1-3. (a) Ka mɔɔ zile kolaa na Yutekɛse awu la anwo edwɛkɛ. (b) Duzu a Pɔɔlo yɛle a, na duzu a ɛhye maa yɛnwu ye wɔ Pɔɔlo anwo a?

 PƆƆLO nee menli dɔɔnwo wɔ ɛbolɔnsam bie azo wɔ Tulowase. Ɔ nee mediema ne mɔ ɛdendɛ ɛhyɛ kpalɛ, ɔluakɛ ɛnee aleɛ kye a ɔbavi bɛ nwo ɛkɛ. Bɛbɔ nɔɔzo bulu nee nwiɔ. Bɛsosɔ ahɛnlaneɛ dɔɔnwo wɔ sua ne anu ɔti ɛkɛ ne ɛyɛ wuluwulu yɛɛ anwoma ne ɛmbɔ kpalɛ wɔ ɛkɛ. Kpavolɛ bie mɔɔ bɛfɛlɛ ye Yutekɛse la de nvɛnzɛlɛ ne anloa. Mɔɔ Pɔɔlo ɛlɛtendɛ la, nafelɛ vale Yutekɛse na ɔvi ɛbolɔnsam ndazo nsa ne azo nvɛnzɛlɛ ne anu ɔdɔle aze!

² Kɛmɔ Luku le ayileyɛvolɛ la ati, ɔbayɛ kɛ ɔboka menli mɔɔ limoale dwule aze hɔnleanle kpavolɛ ne la anwo. Ɛnee awie biala ze mɔɔ ɛzi la. “Bɛhɔmaanle [Yutekɛse] zo la ɛnee yewu.” (Gyi. 20:9) Noko nwanwane debie bie zile. Pɔɔlo hɔbutule kpavolɛ ne anwo zo na ɔhanle ɔhilele menli ne kɛ: “Bɛmmayɛ dede, ɔluakɛ ɔtɛwule.” Pɔɔlo dwazole Yutekɛse rale ngoane nu!​—Gyi. 20:10.

³ Edwɛkɛ zɔhane maa yɛnwu Nyamenle sunsum nwuanzanwuanza ne tumi ne. Tɛ Pɔɔlo a maanle Yutekɛse wule a. Noko, ɛnee ɔngulo kɛ kpavolɛ ne ewule ne sɛkye mekɛ titili zɔhane anzɛɛ maa awie diedi ka aze. Yutekɛse mɔɔ Pɔɔlo dwazole ye la kyekyele asafo ne arɛle yɛɛ ɔmaanle bɛnyianle anwosesebɛ bɛyɛle bɛ ɛzonlenlɛ gyima ne. Ɔda ali kɛ ɛnee awie mɔ ngoane nwo edwɛkɛ hyia Pɔɔlo. Ɔmaa yɛkakye ye edwɛkɛ ne mɔɔ se: “Menli awie biala mogya nwo ɛzonle” la. (Gyi. 20:26) Maa yɛzuzu kɛzi Pɔɔlo neazo ne baboa yɛ wɔ ɛhye ɛyɛlɛ nu la anwo.

4. Edwɛkɛ mɔɔ anu yɛ se la boni a dole Pɔɔlo a?

⁴ Kɛ mɔɔ yɛzuzule nwo wɔ tile mɔɔ li ɛhye anyunlu anu la, Pɔɔlo hɔle tɛnlabelɛ bie mɔɔ anu yɛ se la anu. Ɛzonlenlɛ gyima ne mɔɔ ɔyɛle ye wɔ Ɛfɛsɛse la vale basabasayɛlɛ rale. Nɔhalɛ nu, dwinvolɛma  mɔɔ Aatɛmese ɛzonlenlɛ a maa bɛnyia gyima la vale bɛ nwo wulale basabasayɛlɛ ne anu! Gyima ne 20:1 ka kɛ, “Mɔɔ basabasayɛlɛ ne anloa hanle aze la, Pɔɔlo maanle bɛhɔvɛlɛle ɛdoavolɛma ne, na mɔɔ ɔmaanle bɛ anwosesebɛ na ɔ nee bɛ lile nrɛlaleɛ la, ɔhɔle Masidonea.”

5, 6. (a) Mekɛ tendenle nyɛ a Pɔɔlo lile wɔ Masidonea a, na duzu a ɔyɛle ɔmaanle mediema mɔɔ wɔ ɛkɛ ne la a? (b) Kɛzi Pɔɔlo bule ɔ mediema diedima ɛ?

