1-4. Duzu ati a Pɔɔlo ɛlɛkɔ Gyɛlusalɛm a, na duzu a bado ye a?

 MƆƆ Pɔɔlo nee Luku ɛlɛfi Maelitɛse la, bɛ nee mediema ne mɔ lile nyane. Ɔnla aze ɔmmaa Pɔɔlo nee Luku kɛ bɛbagyakyi Ɛfɛsɛse mgbanyima mɔɔ bɛkulo bɛ edwɛkɛ la ɛkɛ bɛahɔ! Edwɛkpatɛlɛvolɛma nwiɔ ne gyi meli ne anu. Ninyɛne mɔɔ bɛbahyia nwo wɔ bɛ adendulɛ ne anu la wɔ bɛ baage ne anu. Eza bɛlɛ ndoboa mɔɔ bɛfa bɛahɔmaa Dwudiya Kilisienema mɔɔ hyia moalɛ la na bɛkulo kɛ bɛnea bɛmaa menli ne asa ka ahyɛlɛdeɛ ne.

² Anwoma bɛtɛɛ ne mɔɔ ɛlɛbɔ la ɛmaa avela ne anu ɛza na meli ne ɛdu ɔ bo ɛvi dede ne anu. Mrenyia nwiɔ ne nee mediema nsuu ne mɔɔ bɛ nee bɛ ɛlɛtu adenle ne la ɛlɛnea bɛ mediema mɔɔ gyigyi ɛnwea ne anloa mɔɔ bɛ nyunlu ɛyɛ alɔbɔlɛ la. (Gyi. 20:4, 14, 15) Bɛnleanle bɛ too ɔhɔdwule mekɛ mɔɔ akee bɛnnwu bɛ bieko la.

³ Pɔɔlo nee Ɛfɛsɛse mgbanyima ne mɔ ɛbɔ nu ɛyɛ gyima kɛyɛ ɛvolɛ nsa. Noko, kɛkala sunsum nwuanzanwuanza ne ɛhile ye kɛ ɔhɔ Gyɛlusalɛm. Bie a ɔze mɔɔ bado ye a. Yelimoa yeha yehile mgbanyima zɔhane mɔ kɛ: “Melɛkɔ Gyɛlusalɛm kɛ mɔɔ sunsum ne ɛhile me la, menze mɔɔ bado me wɔ ɛkɛ ne la ɛdeɛ, noko sunsum nwuanzanwuanza ne kɔ zo bɔ me kɔkɔ wɔ suakpole biala azo kɛ efiadelalɛ nee anwongyelelɛ a ɛlɛkendɛ me a.” (Gyi. 20:22, 23) Ɔnva nwo kɛ Pɔɔlo ze esiane mɔɔ ɔbayia ye la, ɔnwunle ye kɛ “sunsum ne ɛhile” ye adenle​—na ɛnee ɔlɛ ɛhulolɛ kɛ ɔbali sunsum nwuanzanwuanza ne adehilelɛ zo na yeahɔ Gyɛlusalɛm. Ye ngoane sonle bolɛ maa ye, noko ɛnee Nyamenle ɛhulolɛdeɛ mɔɔ ɔbayɛ la a anwo hyia ye kpalɛ a.

⁴ Asoo kɛ ɛte nganeɛ la ɛne? Saa yɛyila yɛ nwo zo yɛmaa Gyihova a, yɛbɔ ɛwɔkɛ kɛ yɛbayɛ ye ɛhulolɛdeɛ, na yemɔ a le debie mɔɔ hyia yɛ kpalɛ wɔ yɛ ɛbɛlabɔlɛ nu a. Saa yɛsuzu nɔhalɛlilɛ nwo neazo mɔɔ ɛzoanvolɛ Pɔɔlo yɛle la anwo a ɔbaboa yɛ kpalɛ.

