TILE 18
‘Bɛkpondɛ Nyamenle Na Bɛkɛnwu Ye’
Pɔɔlo hanle mɔɔ ye tievolɛma anye die nwo la yɛɛ ɔhakyile ye edwɛkɛ nu
Ɔgyi Gyima ne 17:16-34 azo
1-3. (a) Duzu ati a Pɔɔlo lile nyane kpole wɔ Atɛnse a? (b) Duzu a yɛsukoa yɛfi ye neazo ne anu a?
PƆƆLO ɛlɛdi nyane kpole. Ɔwɔ Atɛnse, Gilisi sua mɔɔ ɛlie duma wɔ nwomazukoalɛ nu na menli le kɛ Socrates, Plato, nee Aristotle hilele debie wɔ ɛkɛ ne la azo. Menli mɔɔ wɔ Atɛnse la anye die ɛzonlenlɛ nwo. Pɔɔlo to ɔ nye wɔ ɛleka biala a—ɛzonlenlɛ azua nu, gua zo nee adenle ne mɔ azo—ɔnwu ananze dɔɔnwo, ɔluakɛ Atɛnsema sonle nyamenle gyɛne dɔɔnwo. Pɔɔlo ze kɛzi nɔhalɛ Nyamenle Gyihova bu awozonle ɛzonlenlɛ la. (Ɛzɛ. 20:4, 5) Ɛnee ɔdaye noko ɔlɛ Gyihova adwenle ne bie—ɔkyi awozonle ɛzonlenlɛ!
2 Mɔɔ Pɔɔlo nwunle ye wɔ gua ne anu la zinle ɔ nwo kpole. Bɛyɛ nyamenle Hɛmɛse ananze dɔɔnwo bɛsolo bɛ wɔ sɔlɔ adɔleɛ afoa nu mɔɔ bikye anlenkɛ kpole ne anloa la. Ɛzonlenlɛ azua ɛbu zo wɔ gua ne anu. Kɛzi ɛzoanvolɛ ɛhye mɔɔ bɔ mɔdenle la baha edwɛkɛ ne wɔ ɛleka zɛhae mɔɔ awozonle ɛzonlenlɛ ɛlie ebia la ɛ? Asoo ɔbahomo ɔ nwo zo na yeaha debie mɔɔ ye tievolɛma nee ye bayɛ adwenle wɔ nwo la ɔ? Asoo ɔbahola yeaboa bɛ yeamaa bɛakpondɛ nɔhalɛ Nyamenle ne na bɛanwu ye ɔ?
3 Edwɛkɛ mɔɔ Pɔɔlo hanle hilele nwomama mɔɔ bɛwɔ Atɛnse la anwo kɛlɛtokɛ wɔ Gyima ne 17:22-31, ɔluale nrɛlɛbɛ adenle zo ɔhanle edwɛkɛ mɔɔ nuhua la ɛkɛ la. Saa yɛsukoa Pɔɔlo neazo ne a, ɔbamaa yɛanwu kɛzi yɛbaha edwɛkɛ mɔɔ yɛ tievolɛma anye die nwo la na yɛ nee bɛ azuzu nwolɛ.
Ɔhilehilele “Wɔ Gua Ne Anu” (Gyima ne 17:16-21)
4, 5. Nienwu a Pɔɔlo hanle edwɛkɛ ne wɔ Atɛnse a, na menli boni a ɛnee wɔ ɛkɛ a?
4 Pɔɔlo hɔle Atɛnse wɔ ye adendulɛ ne mɔɔ tɔ zo nwiɔ la anu wɔ kɛyɛ 50 Y.M. a Mɔɔ ɔlɛkendɛ kɛ Timote nee Saelase vi Bɛlia kɛra la, Pɔɔlo “[bɔle] ɔ bo ɔ nee Dwuuma nee menli mɔɔ sonle Nyamenle la zuzule edwɛkɛ nwo wɔ nyianusua ne anu” kɛ mɔɔ ɔta ɔyɛ ye la. Eza ɔhɔle ɛleka mɔɔ ɔ sa baha Atɛnsema mɔɔ ɛnle Dwuuma la—“gua ne anu.” (Gyi. 17:17) Atɛnse gua ne wɔ Akolɔpɔlese ne sɔlɔ adɔleɛ afoa nu, ye kpole bayɛ kɛ polu 12 la. Gua ne ɛnle ɛleka mɔɔ bɛtɔne ninyɛne ala, ɛkɛ ne a suakpole ne azo amra yia a. Buluku bie hanle kɛ ɛnee ɔle ɛleka mɔɔ “gualilɛ, maanyɛlɛ nee amaamuo nwo edwɛkɛ kɔ zo wɔ suakpole ne azo a.” Ɛnee Atɛnsema anye die nwo kɛ bɛbayia ɛkɛ na bɛazuzu ninyɛne nwo.