⁵ Mekɛ mɔɔ Pɔɔlo ɛlɛkɔ Masidonea la, ɔdwule aze wɔ Tulowase habɔ na ɔdɛnlanle ɛkɛ ne ekyi. Ɛnee Pɔɔlo anye la kɛ Taetɛse mɔɔ bɛzoa ye wɔ Kɔlente la baraboka ɔ nwo. (2 Kɔl. 2:12, 13) Noko, mekɛ mɔɔ Pɔɔlo nwunle kɛ Taetɛse amba la, ɔhɔle Masidonea na ɔlile kɛyɛ ɛvolɛ ko wɔ ɛkɛ na “ɔhanle edwɛkɛ dɔɔnwo ɔmaanle ɛdoavolɛma ne anwosesebɛ.” a (Gyi. 20:2) Awieleɛ kolaa ne, Taetɛse rabokale Pɔɔlo anwo wɔ Masidonea na ɔvale kɛzi Kɔlentema ne yɛle bɛ nyɛleɛ wɔ Pɔɔlo kɛlata ne mɔɔ limoa la anwo amaneɛbɔlɛ kpalɛ ɔrɛlɛle Pɔɔlo. (2 Kɔl. 7:5-7) Ɛhye hanle Pɔɔlo maanle ɔhɛlɛle bɛ kɛlata mɔɔ tɔ zo nwiɔ mɔɔ yemɔ a le 2 Kɔlentema la.

⁶ Mekɛ mɔɔ Luku ka Pɔɔlo mɔɔ hɔkpɔlale mediema mɔɔ bɛwɔ Ɛfɛsɛse nee Masidonea anwo edwɛkɛ la ɔvale edwɛkɛkpɔkɛ “ɔmaanle bɛ anwosesebɛ”  ɔlile gyima. Nea kɛzi edwɛkɛ ɛhye maa yɛnwu kɛzi ɛnee Pɔɔlo bu diedima ne la! Ɛnee Pɔɔlo ɛnle kɛ Falasiima mɔɔ ɛnee ɛmbu menli ne la, Pɔɔlo bule mediema ne mɔ kɛ ɔ gɔnwo mɔ gyimayɛvoma. (Dwɔn 7:47-49; 1 Kɔl. 3:9) Pɔɔlo lale subane ɛhye ali wɔ mekɛ bɔbɔ mɔɔ ɔwɔ kɛ ɔfa folɛdulɛ mɔɔ anu yɛ se ɔmaa bɛ la.​—2 Kɔl. 2:4.

7. Kɛ ɔkɛyɛ na Kilisiene neavolɛma mɔɔ wɔ ɛkɛ ne ɛnɛ la azukoa Pɔɔlo neazo ne ɛ?

⁷ Ɛnɛ noko asafo nu mgbanyima nee maangyebakyi zo neavolɛma bɔ mɔdenle sukoa Pɔɔlo neazo ne. Saa bɛlɛtenrɛdenrɛ mediema ne mɔ bɔbɔ a, bɛ bodane a le kɛ bɛfa bɛamaa bɛ anwosesebɛ. Neavolɛma ne ɛndendɛ ɛntia mediema ne mɔ, emomu bɛmaa bɛ anwosesebɛ. Maangyebakyi zo neavolɛ bie mɔɔ lɛ anwubielɛ la hanle kɛ: “Yɛ mediema mrenyia nee mraalɛ dɔɔnwo kulo kɛ bɛyɛ mɔɔ le kpalɛ la, noko ɔyɛ a bɛnnwu mɔɔ bɛyɛ a, ɛzulolɛ ka bɛ yɛɛ bɛte nganeɛ kɛ bɛnrɛhola bɛnrɛyɛ zɔ.” Neavolɛma bahola amaa mediema ɛhye mɔ anwosesebɛ.​—Hib. 12:12, 13.

8, 9. (a) Duzu a ammaa Pɔɔlo angola angɔ Selea a? (b) Duzu ati a ɔbayɛ kɛ Dwuuma ne nyianle Pɔɔlo anwo adwenle ɛtane a?