5. Adenle boni a Pɔɔlo nee ɔ gɔnwo mɔ luale zo hɔle Taya a?

⁵ Meli ne mɔɔ Pɔɔlo nee ɔ gɔnwo mɔ vole la ‘hɔle ɔ nyunlu fɔɔnwo.’  Ɛhye kile kɛ anwoma ne bɔle meli ne hɔle ɔ nyunlu fɔɔnwo too bɛhɔdwule Kɔɔso kenle ko zɔhane. (Gyi. 21:1) Ɔbayɛ kɛ meli ne gyinlanle ɛkɛ too aleɛ hyenle kolaa na yeahɔ Wulodise nee Patala. Mɔɔ bɛdwule Patala mɔɔ wɔ Ehyia Ekyi nyiakɛ ɛnweazo la, mediema ne mɔ vole meli kpole mɔɔ fa ninyɛne la na ɔ nee bɛ hɔle Taya mɔɔ wɔ Fonehyea la. Mɔɔ bɛlɛkɔ la bɛpɛle ‘Saepelɛse bɔra ne mɔɔ wɔ bɛ sa bɛne zo la.’ (Gyi. 21:3) Duzu ati a Luku mɔɔ hɛlɛle Gyima ne la hanle edwɛkɛ ɛhye a?

6. (a) Duzu ati a Pɔɔlo nwunle Saepelɛse la bie a ɔmaanle ye anwosesebɛ a? (b) Saa ɛdwenle kɛzi Gyihova ɛyila wɔ na yeboa wɔ la anwo a, duzu a ɛbaha a?

⁶ Bie a Pɔɔlo dendenle ɔ sa wɔ bɔra ne azo na ɔhanle mɔɔ dole ye wɔ ɛkɛ ne la anwo edwɛkɛ. Kɛyɛ ɛvolɛ ngɔnla mɔɔ ɛpɛ nu wɔ Pɔɔlo adendulɛ mɔɔ limoa la anu, Pɔɔlo nee Baanabase yɛɛ Dwɔn Maake yiale silikyevo Ɛlemase mɔɔ dwazole tiale edwɛkɛhanlɛ ne la. (Gyi. 13:4-12) Mɔɔ Pɔɔlo nwunle bɔra ne na ɔdwenlenle mɔɔ zile wɔ ɛkɛ ne anwo la, ɔbayɛ kɛ ɔmaanle ɔnyianle anwosesebɛ mɔɔ ɔbava yeagyinla mɔɔ la ɔ nyunlu la anloa la. Saa yɛdayɛ noko yɛdwenle kɛzi Nyamenle ɛyila yɛ na yeboa yɛ yemaa yɛgyinla sɔnea nloa la anwo a ɔbaboa yɛ kpalɛ. Saa yɛdwenle ninyɛne nwo zɛhae a ɔbamaa  yɛaha mɔɔ Devidi hanle la bie kɛ: “Tenlenenli amaneɛnwunlɛ zonle, noko Gyihova die ye fi ɔ muala anu.”​—Edw. 34:19.

7. Mɔɔ adenduvoma ne dwule Taya la duzu a bɛyɛle a?

⁷ Ɛnee Pɔɔlo ze kɛzi Kilisienema agɔnwolɛvalɛ hyia la na ɛnee ɔkulo kɛ ɔ nee ɔ gɔnwo mɔ diedima tɛnla. Luku hɛlɛle kɛ, mɔɔ bɛdwule Taya la, ‘bɛhɔkpondɛle ɛdoavolɛma ne na bɛnwunle bɛ.’ (Gyi. 21:4) Kɛmɔ ɛnee adenduvoma ne ze kɛ bɛ gɔnwo mɔ Kilisienema wɔ Taya la ati, bɛkpondɛle bɛ na bie a bɛ nee bɛ dɛnlanle. Nɔhalɛ ne mɔɔ yɛnwu ye la azo nvasoɛ kpole ko a le kɛ ɔnva nwo ɛleka biala mɔɔ yɛbahɔ la, yɛbanwu mediema mɔɔ bɛbalie yɛ kɛnlɛma la. Menli mɔɔ kulo Nyamenle na bɛfa nɔhalɛ ne bɛbɔ bɛ ɛbɛla la lɛ agɔnwolɛma wɔ ewiade amuala.

