TILE 8
Asafo Ne “Nyianle Anzodwolɛ”
Sɔɔlo mɔɔ yɛle bɛ kpɔdekpɔde mɔɔ anu yɛ se la ɛrayɛ ɛzoanvolɛ mɔɔ bɔ mɔdenle
Ɔgyi Gyima ne 9:1-43 azo
1, 2. Duzu a Sɔɔlo hɔle Damasekɛse kɛ ɔkayɛ a?
ADENDUVOMA bie mɔɔ anye ɛbolo la ɛlɛkɔ Damasekɛse kɛ bɛkayɛ debie mɔɔ ɛnle kpalɛ la wɔ ɛkɛ. Bɛkadu Gyisɛse ɛdoavolɛma mɔɔ bɛkpɔ bɛ la bɛavi bɛ azua nu, bɛakyekye bɛ, bɛagua bɛ nyunlu aze na bɛ nee bɛ ahɔ Gyɛlusalɛm bɛamaa Sanhedelin ne nee bɛ ali.
2 Ahenle mɔɔ li bɛ nyunlu la a le Sɔɔlo mɔɔ yelimoa yenlea yemaa bɛhu awie la. a Ɔtɛkyɛle biala, ɔliele ɔdole nu ɔmaanle menli ekpunli bie zile Sitivin, Gyisɛse ɛdoavolɛ mɔɔ bɔ mɔdenle la awolɛ. (Gyi. 7:57–8:1) Sɔɔlo akunlu andwo Gyisɛse ɛdoavolɛma mɔɔ bɛwɔ Gyɛlusalɛm mɔɔ ɔyɛle bɛ kpɔdekpɔde la anwo, na kɛkala yeyɛ ye adwenle kɛ ɔkadoa zo wɔ ɛkɛ ne noko. Ɔkpondɛ kɛ ɔtu ɛzonlenlɛma mɔɔ boka “Adenle Ne” anwo la abo.—Gyi. 9:1, 2; eza nea ɛlɛka mɔɔ ɔ ti ne se “ Tumi Mɔɔ Pɔɔlo Vale Hɔle Damasekɛse La”.
3, 4. (a) Duzu a dole Sɔɔlo a? (b) Kpuya boni mɔ a yɛbazuzu nwo a?
3 Arɛlevilɛ nu ala wienyi bie vi anwuma rabɔle yiale Sɔɔlo. Menli mɔɔ nee ye lua la nwunle wienyi ne noko ɛzulolɛ maanle bɛdɔle mumule. Sɔɔlo anye zile na ɔ nye zo bulule ye. Sɔɔlo mɔɔ ɛnnwu ɛhwee la dele ɛnelɛ bie vi anwuma kɛ: “Sɔɔlo, Sɔɔlo, duzu ati a ɛlɛyɛ me kpɔdekpɔde ɛ?” Sɔɔlo vale anwowosolɛ bizale kɛ: “Yɛmenle, ɛdawɔ nwane ɔ?” Mualɛ mɔɔ Sɔɔlo nyianle la zinle ɔ nwo kpole: “Medame Gyisɛse mɔɔ ɛlɛyɛ me kpɔdekpɔde la ɔ.”—Gyi. 9:3-5; 22:9.
4 Duzu a yɛbahola yɛazukoa yɛavi edwɛkɛ mɔɔ Gyisɛse limoale hanle hilele Sɔɔlo la anu a? Saa yɛsuzu edwɛkɛ mɔɔ sisile mɔɔ maanle Sɔɔlo hakyile la anwo a, kɛzi ɔbaboa yɛ ɛ? Na duzu a yɛbahola yɛazukoa yɛavi asafo ne ɛkɛ wɔ kɛzi bɛvale anzodwolɛ mɔɔ bɛnyianle ye wɔ Sɔɔlo ɛhakyilɛ ne anzi bɛlile gyima kpalɛ la anu a?
“Duzu Ati A Ɛlɛyɛ Me Kpɔdekpɔde Ɛ?” (Gyima ne 9:1-5)
5, 6. Duzu a yɛbahola yɛazukoa yɛavi edwɛkɛ mɔɔ Gyisɛse hanle hilele Sɔɔlo la anu a?
