1-3. Kɛzi Gyisɛse vile ye ɛzoanvolɛma ne anwo ɛkɛ ne hɔle ɛ, na kpuya boni mɔ a ɔmaa yɛbiza a?

 ƐNEE bɛngulo kɛ ɔba awieleɛ. Ɛzoanvolɛma ne anye liele wɔ dapɛne ekyi mɔɔ ɛze la anu! Gyisɛse mɔɔ bɛdwazo ye la ɛmaa bɛ rɛle mɔɔ bɔle la ɛhakyi anyelielɛ. Gyisɛse ɛhɔ zo ɛye ɔ nwo ɛhile ye ɛdoavolɛma ne, yehilehile bɛ na yemaa bɛ anwosesebɛ wɔ kenle 40 anu. Noko, kenle ɛhye a bayɛ kenle mɔɔ li awieleɛ mɔɔ ɔbaye ɔ nwo yeahile bɛ a.

² Ɛzoanvolɛma ne nee Gyisɛse gyi Ɔlivi Boka ne azo na bɛlɛtie edwɛkɛ mɔɔ ɔlɛka la kpalɛ. Mɔɔ ɔdendɛle ɔwiele la​—yeangyɛ biala​—ɔmaanle ɔ sa zo na ɔyilale bɛ. Akee ɔbɔle ɔ bo kɛ ɔkɔ anwuma! Ye ɛdoavolɛma anye hale ɔ nwo wɔ mekɛ mɔɔ ɔlɛkɔ anwuma la. Awieleɛ bɔkɔɔ ne, amungu ne hedale ɔ nwo zo na bɛannwu ye bieko. Ɛnee yehɔ, noko bɛhɔle zo bɛnleanle anwomanyunlu.​—Luku 24:50; Gyi. 1:9, 10.

 ³ Deɛ ɛhye mɔɔ zile la hakyile ɛdoavolɛma ne ɛbɛlabɔlɛ bɔkɔɔ. Kɛkala mɔɔ bɛ Menle Gyisɛse Kelaese ɛhɔ anwuma la, duzu a bɛbayɛ a? Ka wɔ ahonle to wɔ azule nu, ɛnee bɛ Menle ne ɛziezie bɛ kɛ bɛdoa gyima mɔɔ ɔbɔle ɔ bo la azo. Kɛzi ɔzieziele bɛ ɔmaanle gyima ɛhye mɔɔ anwo hyia la ɛ, na duzu a bɛyɛle a? Na kɛzi ɛhye fale Kilisienema anwo ɛnɛ ɛ? Mualɛ mɔɔ maa anwosesebɛ la wɔ Gyima ne tile mɔɔ limoa la anu.

4. Kɛzi Luku bɔle ye kɛlɛtokɛ mɔɔ wɔ Gyima buluku ne anu la abo ɛ?

⁴ Luku bɔle Tiyɔfelɛse duma wɔ ye kɛlɛtokɛ ne mɔlebɛbo, sonla ko ne ala mɔɔ ɔhɛlɛle ye Edwɛkpa ne ɔhɔmaanle ye la. a Amaa yeala ali kɛ Luku ɛlɛtoa kɛlɛtokɛ mɔɔ ɔlimoale ɔyɛle la azo la, ɔhanle kɛzi ɔdwulale ye Edwɛkpa ne la anwo edwɛkɛ sikalɛ, yɛɛ ɔvale edwɛkɛ agbɔkɛ nee ninyɛne fofolɛ bie mɔ ɔbɔle ɔ bo a.

5, 6. (a) Duzu a baboa Gyisɛse ɛdoavolɛma yeamaa bɛ diedi nu ahɔ zo amia a? (b) Kɛzi Kilisienema mɔɔ wɔ ɛkɛ ne ɛnɛ la diedi gyi “daselɛ dɔɔnwo” azo ɛ?