8. Kɛzi ɔwɔ kɛ yɛte Gyima ne 21:4 abo ɛ?

⁸ Mɔɔ Luku ɛlɛka kenle nsuu ne mɔɔ bɛlile ye wɔ Taya anwo edwɛkɛ la, ɔhanle edwɛkɛ bie mɔɔ ɔzɔho kɛ ɔyɛ azibɛnwo la kɛ: Mediema mɔɔ wɔ Taya la ‘luale sunsum ne azo hanle ye fane dɔɔnwo hilele Pɔɔlo kɛ ɔmmakɔ Gyɛlusalɛm.’ (Gyi. 21:4) Asoo Gyihova ɛhakyi ye adwenle ɔ? Akee ɔlɛka yeahile Pɔɔlo kɛ ɔmmakɔ Gyɛlusalɛm ɔ? Kyɛkyɛ. Ɛnee sunsum ne ɛha ɛhile Pɔɔlo kɛ bɛbayɛ ye basabasa wɔ Gyɛlusalɛm, na yeanga kɛ ɔnle kɛ ɔkɔ ɛkɛ. Ɔbayɛ kɛ ɔlua sunsum nwuanzanwuanza ne azo, mediema mɔɔ bɛwɔ Taya la nwunle kɛ Pɔɔlo bayia ngyegyelɛ wɔ Gyɛlusalɛm. Kɛmɔ bɛdwenle Pɔɔlo anwo la ati, bɛhanle bɛhilele ye kɛ ɔmmakɔ suakpole ne azo. Ɛnee ndelebɛbo wɔ nu kɛ bɛkulo kɛ bɛbɔ Pɔɔlo anwo bane bɛfi esiane nwo la. Noko ɛnee Pɔɔlo ɛbɔ kpɔkɛ kɛ ɔbayɛ Gyihova ɛhulolɛdeɛ, ɔti ɔdoale zo ɔhɔle Gyɛlusalɛm.​—Gyi. 21:12.

9, 10. (a) Mɔɔ Pɔɔlo nwunle kɛzi Taya mediema ne mɔ dwenle ɔ nwo la, tɛnlabelɛ mɔɔ le kɛ ɛhye la boni a ɔbayɛ kɛ ɔhakyele a? (b) Adwenle boni a ɛbu zo ɛnɛ a, na kɛzi ɔle ngakyile ɔfi Gyisɛse edwɛkɛ ne anwo ɛ?

⁹ Mɔɔ Pɔɔlo nwunle kɛzi mediema ne mɔ dwenle ɔ nwo la, bie a ɔhakyele kɛ Gyisɛse yiale tɛnlabelɛ ɛhye bie wɔ mekɛ mɔɔ ɔhanle ɔhilele ye ɛdoavolɛma ne kɛ ɔwɔ kɛ ɔkɔ Gyɛlusalɛm na ɔnwu amaneɛ dɔɔnwo na bɛku ye la. Ɛlɔlɛ maanle Pita hanle hilele Gyisɛse kɛ: “Awulae, mmaka ye zɔ; ɛhye ɛnrɛdo wɔ ɛlɛ.” Gyisɛse buale ye kɛ: “Se di me nzi, Seetan! Ɛle azedolɛ bolɛ ɛmaa me, ɔluakɛ wɔ adwenle ne ɛnle Nyamenle adwenle, emomu sonla adwenle.” (Mat. 16:21-23) Ɛnee Gyisɛse ɛbɔ kpɔkɛ, ɔbayɛ gyima mɔɔ Nyamenle ɛva ɛmaa ye la na yeava ye ngoane yeabɔ afɔle. Ɛnee kɛ Pɔɔlo noko kulo kɛ ɔyɛ la ɛne. Ɛnee mediema mɔɔ bɛwɔ Taya la le kɛ ɛzoanvolɛ Pita la, ɛnee bɛlɛ adwenle kpalɛ noko bɛannwu ye kɛ ɔle Nyamenle ɛhulolɛdeɛ.