5 Mekɛ mɔɔ Gyisɛse yiale Sɔɔlo wɔ Damasekɛse adenle ne azo la, yeambiza ye kɛ: “Duzu ati a ɛlɛyɛ me ɛdoavolɛma ne kpɔdekpɔde ɛ?” Kɛ mɔɔ yɛnwu ye wɔ anwuma ɛkɛ ne la, ɔbizale ye kɛ: “Duzu ati a ɛlɛyɛ me kpɔdekpɔde ɛ?” (Gyi. 9:4) Nɔhalɛ nu, Gyisɛse bu sɔnea mɔɔ ye azonvolɛ yia la kɛ bɛlɛfa bɛara ɔ nwo zo.—Mat. 25:34-40, 45.
6 Saa ɛlɛnwu amaneɛ ɔlua diedi mɔɔ ɛlɛ ye wɔ Kelaese anu la ati a, nyia anwodozo kɛ Gyihova nee Gyisɛse ze tɛnlabelɛ ne. (Mat. 10:22, 28-31) Bie a kɛkala bɛnrɛye ngyegyelɛ ne bɛnrɛvi ɛkɛ. Kakye kɛ ɛnee Gyisɛse anye gyi Sɔɔlo anwo wɔ mekɛ mɔɔ ɔlɛnea yeamaa bɛahu Sitivin la, yɛɛ ɔnwunle Sɔɔlo wɔ mekɛ mɔɔ ɔhɔhwenle nɔhalɛ ɛdoavolɛma ɔvile bɛ azua nu wɔ Gyɛlusalɛm la. (Gyi. 8:3) Noko, Gyisɛse anyɛ nwolɛ ɛhwee wɔ zɔhane mekɛ ne. Noko akee, Gyihova luale Kelaese anwo zo maanle Sitivin nee ɛdoavolɛma gyɛne anwosesebɛ mɔɔ bɛhyia amaa bɛahɔ zo bɛali nɔhalɛ la.
7. Duzu a ɔwɔ kɛ ɛyɛ amaa wɔagyinla kpundii wɔ mekɛ mɔɔ bɛlɛyɛ wɔ kpɔdekpɔde la ɛ?
7 Saa ɛyɛ ninyɛne ɛhye mɔ a ɛdawɔ noko ɛbahola wɔagyinla kpɔdekpɔdeyɛlɛ nloa: (1) Bɔ kpɔkɛ kɛ ɔnva nwo biala mɔɔ bazi la ɛbali nɔhalɛ. (2) Sɛlɛ moalɛ fi Gyihova ɛkɛ. (Fel. 4:6, 7) (3) Gyakyi nzenralɛlilɛ ne maa Gyihova. (Wlo. 12:17-21) (4) Nyia anwodozo kɛ Gyihova bamaa wɔ anwosesebɛ mɔɔ ɛhyia nwo la kɔkpula kɛ ɔbaye sɔnea ne yeavi ɛkɛ ne la.—Fel. 4:12, 13.
“Adiema Sɔɔlo, Awulae . . . Ɛzoa Me Ɛ Nwo Ɛke” (Gyima ne 9:6-17)
8, 9. Kɛzi Ananayase dele nganeɛ wɔ gyima mɔɔ bɛvale bɛmaanle ye la anwo ɛ?
8 Mekɛ mɔɔ Gyisɛse buale Sɔɔlo kpuya mɔɔ ɔbizale kɛ, “Yɛmenle, ɛdawɔ nwane ɔ?” la ɔwiele la, ɔhanle ɔhilele ye kɛ: “Dwazo na kɔ suakpole ne azo na bɛbaha mɔɔ ɔwɔ kɛ ɛyɛ la bɛahile wɔ.” (Gyi. 9:6) Bɛzɔle Sɔɔlo mɔɔ anye ɛzi la asa bɛ nee ye hɔle sua nu wɔ Damasekɛse, ɔhyele ɛhɔne na ɔyɛle asɔne too kenle nsa wɔ ɛkɛ. Wɔ zɔhane mekɛ ne, Gyisɛse dendɛle hilele ɛdoavolɛ bie mɔɔ bɛfɛlɛ ye Ananayase mɔɔ wɔ suakpole ne azo la. Ɛnee “Dwuuma amuala ka ɔ nwo edwɛkɛ kpalɛ” wɔ Damasekɛse.—Gyi. 22:12.
