TILE 6
Sitivin—“Nyamenle Ɛlolɛ Nee Ye Tumi Kpole Ne Wɔ Ɔ Nwo Zo”
Sukoa akɛnrazilɛ mɔɔ Sitivin vale lile daselɛ wɔ Sanhedelin ne anyunlu la
Ɔgyi Gyima ne 6:8–8:3 azo
1-3. (a) Tɛnlabelɛ mɔɔ yɛ ɛzulolɛ la boni a Sitivin yiale a, noko duzu a ɔyɛle ye wɔ nwolɛ a? (b) Kpuya boni mɔ a yɛbazuzu nwolɛ a?
SITIVIN gyi kɔɔto ne anyunlu. Mrenyia 71 ɛyia asalo kpole bie mɔɔ ɔbayɛ kɛ ɔbikye Gyɛlusalɛm ɛzonlenlɛsua ne la anu. Sanhedelin kɔɔto ɛhye ɛyia nu ɛnɛ kɛ bɛbua Sitivin ndɛne. Ndɛnebuavolɛma ne lɛ tumi yɛɛ bɛlie duma na bɛ nuhua dɔɔnwo ɛmbu Gyisɛse ɛdoavolɛ ɛhye. Nɔhalɛ nu, ahenle mɔɔ vɛlɛle ayia ɛhye la a le Ɛsɔfo Kpanyinli Kayafase, na ɔdaye a ɔnleanle Sanhedelin ne azo wɔ mekɛ mɔɔ bɛbuale Gyisɛse Kelaese ewule fɔlɛ wɔ siane ekyi mɔɔ ɛze ɛhɔ la anu a. Asoo Sitivin ahonle ɛdu ɔ?
2 Kɛzi Sitivin anyunlu ɛyɛ wɔ mekɛ ɛhye anu la yɛ nwanwane. Ndɛnebuavolɛma ne nleanle ɔ nyunlu na bɛnwunle kɛ “ɔ nyunlu ɛyɛ kɛ anwumabɔvolɛ nyunlu” la. (Gyi. 6:15) Anwumabɔvolɛma ka Gyihova Nyamenle edwɛkɛ ɔti bɛnzulo debie, bɛsie bɛ nwo dii yɛɛ bɛlɛ anzodwolɛ. Kɛ ɛnee Sitivin de la ɛne—ndɛnebuavolɛma ne mɔɔ bɛkpɔ ye bɔbɔ la nwunle ye zɔ. Duzu a maanle ɔziele ɔ nwo dii a?
3 Kilisienema mɔɔ wɔ ɛkɛ ne ɛnɛ la bahola azukoa debie avi kpuya zɔhane mualɛ ne anu. Eza ɔwɔ kɛ yɛnwu deɛmɔti Sitivin ɛhɔ tɛnlabelɛ ɛsesebɛ ɛhye anu la. Kɛzi ɔlile ye diedi ne anwo daselɛ mekɛ bie ɛ? Na ndenle boni mɔ a yɛbahola yɛalua zo yɛazukoa ye a?
‘Bɛmaanle Menli Ne Vale Ɛya’ (Gyima ne 6:8-15)
4, 5. (a) Duzu ati a ɛnee Sitivin le awie mɔɔ anwo hyia wɔ asafo ne anu a? (b) Kɛzi ɛnee “Nyamenle ɛlolɛ nee ye tumi kpole ne” wɔ Sitivin anwo zo ɛ?
4 Yɛnwu kɛ Sitivin boale Kilisiene asafo fofolɛ ne mɔɔ bɛdele la kpalɛ. Wɔ tile mɔɔ li ɛhye anyunlu la anu, yɛnwunle kɛ ɛnee ɔboka mrenyia nsuu ne mɔɔ bɛlɛ bɛ nwo aze mɔɔ ɛnee lɛ ɛhulolɛ kɛ bɛbaboa ɛzoanvolɛma ne la anwo. Saa yɛnea ɛlolɛ ahyɛlɛdeɛ mɔɔ ɔlɛ noko ɛnee ɔbɛlɛ ɔ nwo la aze la a ɔyɛ azibɛnwo. Yɛkenga wɔ Gyima ne 6:8 kɛ ɔholale ɔyɛle “nwanwane ninyɛne nee sɛkɛlɛneɛ mgbole” kɛ mɔɔ ɛzoanvolɛma ne bie mɔ yɛle la. Yɛde noko kɛ ɛnee “Nyamenle ɛlolɛ nee ye tumi kpole ne wɔ ɔ nwo zo.” Duzu a ɛhye kile a?