¹⁰ Menli dɔɔnwo mɔɔ wɔ ɛkɛ ne ɛnɛ la ɛngulo kɛ bɛbayɛ debie mɔɔ bamaa bɛ nwo ahyele bɛ la. Bɛkulo ɛzonlenlɛ mɔɔ maa bɛ nwo tɔ bɛ na  ɔmmaa bɛnyɛ ɛhwee la. Noko mɔɔ Gyisɛse se yɛyɛ la le ngakyile. Ɔhanle ɔhilele ye ɛdoavolɛma kɛ: “Saa awie kulo kɛ ɔtoa me a, maa ɔkpo ɔ nwo na ɔva ye amaneɛnwunlɛ baka ne na ɔhɔ zo ɔdoa me.” (Mat. 16:24) Nrɛlɛbɛ wɔ nu kɛ yɛbadoa Gyisɛse yɛɛ yemɔ a le kpalɛ a, noko ɔnla aze.

11. Kɛzi ɛdoavolɛma mɔɔ wɔ Taya la boale Pɔɔlo na bɛhilele kɛ bɛkulo ye edwɛkɛ ɛ?

¹¹ Akee mekɛ ɛdwu kɛ Pɔɔlo, Luku nee menli mɔɔ bɛ nee bɛ lua la toa bɛ adendulɛ ne azo. Bɛ ɛhɔlɛ ne anwo edwɛkɛ ka ahonle. Ɔmaa yɛnwu kɛzi ɛnee Taya mediema ne mɔ kulo Pɔɔlo nee kɛzi bɛboale ye wɔ ye ɛzonlenlɛ gyima ne anu la. Mrenyia, mraalɛ nee ngakula hɔzɔhonle Pɔɔlo nee menli mɔɔ ɔ nee bɛ lua la too bɛhɔdwule nyevile ne anloa. Bɛ muala bɛhotole nyevile ne anloa, bɛyɛle asɔne na bɛ nee bɛ lile nrɛlaleɛ. Akee, Pɔɔlo, Luku nee bɛ gɔnwo mɔ hɔvole meli nu na bɛdoale zo bɛhɔle Tɔlɛmeeyese, bɛyiale mediema mɔɔ wɔ ɛkɛ la na bɛlile kenle ko wɔ bɛ nwo ɛkɛ.​—Gyi. 21:5-7.

12, 13. (a) Nɔhalɛlilɛ nwo neazo boni a Felepe yɛle a? (b) Kɛzi Felepe neazo ne le kpalɛ maa Kilisiene selɛma ɛnɛ ɛ?

¹² Luku bɔ amaneɛ kɛ akee Pɔɔlo nee menli mɔɔ ɔ nee bɛ lua la hɔle Sizalia. Mɔɔ bɛdwule ɛkɛ ne la, ‘bɛhɔle edwɛkpakavolɛ Felepe sua nu.’ a (Gyi. 21:8) Ɔbayɛ kɛ bɛ nye liele kɛ bɛnwunle Felepe la. Kɛyɛ ɛvolɛ 20 mɔɔ ɛpɛ nu la, ɛzoanvolɛma ne kpale ye kɛ ɔboa ɔmaa bɛhyɛ aleɛ wɔ asafo fofolɛ ne mɔɔ wɔ Gyɛlusalɛm la anu. Ɛnee Felepe ɛva mɔdenlebɔlɛ ɛha edwɛkɛ ne ɛvolɛ dɔɔnwo. Kakye kɛ mekɛ mɔɔ kpɔdekpɔdeyɛlɛ maanle ɛdoavolɛma ne bɔle asande la, Felepe hɔhanle edwɛkɛ ne wɔ Samɛlea. Nzinlii, ɔhanle edwɛkɛ ne ɔhilele Yiteyopeanli kpanyinli ne na ɔzɔnenle ye. (Gyi. 6:2-6; 8:4-13, 26-38) Nea kɛzi ɔvale nɔhalɛlilɛ ɔzonlenle la!

