TILE 5
“Ɔwɔ Kɛ Yɛtie Nyamenle Kɛ Tumivolɛ”
Ɛzoanvolɛma ne yɛle neazo maanle nɔhalɛ Kilisienema kɔsɔɔti
Ɔgyi Gyima ne 5:12–6:7 azo
1-3. (a) Kɛmɔti a bɛva ɛzoanvolɛma ne bɛra Sanhedelin ne anyunlu a, na duzu ati ɔ? (b) Duzu ati a kpɔkɛ mɔɔ ɛzoanvolɛma ne zile la fale yɛ nwo a?
NDƐNEBUAVOLƐMA mɔɔ wɔ Sanhedelin ne anu la ɛva ɛya kpole kpalɛ! Ɛzoanvolɛma ne gyi kɔɔto kpole ɛhye anyunlu. Duzu ati ɔ? Dwosefi Kayafase mɔɔ le Sanhedelin ne kpanyinli la dendɛle ɛya zo hilele bɛ kɛ: “Yɛduale bɛ kpunli kɛ bɛmmakilehile wɔ duma ɛhye anu bieko.” Ɛnee Kayafase ɛngulo kɛ ɔbabɔ Gyisɛse duma bɔbɔ. Noko ɔdoale zo kɛ, “bɛva bɛ ngilehilelɛ ne bɛkponde Gyɛlusalɛm amuala na bɛyɛ bɛamaa yɛali nrenyia ɛhye ewule ne anwo ɛzonle.” (Gyi. 5:28) Ɛnee edwɛkɛ ne anu la ɛkɛ: Bɛgyakyi edwɛkɛ ne ɛhanlɛ!
2 Duzu a ɛzoanvolɛma ne yɛle a? Gyisɛse mɔɔ Gyihova ɛmaa ye tumi la a ɛva edwɛkɛhanlɛ gyima ne ɛwula bɛ sa nu a. (Mat. 28:18-20) Asoo ɛzoanvolɛma ne bamaa sonla nwo ɛzulolɛ aha bɛ na bɛayɛ koonwu ɔ? Anzɛɛ bɛbanyia akɛnrasesebɛ bɛagyinla kpundii na bɛaha edwɛkɛ ne ɔ? Edwɛkɛ ne ati nee ɔ bo amuala a le kɛ: Bɛbadie Nyamenle anzɛɛ sonla ɔ? Ɛzoanvolɛ Pita andwenlehwenle ɔ bo aze fee, ɔdendɛle ɔmaanle ɛzoanvolɛma ne amuala. Ɔvale akɛnrazilɛ ɔhanle edwɛkɛ mɔɔ anu la ɛkɛ ne la.
3 Kɛ nɔhalɛ Kilisienema la, mɔɔ ɛzoanvolɛma ne yɛle ye wɔ Sanhedelin ne ɛnwunlonwunlanlɛ ne anwo la hyia yɛ kpalɛ. Bɛmaa yɛdayɛ noko gyima kɛ yɛha edwɛkɛ ne. Bie a yɛbayia dwazotia wɔ mekɛ mɔɔ yɛlɛyɛ gyima ɛhye la. (Mat. 10:22) Bie a dwazotiama babɔ mɔdenle kɛ bɛtua yɛ kɛ yɛmmaka edwɛkɛ ne anzɛɛ bɛava bɛ sa bɛado yɛ gyima ne azo. Duzu a yɛbayɛ a? Saa yɛsuzu kpɔkɛ mɔɔ ɛzoanvolɛma ne zile nee ninyɛne mɔɔ sisile kolaa na bɛava bɛ bara Sanhedelin ne anyunlu la anwo a ɔbaboa yɛ. a
“Gyihova Anwumabɔvolɛ Bukebukele Efiade Ne Nlenkɛ Ne Mɔ” (Gyima ne 5:12-21a)
4, 5. Duzu ati a Kayafase nee Sadusiima ne ‘vale ɛya kpole’ a?