5 Ɔda ali kɛ ɛnee Sitivin atiakunlu le kɛnlɛma yɛɛ ɔle bɛtɛɛ na ɛhye maanle menli bikyele ye. Adenle mɔɔ ɔluale zo ɔdendɛle la maanle ye tievolɛma diele ye, ɔmaanle bɛnwunle kɛ mɔɔ ɔlɛka la le nɔhalɛ yɛɛ ɔbaboa bɛ. Ɛnee ɔlɛ tumi ɔluakɛ ɛnee Gyihova sunsum ne wɔ ɔ nwo zo yɛɛ ɔvale mɛlɛbɛnwoaze ɔlile sunsum ne adehilelɛ nzi. Yeanva ye ɛlolɛ ahyɛlɛdeɛ nee ninyɛne mɔɔ ɔkola ɔyɛ la yeammemaa ɔ nwo zo, emomu ɔvale nwolɛ nganvolɛ ne ɔmaanle Gyihova na ɔhilele kɛ ɔdwenle ye tievolɛma anwo. Ɔnyɛ nwanwane kɛ menli mɔɔ dwazole tiale ye la nwunle kɛ ɔwɔ kɛ bɛgyinla boɛ la!
6-8. (a) Somolɛ nwiɔ boni mɔ a dwazotiama ne bɔle Sitivin a, na duzu ati ɔ? (b) Duzu ati a Sitivin neazo ne bahola aboa Kilisienema ɛnɛ a?
6 Mrenyia dɔɔnwo dwazole kɛ bɛ nee Sitivin su kpolera, noko “bɛangola bɛangyinla ye nrɛlɛbɛ nee sunsum ne mɔɔ ɔlɛfa yeadendɛ la anloa.” a Anyezota maanle “bɛwulowulale menli bie abo” kɛ bɛdo Kelaese ɛdoavolɛ ɛhye mɔɔ ɛnze nwolɛ bie la ɛzonle. Eza “bɛmaanle menli ne, mgbanyima ne mɔ nee mɛla kilehilevolɛma ne vale ɛya” ɔti bɛrale ɔ nwo zo bɛrahyele ye na bɛvale ye bɛhɔmaanle Sanhedelin ne. (Gyi. 6:9-12) Dwazotiama ne bɔle ye somolɛ nwiɔ ɛhye: Ɔlɛka munzule edwɛkɛ yeatia Nyamenle nee Mosisi. Adenle boni azo?
7 Menli mɔɔ bɔle Sitivin somolɛ la hanle kɛ ɔlɛtendɛ yeatia “ɛleka nwuanzanwuanza ɛhye”—Gyɛlusalɛm ɛzonlenlɛsua ne. (Gyi. 6:13) Eza bɛhanle kɛ yedendɛ yetia Mosisi Mɛla ne ɔluakɛ ɔlɛkakyi amaamuo mɔɔ Mosisi vale gyakyile bɛ la. Ɛnee ɛhye le ɛzonledolɛ kpole, ɔluakɛ wɔ zɔhane mekɛ ne, ɛnee Dwuuma bu ɛzonlenlɛsua ne, Mosisi Mɛla ne anu ninyɛne ngyikyi ne mɔ yɛɛ amaamuo dɔɔnwo ne mɔɔ bɛva bɛbokale Mɛla ne anwo la kpalɛ. Ɔti, somolɛ mɔɔ bɛbɔle Sitivin la kile kɛ ɔle sonlatane mɔɔ fɛta ewule a!
