TILE 20
“Ɔdɛlɛle Na Ɔlile Konim Dɔɔnwo” Ɔnva Nwo Dwazotia
Kɛzi Apɔlɔso nee Pɔɔlo boale maanle edwɛkpa ne nyianle anyuhɔlɛ la
Ɔgyi Gyima ne 18:23–19:41 azo
1, 2. (a) Edwɛkɛ boni a dole Pɔɔlo nee ɔ gɔnwo mɔ wɔ Ɛfɛsɛse a? (b) Duzu a yɛbazuzu nwo wɔ tile ɛhye anu a?
MENLI dɔɔnwo mɔɔ ɛlɛnriandi la ɛlɛteɛdea nu ayɛ dede wɔ Ɛfɛsɛse gua ne mɔ azo. Menli ekpunli bie ɛlɛyɛ basabasa! Bɛhye ɛzoanvolɛ Pɔɔlo agɔnwo mɔ nwiɔ na bɛlɛtwili bɛ bɛahɔ. Menli mɔɔ lɛ sotɔɔ wɔ gua ne azo la ɛtoto nu na bɛlɛnriandi bɛadoa menli dɔɔnwo ne bɛahɔ nwɔhoalilɛleka ne mɔɔ kola fa menli 25,000 la. Bɛ nuhua dɔɔnwo ɛnze deɛmɔti basabasayɛlɛ ne ɛlɛkɔ zo la, noko bɛsuzu kɛ ɔfale bɛ ɛzonlenlɛsua ne nee nyamenle raalɛ Aatɛmese mɔɔ bɛkulo ye edwɛkɛ kpalɛ la anwo. Ɔti bɛbɔle ɔ bo bɛdeɛdeanle nu ɛsesebɛ kɛ: “Ɛfɛsɛsema Aatɛmese ne le kpole!”—Gyi. 19:34.
2 Eza yɛnwu ye wɔ ɛke kɛ Seetan ɛlɛdua basabasayɛlɛma anwo zo azi Nyamenle Belemgbunlililɛ edwɛkpa ne nolobɔlɛ adenle. Tɛ basabasayɛlɛ ala a Seetan fa di gyima a. Yɛbazuzu ndenle mɔɔ Seetan luale zo honle tiale edwɛkɛhanlɛ gyima ne nee koyɛlɛ mɔɔ ɛnee wɔ alimoa Kilisienema avinli la anwo wɔ tile ɛhye anu. Mɔɔ hyia kpalɛ la, yɛbanwu kɛ ye ndenle ne mɔ anyɛ gyima ɔluakɛ “Gyihova tumi ne ati, ye edwɛkɛ ne hɔle zo dɛlɛle na ɔlile konim dɔɔnwo.” (Gyi. 19:20) Duzu a maanle Kilisienema zɔhane mɔ lile konim a? Bɛnyianle moalɛ mɔɔ yɛnyia ye ɛnɛ la bie. Nɔhalɛ nu, konimlilɛ ne vi Gyihova na ɔnvi yɛ ɛkɛ. Noko, ɔwɔ kɛ yɛyɛ yɛ afoa nu ɛdeɛ kɛ mɔɔ alimoa Kilisienema yɛle la. Gyihova sunsum ne bamaa yɛanyia subane mɔɔ baboa yɛ yeamaa yɛayɛ yɛ ɛzonlenle gyima ne kpalɛ la. Bɛmaa yɛlimoa yɛzuzu Apɔlɔso neazo ne anwo.
“Ɔze Ngɛlɛlera Ne Kpalɛ” (Gyima ne 18:24-28)
3, 4. Duzu a Akoyela nee Pelesela nwunle kɛ Apɔlɔso ɛnze a, na kɛzi bɛlile nwolɛ gyima ɛ?
3 Mekɛ mɔɔ Pɔɔlo hɔle Ɛfɛsɛse wɔ ye edwɛkpatɛlɛvolɛ adendulɛ mɔɔ tɔ zo nsa la anu, Dwuunli bie mɔɔ bɛfɛlɛ ye Apɔlɔso la rale suakpole ne azo. Ɛnee ɔvi Yigyibiti suakpole Alɛzandelea mɔɔ ɛlie duma la azo. Apɔlɔso bɔ mɔdenle kpalɛ. Ɔze tendɛ kpalɛ. Ɔ nloa ɛde. Eza “ɔze Ngɛlɛlera ne kpalɛ.” Bieko, ɛnee “sunsum ne maa ɔbɔ mɔdenle kpalɛ.” Apɔlɔso vale mɔdenlebɔlɛ nee akɛnrazilɛ dendɛle hilele Dwuuma wɔ nyianusua ne anu.—Gyi. 18:24, 25.