5 Pɔɔlo yiale menli bie mɔɔ bɛ edwɛkɛ yɛ se la wɔ gua ne anu. Ɛnee Ɛpekulɛse nee Setɔyeke nrɛlɛbɛvolɛma mɔɔ asolo bɛ diedi la boka menli mɔɔ ɛlɛtie ye la anwo. b Ɛpekulɛsema die di kɛ ngoane rale mgbane ala. Adwenle mɔɔ ɛnee bɛlɛ la ɛne: “Ɔngyia kɛ ɛsulo Nyamenle; Ewule ɛnyɛ nyane; Ɛbahola wɔayɛ kpalɛ; Edwɛkɛ to wɔ a ɛbahola wɔagyinla ɔ nloa.” Ɛnee Setɔyekema die di kɛ ɛbahola wɔava wɔ adwenle wɔabɔ wɔ ɛbɛla yɛɛ bɛnlie bɛnli kɛ Nyamenle wɔ ɛkɛ. Ɛnee Ɛpekulɛsema nee Setɔyekema ɛnlie ewudwazo ne mɔɔ Kelaese ɛdoavolɛma kilehile la ɛnli. Nɔhalɛ nu, ɛnee adwenle mɔɔ ekpunli nwiɔ ɛhye lɛ la le ngakyile fi nɔhalɛ tagyee ne mɔɔ Kilisienema die di mɔɔ Pɔɔlo ɛlɛka nwolɛ edwɛkɛ la anwo.
6, 7. Kɛzi Giliki nrɛlɛbɛvolɛma bie mɔ yɛle bɛ nyɛleɛ wɔ Pɔɔlo ngilehilelɛ ne anwo ɛ, na kɛzi yɛbahola yɛayia menli mɔɔ lɛ subane zɛhae bie la ɛnɛ ɛ?
6 Kɛzi Giliki nrɛlɛbɛvolɛma ne yɛle bɛ nyɛleɛ wɔ Pɔɔlo ngilehilelɛ ne anwo ɛ? Bie mɔ vale Giliki edwɛkɛkpɔkɛ mɔɔ kile “ɛdendɛzoma” la vɛlɛle ye. (Gyi. 17:18) Abɔlɔba bie hanle kɛ: “Alimoa ne, ɛnee bɛfa edwɛkɛkpɔkɛ ɛhye bɛfɛlɛ aloma bie mɔɔ duolua nu soso aleɛ la, na nzinlii bɛvale bɛvɛlɛle awie mɔɔ sesa aleɛ bo zo nee ninyɛne gyɛne wɔ gua nu la. Akee bɛvale bɛvɛlɛle awie biala mɔɔ ka edwɛkɛ mɔɔ ɔnze nwolɛ ɛhwee anzɛɛ ɔnde ɔ bo kpalɛ la.” Ɔti, ɛnee mbɔlɔba zɔhane mɔ ɛlɛka kɛ Pɔɔlo ɛnze ɛhwee na mɔɔ awie mɔ ɛha la yɛɛ ɔka a. Noko, kɛ mɔɔ yɛbanwu ye la, Pɔɔlo ammaa duma ɛtane zɔhane ando ɔ sa nu.