⁸ Pɔɔlo vile Masidonea hɔle Kɔlente. b Mekɛ mɔɔ ɔlile siane nsa wɔ ɛkɛ ne la, ɛnee ɔkulo kɛ ɔtoa ye adendulɛ ne azo ɔkɔ Sɛnkilia na ɔfa ɛlɛne wɔ ɛkɛ ne ɔkɔ Selea. Na saa ɔdwu ɛkɛ ne a ɔbahola yeahɔ Gyɛlusalɛm na yeava ndoboa ne yeamaa mediema mɔɔ wɔ ɛkɛ ne mɔɔ bɛhyia moalɛ la. c (Gyi. 24:17; Wlo. 15:25, 26) Noko, edwɛkɛ bie zile mɔɔ maanle Pɔɔlo hakyile ye ngyehyɛleɛ ne a. Gyima ne 20:3 ka kɛ: “Dwuuma ne bɔle kpɔkɛ kɛ bɛku ye”!

⁹ Ɔnyɛ nwanwane kɛ ɛnee Dwuuma ne kpɔ Pɔɔlo la, ɔluakɛ ɛnee bɛbu ye kɛ ɔle kpɔkyevolɛ. Ɔtɛkyɛle biala yɛɛ ye edwɛkɛhanlɛ gyima ne ɛmaa Kelesepɛse mɔɔ le sonla titili wɔ Kɔlente nyianusua ne anu la ɛrayɛ Kilisienenli a. (Gyi. 18:7, 8; 1 Kɔl. 1:14) Wɔ mekɛ bie noko, Dwuuma mɔɔ wɔ Kɔlente la vale Pɔɔlo hɔle Galeyo mɔɔ le amɛnlado wɔ Akaya la anyunlu na bɛbɔle somolɛ. Noko Galeyo bɔle bɛ edwɛkɛ ne guale na Pɔɔlo agbɔvolɛ vale ɛya kpole wɔ kpɔkɛzilɛ zɔhane anwo. (Gyi. 18:12-17) Bie a ɛnee Dwuuma mɔɔ wɔ Kɔlente la ze ye anzɛɛ bɛzuzule kɛ ɔnrɛhyɛ Pɔɔlo bahɔva ɛlɛne wɔ Sɛnkilia, ɔti bɛbɔle kpɔkɛ kɛ bɛbahu ye wɔ ɛkɛ ne. Duzu a Pɔɔlo bayɛ a?

10. Asoo ɛnee Pɔɔlo sulo debie la ati a yeangɔ Sɛnkilia a? Kilehile nu.

¹⁰ Amaa Pɔɔlo abɔ ɔ nwo nee ezukoa mɔɔ bɛva bɛmaa ye anwo bane la, yeangɔ Sɛnkilia, emomu ɔziale ɔ nzi ɔhɔvale Masidonea. Nɔhalɛ ne a le kɛ saa ɔfa aze bɔbɔ a ɔbayia ngyegyelɛ. Ɛnee nwulema ta sia menli wɔ  adenle nu wɔ tete ne. Ɛnee bɛdabɛ mɔɔ bɛda nyɛvolɛ sua nu bɔbɔ la ɛnlɛ anwobanebɔlɛ. Noko Pɔɔlo kpale kɛ ɔbava ngyegyelɛ ɛhye mɔ anu tɛla kɛ ɔbahɔdɔ menli mɔɔ ɛlɛkendɛ ye wɔ Sɛnkilia la asa anu. Ɔle kpalɛ kɛ ɛnee tɛ ɔ ngomekye a ɔlua a. Menli mɔɔ ɛnee nee Pɔɔlo lua wɔ ye edwɛkpatɛlɛvolɛ adendulɛ ɛhye anu la a le Alesetaakɛse, Geeyɛse, Sɛkɛndɛse, Sopatɛ, Timote, Tulofemɛse yɛɛ Tekekɛse.​—Gyi. 20:3, 4.

11. Duzu a Kilisienema yɛ ye ɛnɛ fa bɔ bɛ nwo bane wɔ bɛ ɛzonlenlɛ gyima ne anu a, na neazo boni a Gyisɛse yɛle ye wɔ ɛhye anwo a?