9 Dwenle nganeɛ mɔɔ bie a Ananayase dele la anwo nea! Gyisɛse Kelaese mɔɔ bɛdwazo ye, mɔɔ le asafo ne Ati la nee ye ɛdendɛ na yekpa ye kɛ ɔyɛ gyima titili bie. Ɔle enililɛ kpole, noko ɛnee gyima ɛhye ɛnla aze! Mekɛ mɔɔ bɛhanle kɛ ɔwɔ kɛ Ananayase kɔ Sɔɔlo ɛkɛ ne la ɔhanle kɛ: “Awulae, mede nrenyia ɛhye anwo edwɛkɛ mevi menli dɔɔnwo ɛkɛ ne kɛ yeyɛ wɔ nwuanzanwuanzama mɔɔ wɔ Gyɛlusalɛm la kpɔdekpɔde dɔɔnwo. Na ɛsɔfo mgbanyima ne mɔ ɛmaa ye tumi kɛ ɔrɛla ɛke na ɔrahye awie biala mɔɔ kɛbɔ wɔ duma la.”—Gyi. 9:13, 14.
10. Duzu a yɛsukoa yɛfi edwɛkɛ mɔɔ Gyisɛse hanle hilele Ananayase la anu a?
10 Gyisɛse andea Ananayase kɛ ɔhanle kɛzi ɔte nganeɛ la. Emomu, Gyisɛse maanle ye adehilelɛ mɔɔ nuhua la ɛkɛ ne la. Eza Gyisɛse lile ye eni ɔluakɛ ɔmaanle ɔnwunle deɛmɔti ɔlɛfa gyima ɛhye yeawula ɔ sa la. Gyisɛse hanle Sɔɔlo anwo edwɛkɛ kɛ: “Mekpa nrenyia ɛhye kɛ ɔli me duma ne anwo daselɛ ɔhile maanle maanle nee arelemgbunli yɛɛ Yizilayɛma. Ɔluakɛ mebamaa yeanwu amaneɛ dɔɔnwo ne mɔɔ ɔbanwu ye wɔ me duma nu la wienyi.” (Gyi. 9:15, 16) Ndɛndɛ ne ala, Ananayase diele Gyisɛse. Ɔhɔle Sɔɔlo mɔɔ ɛnee ɔlɛyɛ bɛ kpɔdekpɔde la ɛkɛ na ɔhanle ɔhilele ye kɛ: “Adiema Sɔɔlo, Awulae Gyisɛse mɔɔ yele ɔ nwo hilele wɔ wɔ adenle nu wɔ mekɛ mɔɔ ɛlɛba la ɛzoa me ɛ nwo ɛke amaa wɔanwu debie bieko na sunsum nwuanzanwuanza ne ayi wɔ tɛkɛɛ.”—Gyi. 9:17.
11, 12. Duzu a yɛsukoa yɛfi Gyisɛse, Ananayase nee Sɔɔlo edwɛkɛ ne anu a?
11 Yɛnwu nɔhalɛ edwɛkɛ dɔɔnwo wɔ Gyisɛse, Ananayase nee Sɔɔlo edwɛkɛ ne anu. Kɛ neazo la, Gyisɛse ɛlɛkile edwɛkɛhanlɛ gyima ne adenle kɛ mɔɔ ɔbɔle nwolɛ ɛwɔkɛ la. (Mat. 28:20) Gyisɛse nee menli ɛndendɛ ɛnɛ ɛdeɛ, noko ɔlɛdua akɛlɛ nɔhavo ne mɔɔ yekpa ye kɛ ɔnlea ye sonvolɛma anwo zo la anwo zo yeahile edwɛkɛhanlɛ gyima ne adenle. (Mat. 24:45-47) Neazo Eku ne maa nolobɔlɛma nee adekpakyelɛma kɔkpondɛ menli mɔɔ kulo kɛ bɛnwu Kelaese anwo edwɛkɛ dɔɔnwo la. Kɛ mɔɔ yɛnwunle ye wɔ tile mɔɔ li ɛhye anyunlu anu la, bɛ nuhua dɔɔnwo zɛlɛle Nyamenle na Gyihova Alasevolɛ ne mɔ hɔle bɛ ɛkɛ.—Gyi. 9:11.
