1, 2. Duzu a mɔdenle mɔɔ bɛbɔle kɛ bɛmaa bɛagyakyi edwɛkɛhanlɛ gyima ne wɔ ɛvoya mɔɔ limoa anu la vale rale a?

 KPƆDEKPƆDEYƐLƐ kpole yele ɔ ti, na Sɔɔlo bɔle ɔ bo kɛ “ɔsɛkye” asafo ne​—ɛhye kile kɛ kpɔdekpɔdeyɛlɛ ne anu yɛ se kpalɛ. (Gyi. 8:3) Ɛdoavolɛma ne nriandile, na ɛnee ɔzɔho kɛ bodane mɔɔ Sɔɔlo lɛ kɛ ɔtu Kilisiene ɛzonlenlɛ bo la bara nu. Noko, Kilisienema mɔɔ bɔle asande la yɛle debie bie mɔɔ yɛ azibɛnwo la. Duzu debie ɔ?

² Menli mɔɔ bɔle asande la “bɔle edwɛkpa ne nolo” wɔ ɛleka biala mɔɔ bɛhɔle la. (Gyi. 8:4) Suzu nwolɛ nea! Kpɔdekpɔdeyɛlɛ ne ammaa bɛangyakyi edwɛkpa ne ɛhanlɛ, emomu ɔboale ɔmaanle edwɛkɛ ne dɛlɛle! Ɛdoavolɛma mɔɔ kpɔdekpɔdeyɛlɛ ne ati bɛbɔle asande la maanle edwɛkɛhanlɛ gyima ne dɛlɛle hɔle azɛlɛsinli mɔɔ wɔ moamoa la azo. Kɛ mɔɔ yɛbanwu ye nzinlii la, debie zɛhae bie ɛzi wɔ yɛ mekɛ ye azo.

3. (a) Felepe a le nwane? (b) Duzu ati a bɛanyɛ edwɛkɛhanlɛ gyima ne bie wɔ Samɛlea a, na duzu a Gyisɛse hanle kɛ ɔbahɔ zo wɔ ɛkɛ a?

³ Felepe boka “menli mɔɔ bɔle asande” la anwo. a (Gyi. 8:4; eza nea ɛlɛka, “ Edwɛkpakavolɛ Felepe”) Ɔhɔle Samɛlea, suakpole bie mɔɔ ɛnee bɛtɛyɛle edwɛkɛhanlɛ gyima ne bie wɔ ɛkɛ la azo, ɔluakɛ mekɛ bie Gyisɛse hanle hilele ye ɛzoanvolɛma ne kɛ: “Bɛmmamakyi bɛfa maanle maanle ne mɔ adenle biala azo yɛɛ bɛmmakɔ Samɛlea sua biala azo; emomu, bɛhɔkpondɛ Yizilayɛ sua nu mboane mɔɔ ɛminli la ala.” (Mat. 10:5, 6) Noko ɛnee Gyisɛse ze kɛ mekɛ ɛlɛkɔ la, bɛbali daselɛ bɔkɔɔ wɔ Samɛlea, ɔluakɛ kolaa na yeahɔ anwuma la ɔhanle kɛ: “[Bɛbayɛ] me alasevolɛ wɔ Gyɛlusalɛm nee Dwudiya nee Samɛlea amuala, bɛahɔdwu azɛlɛ ye azo ɛleka biala.”​—Gyi. 1:8.

4. Kɛzi Samɛleama yɛle bɛ nyɛleɛ wɔ Felepe edwɛkɛhanlɛ gyima ne anwo ɛ, na duzu a maanle bɛyɛle zɔ a?

 ⁴ Felepe nwunle kɛ Samɛlea le kɛ “ma [mɔɔ] ɛbolo mɔɔ ɔwɔ kɛ bɛte a.” (Dwɔn 4:35) Ye edwɛkɛ ne maanle menli mɔɔ wɔ ɛkɛ la ahonle dɔle bɛ azule nu na ɔnyɛ se kɛ yɛbanwu deɛmɔti ɔrale ye zɔ la. Ɛnee Dwuuma nee Samɛleama ɛnga yɛɛ bɛ nuhua dɔɔnwo ɛmbu bɛ fee. Noko Samɛleama nwunle kɛ edwɛkpa ne ɛnva nyeyenu ɛmba yɛɛ ɔle ngakyile ɔfi Falasiima ɛdeɛ ne mɔɔ fa mgbakyemgbakyenu ba la anwo. Mɔdenle mɔɔ Felepe bɔle hanle edwɛkɛ ne hilele Samɛleama amuala la maanle ɔlale ali kɛ ɔnlɛ bɛ nwo adwenle ɛtane kɛ menli mɔɔ ɛmbu bɛ la. Ɔnyɛ nwanwane kɛ Samɛleama dɔɔnwo ‘vale koyɛlɛ’ diele Felepe la.​—Gyi. 8:6.