8 Ɔyɛ alɔbɔlɛ kɛ menli mɔɔ wɔ ɛzonlenlɛ ngakyile nu la ta dua ndenle ɛhye mɔ azo fa ngyegyelɛ ba Nyamenle azonvolɛ nwo zo la. Ɛnɛ bɔbɔ, ɔyɛ a ɛzonlenlɛ mɔɔ dwazo tia Gyihova Alasevolɛ la wulowula arane mgbanyima abo bɛmaa bɛyɛ yɛ kpɔdekpɔde. Saa bɛto yɛ ɛzonle anzɛɛ bɛka yɛ nwo edwɛkɛ ɛtane a duzu a ɔwɔ kɛ yɛyɛ a? Yɛbahola yɛazukoa ninyɛne dɔɔnwo yɛavi Sitivin ɛkɛ.
Ɔvale Akɛnrazilɛ Ɔlile “Anyunlunyia Nyamenle Ne” Anwo Daselɛ (Gyima ne 7:1-53)
9, 10. Edwɛkɛ boni a tendɛtiama ɛha ye wɔ ɛdendɛlɛ mɔɔ Sitivin maanle ye wɔ Sanhedelin ne anyunlu la anwo a, na duzu a ɔwɔ kɛ yɛkakye a?
9 Kɛ mɔɔ bɛha ye wɔ tile ɛhye mɔlebɛbo la, Sitivin anyunlu yɛle kɛ anwumabɔvolɛ nyunlu wɔ mekɛ mɔɔ ɔlɛtie somolɛ mɔɔ bɛlɛbɔ ye la. Akee Kayafase hakyile ɔ nye nleanle ye na ɔbizale ye kɛ: “Ɛhye mɔ le zɔ ɔ?” (Gyi. 7:1) Akee mekɛ ɛdwu kɛ Sitivin tendɛ na ɔdendɛle noko!
10 Menli bie mɔ ɛdendɛ ɛtia Sitivin ɛdendɛlɛ ne, na bɛka kɛ yeanye ɛzonle mɔɔ bɛdole ye la anloa wɔ edwɛkɛ dɔɔnwo ne mɔɔ ɔhanle la anu. Nɔhalɛ ne a le kɛ, Sitivin yɛle neazo kɛnlɛma maanle yɛ wɔ kɛzi ɔwɔ kɛ ‘yɛbua’ awie mɔ wɔ edwɛkpa ne anwo la. (1 Pita 3:15) Kakye kɛ bɛbɔle Sitivin somolɛ kɛ ɔlɛtendɛ yeatia Nyamenle nee Mosisi ɔluakɛ yeambu ɛzonlenlɛsua ne nee Mɛla ne. Sitivin pɛle Yizilayɛ tetedwɛkɛ ne sikalɛ ɔyɛle ye ekpunli nsa, na ɔzile edwɛkɛ bie mɔ azo wɔ nu. Maa yɛzuzu ekpunli nsa ɛhye mɔ anwo ngoko.
11, 12. (a) Kɛzi Sitivin vale Ebileham neazo ne lile gyima kpalɛ ɛ? (b) Duzu ati a Sitivin hanle Dwosefi anwo edwɛkɛ wɔ ye ɛdendɛlɛ ne anu a?
11 Tete selɛma ne mekɛ zo. (Gyi. 7:1-16) Sitivin vale Ebileham mɔɔ ye diedi ti Dwuuma bu ye la bɔle ye edwɛkɛ ne abo. Sitivin hanle edwɛkɛ ɛhye mɔɔ Dwuuma ne nee ye yɛ adwenle wɔ nwo la vale zile zo kɛ Gyihova, “Anyunlunyia Nyamenle ne,” limoale yele ɔ nwo hilele Ebileham wɔ Mɛsɔpɔteemea. (Gyi. 7:2) Nɔhalɛ nu, ɛnee nrenyia ɛhye le ɛyɛvolɛ wɔ Ɛwɔkɛ Azɛlɛ ne azo. Ɛnee Ebileham ɛnlɛ ɛzonlenlɛsua anzɛɛ Mosisi Mɛla ne. Ɔti, kɛ ɔkɛyɛ na awie aha kɛ ɔwɔ kɛ dahuu awie di ngyehyɛleɛ zɛhae mɔ azo ɔfa ɔkile kɛ ɔdi nɔhalɛ ɔmaa Nyamenle ɛ?