12 Ananayase yɛle tieyɛ, ɔyɛle ye gyima ne na ɔnyianle nyilalɛ dɔɔnwo. Saa daselɛlilɛ gyima ne maa wɔ ahonle tu bɔbɔ a, asoo ɛlɛyɛ tieyɛ wɔali daselɛ bɔkɔɔ ɔ? Wɔ bie mɔ afoa nu, bɛsulo kɛ bɛbahɔ azua nu na bɛ nee menli mɔɔ bɛnze bɛ la adendɛ. Ɔnla aze ɔmmaa bie mɔ kɛ bɛbali daselɛ wɔ gyima nu, gua zo, fonu zo anzɛɛ kɛlata zo. Ananayase lile ɛzulolɛ mɔɔ ɔlɛ la anwo gyima na ɔnyianle nwolɛ adenle ɔboale Sɔɔlo ɔmaanle ɔ sa hanle sunsum nwuanzanwuanza ne. b Ananayase holale yɛle gyima ɛhye ɔluakɛ ɔnyianle diedi wɔ Gyisɛse anu yɛɛ ɔbule Sɔɔlo kɛ ɔ diema. Kɛ mɔɔ Ananayase yɛle la, saa yɛdie Gyisɛse mɔɔ ɛlɛkile edwɛkɛhanlɛ gyima ne adenle la yɛdi, yɛmaa yɛ kunlu yelɛyela yɛ maa menli na yɛbu menli mɔɔ yɛnwu bɛ a yɛsulo bɛ la kɛ bɛbahola bɛarayɛ ye mediema a, yɛbahola yɛali ɛzulolɛ zo konim.—Mat. 9:36.
“Ɔbɔle Ɔ Bo Ɔhanle Gyisɛse Anwo Edwɛkɛ” (Gyima ne 9:18-30)
13, 14. Saa ɛle awie mɔɔ ɛlɛsukoa Baebolo ne noko ɛtɛsɔnenle a, duzu a ɛbahola wɔazukoa wɔavi Sɔɔlo neazo ne anu a?
13 Sɔɔlo yɛle ye ndɛndɛ vale mɔɔ ɔlɛsukoa la lile gyima. Mɔɔ bɛyɛle ye ayile la, ɔmaanle bɛzɔnenle ye na ɔ nee ɛdoavolɛma mɔɔ bɛwɔ Damasekɛse la dule. Noko ɔyɛle dɔɔnwo ɔbokale nwo. “Ndɛndɛ ne ala ɔhɔle nyianu azua ne mɔ anu na ɔbɔle ɔ bo ɔhanle Gyisɛse anwo edwɛkɛ kɛ yemɔ a ɔle Nyamenle Ara ne a.”—Gyi. 9:20.
14 Saa bɛ nee wɔ ɛlɛsukoa Baebolo ne noko bɛtɛsɔnenle wɔ a, asoo ɛbayɛ kɛ Sɔɔlo la na wɔazi nwolɛ kpɔkɛ kpalɛ ɔ? Ɔle zɔ kɛ Sɔɔlo nwunle nwanwane debie mɔɔ Kelaese yɛle la, na ɛhye a boale ye maanle ɔyɛle nwolɛ debie a. Menli bie mɔ noko nwunle nwanwane ninyɛne mɔɔ Gyisɛse yɛle la. Kɛ neazo la, Falasiima ekpunli bie nwunle ye kɛ yeyɛ nrenyia bie mɔɔ asa ɛdwe la ayile yɛɛ Dwuuma dɔɔnwo ze kɛ ɔdwazole Lazalɛse ɔvile ewule nu. Noko bɛ nuhua dɔɔnwo yɛle anyetele yɛɛ bɛdwazole bɛtiale ye bɔbɔ. (Maake 3:1-6; Dwɔn 12:9, 10) Noko Sɔɔlo mɔɔ ɔhakyile. Duzu ati a Sɔɔlo hakyile na bie mɔ angakyi ɛ? Ɔboalekɛ ɔzulole Nyamenle ɔdɛlale sonla yɛɛ ɔhilele Kelaese anwunvɔnezelɛ ne anwo anyezɔlɛ. (Fel. 3:8) Saa ɛdawɔ noko ɛyɛ zɔ a, ɛnrɛmaa debie biala ɛnrɛzi wɔ adenle kɛ ɛbaha edwɛkɛ ne na wɔafɛta wɔamaa ɛzɔnenlɛ.
15, 16. Duzu a Sɔɔlo yɛle ye wɔ nyianu azua ne mɔ anu a, na kɛzi Dwuuma mɔɔ wɔ Damasekɛse la yɛle bɛ nyɛleɛ ɛ?
15 Ɛbahola wɔapɛ kɛzi edwɛkɛ ne ɛzi menli ne anwo na bɛva ɛya wɔ mekɛ mɔɔ bɛnwunle kɛ Sɔɔlo ɛlɛka Gyisɛse anwo edwɛkɛ wɔ nyianusua ne anu la anwo nvoninli ɔ? Bɛbizale kɛ, “Asoo tɛ nrenyia ne mɔɔ yɛle bɛdabɛ mɔɔ bɛbɔle duma ɛhye kpɔdekpɔde wɔ Gyɛlusalɛm la ɛne?” (Gyi. 9:21) Mekɛ mɔɔ Sɔɔlo ɛlɛka deɛmɔti ɔhakyile adwenle mɔɔ ɔlɛ ye wɔ Gyisɛse anwo la, “ɔhilehilele nu kɛ Gyisɛse a le Kelaese ne” a. (Gyi. 9:22) Noko tɛ awie biala a liele ngilenu ɛhye dole nu a. Menli mɔɔ amaamuo ɛli bɛ ti nee bɛdabɛ mɔɔ bɛle anwomemaazo la anlie mɔɔ ɔhanle la ando nu. Noko Sɔɔlo ammaa ɔ sa nu ando.
16 Ɛvolɛ nsa anzi ɛnee Dwuuma mɔɔ wɔ Damasekɛse la nee Sɔɔlo tɛsu kpolera. Akee bɛyɛle kɛ bɛku ye. (Gyi. 9:23; 2 Kɔl. 11:32, 33; Gal. 1:13-18) Mekɛ mɔɔ Sɔɔlo nwunle adwenle mɔɔ bɛbɔle ye wɔ ɔ nwo la, ɔzile kpɔkɛ nrɛlɛbɛ nu na ɔdɛnlanle kɛndɛne nu na bɛvale ye bɛluale suakpole ne bane ne anwo tokule bie anu bɛdwulale ye aze bɛtɛɛ. Luku hanle kɛ “ye [Sɔɔlo] ɛdoavolɛma ne” a boale ye maanle ɔnriandile zɔhane nɔe ne a. (Gyi. 9:25) Edwɛkɛ ɛhye kile kɛ menli mɔɔ dele kɛ Sɔɔlo ɛlɛka edwɛkɛ ne wɔ Damasekɛse la bie mɔ diele na bɛrayɛle Kelaese ɛdoavolɛma.
17. (a) Kɛzi menli bie mɔ yɛ bɛ nyɛleɛ wɔ Baebolo ne anu nɔhalɛ ne anwo ɛ? (b) Duzu a ɔwɔ kɛ yɛkɔ zo yɛyɛ a, na kɛmɔti ɛ?
17 Mekɛ mɔɔ ɛbɔle ɔ bo kɛ ɛka ninyɛne mgbalɛ mɔɔ ɛlɛsukoa la bie wɔahile wɔ mbusuafoɔ, ɛ gɔnwo mɔ nee menli gyɛne la, bie a ɛnee ɛ nye la kɛ awie biala balie Baebolo ne anu nɔhalɛ ne mɔɔ nuhua la ɛkɛ ne la ado nu. Bie a bie mɔ liele dole nu, noko bɛ nuhua dɔɔnwo anyɛ zɔ. Nɔhalɛ nu, bie a wɔ sua nu amra kpɔle wɔ. (Mat. 10:32-38) Noko, saa ɛnyia anyuhɔlɛ wɔ kɛzi ɛ nee menli suzu Ngɛlɛlera ne anwo la anu na ɛbɔ ɛbɛla kpalɛ a, wɔannea a menli mɔɔ dwazo tia wɔ la bie mɔ bɔbɔ bahakyi bɛ adwenle.—Gyi. 17:2; 1 Pita 2:12; 3:1, 2, 7.