¹³ Felepe angyakyi mɔdenlebɔlɛ mɔɔ ɔfa ɔyɛ ɛzonlenlɛ gyima ne la. Kɛkala ɔde Sizalia, noko ɔlɛyɛ dɔɔnwo wɔ edwɛkɛhanlɛ gyima ne anu ɔluakɛ Luku vɛlɛle ye “edwɛkpakavolɛ.” Eza yɛnwu kɛ ɔlɛ mralɛ mraalɛ nna mɔɔ bɛka ngapezo a, na ɛhye kile kɛ bɛvale bɛ papa agyakɛ. b (Gyi. 21:9) Ɔbayɛ kɛ Felepe  bɔle mɔdenle maanle ye abusua ne anwo yɛle se wɔ sunsum nu. Ɔwɔ kɛ Kilisiene selɛma mɔɔ bɛwɔ ɛkɛ ne ɛnɛ la sukoa ye neazo ne, bɛdi edwɛkɛhanlɛ gyima ne anyunlu na bɛboa bɛ mra bɛmaa bɛ nye die edwɛkɛhanlɛ gyima ne anwo.

14. Duzu a vi mediema diedima mɔɔ Pɔɔlo hɔkpɔlale bɛ la anu rale a, na kɛ ɔkɛyɛ na yɛazukoa bɛ ɛnɛ ɛ?

¹⁴ Wɔ ɛleka biala mɔɔ Pɔɔlo hɔle la, ɔkpondɛle ɔ mediema diedima na ɔ nee bɛ dɛnlanle. Nɔhalɛ nu, mediema mɔɔ ɔhɔdole bɛ la vile bɛ ɛhulolɛ nu liele Pɔɔlo nee ɔ gɔnwo mɔ ɛyɛvolɛ. Ɛkpɔlalɛ zɛhae mɔ maanle bɛmaanle bɛ nwo “anwosesebɛ.” (Wlo. 1:11, 12) Yɛlɛ adenle yɛyɛ ɛhye bie ɛnɛ. Ɔnva nwo kɛzi yɛ sua nu de biala la, saa yɛmaa maangyebakyi zo neavolɛ ne nee ɔ ye bada ɛkɛ a, yɛbanyia zolɛ nvasoɛ dɔɔnwo.​—Wlo. 12:13.

15, 16. Edwɛkɛ boni a Agabɛse rahanle a, na kɛzi ɔhanle menli mɔɔ dele la ɛ?

¹⁵ Mɔɔ Pɔɔlo wɔ Felepe anwo ɛkɛ ne la, Agabɛse mɔɔ bɛbu ye la rale ɛkɛ. Ɛnee menli mɔɔ ɛyia Felepe sua nu ɛkɛ ne la ze kɛ Agabɛse le ngapezonli; ɔhanle kɛ ɛhɔne kpole bie bazi wɔ Kolɔdeɛse mekɛ zo. (Gyi. 11:27, 28) Bie a bɛbizale bɛ nwo kɛ: ‘Duzu ati a Agabɛse ɛra a? Edwɛkɛ boni a ɔ nee ye lua a?’ Mekɛ mɔɔ bɛlɛnea ye koonwu la, ɔvale Pɔɔlo bɛlɛte ne ɔkyekyele ɔdaye mumua ne ɔ gyakɛ nee ɔ sa. Akee ɔdendɛle. Ɛnee ɔle anyebolo edwɛkɛ: “Kɛ sunsum nwuanzanwuanza ne se la ɛne, ‘Nrenyia ne mɔɔ lɛ bɛlɛte ɛhye la, Dwuuma bakyekye ye zɛhae wɔ Gyɛlusalɛm, na bɛaye ye bɛawula maanle maanle ne anu amra asa anu.’”​—Gyi. 21:11.

¹⁶ Ngapezo ne zile zo kɛ Pɔɔlo bahɔ Gyɛlusalɛm. Eza ɔmaanle ɔlale ali kɛ ɔlua edwɛkɛ ne mɔɔ ɔlɛka yeahile Dwuuma ne la ati, ‘bɛbaye ye bɛawula maanle maanle ne anu amra asa anu.’ Ngapezo  ne hanle menli mɔɔ wɔ kɛ ne la kpalɛ. Luku hɛlɛle kɛ: “Mɔɔ yɛdele ɛhye la, yɛ nee bɛdabɛ mɔɔ bɛwɔ ɛkɛ ne la bɔle ɔ bo kpale ye kyɛlɛ kɛ ɔmmakɔ Gyɛlusalɛm. Akee Pɔɔlo buale bɛ kɛ: ‘Duzu ati a bɛlɛsu bɛamaa me rɛle abɔ a? Bɛnwu ye kɛ, meziezie me nwo kɛ memaa bakyekye me na eza bɛahu me wɔ Gyɛlusalɛm wɔ Awulae Gyisɛse duma ne ati.’”​—Gyi. 21:12, 13.