5-7. Maa neazo mɔɔ kile kɛ Kilisienema mɔɔ bɔle asande la maanle edwɛkpa ne dɛlɛle la.

⁵ Ɛnɛ noko kpɔdekpɔdeyɛlɛ ɛtɛmaanle Nyamenle menli ne ɛtɛgyakyile edwɛkɛhanlɛ gyima ne kɛ mɔɔ ɛnee ɔde ye wɔ ɛvoya mɔɔ limoa la anu la. Fane dɔɔnwo ne ala, Kilisienema mɔɔ bɛtinlitinli bɛ nwo zo bɛmaa bɛtu bɛkɔ ɛleka fofolɛ la​—bie a efiadelalɛ anzɛɛ maanle gyɛne zo​—ɛboa ɛmaa bɛbɔ Belemgbunlililɛ edwɛkɛ ne nolo wɔ ɛleka ɛhye mɔ. Kɛ neazo la, wɔ Ewiade Konle II la anu, Gyihova Alasevolɛ holale lile daselɛ kɛnlɛma wɔ Nazi efiade ngakyile nu. Dwuunli bie mɔɔ yiale Alasevolɛ wɔ ɛkɛ ne la hanle kɛ: “Akɛnrasesebɛ mɔɔ  Gyihova Alasevolɛ lale ye ali wɔ efiade ɛkɛ ne la maanle menyianle anwodozo kɛ bɛ diedi ne gyi Ngɛlɛlera ne azo​—ɔti ɔmaanle menyɛle Dasevolɛ.”

⁶ Ɔdwu mekɛ ne bie a bɛdi menli mɔɔ ɛlɛyɛ bɛ kpɔdekpɔde bɔbɔ la daselɛ na bɛtie. Kɛ neazo la, mekɛ mɔɔ bɛdole Dasevolɛ bie mɔɔ bɛfɛlɛ ye Franz Desch efiade wɔ Gusen mɔɔ wɔ Austria la, ɔholale ɔ nee sogyanli bie zukoale Baebolo ne. Nea kɛzi bɛ nye liele wɔ mekɛ mɔɔ ɛvolɛ dɔɔnwo pɛle nu la bɛyiale wɔ Gyihova Alasevolɛ nyianu bie abo na bɛnwunle kɛ bɛ mu nwiɔ bɛlɛbɔ edwɛkpa ne nolo la!

⁷ Debie zɛhae bie zile wɔ mekɛ mɔɔ kpɔdekpɔdeyɛlɛ maanle Kilisienema nriandile vile bɛ maanle nu hɔle maanle fofolɛ nu la. Kɛ neazo la, wɔ 1970 ne anu mɔɔ kpɔdekpɔdeyɛlɛ maanle Alasevolɛ mɔɔ wɔ Malawi la nriandile hɔle Mozambique la bɛlile daselɛ kpole wɔ ɛkɛ. Nzinlii mɔɔ kpɔdekpɔdeyɛlɛ zile wɔ Mozambique bɔbɔ la bɛhɔle zo bɛhanle edwɛkɛ ne. Francisco Coana hanle kɛ, “Nɔhalɛ nu, ɔlua edwɛkɛhanlɛ gyima ne ati bɛhyele yɛ nuhua bie mɔ fane dɔɔnwo. Noko wɔ mekɛ mɔɔ menli dɔɔnwo diele yɛ la, yɛnyianle anwodozo kɛ Nyamenle ɛlɛboa yɛ kɛ mɔɔ ɔboale ɛvoya mɔɔ limoa Kilisienema la.”