4 Akoyela nee Pelesela dele kɛ Apɔlɔso ɛlɛtendɛ. Bɛ nye liele wɔ mekɛ mɔɔ bɛdele kɛ ɔlɛkilehile “Gyisɛse anwo ninyɛne pɛpɛɛpɛ” la. Gyisɛse anwo edwɛkɛ mɔɔ ɔhanle la le nɔhalɛ. Noko, yeangyɛ agyalɛma ne nwunle kɛ Apɔlɔso ɛnze debie bie mɔɔ anwo hyia la. Ɛnee “Dwɔn ɛzɔnenlɛ ne ala a ɔze a.” Agyalɛma ɛhye mɔɔ ɛnlɛ bie na bɛyɛ ɛdanlɛsua la ammaa Apɔlɔso anloa mɔɔ ɛde nee nwoma mɔɔ ɔze la anga bɛ ɛzulolɛ. Emomu, “bɛvale ye bɛbokale bɛ nwo na bɛhilele ye Nyamenle adenle ne wienyi.” (Gyi. 18:25, 26) Duzu a nrenyia ɛhye mɔɔ ze tendɛ na ɔze nwoma la yɛle a? Nɔhalɛ nu, ɔlale subane mɔɔ anwo hyia mɔɔ ɔwɔ kɛ Kilisienenli nyia la bie ali—mɛlɛbɛnwoaze.
5, 6. Duzu a boale Apɔlɔso maanle Gyihova vale ye lile gyima a, na duzu a yɛsukoa yɛfi Apɔlɔso neazo ne anu a?
5 Kɛmɔ Apɔlɔso liele Akoyela nee Pelesela moalɛ dole nu la ati, ɔrayɛle Gyihova sonvolɛ mɔɔ bɔ mɔdenle kpalɛ la. Ɔdule adenle ɔhɔle Akɛya na “ɔboale” diedima ne. Ye ngilehilelɛ ne eza boale Dwuuma mɔɔ wɔ maanzinli zɔhane anu mɔɔ ka kɛ tɛ Gyisɛse a le Mɛzaya ne la. Luku bɔ amaneɛ kɛ: “Ɔbɔle mɔdenle ɔhilele ye wɔ bagua nu kɛ Dwuuma ne mɔ ngilehilelɛ ne ɛnle kpalɛ, na ɔluale Ngɛlɛlera ne azo ɔhilele bɛ kɛ Gyisɛse a le Kelaese ne a.” (Gyi. 18:27, 28) Nea kɛzi Apɔlɔso boale kpole la! Ɔboka nwolɛ bie a ‘Gyihova edwɛkɛ ne’ hɔle zo lile konim a. Duzu a yɛbahola yɛazukoa yɛavi Apɔlɔso neazo ne anu a?
6 Ɔwɔ kɛ Kilisienema kɔsɔɔti bɛlɛ bɛ nwo aze. Yɛ muala yɛlɛ ahyɛlɛdeɛ bie mɔ—ɔbahola yeayɛ debie bie mɔɔ yɛze ye yɛ, anwubielɛ anzɛɛ ndelebɛbo bie mɔɔ yɛnyia. Noko, ɔwɔ kɛ yɛmaa yɛ mɛlɛbɛnwoaze ne yɛ kpole tɛla mɔɔ yɛkola yɛyɛ la. Tɛ ye zɔ a, mɔɔ yɛkola yɛyɛ la azo ɛnrɛra nvasoɛ. Ɔbahola yeamaa yɛanyia anwomemaazo subane. (1 Kɔl. 4:7; Gye. 4:6) Saa yɛbɛlɛ yɛ nwo aze amgba a, yɛbabɔ mɔdenle yɛabu awie mɔ kɛ bɛtɛla yɛ. (Fel. 2:3) Awie mɔ tenrɛdenrɛ yɛ anzɛɛ bɛkilehile yɛ a yɛnrɛva ɛya. Saa yɛnwu kɛ adwenle mɔɔ yɛlɛ la nee mɔɔ sunsum nwuanzanwuanza ne ɛlɛkile ye kɛkala la ɛnle ko a, yɛnrɛyɛ kyengye wɔ mɔɔ yɛze la anwo. Saa yɛkɔ zo yɛbɛlɛ yɛ nwo aze a, Gyihova nee ɔ Ra ne bava yɛ ali gyima.—Luku 1:51, 52.