7 Ɛnɛ noko kɛ ɔde ala ɛne. Bɛfa aluma bie mɔ bɛfɛlɛ Gyihova Alasevolɛ ɔlua yɛ diedi mɔɔ gyi Baebolo ne azo la ati. Kɛ neazo la, kilehilevolɛma bie mɔ kilehile kɛ ngakyihakyililɛ le nɔhalɛ na bɛka kɛ saa awie ze nrɛlɛbɛ a ɔwɔ kɛ ɔdie ɔto nu. Bɛka kɛ saa awie ɛnlie ngakyihakyililɛ ɛndo nu a, ɔkile kɛ ɔnze ɛhwee. Ɔti, mbɔlɔba ɛhye mɔ maa menli nyia adwenle kɛ ‘yɛnze mɔɔ yɛka la’ ɔluakɛ yɛkilehile mɔɔ Baebolo ne ka la yɛɛ yɛmaa menli nwu daselɛ mɔɔ kile kɛ bɛbɔle ninyɛne la. Noko yɛmmaa ɛhye ɛndo yɛ sa nu. Emomu, yɛfa anwodozo yɛka diedi mɔɔ yɛlɛ kɛ Gyihova Nyamenle mɔɔ ze nrɛlɛbɛ la a bɔle ninyɛne mɔɔ wɔ azɛlɛ ye azo la anwo edwɛkɛ.—Yek. 4:11.
8. (a) Duzu a menli mɔɔ dele Pɔɔlo edwɛkɛ ne la bie mɔ yɛle a? (b) Bie a Alɛyɔpagɛse ne azo mɔɔ bɛvale Pɔɔlo bɛhɔle la kile duzu? (Nea ɔbodwɛkɛ mɔɔ wɔ mukelɛ 142 la.)
8 Asolo kɛzi menli bie mɔ mɔɔ dele Pɔɔlo edwɛkɛ ne wɔ gua ne anu la yɛle bɛ nyɛleɛ a. Bɛhanle kɛ, “Ɔzɔho kɛ ɔlɛka nyamenle gyɛne bie mɔ anwo edwɛkɛ.” (Gyi. 17:18) Asoo ɛnee amgba Pɔɔlo ɛlɛka nyamenle gyɛne bie mɔ anwo edwɛkɛ ahile Atɛnsema? Ɛnee ɛhye le anyebolo edwɛkɛ, ɔluakɛ ɛnee bɛlimoa bɛbɔ Socrates somolɛ zɛhae bie na bɛli ye edwɛkɛ bɛhu ye. Ɔnyɛ nwanwane kɛ bɛvale Pɔɔlo bɛhɔle Alɛyɔpagɛse ne azo kɛ ɔhilehile edwɛkɛ ne mɔɔ Atɛnsema ɛnde ɔ bo la anu a. c Kɛ ɔkɛyɛ na Pɔɔlo ahilehile ye diedi ne anu ahile menli mɔɔ bɛnze Ngɛlɛlera ne anwo ɛhwee la ɛ?
“Atɛnsema, Menwu Kɛ” (Gyima ne 17:22, 23)
9-11. (a) Kɛzi Pɔɔlo bɔle mɔdenle kɛ ɔbaha edwɛkɛ mɔɔ ye tievolɛma anye die nwo la ɛ? (b) Kɛzi yɛbahola yɛazukoa Pɔɔlo neazo ne wɔ yɛ ɛzonlenlɛ gyima ne anu ɛ?
9 Kakye kɛ Pɔɔlo lile nyane ɔlua awozonle ɛzonlenlɛ ninyɛne mɔɔ ɔnwunle bɛ la ati. Noko, ɔhomole ɔ nwo zo, na yeandendɛ yeantia awozonle ɛzonlenlɛ. Akee ɔbɔle mɔdenle ɔluale nrɛlɛbɛ adenle zo ɔhanle edwɛkɛ mɔɔ ye tievolɛma anye die nwo la. Ɔbɔle ɔ bo kɛ: “Atɛnsema, menwu kɛ wɔ debie biala anu ɔzɔho kɛ bɛkulo nyamenlezonlenlɛ bɛtɛla menli mɔɔ ɛha la.” (Gyi. 17:22) Mɔɔ ɛnee Pɔɔlo ɛlɛka la a le kɛ, ‘Menwu kɛ bɛ nye die nyamenlezonlenlɛ nwo kpalɛ.’ Pɔɔlo hanvole bɛ kɛ bɛkulo nyamenlezonlenlɛ la. Ɔnwunle kɛ bɛdabɛ mɔɔ adalɛ ngilehilelɛ ɛzi bɛ nye la bie mɔ lɛ ahonle kpalɛ. Ɛnee Pɔɔlo ze kɛ mekɛ bie ‘ɛnee ɔnze yɛɛ ɛnee ɔnlɛ diedi la ati ɔyɛle’ ninyɛne bie mɔ.—1 Tim. 1:13.