⁵ Duzu a bamaa Gyisɛse ɛdoavolɛma diedi nu ahɔ zo amia a? Wɔ Gyima ne 1:3, yɛkenga ye wɔ Gyisɛse anwo kɛ: “Ɔmaanle bɛnyianle daselɛ dɔɔnwo kɛ ɔde aze.” Luku mɔɔ le “ayileyɛvolɛ kulovolɛ” la angomekye a vale edwɛkɛ “daselɛ dɔɔnwo” lile gyima wɔ Baebolo ne anu a. (Kɔl. 4:14) Ɔle edwɛkɛ mɔɔ bɛfa bɛdi gyima wɔ ayileyɛlɛ nu bɛkile kɛ daselɛ bie le nɔhalɛ yɛɛ nuhua la ɛkɛ. Gyisɛse maanle bɛnwunle daselɛ zɛhae mɔ. Ɔyele ɔ nwo ɔhilele ye ɛdoavolɛma ne fane dɔɔnwo, ɔyɛ a ɔye ɔ nwo ɔkile sonla ko anzɛɛ menli nwiɔ, ɔdwu mekɛ ne bie noko a ye ɛzoanvolɛma ne amuala, yɛɛ mekɛ bie ɔyele ɔ nwo ɔhilele diedima mɔɔ bo 500 la. (1 Kɔl. 15:3-6) Ɛhye mɔ le daselɛ mɔɔ le nɔhalɛ amgba!

⁶ Ɛnɛ noko nɔhalɛ Kilisienema mɔɔ wɔ ɛkɛ ne la diedi gyi “daselɛ dɔɔnwo” azo. Asoo yɛlɛ daselɛ mɔɔ kile kɛ Gyisɛse dɛnlanle azɛlɛ ye azo, yɛ ɛtane ti a ɔwule yɛɛ bɛdwazole ye ɔ? Ɛhɛe! Menli mɔɔ vale bɛ nye nwunle mɔɔ hɔle zo mɔɔ Nyamenle sunsum ne maanle bɛhɛlɛle nwolɛ edwɛkɛ wɔ Baebolo ne anu la, ɛmaa yɛnyia daselɛ dɔɔnwo mɔɔ yɛhyia nwo la. Saa yɛfa asɔneyɛlɛ yɛsuzu edwɛkɛ ɛhye mɔ anwo a, ɔbamaa yɛ diedi nu amia kpalɛ. Kakye kɛ diedi mɔɔ gyi daselɛ kpalɛ zo la ɛngile kɛ yɛdie edwɛkɛ bie yɛado nu ala. Ɔhyia kɛ yɛnyia nɔhalɛ diedi amaa yɛanyia dahuu ngoane.​—Dwɔn 3:16.

7. Neazo boni a Gyisɛse yɛle maanle ye ɛdoavolɛma wɔ ngilehilelɛ nee edwɛkɛhanlɛ nu a?

⁷ Eza Gyisɛse ‘hanle Nyamenle Belemgbunlililɛ ne anwo edwɛkɛ.’ Kɛ neazo la, ɔhilehilele ngapezo mɔɔ kile kɛ Mɛzaya ne banwu amaneɛ na yeawu la  anu. (Luku 24:13-32, 46, 47) Mekɛ mɔɔ Gyisɛse ɛlɛkilehile gyima mɔɔ ɔyɛ kɛ Mɛzaya ne anu la, ɔhanle Nyamenle Belemgbunlililɛ ne anwo edwɛkɛ ɔluakɛ ɔdaye a bɛkpa ye kɛ zolɛ Belemgbunli a. Belemgbunlililɛ ne le debie titili mɔɔ Gyisɛse hanle nwolɛ edwɛkɛ a, na yemɔ a le debie titili mɔɔ ye ɛdoavolɛma mɔɔ wɔ ɛkɛ ne ɛnɛ la noko ka nwolɛ edwɛkɛ a.​—Mat. 24:14; Luku 4:43.

8, 9. (a) Adwenle nwiɔ mɔɔ ɛndenrɛ la boni a ɛnee Gyisɛse ɛzoanvolɛma lɛ a? (b) Kɛzi Gyisɛse denrɛle ye ɛzoanvolɛma adwenle ɛ, na ɛzukoalɛdeɛ boni a wɔ nu maa Kilisienema ɛnɛ a?