¹¹ Kilisienema mɔɔ wɔ ɛkɛ ne ɛnɛ la kpondɛ ndenle dua zo bɔ bɛ nwo bane wɔ daselɛlilɛ nu kɛ mɔɔ Pɔɔlo yɛle la. Wɔ ɛleka bie mɔ, saa bɛlɛkɔ daselɛlilɛ a bɛkɔ ye kɛ ekpunli anzɛɛ yeanyɛ boɛ fee la bɛkɔ ye nwiɔ nwiɔ. Na mɔɔ fale kpɔdekpɔdeyɛlɛ nwo la ɛ? Kilisienema ze ye kɛ, kɛ ɔde ye biala bɛbayia kpɔdekpɔdeyɛlɛ. (Dwɔn 15:20; 2 Tim. 3:12) Noko bɛ nye fuu bɛnva bɛ nwo bɛndo esiane nu. Suzu Gyisɛse neazo ne anwo nea. Mekɛ bie mɔɔ dwazotiama mɔɔ bɛwɔ Gyɛlusalɛm yɛle kɛ bɛsi Gyisɛse awolɛ la, “Gyisɛse veale ɔ nwo na ɔvile ɛzonlenlɛsua ne anu ɔhɔle.” (Dwɔn 8:59) Nzinlii mɔɔ Dwuuma bɔle adwenle kɛ bɛku Gyisɛse la, “Gyisɛse anye ɔ nyunlu anlua wɔ Dwuuma anu, emomu ɔvile ɛkɛ ne ɔhɔle maanzinli ne mɔɔ bikye fienemgbole ne la anu.” (Dwɔn 11:54) Gyisɛse yɛle mɔɔ ɔbahola la ɔvale ɔbɔle ɔ nwo bane amaa yeahola yeayɛ Gyihova ɛhulolɛdeɛ. Kilisienema mɔɔ wɔ ɛkɛ ne ɛnɛ la yɛ zɔ.​—Mat. 10:16.

12, 13. (a) Kɛzi Yutekɛse ewudwazo ne hanle asafo ne ɛ? (b) Baebolo ne anu anyelazo boni a kyekye menli mɔɔ bɛ alɔvolɛ ɛwu la arɛle a?

¹² Pɔɔlo nee ɔ gɔnwo mɔ vile Masidonea na bɛ avinli tetele. Ɔda ali kɛ bɛziale bɛyiale nu wɔ Tulowase. d Kɛlɛtokɛ ne ka kɛ: “Ye kenle nnu ne azo yɛhɔdole bɛ wɔ Tulowase.” e (Gyi. 20:6) Ɛke a bɛdwazole kpavolɛ Yutekɛse mɔɔ yɛlimoa yɛha ɔ nwo edwɛkɛ la. Nea kɛzi mediema ne mɔ dele nganeɛ wɔ mekɛ mɔɔ bɛnwunle kɛ bɛdwazo bɛ gɔnwo Yutekɛse bɛra ngoane nu bieko la! Kɛ mɔɔ kɛlɛtokɛ ne ka la, “bɛ rɛle kyekyele kpole.”​—Gyi. 20:12.

¹³ Ɔle zɔ kɛ nwanwane deɛ ɛhye bie ɛnzi ɛnɛ. Noko, wɔ bɛdabɛ mɔɔ bɛ alɔvolɛ ɛwu la afoa nu, ewudwazo nwo anyelazo mɔɔ gyi Baebolo ne azo la ‘kyekye bɛ rɛle kpole.’ (Dwɔn 5:28, 29) Suzu nwo nea: Kɛmɔ ɛnee Yutekɛse ɛnli munli la ati, ɔziale ɔwule. (Wlo. 6:23) Noko bɛdabɛ mɔɔ bɛbadwazo bɛ wɔ Nyamenle ewiade fofolɛ ne anu la banyia nwolɛ adenle adɛnla aze dahuu! Bieko, bɛdabɛ mɔɔ bɛbadwazo bɛ na bɛ nee Gyisɛse ali tumi wɔ  anwuma la ɛnrɛwu bieko. (1 Kɔl. 15:51-53) Ɔwɔ kɛ Kilisienema mɔɔ wɔ ɛkɛ ɛnɛ la​—saa bɛkpokpa bɛ o anzɛɛ bɛboka “mboane gyɛne” ne anwo o​—maa ‘bɛ rɛle kyekye kpole’ kpalɛ.​—Dwɔn 10:16.