10 Pɔɔlo hanle kɛ yenwu daselɛ mɔɔ kile kɛ Atɛnsema kulo nyamenlezonlenlɛ la—afɔlemokyea bie mɔɔ bɛyila zo bɛmaa “Nyamenle Bie Mɔɔ Yɛnze Ye La.” Buluku bie ka kɛ, “ɛnee Gilikima nee menli gyɛne ta yila afɔlemokyea zo maa ‘nyamenle mɔɔ bɛnze bɛ’ la ɔluakɛ ɛnee bɛsulo kɛ bie a ɛnee bɛanzonle nyamenle ne bie ɔti ɔbava bɛ nwo ɛya.” Ɔlua afɔlemokyea zɛhae azo, Atɛnsema liele dole nu kɛ Nyamenle bie wɔ ɛkɛ mɔɔ bɛnze ye a. Pɔɔlo vale afɔlemokyea zɔhane bɔle ye edwɛkɛ abo na ɔhwenle adwenle ɔhɔle edwɛkpa ne azo. Ɔhanle kɛ: “Mɔɔ bɛsonle ye noko bɛnze ye la, yemɔ a melɛka ɔ nwo edwɛkɛ meahile bɛ a.” (Gyi. 17:23) Pɔɔlo luale nrɛlɛbɛ adenle zo dendɛle noko ɛnee tumi wɔ nu. Ɛnee ɔnga nyamenle fofolɛ anzɛɛ mɔɔ bɛnze ye la anwo edwɛkɛ kɛ mɔɔ bie mɔ bɔle ye somolɛ la. Ɛnee ɔlɛka nɔhalɛ Nyamenle ne mɔɔ bɛnze ye la anwo edwɛkɛ yeahile bɛ.
11 Kɛ ɔkɛyɛ na yɛazukoa Pɔɔlo neazo ne wɔ yɛ ɛzonlenlɛ gyima ne anu ɛ? Saa yɛgua yɛ nye aze a yɛbanwu daselɛ mɔɔ kile kɛ awie kulo nyamenlezonlenlɛ la, bie a yeva ɛzonlenlɛ nu debie bie yeziezie ɔ nwo anzɛɛ ye sua nu ɛkɛ ne. Yɛbahola yɛaha kɛ: ‘Menwu ye kɛ ɛkulo nyamenlezonlenlɛ. Ɛnee me nye la kɛ mebayia awie mɔɔ kulo nyamenlezonlenlɛ la.’ Saa yɛdua nrɛlɛbɛ adenle zo yɛka kɛ ɔkulo nyamenlezonlenlɛ a, bie a yɛbahola yɛaha edwɛkɛ mɔɔ ɔ nye die nwo mɔɔ yɛbahola yɛazuzu nwo la. Kakye kɛ tɛ yɛ bodane a le kɛ yɛgyinla menli diedi zo yɛabua bɛ ndɛne. Menli mɔɔ ɛnee wɔ adalɛ ɛzonlenlɛ nu la bie mɔ nee yɛ ɛlɛsonle kɛkala.
Ka edwɛkɛ mɔɔ bɛ nye balie nwo la
Nyamenle “Nee Yɛ Nuhua Ko Biala Avinli Anwa” (Gyima ne 17:24-28)
12. Kɛzi Pɔɔlo hakyile ye edwɛkɛ nu maanle ye tievolɛma ɛ?
12 Pɔɔlo nwunle edwɛkɛ mɔɔ ye tievolɛma anye die nwo la noko asoo yemɔ ala a ɔbava yeali bɛ daselɛ ɔ? Ɛnee ɔze kɛ ye tievolɛma le Giliki nrɛlɛbɛvolɛma mɔɔ ze nwoma noko bɛnze Ngɛlɛlera ne anu la ati, ɔhakyile ndenle mɔɔ ɔdua zo ɔdi daselɛ la anu. Mɔɔ limoa, ɔhanle Baebolo ne anwo edwɛkɛ noko yeanga Ngɛlɛlera ne anu edwɛkɛ fɔɔnwo bie. Mɔɔ tɔ zo nwiɔ, ɔmaanle ye tievolɛma nwunle kɛ ɔboka nwolɛ, ɔti ɔyɛ a ɔfa “yɛdayɛ” nee “yɛ” ɔdi gyima. Mɔɔ tɔ zo nsa, ɔhanle Giliki buluku bie mɔ anu edwɛkɛ ɔvale ɔhilele kɛ ninyɛne mɔɔ ɔlɛkilehile bɛ la bie mɔ wɔ bɛdabɛ mumua ne bɛ mbuluku nu. Akee bɛmaa yɛzuzu Pɔɔlo edwɛkɛ mɔɔ tumi wɔ nu la anwo. Nyamenle ne mɔɔ Atɛnsema ɛnze ye la anwo nɔhalɛ edwɛkɛ mɔɔ hyia la boni mɔ a ɔhanle a?