⁸ Mekɛ mɔɔ ɛzoanvolɛma ne nee Gyisɛse yiale wɔ Ɔlivi Boka ne azo la, bɛ nee ye anyia bieko wɔ azɛlɛ ye azo. Bɛvale anyelielɛ bɛbizale ye kɛ: “Awulae, mekɛ ɛhye anu a ɛbava belemgbunlililɛ ne wɔamaa Yizilayɛ bieko ɔ?” (Gyi. 1:6) Kpuya ɛhye maanle ɔlale ali kɛ ɛnee ɛzoanvolɛma ne lɛ adwenle nwiɔ mɔɔ ɛndenrɛ la. Mɔɔ limoa, ɛnee bɛlɛ adwenle kɛ bɛbava Nyamenle Belemgbunlililɛ ne bamaa nwonane afoa nu Yizilayɛ. Mɔɔ tɔ zo nwiɔ, ɛnee bɛ nye la kɛ Belemgbunlililɛ ne mɔɔ bɛbɔ nwolɛ ɛwɔkɛ la babɔ ye tumililɛ bo ɛkɛ ne ala wɔ “mekɛ ɛhye anu.” Kɛzi Gyisɛse boale bɛ maanle bɛdele ɔ bo ɛ?

⁹ Ɛnee Gyisɛse ze ye kɛ ɔnrɛhyɛ bɛbade adwenle mɔɔ bɛlimoale bɛnyianle la abo. Nɔhalɛ nu, ɛnee yeha kenle bulu pɛ na ye ɛdoavolɛma anwu sunsum nu Yizilayɛ ne mɔɔ le maanle fofolɛ ne mɔɔ bɛbawo ye la. Ɛnee nwonane afoa nu Yizilayɛ ɛnrɛyɛ Nyamenle menli titili bieko. Mɔɔ fale adwenle bieko mɔɔ bɛnyianle la anwo la, Gyisɛse hakyele bɛ kɛ: “Ɔngyia kɛ bɛkɛnwu mekɛ anzɛɛ ɛlobɔ ne mɔ mɔɔ Selɛ ne angome a kola kile la.” (Gyi. 1:7) Gyihova a ze mekɛ ne a. Kolaa na Gyisɛse awu la, ɔhanle kɛ sonla Ra ne bɔbɔ ɛnze “kenle zɔhane nee dɔnehwele ne” mɔɔ awieleɛ ne bara la “kyesɛ Selɛ ne ala.” (Mat. 24:36) Saa Kilisienema fa bɛ adwenle sie mekɛ mɔɔ ewiade ɛhye bara awieleɛ la azo somaa a ɛnee bɛlɛfa debie mɔɔ bɛnlɛ zolɛ tumi la bagyegye bɛ nwo.

10. Subane boni a ɔwɔ kɛ yɛsukoa yɛfi ɛzoanvolɛma ne ɛkɛ a, na duzu ati ɔ?

¹⁰ Noko ɔwɔ kɛ yɛnea boɛ na yɛannyia Gyisɛse ɛzoanvolɛma mɔɔ ɛnee lɛ diedi kpole la anwo adwenle mɔɔ ɛndenrɛ la. Bɛbɛlɛle bɛ nwo aze bɛliele ɛdenrɛdenrɛlɛ bɛdole nu. Bieko ɔnva nwo kɛ adwenle mɔɔ ɛndenrɛ la a maanle bɛbizale kpuya ne la, ɛnee bɛlɛ subane kpalɛ. Ɛnee Gyisɛse ɛha ɛhile ye ɛdoavolɛma fane dɔɔnwo kɛ: “Bɛhɔ zo bɛzinza.” (Mat. 24:42; 25:13; 26:41) Ɛnee bɛ nye la ɛkɛ wɔ sunsum nu, na ɛnee bɛlɛkpondɛ daselɛ mɔɔ kile kɛ Gyihova mekɛ ne ɛdwu la. Subane ɛhye a ɔwɔ kɛ yɛnyia ye ɛnɛ a. Nɔhalɛ nu, ɔwɔ kɛ yɛyɛ zɔ wɔ ‘mekɛ ɛhye mɔɔ li awieleɛ’ la anu.​—2 Tim. 3:1-5.

11, 12. (a) Gyima boni a Gyisɛse vale maanle ye ɛdoavolɛma a? (b) Duzu ati a ɔle kpalɛ kɛ Gyisɛse hanle sunsum nwuanzanwuanza ne anwo edwɛkɛ wɔ mekɛ mɔɔ ɔlɛfa gyima ne yeamaa bɛ la a?

¹¹ Gyisɛse hakyele ɛzoanvolɛma ne debie mɔɔ ɔwɔ kɛ bɛmaa ɔkyia bɛ la. Ɔhanle kɛ: “Saa sunsum nwuanzanwuanza ne ba bɛ nwo zo a, bɛbanyia tumi na bɛayɛ me alasevolɛ wɔ Gyɛlusalɛm nee Dwudiya nee Samɛlea amuala,  bɛahɔdwu azɛlɛ ye azo ɛleka biala.” (Gyi. 1:8) Ɛnee ɔwɔ kɛ bɛdimoa bɛka Gyisɛse ewudwazo ne anwo edwɛkɛ wɔ Gyɛlusalɛm mɔɔ bɛhunle ye wɔ ɛkɛ la. Akee bɛbaha edwɛkɛ ne bɛahɔdwu Dwudiya nee Samɛlea amuala yɛɛ moamoa.

¹² Ɔle kpalɛ kɛ Gyisɛse hakyele bɛ ɛwɔkɛ mɔɔ ɔbɔle kɛ ɔbamaa sunsum nwuanzanwuanza ne aboa bɛ kolaa na yeava edwɛkɛhanlɛ gyima ne yeawula bɛ sa la. Fane mɔɔ bo 40 mɔɔ “sunsum nwuanzanwuanza” ne finde wɔ Gyima buluku ne anu la ko a le mɔɔ wɔ ɛke la. Gyima buluku ne maa ɔda ali fane dɔɔnwo kɛ sunsum nwuanzanwuanza ne ɛnle nu a yɛnrɛhola yɛnrɛyɛ Gyihova ɛhulolɛdeɛ. Nea kɛzi nwolɛ hyia kɛ yɛbazɛlɛ sunsum nwuanzanwuanza ne dahuu a! (Luku 11:13) Yɛhyia nwolɛ ɛnɛ yɛtɛla mekɛ biala.

13. Kɛzi edwɛkɛhanlɛ gyima ne mɔɔ bɛva bɛmaa Nyamenle menli la kpole de ɛ, na duzu ati a ɔwɔ kɛ yɛfa anyelielɛ yɛyɛ a?

¹³ Kɛzi yɛbu edwɛkɛ “azɛlɛ ye azo ɛleka biala” la ɛhakyi ɔvi mekɛ zɔhane mɔɔ ba la. Kɛ mɔɔ yɛnwunle ye wɔ tile mɔɔ li ɛhye anyunlu anu la, Gyihova Alasevolɛ ɛvi bɛ ahonle kɔsɔɔti anu ɛlie daselɛlilɛ gyima ne ɛdo nu, ɔluakɛ bɛze kɛ Nyamenle kulo kɛ menli ngakyile kɔsɔɔti te ye Belemgbunlililɛ ne anwo edwɛkpa ne. (1 Tim. 2:3, 4) Ɛ nye ɛbolo ɛlɛyɛ ngoanelielɛ gyima ɛhye bie ɔ? Ɛnrɛnyia gyima mɔɔ yɛ ahunlundwolɛ zɛhae la bie wɔ ɛleka biala! Gyihova bamaa wɔ anwosesebɛ mɔɔ ɛhyia la yeamaa wɔahola wɔayɛ bie. Gyima buluku ne bamaa wɔanwu ndenle kpalɛ mɔɔ ɛbalua zo wɔayɛ gyima ne nee subane kpalɛ mɔɔ ɔwɔ kɛ ɛnyia amaa wɔayɛ ye boɛ la.

14, 15. (a) Duzu a anwumabɔvolɛ ne mɔ hanle ye wɔ Kelaese ɛralɛ ne anwo a, na duzu a ɛnee bɛkpondɛ bɛahile a? (Eza nea ɔbodwɛkɛ.) (b) Kɛzi Kelaese ɛralɛ ne yɛle kɛ “adenle ko ne ala” mɔɔ ɔluale zo ɔhɔle la ɛ?