8. Kɛzi maanyɛlɛ nee ezukoa nwo edwɛkɛ ka yɛ edwɛkɛhanlɛ gyima ne ɛ?

⁸ Nɔhalɛ nu, tɛ kpɔdekpɔdeyɛlɛ angomekye a ɛmaa Kilisiene ɛzonlenlɛ ɛnyia anyuhɔlɛ wɔ maanle bie mɔ azo a. Kenlensa ye, maanyɛlɛ nee ezukoa nwo edwɛkɛ ɛbuke nwolɛ adenle ɛmaa bɛha Belemgbunlililɛ edwɛkpa ne bɛhile menli mɔɔ wɔ maanle maanle nee aneɛ ngakyile nu la. Konle nee ezukoasɛm ɛmaa bie mɔ ɛdu ɛhɔ maanle mɔɔ bɛlɛ ezukoa la azo na bɛbɔ ɔ bo bɛlɛsukoa Baebolo ne wɔ ɛleka mɔɔ bɛdu bɛhɔ la. Bɛtete asafo mɔɔ bɛka aneɛ gyɛne la wɔ ɛleka mɔɔ tutanema dɔɔnwo wɔ la. Ɛlɛbɔ mɔdenle wɔaha edwɛkɛ ne wɔahile menli mɔɔ vi “maanle maanle nee mbusua nee menli nee aneɛ ngakyile” nu mɔɔ bɛwɔ wɔ azɛlɛsinli ne anu la ɔ?​—Yek. 7:9.

9. Saemɔn a le nwane, na duzu a maanle ɔ nye liele Felepe anwo a?

⁹ Felepe yɛle nwanwane ninyɛne dɔɔnwo wɔ Samɛlea. Kɛ neazo la, ɔyɛle menli mɔɔ lɛ ewule ngakyile la ayile yɛɛ ɔdule sunsum ɛtane dɔɔnwo bɔbɔ. (Gyi. 8:6-8) Nrenyia ko bie anye liele nwanwane ninyɛne mɔɔ Felepe yɛle la anwo. Bɛfɛlɛ ye Saemɔn, ɔle ngonyianli mɔɔ menli bu ye kpalɛ la ati bɛka ɔ nwo edwɛkɛ kɛ: “Nrenyia ɛhye a le Nyamenle Tumi ne” a. Noko kɛkala, akee Saemɔn ɛnwu Nyamenle tumi kpalɛ ne, ɔluakɛ yenwu nwanwane ninyɛne mɔɔ Felepe ɛlɛyɛ la na Saemɔn ɛrayɛ diedinli. (Gyi. 8:9-13) Noko nzinlii, adwenle mɔɔ Saemɔn lɛ la lale ali. Adenle boni azo?

10. (a) Duzu a Pita nee Dwɔn yɛle wɔ Samɛlea a? (b) Mɔɔ Saemɔn nwunle kɛ Pita nee Dwɔn fa bɛ sa gua ɛdoavolɛma fofolɛ ne mɔ anwo zo a bɛnyia sunsum nwuanzanwuanza ne la, duzu a ɔyɛle a?

¹⁰ Mɔɔ ɛzoanvolɛma ne dele kɛ menli dɔɔnwo ɛlɛtie edwɛkɛ ne wɔ Samɛlea la, bɛzoanle Pita nee Dwɔn wɔ bɛ nwo lɔ. (Nea ɛlɛka “ Pita Vale ‘Belemgbunlililɛ  Ne Sanvɛ Ne Mɔ’ Lile Gyima.”) Mɔɔ ɛzoanvolɛ nwiɔ ne hɔdwule ɛkɛ la, bɛvale bɛ sa bɛguale ɛdoavolɛma fofolɛ ne anwo zo, na bɛ nuhua ko biala nyianle sunsum nwuanzanwuanza ne. b Mɔɔ Saemɔn nwunle ɛhye la, ɔzinle ɔ nwo. Ɔhanle ɔhilele bɛ kɛ, “Bɛmaa me tumi ɛhye noko bie amaa awie biala mɔɔ mekɛva me sa mekɛgua ɔ nwo zo la anyia sunsum nwuanzanwuanza ne bie.” Saemɔn yɛle kɛ ɔmaa bɛ ezukoa amaa yeanyia Nyamenle ahyɛlɛdeɛ ɛhye bie!​—Gyi. 8:14-19.