7. Mɛlɛbɛnwoaze nwo neazo boni a Pɔɔlo nee Apɔlɔso yɛle a?
7 Mɛlɛbɛnwoaze maa yɛkpo kɛ yɛ nee awie mɔ kɛzu. Wɔnwu kɛzi ɛnee Seetan kulo kɛ ɔfa mgbakyemgbakyenu ɔba alimoa Kilisienema avinli la ɔ? Nea kɛzi anrɛɛ Seetan anye balie kɛ Pɔɔlo nee Apɔlɔso kɛzu na bɛkɛbɔ mɔdenle kɛ bɛdie duma wɔ asafo ne anu a! Anrɛɛ ɔnrɛyɛ se kɛ bɛbayɛ zɔ. Kilisienema mɔɔ wɔ Kɔlente la bie mɔ bɔle ɔ bo hanle kɛ, “Mele Pɔɔlo ɛdeɛ,” yɛɛ bie mɔ noko hanle kɛ, “Mele Apɔlɔso ɛdeɛ.” Asoo Pɔɔlo nee Apɔlɔso maanle bɛ adenle ɔ? Kyɛkyɛ! Mɛlɛbɛnwoaze maanle Pɔɔlo nwunle Apɔlɔso mɔdenlebɔlɛ ne na ɔmaanle ye gyimalilɛ dɔɔnwo. Apɔlɔso noko liele Pɔɔlo adehilelɛ dole nu. (1 Kɔl. 1:10-12; 3:6, 9; Tae. 3:12, 13) Nea kɛzi mɛlɛbɛnwoaze mɔɔ bɛvale bɛbɔle nu bɛyɛle gyima la le neazo maa yɛ ɛnɛ la!
“Ɔ Nee Bɛ Zuzule Nyamenle Belemgbunlililɛ Ne Anwo” (Gyima ne 18:23; 19:1-10)
8. Adenle boni a Pɔɔlo luale zo ziale rale Ɛfɛsɛse a, na duzu ati ɔ?
8 Pɔɔlo bɔle ɛwɔkɛ kɛ ɔbazia yeara Ɛfɛsɛse, na ɔlile ye ɛwɔkɛ zo. a (Gyi. 18:20, 21) Noko, yɛ adenle mɔɔ ɔluale zo ɔrale la nzonlɛ. Mekɛ mɔɔ li awieleɛ mɔɔ yɛdele ye nganeɛ la ɛnee ɔwɔ Anteɔko mɔɔ wɔ Selea la. Amaa yeadwu Ɛfɛsɛse la, anrɛɛ ɔbahola yeapɛ adenle sikalɛ yeahɔ Sɛlusea, na yeava meli wɔ ɛkɛ ne yeara Ɛfɛsɛse. Noko, “[ɔhɔle] maanzinli ne mɔ mɔɔ ɛmbikye nyevile ne la anu.” Mgbondabulɛ bie kile kɛ Pɔɔlo adendulɛ ne mɔɔ bɛha nwolɛ edwɛkɛ wɔ Gyima ne 18:23 nee 19:1 la bayɛ mayɛlɛ apenle ko! Duzu ati a Pɔɔlo luale adenle mɔɔ zolɛ ɛvalɛ ɛnla aze la azo ɛ? Ɔluakɛ ɛnee ɔkulo kɛ ‘ɔmaa ɛdoavolɛma ne amuala anwosesebɛ.’ (Gyi. 18:23) Ye adendulɛ mɔɔ tɔ zo nsa la le kɛ nwiɔ ne mɔɔ limoa la, ɛnee ɔbamaa yeavɛ noko ɔbule ye kɛ nvasoɛ wɔ zo. Maangyebakyi zo neavolɛma nee bɛ ye mɔ da subane ko ne ala bie ali ɛnɛ. Asoo ɔnle kɛ yɛkile ɛlɔlɛ mɔɔ bɛda ye ali la anwo anyezɔlɛ ɔ?