13. Duzu a Pɔɔlo hanle ye wɔ kɛzi bɛbɔle anwuma nee aze la anwo a, na duzu a ɛnee ɔlɛkile a?
13 Nyamenle bɔle anwuma nee aze. Pɔɔlo hanle kɛ: “Nyamenle ne mɔɔ yɛle ewiade nee debie biala mɔɔ wɔ nu, mɔɔ ɔle anwuma nee azɛlɛ Menle la, ɔnde ɛzonlenlɛsua mɔɔ bɛva bɛ sa bɛzi la anu.” d (Gyi. 17:24) Anwuma nee aze amba mgbane ala. Nɔhalɛ Nyamenle ne a bɔle ninyɛne kɔsɔɔti a. (Edw. 146:6) Anwuma nee aze Tumivolɛ Awulae ne ɛndɛnla ɛzonlenlɛsua mɔɔ menli ɛva bɛ sa ɛzi la anu, ɔnle kɛ Athena anzɛɛ nyamenle gyɛne mɔɔ ɛzonlenlɛ azua nee afɔlemokyea a bɛfa bɛwula bɛ anyunlunyia la. (1 Arl. 8:27) Pɔɔlo edwɛkɛ ne anu la ɛkɛ ne wienyi: Nɔhalɛ Nyamenle ne le kpole tɛla ananze mɔɔ menli ɛyɛ ɛziezie ɛzonlenlɛ azua nu la.—Aye. 40:18-26.
14. Kɛzi Pɔɔlo hilele kɛ Nyamenle ɛngyia alesama moalɛ ɛ?
14 Nyamenle ɛngyia alesama moalɛ. Awozonle ɛzonlenlɛma fa ninyɛne ngɛnlɛma siezie bɛ ananze ne mɔ, bɛkyɛ bɛ debie anzɛɛ bɛmaa bɛ aleɛ nee nzule—kɛ asɛɛ ananze ne mɔ hyia ninyɛne zɔhane mɔ anwo la! Noko, ɛnee Giliki nrɛlɛbɛvolɛma mɔɔ ɛlɛtie Pɔɔlo la bie mɔ die di kɛ nyamenle ne mɔ ɛngyia ɛhwee ɛnvi alesama ɛkɛ. Saa ye zɔ a, ɛnee ɔkile kɛ bɛ nee Pɔɔlo yɛ adwenle wɔ edwɛkɛ mɔɔ ɔhanle kɛ Nyamenle “[ɛnnea] kɛ menli kɛboa ye kɛ asɛɛ ɔhyia debie la” anwo. Nɔhalɛ nu, Bɔvolɛ ne ɛngyia alesama debie biala! Emomu, ɔmaa alesama nyia mɔɔ bɛhyia nwo la—“ngoane nee ɛnwomenle nee debie biala” mɔɔ bie a le ewia, nzule yɛɛ azɛlɛ mɔɔ kye aleɛ la. (Gyi. 17:25; Gyn. 2:7) Ɔti, Nyamenle mɔɔ maa alesama ninyɛne la ɛngyia bɛ debie.
15. Kɛzi Pɔɔlo lile adwenle mɔɔ Atɛnsema lɛ kɛ bɛle kpalɛ bɛtɛla menli mɔɔ ɛnle Gilikima la anwo gyima ɛ, na debie mɔɔ hyia la boni a yɛsukoa yɛfi nu a?