11. Kɔkɔbɔlɛ boni a Pita vale maanle Saemɔn a, na duzu a Saemɔn yɛle ye wɔ nwo a?

¹¹ Pita zile ɔ gyakɛ aze buale Saemɔn kɛ. “Ɛ nee wɔ ezukoa ne amuala ɛminli, ɔluakɛ ɛdwenle kɛ ɛbahola wɔava ezukoa wɔadɔ Nyamenle ahyɛlɛdeɛ ne mɔɔ ɔfa ɔmaa mgbane la. Ɛnlɛ kyɛfoa biala wɔ gyima ɛhye anu, ɔluakɛ wɔ ahonle nu ɛnde wɔ Nyamenle anyunlu.” Akee Pita dule Saemɔn folɛ kɛ, “Nu ɛ nwo na gyakyi wɔ subane ɛtane ne, bodo Gyihova na kakyi wɔ adwenle amaa yeava wɔ ɛtane yeahyɛ wɔ; ɔluakɛ menwu kɛ anyebolo ɛyi wɔ tɛkɛɛ na dahuu ɛkpondɛ kɛ ɛyɛ ɛtane.” Ɔda ali kɛ ɛnee Saemɔn ɛnle sonlatane; ɛnee ɔkpondɛ kɛ ɔyɛ mɔɔ le kpalɛ la noko ɛnee ɔtɛtele ninyɛne bo kpalɛ. Ɔti ɔzɛlɛle ɛzoanvolɛma ne kɛ: “Bɛbodo Gyihova bɛmaa me amaa ninyɛne mɔɔ bɛha la anu biala anzi me nwo zo.”​—Gyi. 8:20-24.

12. Kɛzi ezukoa mɔɔ bɛfa bɛtɔ gyinlabelɛ la ɛbu zo wɔ Kilisienemaanle ne anu ɛ?

 ¹² Saemɔn anyunlu mɔɔ Pita hwile la le kɔkɔbɔlɛ maa Kilisienema mɔɔ wɔ ɛkɛ ɛnɛ la wɔ gyinlabelɛ mɔɔ bɛfa ezukoa bɛtɔ anzɛɛ ezukoa ti bɛfa bɛmaa wɔ asafo ne anu la anwo. Nyɛleɛ ɛhye kɔ zo wɔ Kilisienemaanle ne mɔɔ ɛkpɔkye la anu. Nɔhalɛ nu, The Encyclopædia Britannica (1878) mɔɔ tɔ zo ngɔnla la ka kɛ: “Saa awie sukoa Pope ne mɔ anwo debie a ɔnwu ye wienyi kɛ ɛra biala ɛnle ɛkɛ mɔɔ bɛdole bɛyele bie mɔɔ ezukoa ɛnle nu a, yɛɛ nuhua dɔɔnwo ne ala ezukoa mɔɔ bɛfa bɛtɔ gyinlabelɛ ne la le mɔɔ bɛyɛ bɛmaa ɔbo zo, ɔle anyiemgba yɛɛ bɛyɛ bɛmaa menli nwu ye.”

13. Ndenle boni mɔ azo a ɔwɔ kɛ Kilisienema nea boɛ wɔ gyinlabelɛ mɔɔ bɛfa ezukoa bɛtɔ la anwo a?

¹³ Ɔwɔ kɛ Kilisienema nea boɛ wɔ gyinlabelɛ mɔɔ bɛfa ezukoa bɛtɔ la anwo. Kɛ neazo la, ɔnle kɛ bɛbɔ mɔdenle kɛ bɛbahyɛ mgbanyima mɔɔ bɛbahola bɛamaa bɛanyia nwolɛ adenle wɔ asafo ne anu la ninyɛne anzɛɛ bɛkanvo bɛ somaa amaa bɛanyia bɛ nyunlu ɛlolɛ. Zɔhane ala a ɔwɔ kɛ mgbanyima ɛhye mɔ nea boɛ na bɛanva bɛ adwenle bɛanzie menli mɔɔ ezukoa wɔ bɛ sa nu la angomekye anwo zo a. Neazo nwiɔ ɛhye mɔ anu ko biala le ezukoa mɔɔ bɛfa bɛtɔ gyinlabelɛ la. Nɔhalɛ nu, ɔwɔ kɛ Nyamenle azonvolɛ kɔsɔɔti bu bɛ nwo kɛ ‘bɛle ekyi’ na bɛkendɛ bɛmaa bɛdua Gyihova sunsum ne azo bɛfa nwolɛ adenle bie bɛmaa bɛ. (Luku 9:48) Ɔnle kpalɛ wɔ Nyamenle ahyehyɛdeɛ ne anu kɛ awie “kɛkpondɛ anyunlunyia kɛmaa ɔ nwo.”​—Mrɛ. 25:27.