9. Duzu ati a ɛnee ɔwɔ kɛ bɛsia bɛsɔne ɛdoavolɛma bie mɔ a, na duzu a yɛsukoa yɛfi bɛ ɛkɛ a?
9 Mɔɔ Pɔɔlo dwule Ɛfɛsɛse la, ɔnwunle Dwɔn Sɔnevolɛ ne ɛdoavolɛma kɛyɛ bulu nee nwiɔ wɔ ɛkɛ. Ngyehyɛleɛ mɔɔ bɛluale zo bɛzɔnenle bɛ la ɛkpa nwo. Eza ɔzɔho kɛ ɛnee bɛtɛtele sunsum nwuanzanwuanza ne anwo edwɛkɛ anzɛɛ bɛnze nwolɛ ɛhwee. Pɔɔlo boale bɛ maanle bɛdele ngyehyɛleɛ fofolɛ ne abo na bɛbɛlɛle bɛ nwo aze bɛliele bɛdole nu kɛ Apɔlɔso la. Mɔɔ bɛzɔnenle bɛ wɔ Gyisɛse duma nu la, bɛnyianle sunsum nwuanzanwuanza ne nee sunsum nu ahyɛlɛdeɛ ngakyile bie mɔ. Nɔhalɛ nu, saa yɛdi Gyihova ahyehyɛdeɛ ne mɔɔ ɛlɛnyia anyuhɔlɛ la adehilelɛ zo a, yɛnyia nyilalɛ.—Gyi. 19:1-7.
10. Duzu ati a Pɔɔlo vile nyianusua ne anu hɔle sukulu sua nu a, na kɛzi ɔle neazo ɔmaa yɛ wɔ yɛ ɛzonlenlɛ gyima ne anu ɛ?
10 Yeangyɛ bɛnyianle anyuhɔlɛ. Pɔɔlo vale akɛnrazilɛ hanle edwɛkɛ ne wɔ nyianusua ne anu siane nsa. Ɔnva nwo kɛ “ɔ nee bɛ zuzule Nyamenle Belemgbunlililɛ ne anwo wɔ adenle mɔɔ tɔ ɛnzolɛ nu la azo” la, bie mɔ andie ye na bɛdwazole bɛtiale ye. Pɔɔlo anzɛkye ye mekɛ wɔ menli mɔɔ “bɛhanle Adenle Ne anwo edwɛkɛ ɛtane” la anwo, emomu ɔyɛle ngyehyɛleɛ na ɔhɔhanle edwɛkɛ ne wɔ sukulu sua bie anu. (Gyi. 19:8, 9) Ɛnee ɔwɔ kɛ menli mɔɔ kulo kɛ nyia sunsum nu anyuhɔlɛ la fi nyianusua ne anu kɔ sukulu sua ne anu. Bie a saa yɛnwu kɛ suamenle bie ɛngulo kɛ ɔtie yɛ anzɛɛ ɔ nee yɛ su kpolera a yɛbapɛ adawubɔlɛ bie azo kɛ mɔɔ Pɔɔlo yɛle la. Ahonlekpalɛma dɔɔnwo wɔ ɛkɛ mɔɔ ɔwɔ kɛ bɛte yɛ edwɛkɛ ne mɔɔ maa anwosesebɛ la!
11, 12. (a) Kɛzi Pɔɔlo mɔdenlebɔlɛ nee ye edwɛkɛ ne mɔɔ ɔkakyi nu la le neazo maa yɛ ɛ? (b) Kɛzi Gyihova Alasevolɛ bɔ mɔdenle na bɛkakyi bɛ edwɛkɛ nu wɔ daselɛlilɛ nu ɛ?
11 Ɔbayɛ kɛ Pɔɔlo hanle edwɛkɛ ne wɔ sukulu sua ne anu wɔ kɛyɛ nwonlomɔ 11:00 kɔdwu nɔsolɛ 4:00. (Gyi. 19:9) Ɔdwu mekɛ zɔhane a maanle nu le koonwu yɛɛ wuluwulu wɔ nu, ɔti menli fa die bɛ menle na bɛdi aleɛ. Saa Pɔɔlo vale ɛvolɛ nwiɔ yɛle gyima ɛsesebɛ ɛhye a, ɔkile kɛ ɔvale dɔnehwele mɔɔ bo 3,000 la ɔhilehilele bɛ. b Ɛhye noko boka nwolɛ bie a Gyihova edwɛkɛ ne hɔle zo dɛlɛle na ɔlile konim dɔɔnwo la. Ɛnee Pɔɔlo bɔ mɔdenle yɛɛ ɔdi tɛnlabelɛ biala anwo gyima. Ɔyɛle nzenzaleɛ wɔ mekɛ mɔɔ ɔfa ɔdi daselɛ la anu amaa ɔ sa aha menli mɔɔ ɛnee bɛwɔ ɛleka zɔhane la. Duzu a vi nu rale a? “Bɛdabɛ mɔɔ bɛwɔ Ehyea maanzinli ne anu la, Dwuuma nee Gilikima amuala dele Awulae edwɛkɛ ne.” (Gyi. 19:10) Nea kɛzi ɔlile daselɛ bɔkɔɔ la!