15 Nyamenle bɔle sonla. Ɛnee Atɛnsema die di kɛ bɛle kpalɛ bɛtɛla menli mɔɔ ɛnle Gilikima la. Noko awie maanle anzɛɛ ɔ nwo nane kɔla mɔɔ ɔfa ɔtu ɔ nwo la ko tia Baebolo ne. (Dit. 10:17) Pɔɔlo luale nrɛlɛbɛ adenle zo lile edwɛkɛ ɛhye anwo gyima. Mekɛ mɔɔ Pɔɔlo hanle kɛ, “[Nyamenle maanle] menli mɔɔ wɔ maanle kɔsɔɔti anu la luale sonla ko anwo zo rale” la, ɔmaanle ye tievolɛma ne dwenlenle. (Gyi. 17:26) Ɛnee ɔlɛka Adam mɔɔ alesama vi ye nu rale la anwo edwɛkɛ mɔɔ wɔ Gyɛnɛsese kɛlɛtokɛ ne anu la. (Gyn. 1:26-28) Kɛmɔ alesama kɔsɔɔti vi sonla ko anu la ati, maanle anzɛɛ menli ne bie ɛnle kpalɛ ɛndɛla bie. Menli mɔɔ ɛlɛtie Pɔɔlo la amuala dele ɔ bo. Yɛsukoa debie mɔɔ anwo hyia la wɔ ye neazo ne anu. Yɛkulo kɛ yɛdua nrɛlɛbɛ adenle zo yɛyɛ yɛ edwɛkɛhanlɛ gyima ne, noko yɛngulo kɛ yɛkakyi Baebolo ne anu nɔhalɛ bie amaa yeayɛ awie mɔ fɛ.
16. Bodane boni a Bɔvolɛ ne lɛ maa alesama a?
16 Nyamenle kulo kɛ alesama bikye ye. Saa nrɛlɛbɛvolɛma mɔɔ wɔ Pɔɔlo mekɛ zo la vale mekɛ tendenle zuzule bodane mɔɔ ɔti bɛbɔle alesama la anwo bɔbɔ a, anrɛɛ bɛnrɛhola bɛnrɛhilehile nu kpalɛ. Noko Pɔɔlo maanle bɛnwunle bodane mɔɔ Bɔvolɛ ne lɛ maa alesama la, yemɔ a le kɛ “amaa bɛakpondɛ Nyamenle abo zo, na bɛakpondɛ ye ɛsesebɛ kɔkpula kɛ bɛkɛnwu ye, noko, nɔhalɛ nu, ɔ nee yɛ nuhua ko biala avinli anwa.” (Gyi. 17:27) Ɔnyɛ se kɛ awie banwu Nyamenle ne mɔɔ Atɛnsema ɛnze ye la. Nɔhalɛ nu, ɔ nee menli mɔɔ kpondɛ ye nɔhalɛ nu na bɛkulo kɛ bɛsukoa ɔ nwo debie la avinli anwa. (Edw. 145:18) Yɛ ye nzonlɛ kɛ Pɔɔlo vale “yɛ” lile gyima, kile kɛ ɔboka menli mɔɔ ɔwɔ kɛ ‘bɛkpondɛ’ Nyamenle abo zo na ‘bɛkpondɛ ye ɛsesebɛ’ la anwo.
17, 18. Duzu ati a ɔwɔ kɛ alesama kola bikye Nyamenle a, na duzu a yɛsukoa yɛfi kɛzi Pɔɔlo nee ye tievolɛma zuzule nwolɛ la anu a?
17 Alesama kola bikye Nyamenle. Pɔɔlo hanle kɛ “ɔlua ɔ nwo zo a yɛlɛ ngoane na yɛkɔ yɛba na yɛwɔ ɛkɛ a.” Mbɔlɔba bie mɔ ka kɛ ɛnee Pɔɔlo ɛlɛtwe adwenle ahɔ edwɛkɛ bie mɔɔ Epimenides, edwɛkɛdwɛndolɛnli bie mɔɔ vi Kiliti mɔɔ dɛnlanle aze wɔ ɛvoya nsia K.Y.M., “mɔɔ ɛlie duma wɔ Atɛnsema ɛzonlenlɛ nu” hanle la azo. Eza Pɔɔlo hilele debie bieko mɔɔ ɔti ɔwɔ kɛ alesama kola bikye Nyamenle la: “Kɛ mɔɔ bɛ edwɛkɛdwɛndolɛma bie mɔ bɔbɔ hanle la, ‘Yɛdayɛ noko yɛle ɔ mra.’” (Gyi. 17:28) Ɔwɔ kɛ alesama kola bikye Nyamenle; ɔluakɛ ɔdaye a ɔbɔle sonla ko ne mɔɔ alesama kɔsɔɔti vi ye nu la. Amaa menli mɔ ɛlɛtie Pɔɔlo la anye alie edwