwɛkɛ kile mgbanyima ne mɔ nee mediema gyɛne mɔɔ ɛnyi sunsum nu la. Tumi wɔ asɔne mɔɔ awie mɔ yɛ maa yɛ la anu.​—Ɛfɛ. 6:18; Gye. 5:16.

15. Duzu a bahola amaa menli mɔɔ gyakyile daselɛlilɛ wɔ mekɛ bie anu la anwosesebɛ a?

¹⁵ Saa sonla nwo ɛzulolɛ ɛmaa wɔgyakyi daselɛlilɛ wɔ mekɛ bie anu a, mmamaa ɛ sa nu to. Kakye kɛ ɛzoanvolɛ ne mɔ amuala gyakyile edwɛkɛhanlɛ ne wɔ mekɛ mɔɔ Gyisɛse wule la, noko nzinlii bɛbɔle ɔ bo bieko. (Mat. 26:56; 28:10, 16-20) Kɛ anrɛɛ ɛbamaa nvonleɛ mɔɔ wɔyɛ ye dɛba la amaa ɛ sa nu ado la, ɛbahola wɔava ɛzukoalɛdeɛ mɔɔ wɔ nu la wɔamaa awie mɔ anwosesebɛ ɔ?

16, 17. Duzu a yɛbahola yɛazukoa yɛavi Kelaese ɛdoavolɛma mɔɔ ɛnee wɔ Gyɛlusalɛm la asɔneyɛlɛ ne anu a?

¹⁶ Saa menli mɔɔ lɛ tumi la dwazo tia yɛ a, duzu a ɔwɔ kɛ yɛyɛ nwolɛ asɔne a? Yɛ ye nzonlɛ kɛ ɛdoavolɛma ne anzɛlɛ kɛ sɔnea mmato bɛ. Ɛnee bɛkakye edwɛkɛ ɛhye mɔɔ Gyisɛse hanle la kpalɛ: “Saa bɛyɛle me kpɔdekpɔde a, ɛnee bɛbayɛ bɛdabɛ noko kpɔdekpɔde.” (Dwɔn 15:20) Emomu, ɛdoavolɛma ɛhye mɔ mɔɔ di nɔhalɛ la zɛlɛle Gyihova kɛ ‘ɔnlea bɛ agbɔvolɛ ɛnwunlonwunlanlɛ ne.’ (Gyi. 4:29) Ɛdoavolɛma ne vale bɛ adwenle ziele debie mɔɔ anwo hyia kpalɛ la azo, bɛnwunle kɛ ɛkpɔlɛ mɔɔ bɛlɛyia ye la le ngapezo mɔɔ ɛlɛba nu. Ɛnee bɛze ye kɛ, kɛ mɔɔ Gyisɛse hanle kɛ bɛyɛ nwolɛ asɔne la, Nyamenle ɛhulolɛdeɛ ‘bayɛ ɛkɛ wɔ azɛlɛ ye azo’ ɔnva nwo mɔɔ sonla arane bie bayɛ la.​—Mat. 6:9, 10.

¹⁷ Amaa ɛdoavolɛma ne ayɛ Nyamenle ɛhulolɛdeɛ la, bɛzɛlɛle Gyihova kɛ: “Maa  wɔ ngɛkɛlɛ ɛhɔ zo ɛva akɛnrazilɛ ɛha wɔ edwɛkɛ ne.” Kɛzi Gyihova buale bɛ asɔneyɛlɛ ne ɛkɛ ne ala ɛ? “Ɛleka mɔɔ bɛyiale la kpusule, na sunsum nwuanzanwuanza ne yile bɛ muala tetɛkɛɛ na bɛvale akɛnrazilɛ bɛhanle Nyamenle edwɛkɛ ne.” (Gyi. 4:29-31) Debie biala ɛnrɛhola ɛnrɛzi Nyamenle ɛhulolɛdeɛ ɛyɛlɛ adenle. (Aye. 55:11) Ɔnva nwo kɛzi ngyegyelɛ ne de anzɛɛ tumi mɔɔ kpɔvolɛ ne lɛ la, saa yɛmaa yɛ ne zo yɛsɛlɛ Nyamenle a, yɛbahola yɛanyia anwodozo kɛ ɔbamaa yɛ anwosesebɛ yeamaa yɛahɔ zo yɛava akɛnrazilɛ yɛaha ye edwɛkɛ ne.