Yɛbɔ mɔdenle yɛka edwɛkɛ ne wɔ ɛleka biala mɔɔ menli wɔ la
12 Ɛnɛ noko Gyihova Alasevolɛ bɔ mɔdenle yɛɛ bɛdi tɛnlabelɛ biala anwo gyima. Yɛbɔ mɔdenle yɛka edwɛkɛ ne yɛkile menli wɔ ɛleka biala nee mekɛ biala mɔɔ yɛkɛnwu bɛ la. Yɛdi daselɛ wɔ gua zo nee gua nu yɛɛ kale agyinlaleɛ. Bie a yɛdua fonu anzɛɛ kɛlata ɛhɛlɛlɛ zo yɛdi menli daselɛ. Eza yɛbɔ mɔdenle yɛka edwɛkɛ ne wɔ menli azua nu wɔ mekɛ mɔɔ yɛkɔ ɛkɛ a yɛbado bɛ la.
“Ɔdɛlɛle Na Ɔlile Konim Dɔɔnwo” Ɔnva Nwo Sunsum Ɛtane Gyimalilɛ (Gyima ne 19:11-22)
13, 14. (a) Duzu a Gyihova boale Pɔɔlo maanle ɔyɛle a? (b) Nvonleɛ boni a Siva amra mrenyia ne mɔ yɛle a, na kɛzi asɔne ngakyile yɛ bɛ nvonleɛ ne bie ɛnɛ ɛ?
13 Luku bɔ amaneɛ kɛ Pɔɔlo ɛzonlenlɛ gyima ne nyianle anyuhɔlɛ dɔɔnwo ɔluakɛ Gyihova boale ye maanle ɔyɛle “nwanwane ninyɛne mgbole dɔɔnwo.” Bɛvale Pɔɔlo adɛladeɛ nee ye aguzo bɔbɔ bɛhɔguale wuliravolɛma anwo zo bɛmaanle bɛdele kpɔkɛ. Bɛluale adenle ɛhye noko azo bɛdule sunsum ɛtane ne mɔ. c (Gyi. 19:11, 12) Seetan asa zo ne mɔ mɔɔ bɛlile bɛ nwo zo konim la zinle menli dɔɔnwo anwo, noko tɛ awie biala a anye liele nwolɛ a.
14 “Dwuuma bie mɔ mɔɔ bɛluolua nu bɛtu sunsum ɛtane” la yɛle kɛ bɛyɛ Pɔɔlo nwanwane ninyɛne ne mɔ bie. Dwuuma ɛhye mɔ bie bɔle Gyisɛse nee Pɔɔlo duma kɛ bɛfa bɛadu sunsum ɛtane. Luku hanle Siva amra mrenyia nsuu ne—mɔɔ vi ɛsɔfo abusua nu—mɔɔ bɔle mɔdenle kɛ bɛyɛ ɛhye la neazo ne. Sunsum ɛtane ne hanle hilele bɛ kɛ: “Meze Gyisɛse yɛɛ meze Pɔɔlo; na bɛmɛ bɛle nwane mɔ?” Nrenyia ne mɔɔ sunsum ɛtane ne wɔ ɔ nwo la hɔle adalɛma zɔhane mɔ anwo zo kɛ nane anwo ɛzulolɛ la, na bɛlɛle bɛ nwo zɔ bɛnriandile. (Gyi. 19:13-16) Ɛhye maanle ‘Gyihova edwɛkɛ ne’ lile konim kpole, ɔluakɛ ɔmaanle bɛnwunle ngakyile wienyi mɔɔ wɔ tumi mɔɔ bɛvale bɛmaanle Pɔɔlo nee mɔɔ adalɛ ɛzonlenlɛma ne lɛ la anu. Ɛnɛ, menli mgbe dɔɔnwo dwenle kɛ saa bɛbɔ Gyisɛse duma anzɛɛ bɛfɛlɛ bɛ nwo “Kilisienema” a ɛnee yewie. Kɛ mɔɔ Gyisɛse hanle la, menli mɔɔ yɛ ɔ Ze ɛhulolɛdeɛ la ala a lɛ anyelazo kpalɛ kenle bie a.—Mat. 7:21-23.