4 Kakye kɛ mekɛ mɔɔ limoa mɔɔ bɛhanle bɛhilele Pita nee Dwɔn kɛ bɛgyakyi edwɛkɛ ne ɛhanlɛ la bɛbuale bɛ kɛ: “Yɛnrɛhola yɛnrɛgyakyi ninyɛne mɔɔ yɛnwu ye nee mɔɔ yɛde la anwo edwɛkɛ ɛhanlɛ.” (Gyi. 4:20) Mekɛ mɔɔ Sanhedelin ne nee Pita yɛɛ Dwɔn yiale la anzi, bɛ nee ɛzoanvolɛma ne mɔɔ ɛha la hɔle zo hanle edwɛkɛ ne wɔ ɛzonlenlɛsua ne anu. Ɛzoanvolɛma ne yɛle nwanwane ninyɛne dɔɔnwo, le kɛ bɛyɛle wuliravolɛma ayile yɛɛ bɛdule sunsum ɛtane. Bɛyɛle ɛhye wɔ “Sɔlɔmɔn Abenlana ne anu,” ɛleka bie mɔɔ wɔ ɛzonlenlɛsua ne nyiakɛ mɔɔ Dwuuma dɔɔnwo kɔyia ɛkɛ ne la. Ɔboalekɛ ɛnee Pita ɛlawolɛ bɔbɔ kola yɛ menli ayile! Menli dɔɔnwo mɔɔ bɛyɛle bɛ ayile la diele edwɛkɛ ne mɔɔ bamaa bɛade kpɔkɛ wɔ sunsum nu la. Ɔlua ɛhye azo, “mrenyia nee mraalɛ dɔɔnwo liele Awulae lile na bɛrayɛle ɛdoavolɛma.”—Gyi. 5:12-15.
5 Kayafase nee Sadusiima, ɛzonlenlɛ eku bie mɔɔ ɔboka nwo la, ‘vale ɛya kpole’ na bɛdole ɛzoanvolɛma ne efiade. (Gyi. 5:17, 18) Duzu ati a Sadusiima vale ɛya kpole a? Ɛnee ɛzoanvolɛma ne ɛlɛkilehile kɛ bɛdwazo Gyisɛse noko ɛnee Sadusiima ɛnlie ewudwazo ne ɛnli. Ɛnee ɛzoanvolɛma ɛlɛkilehile kɛ kyesɛ awie nyia diedi wɔ Gyisɛse anu na yeanyia ngoane noko ɛnee Sadusiima ne sulo kɛ saa menli fa Gyisɛse yɛ bɛ Adekilevolɛ a, Wulomuma bahwe bɛ nzo. (Dwɔn 11:48) Ɔnyɛ nwanwane kɛ Sadusiima ne bɔle kpɔkɛ kɛ bɛbamaa ɛzoanvolɛma ne agyakyi edwɛkɛ ne ɛhanlɛ la!
6. Nwane mɔ titili a maa bɛyɛ Gyihova azonvolɛ kpɔdekpɔde ɛnɛ a, na duzu ati a ɔnle kɛ ɛhye si yɛ nwo a?
6 Ɛnɛ noko ɛzonlenlɛ nu mgbanyima titili a maa menli yɛ Gyihova azonvolɛ kpɔdekpɔde a. Fane dɔɔnwo ne ala, menli ɛhye mɔ dua arane mgbanyima nee adwelie ngɛlata yɛɛ TV zo bɔ mɔdenle kɛ bɛmaa yɛagyakyi edwɛkɛhanlɛ gyima ne. Asoo ɔwɔ kɛ ɛhye si yɛ nwo ɔ? Kyɛkyɛ. Yɛ edwɛkɛ ne kpa adalɛ ɛzonlenlɛ nwo ɛdanlɛ. Saa ahonlekpalɛma die Baebolo ne anu nɔhalɛ ne to nu a, ɔmaa bɛnyia fanwodi bɛfi diedi nee nyɛleɛ mɔɔ ɛngyi Baebolo ne azo la anwo. (Dwɔn 8:32) Asoo ɔwɔ kɛ ɔsi yɛ nwo kɛ yɛ edwɛkɛhanlɛ gyima ne maa ɛzonlenlɛ nu mgbanyima fa yɛ nwo ɛya la ɔ?
7, 8. Kɛzi anwumabɔvolɛ ne edwɛkɛ ne hanle ɛzoanvolɛma ne ɛ, na kpuya boni a ɔwɔ kɛ yɛbiza yɛ nwo a?