12 Ɛnee menli mɔɔ ɛlɛtie Sitivin la bu Dwosefi mɔɔ boka Ebileham abozoamra anwo la kpalɛ, noko Sitivin hakyele bɛ kɛ Dwosefi amediema ne mɔ mɔɔ bɛle Yizilayɛ selɛma la kpɔle nrenyia tenlenenli zɔhane na bɛdɔnenle ye kɛ akɛlɛ. Noko, yemɔ a Nyamenle luale ɔ nwo zo liele Yizilayɛma vile ɛhɔne mɔɔ rale la anu a. Ɔda ali kɛ Sitivin nwunle kɛzi Dwosefi nee Gyisɛse Kelaese le ko la wienyi noko yeanga nwolɛ edwɛkɛ amaa menli ne ahɔ zo adie ye.
13. Kɛzi Mosisi anwo edwɛkɛ ne bɔle somolɛ mɔɔ bɛbɔle Sitivin la guale ɛ, na kɛzi ɛhye maanle edwɛkɛ titili bie anu lale ɛkɛ ɛ?
13 Mosisi mekɛ zo. (Gyi. 7:17-43) Sitivin hanle Mosisi anwo edwɛkɛ dɔɔnwo—ndelebɛbo wɔ nu ɔluakɛ ɛnee Sanhedelin ne anu amra dɔɔnwo le Sadusiima mɔɔ bɛnlie Baebolo ne foa mɔɔ tɛ Mosisi a hɛlɛle la bɛndo nu la. Eza kakye kɛ bɛbɔle Sitivin somolɛ kɛ yeha munzule edwɛkɛ yetia Mosisi. Sitivin edwɛkɛ ne bɔle zɔhane somolɛ ne guale, ɔluakɛ ɔmaanle ɔlale ali kɛ ɔbu Mosisi nee Mɛla ne kpalɛ. (Gyi. 7:38) Eza ɔhanle kɛ menli mɔɔ Mosisi bɔle mɔdenle kɛ ɔdie bɛ la kpole ye. Bɛkpole ye bɔbɔ wɔ mekɛ mɔɔ ɛnee yeli ɛvolɛ 40 la. Ɛvolɛ mɔɔ bo 40 la anzi, bɛdendɛle bɛtiale ye tumililɛ ne fane dɔɔnwo. b Sitivin maanle nɔhalɛ edwɛkɛ titili bie anu lale ɛkɛ: Nyamenle menli ne hɔle zo kpole menli mɔɔ Gyihova kpale bɛ kɛ bɛli bɛ nyunlu la.
14. Kɛzi Sitivin vale Mosisi neazo ne hilehilele ye edwɛkɛ ne anu ɛ?
14 Sitivin hakyele ye tievolɛma ne kɛ Mosisi hanle kɛ ngapezonli bie mɔɔ le kɛ Mosisi la bavinde Yizilayɛ. Nwane ɔ, na kɛzi bɛbalie ye ɛ? Sitivin vale mualɛ ne maanle wɔ ye ɛdendɛlɛ ne awieleɛ. Eza ɔhanle nɔhalɛ edwɛkɛ titili bieko: Mosisi nwunle kɛ ɛleka biala kola yɛ nwuanzanwuanza, le kɛ ɛleka mɔɔ ɛnee kpɔkɛ ne ɛlɛsɔ mɔɔ Gyihova nee ye dendɛle la. Ɔti, asoo sua kokye le kɛ Gyɛlusalɛm ɛzonlenlɛsua ne anu ala a bɛbahola bɛazonle Gyihova wɔ ɛkɛ ɔ? Maa yɛnlea.
15, 16. (a) Duzu ati a ɛnee ɛdanlɛsua ne anwo hyia wɔ edwɛkɛ mɔɔ Sitivin ɛlɛka la anu a? (b) Kɛzi Sitivin vale Sɔlɔmɔn ɛzonlenlɛsua ne hilehilele ye edwɛkɛ ne anu ɛ?