15. Kɛ ɔkɛyɛ na yɛazukoa Ɛfɛsɛsema neazo ne wɔ sunsum ɛtane nyɛleɛ nee bɛ ninyɛne nwo ɛ?
15 Anyiemgba mɔɔ Siva amra ne mɔ bɔle la maanle menli ne zulole Nyamenle na bɛ nuhua dɔɔnwo rayɛle diedima na bɛgyakyile sunsum ɛtane nyɛleɛ. Ɛnee Ɛfɛsɛsema amaamuo gyi ngonyia ɛyelɛ zo. Ɛnee ngonyia nee banzɛlɛ ɛbu zo wɔ ɛkɛ yɛɛ bɛlɛ edwɛkɛ mɔɔ bɛhɛlɛ mɔɔ bɛta bɛka la. Mɔɔ zile la hanle Ɛfɛsɛsema dɔɔnwo ɔmaanle bɛvale bɛ ngonyia mbuluku bɛrale na bɛyelale bɛ wɔ bagua nu—ɔnva nwo kɛ ɛnee ye bolɛ bo dɔla apenle apenle dɔɔnwo la. d Luku ka kɛ: “Na ɔlua Gyihova tumi ne ati, ye edwɛkɛ ne hɔle zo dɛlɛle na ɔlile konim dɔɔnwo.” (Gyi. 19:17-20) Nea konim kpole mɔɔ nɔhalɛ ne lile wɔ adalɛ nee sunsum ɛtane nyɛleɛ zo la! Nɔhavoma ɛhye mɔ yɛle neazo maanle yɛ. Yɛdayɛ noko yɛde ewiade mɔɔ sunsum ɛtane nyɛleɛ ɛbu zo la anu. Saa yɛnwu kɛ yɛlɛ sunsum ɛtane nyɛleɛ debie bie a, ɔwɔ kɛ yɛyɛ mɔɔ Ɛfɛsɛsema yɛle la bie—yɛsɛkye ye ndɛndɛ! Bɛmaa yɛhwe yɛ nwo yɛvi nyɛleɛ ɛtane ɛhye mɔ anwo, saa bɔbɔ ɔnla aze kɛ yɛbayɛ zɔ a.
“Basabasayɛlɛ Kpole Bie Zile” (Gyima ne 19:23-41)
“Ayi mɔ, bɛ muala bɛze kɛ gyima ɛhye a maa yɛnyia yɛ nwo a.”—Gyima ne 19:25
16, 17. (a) Ka kɛzi Dimiteleɛse maanle menli yɛle basabasa wɔ Ɛfɛsɛse la anwo edwɛkɛ. (b) Kɛzi Ɛfɛsɛsema lale ye ali kɛ bɛkulo bɛ maanle ne ɛ?
16 Akee yɛdwu adenle mɔɔ Seetan luale zo maanle basabasayɛlɛ rale la azo. Luku hanle kɛ: “Basabasayɛlɛ kpole bie zile mɔɔ fale Adenle Ne anwo.” Tɛ kɛ ɛnee ɔlɛwudu edwɛkɛ ne anu. e (Gyi. 19:23) Dwinvolɛ bie mɔɔ bɛfɛlɛ ye Dimiteleɛse la a vale ngyegyelɛ ne rale a. Ɔhakyele ɔ gɔnwo mɔ dwinvolɛma kɛ ɔwɔ kɛ bɛtɔne ananze amaa bɛanyia bɛ nwo. Ɔhanle kɛ edwɛkɛ mɔɔ Pɔɔlo ɛlɛka la bamaa bɛ gyima azɛkye ɔluakɛ Kilisienema ɛnzonle awozonle. Akee ɔhanle debie mɔɔ bɛfa bɛtu bɛ nwo nee maanle nwo ɛhulolɛ nwo edwɛkɛ na ɔbɔle bɛ kɔkɔ kɛ bɛannea boɛ a ɔbamaa bɛabu bɛ nyamenle raalɛ Aatɛmese nee ɛzonlenlɛsua ne mɔɔ ɛlie duma la “debie mgbane.”—Gyi. 19:24-27.