7 Ɛnee ɛzoanvolɛma ne la efiade na bɛlɛkendɛ kɛ bɛbali bɛ edwɛkɛ, na bɛngola bɛnnwu ye saa bɛ agbɔvolɛ bɛahu bɛ a. (Mat. 24:9) Noko, azibɛnwo edwɛkɛ bie zile nɔe ne—“Gyihova anwumabɔvolɛ bukebukele efiade ne nlenkɛ ne mɔ.” b (Gyi. 5:19) Anwumabɔvolɛ ne maanle bɛ adehilelɛ fɔɔnwo kɛ: ‘Bɛhɔgyinla ɛzonlenlɛsua ne anu na bɛha edwɛkɛ ne.’ (Gyi. 5:20) Edwɛkɛ zɔhane maanle ɛzoanvolɛma ne nyianle anwodozo kɛ bɛlɛyɛ mɔɔ le kpalɛ la. Eza anwumabɔvolɛ ne edwɛkɛ ne maanle bɛ anwosesebɛ kɛ bɛgyinla kpundii ɔnva nwo mɔɔ bazi la. Ɛzoanvolɛma ne vale akɛnrasesebɛ nee diedi hɔle “ɛzonlenlɛsua ne anu nwonlomɔ mangyee ne na bɛbɔle ɔ bo kɛ bɛkilehile.”—Gyi. 5:21.
8 Ɔwɔ kɛ yɛ nuhua ko biala biza ɔ nwo kɛ, ‘Saa meyia tɛnlabelɛ zɛhae bie a, mebanyia diedi nee akɛnrasesebɛ mɔɔ mehyia nwo amaa meahɔ zo meaha edwɛkɛ ne la ɔ?’ Saa yɛnwu kɛ anwumabɔvolɛma gyi yɛ nzi amaa ‘yɛali Nyamenle Belemgbunlililɛ ne anwo daselɛ bɔkɔɔ’ a, ɔmaa yɛ anwosesebɛ.—Gyi. 28:23; Yek. 14:6, 7.
“Ɔwɔ Kɛ Yɛtie Nyamenle Kɛ Tumivolɛ Na Tɛ Menli Ɔ” (Gyima ne 5:21b-33)
“Ɔti bɛvale bɛ bɛragyinlanle Sanhedelin ne anyunlu.”—Gyima ne 5:27
9-11. Mɔɔ Sanhedelin ne hanle kɛ ɛzoanvolɛma ne ɛgyakyi edwɛkɛ ne ɛhanlɛ la duzu a bɛyɛle a, na kɛzi ɛhye le neazo maa nɔhalɛ Kilisienema ɛ?
9 Ɛnee Kayafase nee ndɛnebuavolɛma gyɛne mɔɔ wɔ Sanhedelin ɛkɛ ne la kulo kɛ bɛtwe ɛzoanvolɛma ne anzo. Ɛnee kɔɔto ne ɛnze mɔɔ ɛhɔ zo wɔ efiade ɛkɛ ne la, ɔti bɛzoanle menli bɛmaanle bɛhɔle efiade ɛkɛ ne kɛ bɛhɔva ɛzoanvolɛma ne bɛrɛla. Nea kɛzi edwɛkɛ ne zinle sinzavolɛma ne anwo wɔ mekɛ mɔɔ bɛnwunle kɛ bɛnle efiade ɛkɛ ne ɔnva nwo kɛ ɛnee bɛdo efiade ne anu na “sinzavolɛma ne gyigyi nlenkɛ ne mɔ anloa” la. (Gyi. 5:23) Yeangyɛ, ɛzonlenlɛsua ne azo neavolɛ ne nwunle kɛ ɛzoanvolɛma ne ɛzia ɛhɔ ɛzonlenlɛsua ne anu na bɛlɛdi Gyisɛse Kelaese anwo daselɛ—gyima mɔɔ ɔti bɛguale bɛ efiade la! Ndɛndɛ ne ala, ɛzonlenlɛsua ne azo neavolɛ ne nee ye sinzavolɛma ne hɔle ɛzonlenlɛsua ne anu hɔvale bɛ rale Sanhedelin ne anyunlu.