15 Ɛdanlɛsua ne nee ɛzonlenlɛsua ne. (Gyi. 7:44-50) Sitivin hakyele kɔɔto ne kɛ kolaa na bɛazi ɛzonlenlɛsua ne wɔ Gyɛlusalɛm la, Nyamenle maanle Mosisi yɛle ɛdanlɛsua—tɛnte mɔɔ bɛkola bɛtudu mɔɔ bɛsonle Nyamenle wɔ nu la. Nwane a baha kɛ ɛzonlenlɛsua ne le kpalɛ tɛla ɛdanlɛsua ne mɔɔ Mosisi mumua ne zonlenle nu la a?
16 Nzinlii mɔɔ Sɔlɔmɔn zile ɛzonlenlɛsua ne la, sunsum ne maanle ɔhanle edwɛkɛ bie mɔɔ anwo hyia la wɔ ye asɔneyɛlɛ nu. Sitivin hanle kɛ, “Anwuma Anwumanli ne ɛndɛnla sua mɔɔ bɛva bɛ sa bɛzi la anu.” (Gyi. 7:48; 2 Ek. 6:18) Gyihova maanle bɛvale ɛzonlenlɛsua ne bɛlile ye bodane nwo gyima, noko ɛnee ɔnde nu. Ɛnee duzu ati a ye azonvolɛ banyia adwenle kɛ ɔwɔ kɛ nɔhalɛ ɛzonlenlɛ kɔ zo wɔ sua mɔɔ bɛva bɛ sa bɛzi la anu a? Sitivin hanle edwɛkɛ mɔɔ tumi wɔ nu mɔɔ wɔ Ayezaya buluku ne anu la ɔvale ɔdwulale ye edwɛkɛ ne kɛ: “Gyihova se, anwuma le me belemgbunli ebia, yɛɛ azɛlɛ ye le me gyakɛ abo ebia. Sua boni a bɛbazi bɛamaa me a? Anzɛɛ nienwu a me ɛnwomenlelielɛ ɛleka ne wɔ a? Asoo tɛ me sa a yɛle ninyɛne ɛhye mɔ amuala ɔ?”—Gyi. 7:49, 50; Aye. 66:1, 2.
17. Kɛzi Sitivin ɛdendɛlɛ ne (a) maanle adwenle mɔɔ ye tievolɛma lɛ la lale ali ɛ? (b) buale ɛzonle mɔɔ bɛdole ye la ɛ?
17 Ɛnea ɛdendɛlɛ mɔɔ Sitivin ɛmaa ɛhile Sanhedelin ne too badwu ɛke la a, ɛnnwu ye kɛ yelua nrɛlɛbɛ adenle zo yemaa adwenle mɔɔ menli mɔɔ dole ye ɛzonle lɛ la ɛla ali ɔ? Ɔmaanle ɔlale ali kɛ Gyihova bodane da ali ngyikyi ngyikyi yɛɛ ɔkola ɔdua ndenle ngakyile zo ɔdi nwolɛ gyima na ɔnli amaamuo bie anzi. Menli mɔɔ Gyɛlusalɛm ɛzonlenlɛsua kɛnlɛma ne nee Mosisi Mɛla ne yɛɛ nwolɛ amaamuo ɛli bɛ adwenle somaa la ɛnde deɛmɔti bɛnyianle Mosisi Mɛla nee ɛzonlenlɛsua ne la abo! Wɔ adenle bie azo, ɛnee Sitivin ɛlɛbiza bɛ kpuya bie mɔɔ anwo hyia la wɔ ye ɛdendɛlɛ ne anu kɛ: Saa bɛtie Gyihova a, asoo ɔngile kɛ bɛbu Mɛla ne na bɛdi ɛzonlenlɛsua ne eni ɔ? Nɔhalɛ nu, Sitivin buale ɛzonle mɔɔ bɛdole ye la ɔluakɛ ɔyɛle biala mɔɔ ɔbahola la ɔdiele Gyihova.