18, 19. (a) Mekɛ mɔɔ Baanabase gyinlanle Sɔɔlo anzi la, duzu a vi nu rale a? (b) Kɛ ɔkɛyɛ na yɛazukoa Baanabase nee Sɔɔlo ɛ?
18 Mɔɔ Sɔɔlo hɔle Gyɛlusalɛm la, ɛnee ɛdoavolɛma dɔɔnwo adwenle nu yɛ bɛ kesee kɛ yerayɛ ɛdoavolɛ a. Noko, mɔɔ Baanabase gyinlanle Sɔɔlo anzi la, bɛliele ye dole nu na ɔdɛnlanle bɛ nwo ɛkɛ ne ekyii. (Gyi. 9:26-28) Ɛnee Sɔɔlo anye gyi ɔ ti anwo noko yeanze edwɛkpa ne anwo nyiane. (Wlo. 1:16) Ɔvale akɛnrazilɛ ɔhanle edwɛkpa ne wɔ Gyɛlusalɛm, ɛleka mɔɔ ɔbɔle ɔ bo ɔyɛle Gyisɛse Kelaese ɛdoavolɛma kpɔdekpɔde la. Ɔzinle Dwuuma mɔɔ wɔ Gyɛlusalɛm la anwo kɛ ahenle mɔɔ li bɛ ti la ɛhakyi ɛrayɛ Kilisienenli la, ɔti bɛyɛle kɛ bɛku ye. Kɛlɛtokɛ ne ka kɛ, “Mɔɔ mediema ne mɔ nwunle ɛhye la, bɛvale [Sɔɔlo] bɛhɔle Sizalia na bɛmaanle ɔhɔle Taasɛse.” (Gyi. 9:30) Sɔɔlo diele adehilelɛ mɔɔ Gyisɛse luale asafo ne azo vale maanle la. Na ɔboale Sɔɔlo nee asafo ne.
19 Yɛ ye nzonlɛ kɛ Baanabase a limoale bikyele Sɔɔlo a. Ɔda ali kɛ subane kɛnlɛma ɛhye maanle agɔnwolɛvalɛ mɔɔ wɔ Gyihova azonvolɛ nwiɔ ɛhye mɔɔ bɔ mɔdenle la avinli la yɛle kpole. Asoo ɛdawɔ noko ɛfi wɔ ɛhulolɛ nu ɛboa bɛdabɛ mɔɔ bɛle fofolɛ wɔ asafo ne anu, ɛ nee bɛ kɔ daselɛlilɛ na ɛboa bɛ ɛmaa bɛnyi sunsum nu kɛ mɔɔ Baanabase yɛle la ɔ? Saa ɛyɛ zɔ a, ɛbanyia nyilalɛ dɔɔnwo. Saa ɛle nolobɔlɛnli fofolɛ a, asoo ɛdie moalɛ mɔɔ bɛlɛfa bɛamaa wɔ la ɛto nu kɛ mɔɔ Sɔɔlo yɛle la ɔ? Saa ɛ nee nolobɔlɛma mɔɔ lɛ anwubielɛ la bɔ nu yɛ gyima a, ɛbanyia anyuhɔlɛ, ɛ nye balie kpalɛ yɛɛ ɛ nee bɛ agɔnwolɛvalɛ ne badɛnla ɛkɛ mekɛ tendenle.
“Menli Dɔɔnwo Liele . . . Lile” (Gyima ne 9:31-43)
20, 21. Kɛzi Nyamenle azonvolɛ mɔɔ dɛnlanle aze wɔ tete ne yɛɛ ye mekɛ ye azo la ɛva ‘anzodwolɛ mekɛ’ ɛli gyima kpalɛ ɛ?
20 Mekɛ mɔɔ Sɔɔlo hakyile na ɔvile Gyɛlusalɛm anzodwolɛ nu la anzi, “asafo ne mɔ mɔɔ wɔ Dwudiya nee Galeli yɛɛ Samɛlea amuala la nyianle anzodwolɛ.” (Gyi. 9:31) Kɛzi ɛdoavolɛma ne vale “mekɛ kpalɛ” ɛhye lile gyima ɛ? (2 Tim. 4:2) Kɛlɛtokɛ ne ka kɛ “bɛ nwo yɛle se.” Ɛzoanvolɛma nee menli mɔɔ lɛ ɛzonlelilɛ la maanle ɛdoavolɛma ne diedi nu mianle yɛɛ bɛlile asafo ne anyunlu wɔ “mekɛ mɔɔ bɛvale Gyihova anwo ɛzulolɛ nee arɛlekyekyelɛ mɔɔ sunsum nwuanzanwuanza ne fa maa la bɛluale” la. Kɛ neazo la, Pita vale mekɛ ne maanle ɛdoavolɛma mɔɔ bɛde Leda mɔɔ wɔ Hyɛlɔn Azɛlɛ Sɛsɛ ne azo la anwosesebɛ. Ye mɔdenlebɔlɛ ne maanle menli dɔɔnwo mɔɔ wɔ ɛkɛ la ‘liele Awulae lile.’ (Gyi. 9:32-35) Ɛdoavolɛma ɛhye mɔ ammaa debie gyɛne biala andwehwe bɛ adwenle, emomu bɛbɔle mɔdenle bɛboale bɛ nwo ngoko na bɛhanle edwɛkpa ne. Ɛhye maanle asafo ne anu amra “hɔle zo yɛle dɔɔnwo.”
21 Ɛvoya 20 ne ɛlɛkɔ awieleɛ la, Gyihova Alasevolɛ mɔɔ wɔ maanle dɔɔnwo azo la “nyianle anzodwolɛ” zɛhae bie. Tumivolɛma bie mɔ mɔɔ ɛnee gyegye Nyamenle menli ne wɔ ɛvolɛ dɔɔnwo anu la tumililɛ ne rale awieleɛ arɛlevilɛ nu yɛɛ bɛyele bɛ sa bɛvile edwɛkɛhanlɛ gyima ne azo wɔ ɛleka bie mɔ. Alasevolɛ apenle dɔɔnwo vale nwolɛ adenle ne lile daselɛ wɔ bagua nu, na debie kpalɛ vi nu rale.
22. Kɛ ɔkɛyɛ na wɔava fanwodi mɔɔ ɛlɛ la wɔali gyima kpalɛ ɛ?
22 Ɛlɛfa fanwodi mɔɔ ɛlɛ la wɔali gyima kpalɛ ɔ? Saa ɛde maanle mɔɔ bɛlɛ ɛzonlenlɛ nwo fanwodi la anu a, Seetan bahulo kɛ ɔbɛlɛbɛla wɔ ɔmaa ɛfa wɔ adwenle ɛsie nwonane afoa nu ninyɛne dɔɔnwo ɛkpondɛlɛ zo ɛtɛla kɛ ɛbazonle Gyihova. (Mat. 13:22) Mmamaa ninyɛne twehwe wɔ adwenle. Fa anzodwolɛ mekɛ biala mɔɔ wɔnyia ye kɛkala la di gyima kpalɛ. Bu ye kɛ ɔle nwolɛ adenle mɔɔ ɛbahola wɔava wɔali daselɛ bɔkɔɔ na wɔamaa asafo ne anwo ayɛ se a. Kakye kɛ ninyɛne bahola ahakyi arɛlevilɛ nu.
23, 24. (a) Duzu a yɛsukoa ye wɔ Tabeta edwɛkɛ ne anu a? (b) Duzu a ɔwɔ kɛ yɛbɔ kpɔkɛ kɛ yɛbayɛ a?