18. Duzu a menli mɔɔ wɔ Gyɛlusalɛm asafo ne anu la yɛle maanle bɛ nwo a?

¹⁸ Menli mɔɔ wɔ asafo fofolɛ ne mɔɔ wɔ Gyɛlusalɛm anu la dodo ne bole 5,000. d Ɔnva nwo kɛ ɛnee ɛdoavolɛma ne vi ɛleka ngakyile la, bɛnyianle “ahonle nee adwenle ko.” Ɛnee bɛ nzuzulɛ nee bɛ adwenle le ko. (Gyi. 4:32; 1 Kɔl. 1:10) Ɛdoavolɛma ne anyɛ asɔne kɛ Gyihova ɛyila bɛ mɔdenlebɔlɛ zo ala. Eza bɛboale bɛ nwo ngoko wɔ sunsum nu nee nwonane afoa nu. (1 Dwɔn 3:16-18) Kɛ neazo la, ɛdoavolɛ Dwosefi mɔɔ ɛzoanvolɛma ne donle ye Baanabase la dɔnenle ye azɛlɛ na ɔvile ye ahonle nu ɔvale ezukoa ne amuala ɔboale bɛdabɛ mɔɔ bɛvi moamoa la amaa bɛahola badɛnla Gyɛlusalɛm na bɛazukoa bɛ diedi fofolɛ ne anwo debie dɔɔnwo.

19. Duzu ati a Gyihova hunle Ananayase nee Safaela a?

¹⁹ Agyalɛma bie mɔɔ bɛfɛlɛ bɛ Ananayase nee Safaela la dɔnenle bɛ agyapadeɛ bie na bɛvale ezukoa ne bɛyele ndoboa. Bɛyɛle bɛ nwo kɛ asɛɛ bɛvale ezukoa ne amuala bɛrale noko, ‘bɛyele ezukoa ne bie bɛziele.’ (Gyi. 5:2) Gyihova hunle agyalɛma ne tɛ kɛ ezukoa ne mɔɔ bɛvale bɛrale la le ekyi, emomu ɛnee bɛnlɛ adwenle kpalɛ yɛɛ bɛbɔle adalɛ la ati ɔ. Bɛbɔle ‘adalɛ bɛhilele Nyamenle, bɛambɔ bɛangile menli.’ (Gyi. 5:4) Ɛnee Ananayase nee Safaela le kɛ nabalabama ne mɔɔ Gyisɛse hanle bɛ nwo edwɛkɛ la, ɛnee bɛkulo menli nyunlu anyunlunyia na tɛ Nyamenle anyunlu ɛlolɛ ɔ.​—Mat. 6:1-3.

20. Duzu a yɛsukoa ye wɔ ahyɛlɛdeɛ mɔɔ yɛfa yɛmaa Gyihova la anwo a?

²⁰ Alasevolɛ mgbe dɔɔnwo mɔɔ wɔ ɛkɛ ne ɛnɛ la sukoa ɛvoya mɔɔ limoa nɔhalɛ ɛdoavolɛma mɔɔ ɛnee wɔ Gyɛlusalɛm la nyeleyɛlɛ ne, bɛfi bɛ ɛhulolɛ nu bɛye ndoboa bɛboa ewiade amuala edwɛkɛhanlɛ gyima ne. Bɛnyɛ ye kyengye kɛ awie biala ɛva ye mekɛ anzɛɛ ye ezukoa ɛboa gyima ɛhye. Nɔhalɛ nu, Gyihova ɛngulo kɛ yɛtwenlehwenle yɛ bo aze wɔ ye ɛzonlenlɛ nu anzɛɛ yɛyɛ ye kɛ asɛɛ yɛmia la ati ɔ. (2 Kɔl. 9:7) Tɛ debie dodo mɔɔ yɛfa yɛkyɛ Gyihova la a maa ɔ nye die a, emomu adwenle mɔɔ yɛlɛ ye wɔ deɛ ne anwo la ɔ. (Maake 12:41-44) Yɛngulo kɛ yɛkpondɛ ayɛlɛyelɛ anzɛɛ anyunlunyia wɔ yɛ ɛzonlenlɛ nu kɛ Ananayase nee Safaela la. Ɔti bɛmaa ɛlɔlɛ mɔɔ yɛlɛ yɛmaa Nyamenle nee yɛ gɔnwo mɔ la ɛha yɛ ɔmaa yɛzonle Gyihova dahuu kɛ mɔɔ Pita, Dwɔn yɛɛ Baanabase yɛle la.​—Mat. 22:37-40.