18. Ndenle boni mɔ a ɔwɔ kɛ yɛdua zo yɛbɔ mɔdenle yɛsukoa Sitivin a?
18 Duzu a yɛbahola yɛazukoa yɛavi Sitivin ɛdendɛlɛ ne anu a? Ɛnee ɔze Ngɛlɛlera ne anu edwɛkɛ ne kpalɛ. Zɔhane ala a ɔwɔ kɛ yɛdayɛ noko yɛsukoa Nyamenle Edwɛkɛ ne kpalɛ a amaa yɛahola yɛava ‘nɔhalɛ edwɛkɛ ne yɛali gyima kpalɛ.’ (2 Tim. 2:15) Eza ɔwɔ kɛ yɛdua nrɛlɛbɛ adenle zo yɛtendɛ kɛnlɛma kɛ Sitivin la. Menli mɔɔ ɛlɛtie ye la vale ɛya kpalɛ! Noko ɔbɔle mɔdenle biala ɔ nee bɛ zuzule ninyɛne mɔɔ bɛ nye die nwo kpalɛ la anwo. Eza ɔbule bɛ ɔluakɛ ɔvɛlɛle bɛ “egya mɔ.” (Gyi. 7:2) Ɔwɔ kɛ yɛdayɛ noko yɛfa “mɛlɛbɛnwoaze nee ɛbulɛ” yɛka nɔhalɛ ne mɔɔ wɔ Nyamenle Edwɛkɛ ne anu la.—1 Pita 3:15.
19. Kɛzi Sitivin vale akɛnrasesebɛ hanle Gyihova ndɛnebualɛ edwɛkɛ ne hilele Sanhedelin ne ɛ?
19 Noko, yɛngyakyi kɛ yɛbaha nɔhalɛ edwɛkɛ ne mɔɔ wɔ Nyamenle Edwɛkɛ ne anu la ɔlua menli nwo ɛzulolɛ ti, yɛɛ yɛmbu yɛ nye yɛngua Gyihova ndɛnebualɛ ne azo. Sitivin yɛle ɛhye anwo neazo kpalɛ. Ɔnwunle kɛ daselɛ dɔɔnwo ne mɔɔ ɔhanle nwolɛ edwɛkɛ la anga Sanhedelin ndɛnebuavolɛma ne ahonle. Sunsum nwuanzanwuanza ne hanle ye maanle ɔvale akɛnrasesebɛ ɔdwulale ye edwɛkɛ ne kɛ bɛle kɛ bɛ nenyia mɔ mɔɔ kpole Dwosefi, Mosisi nee ngapezoma ne kɔsɔɔti la. (Gyi. 7:51-53) Nɔhalɛ nu, Sanhedelin ndɛnebuavolɛma ne ɛhu Mɛzaya ne mɔɔ Mosisi nee ngapezoma ne amuala hanle ye ɛralɛ ne anwo edwɛkɛ dole ɛkɛ ne la. Ɔda ali kɛ bɛanli Mosisi Mɛla ne azo fee!
“Awulae Gyisɛse, Die Me Sunsum” (Gyima ne 7:54–8:3)
“Mɔɔ bɛdele ɛhye la, bɛvale ɛya kpole na ɛnee bɛkpondɛ kɛ bɛbo ye.”—Gyima ne 7:54
20, 21. Duzu a Sanhedelin ne yɛle ye wɔ Sitivin edwɛkɛ ne anwo a, na kɛzi Gyihova maanle ye anwosesebɛ ɛ?
20 Nɔhalɛ edwɛkɛ mɔɔ Sitivin hanle la maanle Sanhedelin ne vale ɛya kpole. Ndɛnebuavolɛma ne angola anzɔ bɛ nwo na ɛnee bɛkpondɛ kɛ bɛbo Sitivin. Ɔbayɛ kɛ nrenyia nɔhavo ɛhye nwunle ye kɛ bɛnrɛze ye anwunvɔne kɛ mɔɔ bɛanze ɔ Menle Gyisɛse anwunvɔne la.