14. Duzu a Pɔɔlo hanle hilele Ɛfɛsɛse mgbanyima wɔ mekɛ mɔɔ ɔyiale bɛ wɔ Maelitɛse a?

¹⁴ Pɔɔlo nee menli mɔɔ ɔ nee bɛ lua la vile Tulowase hɔle Asɔso, na akee bɛhɔle Metelin, Kayɔso, Seemɔso yɛɛ Maelitɛse. Ɛnee ye bodane a le kɛ ɔbahɔdwu Gyɛlusalɛm wɔ Pɛntekɔso Ɛvoyia kenle ne. Ɛnee ɔkpondɛ kɛ ɔdwu Gyɛlusalɛm ndɛ la ati a yeanva meli mɔɔ ɔbava Ɛfɛsɛse la. Kɛmɔ ɛnee Pɔɔlo kulo kɛ ɔ nee Ɛfɛsɛse mgbanyima tendɛ la ati ɔhanle kɛ bɛrayia ye wɔ Maelitɛse. (Gyi. 20:13-17) Mɔɔ bɛrale la, Pɔɔlo hanle hilele bɛ kɛ: “Bɛdabɛ bɛze kɛzi ɔvi mekɛ mɔɔ limoa mɔɔ membale Ehyea maanzinli ne anu la membɔle me ɛbɛla wɔ bɛ avinli la, menvale mɛlɛbɛnwoaze kpole nee ɛzunlɛ yɛɛ sɔnea mɔɔ Dwuuma adwenle ɛtane ti ɔdole me la menzonlenle Awulae, na meanva ninyɛne mɔɔ nvasoɛ wɔ zo mɔɔ ɔwɔ kɛ meka mekile bɛ anzɛɛ ɔwɔ kɛ mekilehile bɛ bagua nu nee azua nu la meanvea bɛ. Na menlile Dwuuma nee Gilikima daselɛ bɔkɔɔ kɛ bɛnlu bɛ nwo, bɛzonle Nyamenle na bɛnyia yɛ Awulae Gyisɛse anu diedi.”​—Gyi. 20:18-21.

15. Nvasoɛ mɔɔ wɔ azua nu daselɛlilɛ zo la bie mɔ a le boni?

 ¹⁵ Yɛbahola yɛalua ndenle dɔɔnwo azo yɛaha edwɛkpa ne yɛahile menli ɛnɛ. Yɛle kɛ Pɔɔlo la, yɛbɔ mɔdenle yɛkɔ ɛleka mɔɔ menli wɔ la, le kɛ kale agyinlaleɛ, gua zo anzɛɛ gua nu. Noko azua nu daselɛlilɛ tɛde adenle titili mɔɔ Gyihova Alasevolɛ dua zo bɔ edwɛkpa ne nolo a. Duzu ati ɔ? Deɛmɔti ɔle zɔ la a le kɛ, azua nu daselɛlilɛ ne maa menli dɔɔnwo nyia adenle te Belemgbunlililɛ edwɛkɛ ne dahuu na ɛhye kile kɛ Nyamenle ɛnyɛ nyeyenu. Eza ɔmaa ahonlekpalɛma nyia moalɛ mɔɔ bɛhyia nwo la. Bieko, azua nu daselɛlilɛ ne maa nolobɔlɛma diedi nu yɛ se na bɛgyinla kpundii. Nɔhalɛ nu, debie mɔɔ maa bɛnwu nɔhalɛ Kilisienema ɛnɛ la a le mɔdenlebɔlɛ mɔɔ bɛfa bɛka edwɛkɛ ne wɔ “bagua nu nee azua nu” la.

16, 17. Kɛzi Pɔɔlo hilele kɛ ɔnzulo debie ɛ, na kɛ ɔkɛyɛ na Kilisienema azukoa ye neazo ne ɛnɛ ɛ?

¹⁶ Pɔɔlo hilele nu hilele Ɛfɛsɛse mgbanyima ne mɔ kɛ ɔnze ngyegyelɛ mɔɔ ɔsia ɔkɔ Gyɛlusalɛm a ɔbayia a. Ɔhanle kɛ, “Noko membu me ngoane kɛ ɔsonle bolɛ, amaa meahola meawie ɛnriandilɛ ne nee ɛzonlenlɛ gyima mɔɔ menyianle menvile Awulae Gyisɛse ɛkɛ ne kɛ menli Nyamenle ɛlolɛ kpole ne anwo edwɛkpa ne anwo daselɛ bɔkɔɔ la.” (Gyi. 20:24) Pɔɔlo ammaa tɛnlabelɛ biala​—le kɛ anwodolɛ anzɛɛ dwazotia​—anga ye ɛzulolɛ kɛ ɔbawie ye gyima ne.