17, 18. Kɛzi Pɔɔlo maanle bɛnwunle kpɔkɛ mɔɔ yebɔ la wienyi ɛ, na duzu a mediema ne mɔ yɛle a?

¹⁷ Pɛ mɔɔ hɔle zo la anwo nvoninli nea. Mediema ne mɔ nee Luku ɛlɛkpa Pɔɔlo kyɛlɛ kɛ ɔmmakɔ. Bie mɔ ɛlɛsu. Pɔɔlo nwunle kɛ bɛkulo ye edwɛkɛ, ɔti ɔhanle ye bɛtɛɛ kɛ ‘bɛlɛmaa ɔ rɛle abɔ’ anzɛɛ kɛ mɔɔ ngilebɛbo bie mɔ ka la, “bɛlɛmaa [ye] ahonle ayɛ bɛtɛɛ.” Noko, ɛnee yezi kpɔkɛ yewie na ɛnee ɔnrɛmaa bɛ kyɛlɛkpalɛ anzɛɛ ɛzunlɛ ne ɛnrɛmaa ɔnrɛhakyi ye adwenle kɛ mɔɔ ɔyɛle ye wɔ mekɛ mɔɔ ɔyiale Taya mediema ne mɔ la. Emomu, ɔhilehilele deɛmɔti ɔwɔ kɛ ɔkɔ la anu ɔhilele bɛ. Nea kɛzi ɔlale akɛnrasesebɛ ali na ɔzile ye ahonle la! Pɔɔlo yɛle kɛ Gyisɛse la, ɔbɔle kpɔkɛ kɛ ɔkɔ Gyɛlusalɛm. (Hib. 12:2) Ɛnee tɛ Pɔɔlo adwenle a le kɛ ɔkulo kɛ bɛku ye ɔlua ye diedi ti, noko saa ɔba ye zɔ a, ɔbu ye kɛ ɔle enililɛ kɛ ɔbawu kɛ Kelaese Gyisɛse ɛdoavolɛ la.

¹⁸ Duzu a mediema ne mɔ yɛle a? Bɛliele bɛdole nu. Yɛkenga kɛ: “Mɔɔ yɛnwunle kɛ yɛnrɛhola yɛnrɛmaa ɔnrɛhakyi ye adwenle la, yɛanzi ye adenle bieko na yɛhanle kɛ: ‘Gyihova ɛhulolɛdeɛ ɛyɛ ɛkɛ.’” (Gyi. 21:14) Menli mɔɔ ɛnee bɛlɛka kɛ Pɔɔlo mmakɔ Gyɛlusalɛm la anyɛ kyengye. Bɛdiele Pɔɔlo na bɛpɛle zo, bɛnwunle ye kɛ ɔle Gyihova ɛhulolɛdeɛ yɛɛ bɛliele bɛdole nu, ɔnva nwo kɛ ɛnee ɔyɛ se ɔmaa bɛ la. Ɛnee Pɔɔlo ɛlɛyɛ debie mɔɔ bava ye ahɔ ewule nu la. Ɔti saa menli mɔɔ kulo Pɔɔlo edwɛkɛ la anga kɛ ɔmmakɔ a ɔbaboa kpalɛ.