10 Kɛ mɔɔ yɛnwunle ye wɔ tile ɛhye mɔlebɛbo la, ɛzonlenlɛ nu mgbanyima ɛhye mɔ mɔɔ ɛva ɛya la hanle kɛ bɛgyakyi edwɛkɛ ne ɛhanlɛ. Duzu a ɛzoanvolɛma ne yɛle a? Pita vale akɛnrasesebɛ dendɛle maanle ɛzoanvolɛma ne kɛ: “Ɔwɔ kɛ yɛtie Nyamenle kɛ tumivolɛ na tɛ menli ɔ.” (Gyi. 5:29) Ɛzoanvolɛma ne yɛle neazo maanle nɔhalɛ Kilisienema kɔsɔɔti. Saa tumivolɛma ka kɛ yɛyɛ debie mɔɔ Nyamenle kyi anzɛɛ yɛmmayɛ debie mɔɔ Nyamenle se yɛyɛ la a, yɛkpo kɛ yɛbadie bɛ. Ɔti ɛnɛ, saa “tumivolɛma” fa bɛ sa to yɛ daselɛlilɛ gyima ne azo a, yɛngyakyi gyima mɔɔ Nyamenle ɛva ɛmaa yɛ kɛ yɛbɔ edwɛkpa ne nolo la. (Wlo. 13:1) Emomu, yɛkpondɛ nrɛlɛbɛ adenle yɛdua zo yɛdi Nyamenle Belemgbunlililɛ ne anwo daselɛ bɔkɔɔ.
11 Ɔnyɛ azibɛnwo kɛ akɛnrazilɛ mɔɔ ɛzoanvolɛma ne vale dendɛle la maanle ndɛnebuavolɛma ne vale ɛya la. Bɛbɔle kpɔkɛ kɛ “bɛku” ɛzoanvolɛma ne. (Gyi. 5:33) Ɛnee alasevolɛ ɛhye mɔ mɔɔ bɔ mɔdenle la ze kɛ bɛbahu bɛ. Noko bɛnyianle moalɛ!
“Bɛnrɛhola Bɛnrɛzɛkye Bɛ” (Gyima ne 5:34-42)
12, 13. (a) Folɛ boni a Gameeleɛle dule ɔ gɔnwo mɔ a, na duzu a bɛyɛle a? (b) Bie a kɛzi Gyihova baboa ye menli ne ɛnɛ a, noko “saa tenleneyɛlɛ ti [yɛnwu] amaneɛ bɔbɔ a” duzu a yɛbahola yɛalie yɛali a?
12 Gameeleɛle, “Mɛla kilehilevolɛ mɔɔ menli ne amuala bu ye” la dendɛle. c Ɔbayɛ kɛ ɛnee ɔ gɔnwo mɔ bu ye kpalɛ yɛɛ ɔlɛ tumi ɔluakɛ “ɔmaanle bɛvale ɛzoanvolɛma ne bɛvindele ekyii.” (Gyi. 5:34) Gameeleɛle hanle neazo bie mɔɔ fale menli bie mɔɔ bɔle asande wɔ mekɛ mɔɔ bɛ adekilevolɛma wule la anwo. Ɔhanle ɔhilele kɔɔto ne kɛ bɛnyia ɛzoanvolɛma ne mɔɔ bɛ Adekilevolɛ Gyisɛse wule la ɛtɛkyɛle la anwo abotane. Bɛliele Gameeleɛle edwɛkɛ ɛhye mɔɔ ɔhanle la bɛdole nu: “Bɛmmafa bɛ nloa bɛwulowula menli ɛhye mɔ edwɛkɛ nu, bɛgyakyi bɛ. Ɔluakɛ saa ngyehyɛleɛ ɛhye anzɛɛ gyima ɛhye vi sonla a ɔbazɛkye; noko saa ɔvi Nyamenle a, bɛnrɛhola bɛnrɛzɛkye bɛ. Emomu, bɛannea boɛ a ɔbayɛ kɛ bɛ nee Nyamenle mumua ne a ɛlɛko a.” (Gyi. 5:38, 39) Ndɛnebuavolɛma ne diele ye folɛdulɛ ne. Noko, bɛbole bɛ na bɛhanle bɛhilele bɛ kɛ “bɛmmaka Gyisɛse duma ne anwo edwɛkɛ bieko.”—Gyi. 5:40.
13 Ɛnɛ noko bie a Gyihova bamaa menli titili mɔɔ le kɛ Gameeleɛle la aha bie amaa ye menli ne. (Mrɛ. 21:1) Gyihova bahola ava ye tumi ne aha tumivolɛma, ndɛnebuavolɛma anzɛɛ menli mɔɔ hyehyɛ mɛla la yeamaa bali ye bodane nwo gyima. (Nih. 2:4-8) Noko saa ɔmaa nwolɛ adenle kɛ “tenleneyɛlɛ ti [yɛnwu] amaneɛ bɔbɔ a” yɛbahola yɛalie edwɛkɛ nwiɔ bie yɛali. (1 Pita 3:14) Mɔɔ limoa la, Nyamenle bahola amaa yɛ anwosesebɛ yeamaa yɛagyinla kpundii. (1 Kɔl. 10:13) Mɔɔ tɔ zo nwiɔ, dwazotiama ‘ɛnrɛhola ɛnrɛzɛkye’ Nyamenle gyima ne.—Aye. 54:17.
14, 15. (a) Mɔɔ bɛbole ɛzoanvolɛma ne la, duzu a bɛyɛle a, na duzu ati ɔ? (b) Maa neazo mɔɔ kile kɛ Gyihova menli fa anyelielɛ gyinla kpundii la.
14 Asoo ɛbolɛ ne maanle ɛzoanvolɛma ne mɔdenlebɔlɛ hanle aze ɔ? Kyɛkyɛ! “Bɛvale fɛlɛkolilɛ bɛvile Sanhedelin ne anyunlu ɛkɛ bɛhɔle.” (Gyi. 5:41) ‘Bɛlile fɛlɛko’—duzu ati ɔ? Tɛ ɛbolɛ ne nyane a maanle bɛlile fɛlɛko a. Bɛlile fɛlɛko ɔluakɛ ɛnee bɛze kɛ bɛlɛdi nɔhalɛ bɛamaa Gyihova yɛɛ Gyisɛse neazo ne mɔɔ bɛlɛdi ɔ nzi la ati a bɛlɛyɛ bɛ kpɔdekpɔde a.—Mat. 5:11, 12.
15 Kɛ mɔɔ ɔdole yɛ mediema mɔɔ ɛnee wɔ ɛvoya mɔɔ limoa la anu la, saa edwɛkpa ne ati yɛnwu amaneɛ a yɛdi fɛlɛko. (1 Pita 4:12-14) Ɔnyɛ yɛ fɛ kɛ bɛnwunlonwunla yɛ, bɛyɛ yɛ kpɔdekpɔde anzɛɛ bɛgua yɛ efiade la. Noko nɔhalɛ mɔɔ yɛdi la maa yɛ kunlu dwo yɛ nwo. Kɛ neazo la, suzu Henryk Dornik mɔɔ vale ɛvolɛ dɔɔnwo gyinlanle tumivolɛma mɔɔ bɛ ti yɛ se nyɛleɛ nloa la anwo nea. Ɔkakye kɛ wɔ August 1944, tumivolɛma ne vale ɔ nee ɔ diema nrenyia hɔdole efiade. Dwazotiama ne hanle kɛ: “Bɛngola bɛnli bɛ adwenle bɛmmaa bɛnyɛ debie biala. Saa bɛ diedi ne ati bɛku bɛ a ɔyɛ bɛ fɛ.” Adiema Dornik hilehilele nu kɛ: “Ɛnee ɔnyɛ me fɛ kɛ me diedi ne ati bɛbahu me, noko akɛnrasesebɛ nee nɔhalɛ mɔɔ menlile memaanle Gyihova wɔ enililɛ nu la maanle menlile fɛlɛko.”—Gye. 1:2-4.
Yɛka edwɛkɛ ne wɔ “azua nu” kɛ mɔɔ ɛzoanvolɛma ne yɛle la
16. Kɛzi ɛzoanvolɛma ne lale ye ali kɛ bɛbɔ kpɔkɛ kɛ bɛbali daselɛ bɔkɔɔ ɛ, na kɛ ɔkɛyɛ na yɛazukoa adenle mɔɔ bɛluale zo bɛlile daselɛ la ɛ?