¹⁷ Ɛnɛ noko Kilisienema yia tɛnlabelɛ ngakyile mɔɔ ɛnle kpalɛ la. Arane ne mɔ fa bɛ sa to yɛ gyima zo na bɛyɛ yɛ kpɔdekpɔde. Bie mɔ fa akɛnrasesebɛ gyinla anwodolɛ ngakyile nloa. Kilisiene mgbavolɛ nee mbɛlɛra gyinla atipɛnema ngyegyelɛ nloa wɔ sukulu. Ɔnva nwo tɛnlabelɛ biala mɔɔ Gyihova Alasevolɛ wɔ nu la, bɛgyinla kpundii kɛ Pɔɔlo la. Bɛbɔ kpɔkɛ kɛ bɛbali “edwɛkpa ne anwo daselɛ bɔkɔɔ.”

18. Duzu a Pɔɔlo yɛle mɔɔ yeammaa yeanli mogya nwo fɔlɛ a, na kɛ ɔkɛyɛ na Ɛfɛsɛse mgbanyima azukoa ye ɛ?

¹⁸ Bieko, Pɔɔlo gyinlanle ye anwubielɛ zo vale folɛdulɛ mɔɔ anu la ɛkɛ ne la maanle Ɛfɛsɛse mgbanyima ne mɔ. Mɔɔ limoa la, ɔhanle ɔhilele bɛ kɛ bie a mekɛ mɔɔ li amozi mɔɔ bɛbanwu ye la ɛne. Akee ɔhanle kɛ: “Menli awie biala mogya nwo ɛzonle, ɔluakɛ meanva Nyamenle ɛhulolɛdeɛ ne mɔɔ ɔwɔ kɛ meka nwolɛ edwɛkɛ mekile bɛ la amuala meanvea bɛ. Kɛ ɔkɛyɛ na Ɛfɛsɛse mgbanyima azukoa Pɔɔlo na bɛanli awie biala mogya nwo ɛzonle ɛ? Ɔhanle ɔhilele bɛ kɛ: “Bɛnlea bɛ nwo boɛ na bɛnlea mboane ne mɔ mɔɔ sunsum nwuanzanwuanza ne ɛyɛ bɛ neavolɛma wɔ bɛ avinli la amuala anwo zo, na bɛnlea Nyamenle asafo ne mɔɔ ɔvale ɔ Ra ne mogya ɔdɔle la boɛ.” (Gyi. 20:26-28) Pɔɔlo bɔle bɛ kɔkɔ kɛ “bedi anwo ɛzulolɛ” bara mboane ne avinli na “bɛaha adalɛ edwɛkɛ bɛava bɛahwe ɛdoavolɛma ne bɛali bɛ  nzi.” Duzu a ɔwɔ kɛ mgbanyima ne mɔ yɛ a? Pɔɔlo bɔle bɛ kɔkɔ kɛ, “Bɛmaa bɛ nye ɛla ɛkɛ na bɛhakye kɛ ɛvolɛ nsa ɛne, alehyenlɛ nee aledwolɛ, meangyakyi ye ɛlɛ kɛ mebava ɛzunlɛ meadu bɛ nuhua ko biala folɛ.”​—Gyi. 20:29-31.

19. Ɛkpɔkyelɛ boni a rale wɔ ɛvoya mɔɔ limoa la awieleɛ a, na duzu a vi nu rale a?

¹⁹ “Bedi anwo ɛzulolɛ” ne yele ɔ ti wɔ ɛvoya mɔɔ limoa la awieleɛ. Kɛyɛ 98 Y.M., ɛzoanvolɛ Dwɔn hanle kɛ: “Mɔɔ dwazo tia Kelaese la bara . . . Bɛvi yɛ nu a bɛhɔle a, noko ɛnee bɛmboka yɛ nwo; ɔboalekɛ saa ɛnee bɛboka yɛ nwo a, anrɛɛ bɛ nee yɛ dɛnlanle.” (1 Dwɔn 2:18, 19) Ɔkadwu ɛvoya mɔɔ tɔ zo nsa la ɛnee menli ɛkpɔkye na ɔlua zo bɛnyianle Kilisienemaanle ɛsɔfo eku ne, na wɔ ɛvoya mɔɔ tɔ zo nna ne anu Constantine liele adalɛ “Kilisienema” ɛhye mɔ dole nu. Ɛzonlenlɛ nu mgbanyima ne hanle “adalɛ edwɛkɛ” ɔlua awozonle ɛzonlenlɛ nyɛleɛ mɔɔ bɛliele bɛdole nu wɔ “Kilisiene” ɛzonlenlɛ nu la azo. Ɛnɛ, yɛnwu mɔɔ kpɔkyevolɛma ne nyɛleɛ vale rale la wɔ Kilisienemaanle ne ngilehilelɛ nee bɛ nyɛleɛ nu.