¹⁴ Kɛ mɔɔ bɛhanle ye wɔ tile ɛhye mɔlebɛbo la, Gyisɛse vile azɛlɛ ye azo hɔle anwuma na ɔminliminlinle bɛ nye zo. Noko ɛnee ɛzoanvolɛ 11 ne gyi ɛkɛ bɛlɛnea anwuma. Nzinlii, anwumabɔvolɛ nwiɔ vindele ɛkɛ na bɛhanle kɛ: “Galelima, duzu ati a bɛgyi ɛke bɛlɛnea anwomanyunlu ɛ? Gyisɛse ɛhye mɔɔ bɛva ye bɛvi bɛ avinli bɛhɔ anwuma la balua adenle ko ne ala azo ara kɛ mɔɔ bɛnwunle ye kɛ ɔlɛkɔ anwuma la.” (Gyi. 1:11) Asoo ɛnee anwumabɔvolɛ ne mɔ ne ɛlɛkile kɛ Gyisɛse bava sonlabaka ko ne ala azia ara kɛ mɔɔ ɛzonlenlɛ bie mɔ kilehile la ɔ? Kyɛkyɛ, tɛ mɔɔ ɛnee bɛlɛkile la ɛne. Kɛzi yɛkola yɛnwu ye zɔ ɛ?

¹⁵ Ɛnee anwumabɔvolɛ ne mɔ ɛlɛka “adenle ko ne ala” mɔɔ Gyisɛse balua zo yeara la anwo edwɛkɛ na tɛ sonlabaka mɔɔ ɔbava yeara la ɔ. b Adenle boni azo a ɔluale ɔhɔle a? Mekɛ mɔɔ anwumabɔvolɛ ne mɔ ne ɛlɛtendɛ la ɛnee yehɔ. Ɛzoanvolɛma ekyi ne ala a nwunle kɛ Gyisɛse ɛvi azɛlɛ ye azo na ɔlɛkɔ ɔ Ze anwo lɔ wɔ anwuma a. Ɛnee kɛ ye ɛralɛ ne noko bayɛ la ɛne. Na ɔyɛle zɔ. Ɛnɛ menli mɔɔ ɛnyi sunsum nu la ala a ɛnwu ye kɛ Gyisɛse ɛra na ɔlɛdi  tumi a. (Luku 17:20) Ɔwɔ kɛ yɛnwu daselɛ mɔɔ kile kɛ yera la na yɛka yɛkile awie mɔ amaa bɛdabɛ noko bɛanwu kɛ mekɛ mɔɔ yɛwɔ nu la anwo hyia.

16-18. (a) Duzu a Gyima ne 1:13, 14 maa yɛnwu ye wɔ yɛ Kilisiene ayia ne mɔ anwo a? (b) Duzu a yɛbahola yɛazukoa ye wɔ neazo mɔɔ Gyisɛse mame Mɛle yɛle la anu a? (d) Duzu ati a yɛ Kilisiene ayia ne mɔ anwo hyia ɛnɛ a?

¹⁶ Ɔnyɛ nwanwane kɛ ɛzoanvolɛma ne ‘vale anyelielɛ kpole ziale hɔle Gyɛlusalɛm’ la. (Luku 24:52) Noko ɛnee duzu a bɛbayɛ ye wɔ Kelaese adehilelɛ ne anwo a? Yɛnwu ye wɔ Gyima ne tile 1 ngyehyɛnu 13 nee 14 kɛ bɛyiale wɔ “ɛbolɔnsam ne azo ekpumgbunli ne anu,” eza yɛnwu ninyɛne bie mɔ mɔɔ yɛ anyelielɛ la wɔ ayia ɛhye anwo. Wɔ zɔhane mekɛ ne, ɛnee azua mɔɔ wɔ Palɛsetanye la lɛ anwuma ekpumgbunli yɛɛ bɛlɛ kpolike wɔ alienwo mɔɔ bɛdua zo bɛfo a. Asoo ɔbayɛ kɛ “ɛbolɔnsam ne azo ekpumgbunli” ɛhye ɛnee wɔ Maake mame sua ne mɔɔ bɛha nwolɛ edwɛkɛ wɔ Gyima ne 12:12 la azo ɔ? Kɛzi ɔde ye biala la, ɛnee ɔle kɛnlɛma mɔɔ Kelaese ɛdoavolɛma yia ɛkɛ a ɔyɛ boɛ a. Noko nwane mɔ a yiale ɛkɛ a, yɛɛ bɛyɛle nzɔne?