21 Ɛnee Sitivin hyia akɛnrasesebɛ na yeahola yeagyinla mɔɔ bazi la anloa. Nɔhalɛ nu, ɔnyianle anwosesebɛ ɔvile ɛnyelɛzodeɛnwunlɛ ne mɔɔ Gyihova maanle ɔnyianle la anu. Sitivin nwunle Nyamenle anyunlunyia ne na ɔnwunle Gyisɛse kɛ ɔgyi Gyihova asa fema zo! Mekɛ mɔɔ Sitivin ɛlɛka ɛnyelɛzodeɛnwunlɛ ne anwo edwɛkɛ la, ndɛnebuavolɛma ne vale bɛ sa duoduale bɛ nzo. Duzu ati ɔ? Ɛnee Gyisɛse ɛlimoa ɛha ɛhile kɔɔto ne kɛ ɔdaye a ɔle Mɛzaya ne a na ɔnrɛhyɛ ɔbadɛnla ɔ Ze asa fema zo. (Maake 14:62) Ɛnyelɛzodeɛnwunlɛ ne mɔɔ Sitivin nyianle la maanle ɔlale ali kɛ mɔɔ Gyisɛse hanle la le nɔhalɛ. Ɔti ɔle nɔhalɛ kɛ Sanhedelin ne a yele Mɛzaya ne maanle na bɛhunle ye a! Akee bɛ muala bɛdule bɛhɔle ɔ nwo zo kɛ bɛkazi ye awolɛ bɛahu ye. c
22, 23. Kɛzi Sitivin ewule ne le kɛ ɔ Menle ɛdeɛ ne ɛ, na kɛ ɔkɛyɛ na Kilisienema mɔɔ wɔ ɛkɛ ne ɛnɛ la ahola anyia anwodozo kɛ Sitivin ɛ?
22 Sitivin ewule ne le kɛ ɔ Menle ɛdeɛ ne ala la, ɔluakɛ ɛnee ɔlɛ anzodwolɛ, ɔnyianle anwodozo wɔ Gyihova anu yɛɛ ɔvale menli mɔɔ ɛlɛku ye la ɛtane ɔhyɛle bɛ. Bie a kɛmɔ ɛnee Sitivin anye gyi sonla Ra ne nee Gyihova anwo la ati, ɔhanle kɛ, “Awulae Gyisɛse, die me sunsum.” Nɔhalɛ nu ɛnee Sitivin ze Gyisɛse edwɛkɛ ɛhye mɔɔ maa anwosesebɛ la: “Mame a mele ewudwazo ne nee ngoane ne a.” (Dwɔn 11:25) Awieleɛ kolaa ne, Sitivin vale ɛnelɛ kpole zɛlɛle Nyamenle kɛ: “Gyihova, mmatwe bɛ nzo wɔ ɛtane ɛhye anwo.” Ɔhanle ɛhye ɔwiele la, ɔwule.—Gyi. 7:59, 60.
23 Ɔti, Sitivin rayɛle Kelaese ɛdoavolɛ mɔɔ limoa mɔɔ ye diedi ti bɛhunle ye a. (Eza nea ɛlɛka mɔɔ se “ Adenle Boni Azo A Ɔle Dasevolɛ A?”) Ɔyɛ alɔbɔlɛ kɛ tɛ ye ɛdeɛ ne a li amozi a. Badwu ɛnɛ, menli mɔɔ wɔ ɛzonlenlɛ gyɛne nu, maanyɛlɛma yɛɛ dwazotiama ɛhu Gyihova nɔhalɛ azonvolɛ bie mɔ. Noko, yɛbahola yɛanyia anwodozo kɛ Sitivin la. Kɛkala, Gyisɛse ɛlɛdi Belemgbunli na ɔlɛfa tumi kpole mɔɔ ɔ Ze ɛva ɛmaa ye la yeali gyima. Debie biala ɛnrɛhola ɛnrɛzi ye adenle kɛ ɔbadwazo ye ɛdoavolɛma mɔɔ di nɔhalɛ la.—Dwɔn 5:28, 29.