14, 15. (a) “Yiteyopeanli kpanyinli” ne a le nwane, na kɛzi Felepe nwunle ye ɛ? (b) Kɛzi Yiteyopeanli kpanyinli ne yɛle ye nyɛleɛ wɔ Felepe edwɛkɛ ne anwo ɛ, na duzu ati a yɛkola yɛka kɛ yeampele ɔ nwo yeanzɔne a? (Nea ɔbodwɛkɛ ne.)

¹⁴ Gyihova anwumabɔvolɛ hanle hilele Felepe kɛ ɔhɔ adenle ne mɔɔ vi Gyɛlusalɛm ɔkɔ Gaza la azo. Saa Felepe adwenle nu yɛle ye kesee wɔ deɛmɔti bɛhanle kɛ ɔhɔ la anwo a, ɔdele ninyɛne bo wɔ mekɛ mɔɔ ɔnwunle Yiteyopeanli kpanyinli bie kɛ “ɔlɛkenga ngapezonli Ayezaya buluku ne kpole” la. (Nea ɛlɛka “ Awie Mɔɔ Bɛza Ye” Anzɛɛ “Kpanyinli”.) Gyihova sunsum  ne hanle Felepe maanle ɔnriandile ɔbikyele nrenyia ne ehwili ne. Ɔbizale ye kɛ, “Asoo ɛte mɔɔ ɛlɛkenga la abo?” Yiteyopeanli kpanyinli ne buale ye kɛ, “Saa awie angile me a, kɛ ɔkɛyɛ na meade ɔ bo ɛ?”​—Gyi. 8:26-31.

¹⁵ Yiteyopeanli ne maanle Felepe vole ye ehwili ne anu. Nea kɛzi bɛvale anyelielɛ bɛlile adwelie la! Ɔvi mekɛ tendenle, ɛnee bɛnze “boane” anzɛɛ “sonvolɛ” ne mɔɔ bɛha ɔ nwo edwɛkɛ wɔ Ayezaya ngapezo ne anu la. (Aye. 53:1-12) Noko mekɛ mɔɔ bɛlɛkɔ la, Felepe maanle Yiteyopeanli ne nwunle ye kɛ ngapezo ɛhye fale Gyisɛse Kelaese anwo. Ɛnee Yiteyopeanli ne​—mɔɔ ɛhakyi ɛrayɛ Dwuunli la​—le kɛ menli mɔɔ bɛzɔnenle bɛ wɔ Pɛntekɔso 33 Y.M. la, ɔnwunle mɔɔ ɔwɔ kɛ ɔyɛ la ɛkɛ ne ala. Ɔhanle ɔhilele Felepe kɛ, “Nea! Nzule ɛne; duzu a si me ɛzɔnenlɛ nwo adenle a?” Yiteyopeanli ne maanle Felepe zɔnenle ye ndɛndɛ ne ala! c (Nea ɛlɛka mɔɔ se “ Nzule Nu Ɛzɔnenlɛ” la.) Ɛhye anzi, Gyihova sunsum ne vale Felepe hɔle Ahyedɔdo kɛ ɔhɔha edwɛkpa ne wɔ ɛkɛ ne noko.​—Gyi. 8:32-40.

16, 17. Kɛzi anwumabɔvolɛma ɛlɛyɛ edwɛkɛhanlɛ gyima ne bie ɛnɛ ɛ?