19. Debie mɔɔ hyia la boni a yɛsukoa yɛfi mɔɔ dole Pɔɔlo la anu a?

¹⁹ Yɛsukoa debie mɔɔ hyia la yɛfi mɔɔ dole Pɔɔlo la anu: Yɛngulo kɛ yɛtendɛ yɛtia menli mɔɔ kulo kɛ bɛtu bɛ nwo bɛmaa bɛsonle Nyamenle la. Ɛzukoalɛdeɛ mɔɔ wɔ nu la fale tɛnlabelɛ dɔɔnwo anwo, tɛ ewule nee ngoane nwo ala. Kɛ neazo la, ɔnla aze kɛ Kilisiene awovolɛ dɔɔnwo bamaa bɛ mra ahɔzonle Gyihova wɔ moamoa, noko bɛbɔ kpɔkɛ kɛ bɛnrɛdo bɛ sa nu. Phyllis mɔɔ wɔ England la hanle kɛzi ɔdele nganeɛ wɔ mekɛ mɔɔ ɔ ra raalɛ kokye nyianle nwolɛ adenle kɛ ɔkayɛ edwɛkpatɛlɛvolɛ wɔ Africa la. Phyllis hanle kɛ, “Ɛnee ɔnla aze fee ɔmmaa me. Ɛnee ɔyɛ se ɔmaa me kɛ ɔbahɔ moamoa la. Me rɛle bɔle noko ɛnee ɔyɛ me fɛ. Menyɛle nwolɛ asɔne fane dɔɔnwo. Noko ɛnee ɔle ye kpɔkɛzilɛ na meambɔ mɔdenle kɛ memaa yeahakyi ye adwenle. Ɛnee dahuu meka mekile ye kɛ ɔva Belemgbunlililɛ ne ɔlimoa! Yeva ɛvolɛ 30 yezonle wɔ maanle gyɛne zo, na alehyenlɛ ko biala meda Gyihova ase kɛ yehɔ zo yeli nɔhalɛ la.” Nea kɛzi ɔle kpalɛ kɛ yɛbamaa yɛ mediema diedima anwosesebɛ wɔ bɛ tunwomaa ne anwo a!

20, 21. Duzu a maa yɛnwu kɛ ɛnee Pɔɔlo kulo kɛ ɔ nee mediema ne mɔ tɛnla a, na duzu ati a ɛnee ɔkulo kɛ ɔ nee bɛ tu a?

²⁰ Mɔɔ bɛzieziele bɛ nwo bɛwiele la, Pɔɔlo doale ye adendulɛ ne azo na mediema ne mɔ bie nee ye hɔle. Ɛnee ɛhye kile kɛ bɛfi bɛ ahonle muala anu bɛboa ye. Wɔ Gyɛlusalɛm adendulɛ ne anu amuala, Pɔɔlo nee menli mɔɔ ɔ nee bɛ lua la kpondɛle bɛ Kilisiene mediema bo zo. Mɔɔ bɛdwule Taya la, bɛnwunle ɛdoavolɛma na bɛlile kenle nsuu wɔ bɛ nwo ɛkɛ. Bɛbizale mediema mrenyia nee mraalɛ ahye wɔ Tɔlɛmeeyese na bɛlile kenle ko wɔ ɛkɛ. Wɔ Sizalia, bɛhɔle Felepe sua nu na bɛlile mekɛ ekyi wɔ ɛkɛ. Akee ɛdoavolɛma bie mɔɔ vi Sizalia la nee Pɔɔlo yɛɛ ɔ gɔnwo mɔ hɔle Gyɛlusalɛm na bɛhɔle Meneesen mɔɔ ɔboka bɛdabɛ mɔɔ bɛlimoale bɛyɛle ɛdoavolɛma la anwo la sua nu. Awieleɛ kolaa ne, adenduvoma ne dwule Gyɛlusalɛm na Luku bɔ amaneɛ kɛ “mediema ne mɔ vale anyelielɛ liele yɛ.”​—Gyi. 21:17.

²¹ Ɔda ali kɛ ɛnee Pɔɔlo kulo kɛ ɔ nee ɔ gɔnwo mɔ diedima tu. Pɔɔlo nyianle anwosesebɛmaanlɛ vile ɔ mediema mrenyia nee mraalɛ ɛkɛ, kɛ mɔɔ yɛnyia ye ɛnɛ ala la. Nɔhalɛ nu, anwosesebɛmaanlɛ zɔhane maanle Pɔɔlo holale gyinlanle dwazotiama mɔɔ bɛva ɛya na bɛkpondɛ kɛ bɛku ye la anyunlu.