20, 21. Kɛzi Pɔɔlo lale tunwomaa subane ali ɛ, na kɛzi Kilisiene mgbanyima mɔɔ bɛwɔ ɛkɛ ne ɛnɛ la bahola azukoa ye ɛ?

²⁰ Ɛnee subane mɔɔ Pɔɔlo lɛ la le ngakyile bɔkɔɔ fi menli mɔɔ nzinlii ɛnee bɛkulo kɛ bɛdidi mboane ne anwo la anwo. Ɔyɛle gyima ɔnleanle ɔ nwo amaa yeanyɛ adesoa yeammaa asafo ne. Tɛ ɔdaye mumua ne ye boɛyɛlɛ ti a ɔboale mediema ne mɔ a. Pɔɔlo dule mgbanyima mɔɔ bɛwɔ Ɛfɛsɛse la folɛ kɛ bɛla tunwomaa subane ali. Ɔhanle ɔhilele bɛ kɛ, “Bɛboa bɛdabɛ mɔɔ bɛle bɛtɛɛ la, na ɔwɔ kɛ bɛkakye Awulae Gyisɛse edwɛkɛ mɔɔ ɔhanle la, ɔse: ‘Anyelielɛ dɔɔnwo wɔ ɛmaanlɛ nu tɛla ɛlielɛ.’”​—Gyi. 20:35.

²¹ Kilisiene mgbanyima mɔɔ bɛwɔ ɛkɛ ne ɛnɛ la da tunwomaa subane ali kɛ Pɔɔlo la. Bɛnle kɛ ɛzonlenlɛ nu mgbanyima mɔɔ dielie bɛ mboane ne ezukoa mgbole la, emomu menli mɔɔ bɛmaa bɛ ɛzonlelilɛ kɛ “bɛnlea Nyamenle asafo ne” la ɛmkpondɛ zolɛ nvasoɛ. Anwomemaazo nee anyebolo ɛnle Kilisiene asafo ne anu ɔluakɛ awie mɔɔ “kɛkpondɛ anyunlunyia kɛmaa ɔ nwo” la asa bazi aze. (Mrɛ. 25:27) Anwomemaazo nee anyiemgba a lua a.​—Mrɛ. 11:2.

22. Duzu a maanle mgbanyima mɔɔ bɛwɔ Ɛfɛsɛse la hulole Pɔɔlo edwɛkɛ a?

²² Ahonle nu mɔɔ Pɔɔlo vile hulole ɔ mediema ne mɔ la maanle bɛdabɛ noko bɛhulole ye edwɛkɛ. Nɔhalɛ nu, mekɛ mɔɔ ɔ nee bɛ ɛlɛdi nrɛlaleɛ la, “bɛ muala bɛzunle kpole, bɛyɛle Pɔɔlo atuu na bɛvole ɔ nloa anwo.” (Gyi. 20:37, 38) Kilisienema bu bɛdabɛ mɔɔ bɛle kɛ Pɔɔlo mɔɔ bɛfi bɛ ɛhulolɛ nu bɛfa bɛ mekɛ, bɛ anwosesebɛ nee bɛ ninyɛne bɛboa mboane ne la yɛɛ bɛkulo bɛ edwɛkɛ. Saa ɛnea Pɔɔlo neazo kɛnlɛma mɔɔ yɛzuzu nwo la a, asoo ɛnlie ɛndo nu kɛ ɛnee Pɔɔlo ɛndu ɔ nloa anu anzɛɛ ɛnwudu edwɛkɛ nu wɔ mekɛ mɔɔ ɔhanle kɛ: “Menli awie biala mogya nwo ɛzonlɛ” la ɔ?​—Gyi. 20:26.