16 Ɛzoanvolɛma ne anzɛkye mekɛ fee, bɛbɔle bɛ daselɛlilɛ gyima ne abo. Bɛnyianle akɛnrasesebɛ na “alehyenlɛ biala bɛhɔle ɛzonlenlɛsua ne anu nee azua nu bɛhilehilele na bɛhanle Kelaese Gyisɛse anwo edwɛkpa ne bɛhilele mɔɔ bɛangyakyi a.” d (Gyi. 5:42) Ɛnee nolobɔlɛma ɛhye mɔ mɔɔ bɔ mɔdenle la ɛzi kpɔkɛ kɛ bɛbali daselɛ bɔkɔɔ. Yɛ ye nzonlɛ kɛ bɛhɔhanle edwɛkɛ ne wɔ menli azua nu kɛ mɔɔ Gyisɛse hanle kɛ bɛyɛ la. (Mat. 10:7, 11-14) Ɔda ali kɛ adenle ɛhye azo a bɛluale bɛmaanle bɛ ngilehilelɛ ne dɛlɛle wɔ Gyɛlusalɛm a. Ɛnɛ, bɛze Gyihova Alasevolɛ kɛ bɛyɛ mɔɔ ɛzoanvolɛma ne yɛle la bie. Menli azua nu mɔɔ yɛkɔ la maa ɔda ali kɛ yɛdayɛ noko yɛkulo kɛ yɛdi daselɛ bɔkɔɔ na yɛmaa awie biala te edwɛkpa ne. Gyihova ɛyila azua nu daselɛlilɛ ne azo ɔ? Ɛhɛe! Menli mgbe dɔɔnwo ɛde Belemgbunlililɛ edwɛkɛ ne wɔ awieleɛ mekɛ ɛhye anu, na bɛ nuhua dɔɔnwo limoa dele edwɛkɛ ne wɔ mekɛ mɔɔ Dasevolɛ bie hɔbɔle bɛ anlenkɛ nu la.
Mrenyia Mɔɔ Fɛta La Lile Edwɛkɛ Bie Mɔɔ “Nwolɛ Hyia” La Anwo Gyima (Gyima ne 6:1-6)
17-19. Edwɛkɛ mɔɔ bahola ava mgbakyemgbakyenu ara la boni a zile a, na adehilelɛ boni a ɛzoanvolɛma ne vale maanle amaa bɛali nwolɛ gyima a?
17 Asafo fofolɛ ne yiale ngyegyelɛ mɔɔ bahola azɛkye koyɛlɛ mɔɔ wɔ nu la. Duzu ngyegyelɛ ɔ? Ɛdoavolɛma dɔɔnwo mɔɔ bɛzɔnenle bɛ la ɛnvi Gyɛlusalɛm na ɛnee bɛkulo kɛ bɛsukoa ninyɛne dɔɔnwo na bazia bɛahɔ bɛ sua zo. Ɛdoavolɛma mɔɔ wɔ Gyɛlusalɛm la vile bɛ ɛhulolɛ nu yele ndoboa mɔɔ bɛbava badɔ aleɛ nee ninyɛne gyɛne mɔɔ bɛhyia nwo la. (Gyi. 2:44-46; 4:34-37) Edwɛkɛ bie mɔɔ hyia la zile wɔ mekɛ ɛhye anu. ‘Bɛbule bɛ nye bɛguale’ ahunlanvolɛ mɔɔ ka Giliki la anwo zo wɔ aleɛ mɔɔ “bɛkyɛ ye alehyenlɛ biala la anu.” (Gyi. 6:1) Noko bɛambu bɛ nye bɛangua ahunlanvolɛ mɔɔ ka Hibulu la anwo zo. Nyeyenu mɔɔ bɛyɛle la a vale ngyegyelɛ ɛhye rale a. Nyeyenu bahola ava mgbakyemgbakyenu ara.
18 Ɛzoanvolɛma ne mɔɔ ɛnee le asafo ne mɔɔ ɛlɛnyi neazo eku ne la nwunle kɛ ɔnle kpalɛ kɛ bɛkɛgyakyi Nyamenle edwɛkɛ ne na ‘bɛkɛhyɛ aleɛ.’ (Gyi. 6:2) Amaa bɛali edwɛkɛ ne anwo gyima la, bɛhanle bɛhilele ɛdoavolɛma ne kɛ bɛye mrenyia nsuu mɔɔ “sunsum ne ɛyi bɛ tɛkɛɛ na bɛze nrɛlɛbɛ” mɔɔ ɛzoanvolɛma ne bahola akpa bɛ la bɛmaa bɛli edwɛkɛ ɛhye mɔɔ “nwolɛ hyia” la anwo gyima. (Gyi. 6:3) Ɛnee bɛhyia mrenyia mɔɔ fɛta la anwo ɔluakɛ tɛ aleɛ angomekye a bɛbahyɛ a, emomu ɛnee bɛbanlea ezukoa zo, bɛbatotɔ ninyɛne na bɛayɛ nwolɛ kɛlɛtokɛ kpalɛ. Mrenyia mɔɔ bɛkpale bɛ la amuala lɛ Giliki aluma, ɔti bie a ɛhye maanle ahunlanvolɛ mraalɛ mɔɔ vale ɛya la anye liele. Mɔɔ ɛzoanvolɛma ne vale asɔneyɛlɛ zuzule menli ne anwo wiele la, bɛkpale mrenyia nsuu ne kɛ bɛnlea bɛli edwɛkɛ ne mɔɔ “nwolɛ hyia” la anwo gyima. e
19 Asoo aleɛ mɔɔ mrenyia nsuu ne mɔɔ bɛkpale bɛ la hyɛle la kile kɛ bɛammaa bɛanyɛ edwɛkpa ne nolobɔlɛ gyima ne bie ɔ? Ɔnle zɔ fee! Mrenyia mɔɔ bɛkpale bɛ la bie a le Sitivin mɔɔ nzinlii vale akɛnrazilɛ nee tumi lile daselɛ la. (Gyi. 6:8-10) Ɛnee Felepe noko boka mrenyia nsuu ne anwo na ɛnee bɛfɛlɛ ye “edwɛkpakavolɛ.” (Gyi. 21:8) Ɔda ali kɛ mrenyia nsuu ne hɔle zo yɛle Belemgbunlililɛ ne nolobɔlɛma mɔɔ bɔ mɔdenle a.
20. Kɛzi Nyamenle menli mɔɔ wɔ ɛkɛ ɛnɛ la di ɛzoanvolɛma ne neazo ne anzi ɛ?
20 Gyihova menli mɔɔ wɔ ɛkɛ ne ɛnɛ la di ɛzoanvolɛma ne neazo ne anzi. Ɔwɔ kɛ mrenyia mɔɔ bɛva ɛzonlelilɛ bɛwula bɛ sa nu wɔ asafo ne anu la da ye ali kɛ sunsum ne ɛyi bɛ tɛkɛɛ yɛɛ bɛlɛ anwuma nrɛlɛbɛ. Bɛdua adehilelɛ mɔɔ bɛnyia bɛfi Neazo Eku ne ɛkɛ la azo bɛkpa mrenyia mɔɔ bɛdwu ninyɛne mɔɔ Ngɛlɛlera ne ka nwolɛ edwɛkɛ la anwo la bɛmaa bɛsonle kɛ asafo nu mgbanyima nee azonvolɛ wɔ asafo ne anu. f (1 Tim. 3:1-9, 12, 13) Ɔti yɛkola yɛka kɛ sunsum nwuanzanwuanza ne a ɛkpa mrenyia ɛhye mɔ a ɔluakɛ bɛdwu ninyɛne mɔɔ Ngɛlɛlera ne ka la anwo. Mrenyia ɛhye mɔ mɔɔ yɛ gyima ɛsesebɛ la di ninyɛne mɔɔ “nwolɛ hyia” la anwo gyima. Kɛ neazo la, bie a mgbanyima ne mɔ bɛanlea kɛ menli mɔɔ bɛ nye ɛvi la asa bɛaha ninyɛne mɔɔ bɛhyia nwo la. (Gye. 1:27) Mgbanyima bie mɔ boa maa bɛsisi Belemgbunlililɛ Asalo, bɛyɛ nyianu nwo ngyehyɛleɛ anzɛɛ bɛ nee Asopiti Ngitanwolilɛ Kɔmatii ne yɛ gyima. Azonvolɛ yɛ ninyɛne dɔɔnwo mɔɔ ɛnle mboaneneavolɛ ɛkpɔlalɛ nee ngilehilelɛ gyima la fa boa asafo ne. Ɔwɔ kɛ mrenyia ɛhye mɔ mɔɔ fɛta la amuala di ɛzonlelilɛ mɔɔ bɛlɛ ye wɔ asafo ne nee ahyehyɛdeɛ ne anu la anwo gyima na eza bɛbɔ Belemgbunlililɛ edwɛkpa ne nolo.—1 Kɔl. 9:16.