17 Dimiteleɛse edwɛkɛ ne maanle ɔ sa hanle mɔɔ ɔkpondɛ la. Dwinvolɛma ne bɔle ɔ bo deɛdeanle nu kɛ, “Ɛfɛsɛsema Aatɛmese ne le kpole!” na suakpole ne azo yɛle begyebegye, ɛhye vale basabasayɛlɛ ne mɔɔ bɛha nwolɛ edwɛkɛ wɔ tile ɛhye mɔlebɛbo la rale. f Kɛmɔ Pɔɔlo lɛ tunwomaa la ati, ɛnee ɔkpondɛ kɛ ɔ nee menli dɔɔnwo ne kɔtendɛ wɔ nwɔhoalilɛleka ne, noko ɛdoavolɛma ne hanle kɛ ɔmmafa ɔ nwo ɔto esiane nu. Awie bie mɔɔ bɛfɛlɛ ye Alɛzanda la dwazole gyinlanle menli ne anyunlu na ɔbɔle ɔ bo kɛ ɔtendɛ. Kɛmɔ ɔle Dwuunli la ati, bie a ɛnee ɔkulo kɛ ɔkilehile ngakyile mɔɔ wɔ Dwuuma nee Kilisienema ne avinli la anu. Ɛnee ngilenu zɛhae anwo ɛngyia menli ne. Mɔɔ bɛnwunle kɛ ɔle Dwuunli la, bɛdeɛdeanle nu kɛyɛ dɔnehwele nwiɔ kɛ: “Ɛfɛsɛsema Aatɛmese ne le kpole!” Ɛnɛ noko menli yɛ kyengye wɔ bɛ ɛzonlenlɛ nwo. Ɔmmaa menli ɛnde edwɛkɛ bo fee.—Gyi. 19:28-34.
18, 19. (a) Kɛzi kpanyinli bie maanle menli ne yɛle koonwu wɔ Ɛfɛsɛse ɛ? (b) Kɛzi ɔyɛ a tumivolɛma bie mɔ bɔ Gyihova menli nwo bane ɛ, na duzu a ɔwɔ kɛ yɛyɛ amaa yɛanyia banebɔlɛ zɛhae ɛ?
18 Akee kpanyinli bie maanle menli ne yɛle koonwu. Kpanyinli ɛhye mɔɔ ze nrɛlɛbɛ la hakyele menli ne kɛ Kilisienema ɛnrɛzɛkye bɛ ɛzonlenlɛsua ne nee bɛ nyamenle raalɛ ne, eza Pɔɔlo nee ɔ gɔnwo mɔ ɛtɛyɛle ɛtane biala ɛtɛtiale Aatɛmese ɛzonlenlɛsua ne, yɛɛ ɔmaanle bɛnwunle ye kɛ bɛlɛ ngyehyɛleɛ wɔ ɛkɛ mɔɔ bɛdua zo bɛdi edwɛkɛ ɛhye mɔ anwo gyima a. Bie a debie mɔɔ boale kpalɛ la a le mekɛ mɔɔ ɔhakyele menli ne kɛ bɛ ayia ne tia Wulomuma mɛla la. Ɔhanle ɛhye la ɔmaanle menli ne zandele. Ɛnee bɛva ɛya kpole, noko bɛ ɛya ne hanle aze ɔluakɛ ɛnee ndelebɛbo wɔ edwɛkɛ ne anu.—Gyi. 19:35-41.
19 Tɛ ɛhye a le mekɛ mɔɔ limoa mɔɔ awie mɔɔ te edwɛkɛ bo na ɔlɛ tumi la ɛyɛ debie ɛva ɛbɔ Gyisɛse ɛdoavolɛma anwo bane a, yɛɛ tɛ yemɔ a li amozi a. Nɔhalɛ nu, ɛzoanvolɛ Dwɔn nwunle ye wɔ ɛnyelɛzodeɛnwunlɛ nu kɛ wɔ awieleɛ mekɛ ne anu, azɛlɛ ne, mɔɔ bɛva alesama ngyehyɛleɛ mɔɔ kɔ zo kpalɛ bɛyɛ nwolɛ sɛkɛlɛneɛ la bameme azudenle ne mɔɔ le kpɔdekpɔdeyɛlɛ mɔɔ Seetan bava ara Gyisɛse ɛdoavolɛma anwo zo la. (Yek. 12:15, 16) Ɛhye ɛyɛ nɔhalɛ bɔkɔɔ. Wɔ ɛleka dɔɔnwo ne ala, ndɛnebuavolɛma mɔɔ di pɛlepɛle la ɛboa Gyihova Alasevolɛ ɛmaa bɛnyia mɛla adenle zo tumi mɔɔ maa bɛkola bɛyia nu bɛsonle na bɛbɔ edwɛkpa ne nolo bɛkile awie mɔ a. Nɔhalɛ nu, subane kpalɛ mɔɔ yɛda ye ali la noko boa wɔ konimlilɛ ɛhye mɔ anu. Ɔbayɛ kɛ Pɔɔlo subane kpalɛ ne maanle Ɛfɛsɛse mgbanyima bie mɔ bule ye, ɔti ɛnee bɛkulo kɛ bɛbɔ ɔ nwo bane. (Gyi. 19:31) Bɛmaa subane kpalɛ mɔɔ yɛda ye ali la ɛmaa menli ɛbu yɛ. Yɛnze mɔɔ bavi nu ara a.