24. Kɛzi Sɔɔlo boale maanle bɛhunle Sitivin ɛ, na adenle boni azo a nrenyia nɔhavo ɛhye ewule ne hanle ye ɛ?
24 Ɛnee kpavolɛ bie mɔɔ bɛfɛlɛ ye Sɔɔlo la ɛlɛnea mɔɔ ɛlɛkɔ zo la amuala. Ɔliele Sitivin ewule ne ɔdole nu, na ɔnleanle menli mɔɔ ɛlɛsi ye awolɛ la adɛladeɛ ne azo. Yeangyɛ biala, ɔlile bɛ nyunlu ɔmaanle bɛyɛle ɛdoavolɛma ne kpɔdekpɔde mɔɔ anu yɛ se la. Noko ɛnee Sitivin ewule ne banyia menli dɔɔnwo anwo zo tumi kpole. Ye neazo ne bamaa Kilisienema anwosesebɛ yeamaa bɛahɔ zo bɛali nɔhalɛ na bɛali konim zɛhae bie. Bieko, Sɔɔlo—mɔɔ nzinlii bɛvɛlɛle ye Pɔɔlo la—bahakye mɔɔ ɔyɛle wɔ mekɛ mɔɔ bɛlɛku Sitivin la na yeanlu ɔ nwo kpole. (Gyi. 22:20) Ɔboale ɔmaanle bɛhunle Sitivin noko nzinlii ɔhanle kɛ: ɛnee “meka munzule edwɛkɛ, meyɛ menli kpɔdekpɔde yɛɛ membu debie.” (1 Tim. 1:13) Ɔda ali kɛ Pɔɔlo arɛle anvi Sitivin nee ɛdendɛlɛ mɔɔ tumi wɔ nu mɔɔ ɔmaanle ye kenle zɔhane la. Nɔhalɛ nu, Pɔɔlo edwɛkɛ mɔɔ ɔhanle nee mɔɔ ɔhɛlɛle la anu dɔɔnwo gyi Sitivin ɛdendɛlɛ ne azo. (Gyi. 7:48; 17:24; Hib. 9:24) Nzinlii, Pɔɔlo zukoale diedi nee akɛnrasesebɛ nwo neazo mɔɔ Sitivin mɔɔ ɛnee “Nyamenle ɛlolɛ nee ye tumi kpole ne wɔ ɔ nwo zo” yɛle la. Kpuya ne a le kɛ, “Asoo yɛdayɛ noko yɛbazukoa ye ɔ?”
a Ɛnee dwazotiama ɛhye mɔ bie mɔ boka “Fanwodima Nyianusua ne” anwo. Ɔbayɛ kɛ Wulomuma vale bɛ yɛle ngɛkɛlɛ yɛɛ nzinlii bɛgyakyile bɛ a, anzɛɛ ɛnee bɛle ngɛkɛlɛ mɔɔ bɛhakyi bɛrayɛ Dwuuma a. Ɛnee bɛ nuhua bie mɔ vi Selesea, kɛ mɔɔ ɛnee Sɔɔlo mɔɔ vi Taasɛse de la. Kɛlɛtokɛ ne ɛngile kɛ ɛnee Sɔɔlo boka Seleseama mɔɔ bɛangola Sitivin la anwo.
b Ɛnrɛnwu edwɛkɛ bie mɔ mɔɔ wɔ Sitivin ɛdendɛlɛ ne anu la wɔ Baebolo ne ɛleka biala, le kɛ nwoma mɔɔ Mosisi zukoale ye wɔ Yigyibiti, ɛvolɛ mɔɔ ɛnee yeli wɔ mekɛ mɔɔ ɔnriandile ɔvile Yigyibiti yɛɛ mekɛ dodo mɔɔ ɔlile ye wɔ Medean la anwo edwɛkɛ.
c Wulomuma mɛla ɛmmaa Sanhedelin ne adenle kɛ ɔkola ɔmaa bɛku awie. (Dwɔn 18:31) Kɛzi ɔde ye biala la, menli ekpunli bie mɔɔ ɛva ɛya la a hunle Sitivin a, na tɛ kɛ asɛɛ kɔɔto ne buale ye ewule fɔlɛ la ati ɔ.