“Nyamenle Edwɛkɛ Ne Hɔle Zo Dɛlɛle” (Gyima ne 6:7)
21, 22. Duzu a kile kɛ Gyihova yilale asafo fofolɛ ne a?
21 Ɔlua Gyihova moalɛ zo asafo fofolɛ ne holale gyinlanle kpɔdekpɔdeyɛlɛ nee edwɛkɛ mɔɔ anrɛɛ bahola ava mgbakyemgbakyenu ara la anloa. Ɔda ali kɛ ɛnee Gyihova ɛlɛyila bɛ ɔluakɛ yɛkenga kɛ: “Nyamenle edwɛkɛ ne hɔle zo dɛlɛle, na ɛdoavolɛma ne dodo yɛle mɔnwo dɔɔnwo wɔ Gyɛlusalɛm; na ɛsɔfoma dɔɔnwo rayɛle diedima.” (Gyi. 6:7) Ɛhye le anyuhɔlɛ dɔɔnwo mɔɔ bɛha nwolɛ edwɛkɛ wɔ Gyima buluku ne anu la anu ko ala. (Gyi. 9:31; 12:24; 16:5; 19:20; 28:31) Ɛnɛ, saa yɛte anyuhɔlɛ mɔɔ yɛnyia ye wɔ Belemgbunlililɛ edwɛkɛhanlɛ gyima ne anu wɔ ewiade amuala la anwo amaneɛbɔlɛ a, yɛ nye ɛnlie ɔ?
22 Wɔ ɛvoya mɔɔ limoa Y.M., ɛzonlenlɛ nu mgbanyima mɔɔ ɛnee bɛva ɛya la angyakyi mɔɔ bɛlɛyɛ la. Ɛnee kpɔdekpɔdeyɛlɛ bieko lua adenle zo. Yeangyɛ, Sitivin yiale dwazotia mɔɔ anu yɛ se la kɛ mɔɔ yɛbanwu ye wɔ tile mɔɔ doa zo la anu la.
a Eza nea “ Sanhedelin Ne—Dwuuma Kɔɔto Kpole.”
b Bɛha anwumabɔvolɛma anwo edwɛkɛ fane 20 wɔ Gyima ne anu na ɛhye a limoa a. Bɛha bɛ nwo edwɛkɛ wɔ Gyima ne 1:10 kɛ ‘mrenyia mɔɔ wula adɛladeɛ fufule.’
c Nea ɛlɛka “ Gameeleɛle—Relabaenli Mɔɔ Bɛbu Ye.”
d Nea ɛlɛka “ Bɛhanle Edwɛkɛ Ne ‘Wɔ Azua Nu’.”
e Ɔbayɛ kɛ ɛnee mrenyia ɛhye mɔ fɛta kɛ bɛsonle kɛ mgbanyima, ɔluakɛ ɛnee edwɛkɛ ɛhye mɔɔ “nwolɛ hyia” la le ɛzonlelilɛ kpole. Noko akee, Ngɛlɛlera ne ɛngile mekɛ fɔɔnwo mɔɔ bɛbɔle ɔ bo bɛkpale mrenyia kɛ mgbanyima anzɛɛ neavolɛma wɔ Kilisiene asafo ne anu la.
f Wɔ ɛvoya ne mɔɔ limoa la anu, bɛmaanle mrenyia mɔɔ fɛta la adenle kɛ bɛkpa asafo nu mgbanyima. (Gyi. 14:23; 1 Tim. 5:22; Tae. 1:5) Ɛnɛ, Neazo Eku ne kpa maangyebakyi zo neavolɛma na bɛmaa neavolɛma ɛhye mɔ adenle kɛ bɛkpa asafo nu mgbanyima nee azonvolɛ.