¹⁶ Ɛnɛ, Kilisienema ɛnyia nwolɛ adenle ɛlɛyɛ gyima mɔɔ Felepe yɛle la bie. Fane dɔɔnwo ne ala, bɛkola bɛka Belemgbunlililɛ edwɛkɛ ne bie bɛkile menli wɔ mekɛ mɔɔ bɛnle daselɛlilɛ nu, le kɛ mekɛ mɔɔ bɛlɛtu adenle la. Wɔ bɛ nuhua dɔɔnwo afoa nu, tɛ mgbane gyɛne ala a bɛyia ahonlekpalɛma mɔɔ anye die edwɛkɛ ne anwo a. Yɛ nye la kɛ ɛhye bahola azi ɔluakɛ Baebolo ne maa ɔda ali wienyi kɛ anwumabɔvolɛma ɛlɛkile edwɛkɛhanlɛ gyima ne adenle amaa “maanle nee mbusua nee aneɛ nee menli kɔsɔɔti” ade edwɛkɛ ne bie. (Yek. 14:6) Gyisɛse hanle kɛzi anwumabɔvolɛma baboa wɔ edwɛkɛhanlɛ gyima ne anu la anwo edwɛkɛ fɔɔnwo. Wɔ Gyisɛse ndonwo ne mɔɔ fale hwiiti nee ndile nwo la anu, ɔhanle kɛ wɔ ma ɛdelɛ mekɛ ne anu​—mekɛ ɛhye awieleɛ  ne​—“menli mɔɔ bade la a le anwumabɔvolɛ ne mɔ.” Ɔdoale zo kɛ sunsum nu abɔdeɛ ɛhye mɔ “[baboɔboa] ninyɛne kɔsɔɔti mɔɔ maa awie mɔ tɔ aze nee menli mɔɔ yɛ ninyɛndane la anloa bɛavi ye Belemgbunlililɛ ne anu.” (Mat. 13:37-41) Mekɛ ko ne ala, anwumabɔvolɛma ne baboɔboa Belemgbunlililɛ ne anu koliagyama ne anloa​—yɛɛ akee nzinlii “menli ekpunli kpole” ne mɔɔ boka “mboane gyɛne” ne anwo​—mɔɔ Gyihova kulo kɛ ɔtwe bɛ ɔba ye ahyehyɛdeɛ ne anu la.​—Yek. 7:9; Dwɔn 6:44, 65; 10:16.

¹⁷ Daselɛ mɔɔ kile kɛ ɛhye bie ɛlɛkɔ zo la a le kɛ menli mɔɔ yɛka edwɛkɛ ne yɛkile bɛ wɔ daselɛlilɛ nu la bie mɔ ɛha kɛ ɛnee bɛlɛyɛ asɔne kɛ Nyamenle ɛmaa awie ɛraboa bɛ. Suzu neazo bie mɔɔ fale Belemgbunlililɛ nolobɔlɛma nwiɔ mɔɔ ɛnee bɛ nee kakula ekyi bie lua daselɛlilɛ nu la anwo nea. Mɔɔ bɛyɛle gyima nwonlomɔ ne mɔɔ ɔlɛkɔ ewiazo la, Alasevolɛ nwiɔ ne yɛle kɛ bɛkpɔne noko ɛnee kakula ne anye ɛbolo kɛ ɔkɔ awuke mɔɔ doa zo la anu. Nɔhalɛ nu, ɔ ngomekye ɔhɔbɔle anlenkɛ ne anu! Mɔɔ raalɛ bie bukele anlenkɛ ne la, Alasevolɛ nwiɔ ne hɔle ɔ nwo ɛkɛ ne kɛ bɛ nee ye kadendɛ. Ɔzinle bɛ nwo wɔ mekɛ mɔɔ raalɛ ne hanle kɛ ɛnee ɔlɛyɛ asɔne kɛ awie ɛraboa ye ɔmaa ɔde Baebolo ne abo la. Bɛyɛle Baebolo ɛzukoalɛ nwo ngyehyɛleɛ!

18. Duzu ati a ɔwɔ kɛ yɛmaa yɛ nye bolo yɛyɛ yɛ ɛzonlenlɛ gyima ne a?

¹⁸ Kɛmɔ ɛboka Kilisiene asafo ne anwo la ati, wɔnyia nwolɛ adenle kɛ ɛ nee anwumabɔvolɛma babɔ nu ayɛ edwɛkɛhanlɛ gyima kpole ɛhye mɔɔ ɛlɛkɔ zo ɛnɛ la. Bu nwolɛ adenle ɛhye mɔɔ wɔnyia la kɛ ɔsonle bolɛ. Saa ɛbɔ mɔdenle ɛyɛ bie a, ɛ nye balie wɔ mekɛ mɔɔ ɛlɛkɔ zo wɔabɔ “Gyisɛse anwo edwɛkpa ne” nolo la.​—Gyi. 8:35.