¹⁷ Yɛ ye nzonlɛ kɛ tɛ ɛzoanvolɛma ne nee mrenyia angomekye a yiale ɛkɛ a. Ɛnee “mraalɛ bie mɔ” mɔɔ Gyisɛse mame Mɛle boka nwo la wɔ ɛkɛ ne bie. Ɛke a le ɛleka mɔɔ li awieleɛ mɔɔ bɛbɔle Mɛle duma wɔ Baebolo ne anu a. Yɛbahola yɛalie yɛali kɛ yeangɔ ɛkɛ ne kɛ ɔkakpondɛ duma, emomu ɔvile mɛlɛbɛnwoaze nu ɔ nee ɔ mediema diedima hɔyiale kɛ bɛkazonle. Ɔ rɛle kyekyele kpalɛ kɛ ɔ mra mrenyia nna ne mɔɔ ɛnee bɛnle diedima wɔ mekɛ mɔɔ Gyisɛse wɔ azɛlɛ ye azo la kɛkala ɛraboka ɔ nwo la. (Mat. 13:55; Dwɔn 7:5) Bɛyɛle nzenzaleɛ ɔvi mekɛ mɔɔ bɛ diema ne wule na ɔdwazole la.​—1 Kɔl. 15:7.

¹⁸ Eza yɛ deɛmɔti ye ɛdoavolɛma ne yiale la nzonlɛ: ‘Bɛ muala bɛbɔle nu bɛyɛle asɔne.’ (Gyi. 1:14) Ayia mɔɔ yɛkɔ la boka yɛ Kilisiene ɛzonlenlɛ ne anwo. Yɛyia nu yɛmaa yɛ nwo anwosesebɛ, yɛtie ngilehilelɛ nee folɛdulɛ, na mɔɔ hyia kpalɛ la yɛbɔ nu yɛsonle yɛ anwuma Selɛ Gyihova. Asɔneyɛlɛ nee edwɛne mɔɔ yɛto la maa ɔ nye die kpalɛ yɛɛ ɔboa yɛdayɛ mumua ne. Bɛmmamaa yɛgyakyi ayia ɛhye mɔ mɔɔ le nwuanzanwuanza na ɔmaa yɛ anwosesebɛ la ɛhɔlɛ ɛlɛ!​—Hib. 10:24, 25.

19-21. (a) Duzu a yɛsukoa yɛfi gyima titili mɔɔ Pita lile ye wɔ asafo ne anu la anu a? (b) Duzu ati a ɛnee ɔwɔ kɛ bɛfa awie bɛsie Dwudase agyakɛ anu a, na duzu a yɛsukoa yɛfi kɛzi bɛlile nwolɛ gyima la anu a?

¹⁹ Ɛnee ɔwɔ kɛ Kelaese ɛdoavolɛma ne di edwɛkɛ bie mɔɔ anwo hyia la anwo gyima, na Pita a lile bɛ nyunlu hanle nwolɛ edwɛkɛ a. (Ngyehyɛnu 15-26) Asoo ɔnyɛ anyelielɛ kɛ yɛnwu kɛ Pita ɛnyia anyuhɔlɛ wɔ dapɛne ekyi mɔɔ ɛze ɛhɔ la anu ɔnva nwo kɛ ɔyele ɔ Menle ɔmaanle fane nsa la ɔ? (Maake 14:72) Yɛ kɔsɔɔti yɛyɛ ɛtane, na ɔhyia kɛ yɛkakye kɛ saa yɛnu yɛ nwo nɔhalɛ nu a Gyihova ‘le kpalɛ yɛɛ ɔlɛ ɛhulolɛ kɛ ɔbava ɛtane yeahyɛ.’​—Edw. 86:5.