23 Suzu mɔɔ dole ɛdoavolɛ Tabeta anzɛɛ Dɔkase la anwo nea. Ɛnee ɔde Dwɔpa mɔɔ bikye Leda la. Adiema raalɛ nɔhavo ɛhye vale ye mekɛ nee ye ninyɛne lile gyima nrɛlɛbɛ nu, ɛnee “gyima kpalɛ ɛyi ye tɛkɛɛ yɛɛ ɔboa ehyiavolɛma.” Noko ɔ nwo dole ye arɛlevilɛ nu, na ɔwule. c Ye ewule ne gyegyele ɛdoavolɛma mɔɔ bɛwɔ Dwɔpa la kpole, titili ahunlanvolɛ mraalɛ mɔɔ nyianle ye nyeleyɛlɛ ne azo nvasoɛ la. Mekɛ mɔɔ Pita dwule ɛleka mɔɔ bɛdole ye funli ne la, ɔyɛle nwanwane debie mɔɔ ɛnee Gyisɛse Kelaese ɛdoavolɛ biala ɛtɛyɛle bie ɛlɛ la. Pita yɛle asɔne na ɔdwazole Tabeta ɔvile ewule nu! Ahunlanvolɛ mraalɛ ne mɔ nee ɛdoavolɛma mɔɔ ɛha la anye liele wɔ mekɛ mɔɔ Pita vɛlɛle bɛ rale sua ne anu na ɔvale Tabeta mɔɔ yedwazo ye la ɔmaanle bɛ la. Ɔbayɛ kɛ ninyɛne ɛhye mɔ maanle bɛnyianle anwosesebɛ bɛgyinlanle sɔnea mɔɔ bɛbayia ye la anloa! Ɔda ali kɛ “bɛdele ɛhye wɔ Dwɔpa amuala, na menli dɔɔnwo liele Awulae lile.”—Gyi. 9:36-42.
Kɛ ɔkɛyɛ na wɔazukoa Tabeta ɛ?
24 Yɛsukoa ninyɛne nwiɔ mɔɔ anwo hyia la yɛfi Tabeta edwɛkɛ ne mɔɔ kyekye yɛ rɛle la anu. (1) Yɛ ngoane mekɛ le ezinra. Nea kɛzi ɔle kpalɛ kɛ yɛbanyia duma kpalɛ wɔ Nyamenle anyunlu kolaa na yeaha amozi la! (Nol. 7:1) (2) Ewudwazo anyelazo ne le nɔhalɛ. Gyihova nwunle Tabeta nyeleyɛlɛ ne na ɔyilale ye wɔ nwolɛ. Saa yɛwu kolaa na Amagɛdɔn ne ara a, Gyihova bahakye yɛ gyima ɛsesebɛ ne na yeadwazo yɛ yeara ngoane nu. (Hib. 6:10) Ɔti saa kɛkala yɛwɔ “mekɛ kpalɛ” anzɛɛ “mekɛ mɔɔ anu yɛ se la anu” bɔbɔ a, bɛmaa yɛmia yɛ nwo yɛli Kelaese anwo daselɛ bɔkɔɔ.—2 Tim. 4:2.
a Nea ɛlɛka “ Falasiinli Sɔɔlo.”
b Fane dɔɔnwo ne ala ɛzoanvolɛma ne a maanle menli asa hanle sunsum nwuanzanwuanza ahyɛlɛdeɛ ne a. Noko wɔ tɛnlabelɛ ɛhye anu ɛdeɛ, ɔbayɛ kɛ Gyisɛse luale Ananayase anwo zo maanle Sɔɔlo mɔɔ ‘yekpa ye’ la asa hanle sunsum ahyɛlɛdeɛ ɛhye a. Mɔɔ Sɔɔlo hakyile la, mekɛ guale nu kolaa na yeanwu ɛzoanvolɛma 12 ne. Noko ɔbayɛ kɛ wɔ zɔhane mekɛ ne amuala anu ɛnee ɔlɛyɛ edwɛkɛhanlɛ gyima ne. Ɔti ɔda ali kɛ Gyisɛse maanle Sɔɔlo asa hanle tumi mɔɔ ɔhyia nwo amaa yeahola yeayɛ gyima ɛhye la.
c Eza nea ɛlɛka, “ Tabeta—‘Ɛnee Gyima Kpalɛ Ɛyi Ye Tɛkɛɛ’.”