20. (a) Saa ɛnea kɛzi Gyihova edwɛkɛ ne lile konim wɔ tete ne na ɔlɛdi konim ɛnɛ la a, duzu a ɔka wɔ kɛ ɛyɛ a? (b) Kpɔkɛ boni a wɔbɔ wɔ konim mɔɔ Gyihova ɛlɛdi wɔ yɛ mekɛ ye azo la anwo a?
20 Asoo ɔnyɛ anyelielɛ kɛ yɛzuzu kɛzi ‘Gyihova edwɛkɛ ne hɔle zo dɛlɛle na ɔlile konim dɔɔnwo’ wɔ ɛvoya mɔɔ limoa anu la anwo ɔ? Eza ɔyɛ anyelielɛ kɛ Gyihova ɛmaa yɛli konim ɛhye mɔ bie wɔ yɛ mekɛ ye azo la. Ɛkulo kɛ ɛyɛ wɔ afoa nu ɛdeɛ, saa ekyi bɔbɔ a, ɛmaa konimlilɛ zɛhae mɔ kɔ zo ɔ? Ɛnee sukoa neazo mɔɔ yɛzuzu nwo la. Bɛlɛ ɛ nwo aze, ɛ nee Gyihova ahyehyɛdeɛ ne mɔɔ ɛlɛnyia anyuhɔlɛ la ɛlua, yɛ gyima ɛsesebɛ, kpo sunsum ɛtane nyɛleɛ na bɔ mɔdenle biala dua nɔhalɛlilɛ nee subane kpalɛ zo di daselɛ kɛnlɛma.
a Nea ɛlɛka mɔɔ se “ Ɛfɛsɛse—Ehyia Suakpole.”
b Pɔɔlo eza hɛlɛle 1 Kɔlentema wɔ mekɛ mɔɔ ɛnee ɔwɔ Ɛfɛsɛse la.
c Ɔbayɛ kɛ ɛhye mɔ le ninyɛne mɔɔ Pɔɔlo fa kyekye ɔ ti na ɛhɛlɛnra anzonyi angua ɔ nye zo la. Pɔɔlo mɔɔ bɛha kɛ ɔwula aguzo la bahola ahile kɛ mekɛ zɔhane ɛnee ɔyɛ ye ɛdanlɛsua gyima ne wɔ mekɛ mɔɔ ɔbanyia alagye la, bie a nwonlomɔ mangyee ne.—Gyi. 20:34, 35.
d Luku hanle kɛ ye bolɛ le dwɛtɛ fufule 50,000. Saa denale a ɛnee ɔlɛka nwolɛ edwɛkɛ a, ɔkile kɛ ɔwɔ kɛ awie yɛ gyima kenle 50,000—kɛyɛ ɛvolɛ 137—na yeanyia ezukoa ɛhye, saa ɔfa kenle nsuu ɔyɛ gyima dapɛne biala a.
e Bie mɔ ka kɛ mɔɔ Pɔɔlo hanle hilele Kɔlentema kɛ ‘ɔhale bɛ nee ewule’ la, ɛnee tɛnlabelɛ ɛhye a ɔlɛka nwolɛ edwɛkɛ a. (2 Kɔl. 1:8) Noko, bie a ɛnee debie gyɛne mɔɔ yɛ ɛzulolɛ kpalɛ la a wɔ ye adwenle nu a. Mɔɔ Pɔɔlo hɛlɛle kɛ “[ɔ] nee nane anwo ɛzulolɛ ɛho wɔ Ɛfɛsɛse” la, bie a ɛnee ɔlɛka nane anwo ɛzulolɛ mɔɔ ɔ nee bɛ honle wɔ nwɔhoalilɛleka bie anzɛɛ menli mɔɔ dwazole tiale ye la anwo edwɛkɛ. (1 Kɔl. 15:32) Bie a ɔ nee nane honle amgba anzɛɛ ɛnee ɔlɛfa yeaha edwɛkɛ ala.
f Ɛnee dwinvolɛma eku ne mɔ lɛ tumi kpalɛ. Kɛ neazo la, kɛyɛ ɛvolɛ ɛya ko anzi, menli mɔɔ to paano la eku bie maanle basabasayɛlɛ zɛhae bie hɔle zo wɔ Ɛfɛsɛse.