²⁰ Pita nwunle kɛ ɔwɔ kɛ bɛfa awie bɛsie ɛzoanvolɛ Dwudase mɔɔ yele  Gyisɛse maanle la agyakɛ anu. Noko nwane ɔ? Ɛnee ɔwɔ kɛ ɛzoanvolɛ fofolɛ ne yɛ awie mɔɔ nee Gyisɛse yɛle ye ɛzonlenlɛ gyima ne na ɔdi ye ewudwazo ne anwo daselɛ la. (Gyi. 1:21, 22) Ɛnee ɛhye nee ɛwɔkɛ mɔɔ Gyisɛse ɛbɔ la le ko: “Bɛdabɛ mɔɔ bɛdoa me la, bɛbadɛnla arelemgbunli mbia 12 azo bɛabua Yizilayɛ mbusua 12 ne ndɛne.” (Mat. 19:28) Ɔda ali kɛ ɛnee Gyihova kpondɛ kɛ ɛzoanvolɛma 12 mɔɔ doale Gyisɛse wɔ ye ɛzonlenlɛ gyima ne anu la yɛ kenle bie Gyɛlusalɛm Fofolɛ ne “adiabo awolɛ 12” ne. (Yek. 21:2, 14) Ɔti Nyamenle maanle Pita nwunle kɛ ngapezo mɔɔ se, “ye neavolɛ gyima ne, maa awie fofolɛ ɛyɛ” la fale Dwudase anwo.​—Edw. 109:8.

²¹ Adenle boni a bɛluale zo bɛkpale awie a? Bɛguale ma, ɛnee ɛhye le debie mɔɔ bɛta bɛyɛ wɔ mekɛ zɔhane a. (Mrɛ. 16:33) Noko, ɛhye a le mekɛ mɔɔ li awieleɛ mɔɔ bɛguale ma bɛvale bɛyɛle debie zɛhae wɔ Baebolo ne anu a. Ɔda ali wienyi kɛ mekɛ mɔɔ bɛwolale sunsum nwuanzanwuanza ne bɛguale bɛ nwo zo la bɛgyakyile ye ɛyɛlɛ. Noko, yɛ deɛmɔti bɛguale ma la nzonlɛ. Ɛzoanvolɛma ne yɛle asɔne kɛ: “O Gyihova, wɔmɔ mɔɔ ɛze awie biala ahonle nu la, kile yɛ menli nwiɔ ɛhye anu ko mɔɔ wɔkpa ye la.” (Gyi. 1:23, 24) Ɛnee bɛkpondɛ kɛ bɛnwu awie mɔɔ Gyihova ɛkpa ye la. Bɛkpale Matayase mɔɔ ɔbayɛ kɛ ɛnee ɔboka ɛdoavolɛma 70 ne mɔɔ Gyisɛse zoanle bɛ kɛ bɛhɔha edwɛkɛ ne la anwo. Ɔti Matayase rabokale “Bulu Nee Nwiɔ ne” anwo. c​—Gyi. 6:2.

22, 23. Duzu ati a ɔwɔ kɛ yɛbɛlɛ yɛ nwo aze yɛmaa menli mɔɔ li yɛ nyunlu wɔ asafo ne anu ɛnɛ la a?

²² Edwɛkɛ ɛhye kakye yɛ kɛ ɔhyia kɛ ngyehyɛleɛ kɔ zo wɔ Nyamenle menli avinli. Ɛnɛ nee ɛnɛ ala bɔbɔ, bɛkpa mrenyia kɛ neavolɛma wɔ asafo ne anu. Mgbanyima ne mɔ suzu Ngɛlɛlera ne anu ninyɛne mɔɔ ɔwɔ kɛ awie dwu nwo kolaa na bɛakpa ye kɛ neavolɛ la anwo, yɛɛ bɛsɛlɛ sunsum nwuanzanwuanza ne moalɛ. Ɔti asafo ne anu amra bu menli ɛhye mɔ kɛ sunsum nwuanzanwuanza ne a kpale bɛ a. Ɔwɔ kɛ yɛbɛlɛ yɛ nwo aze yɛdie bɛ adehilelɛ yɛto nu amaa koyɛlɛ adɛnla asafo ne anu.​—Hib. 13:17.

²³ Kɛkala mɔɔ Gyisɛse mɔɔ bɛdwazo ye la ɛye ɔ nwo ɛhile ɛdoavolɛma ne yɛɛ nzenzaleɛ mɔɔ bɛyɛ wɔ kɛzi bɛbayɛ ninyɛne wɔ asafo ne anu la ɛmaa bɛnyia anwosesebɛ la ati, bɛziezie bɛ nwo bɛmaa mɔɔ la bɛ nyunlu la. Tile mɔɔ doa zo la bahilehile ninyɛne titili mɔɔ sisile la anu.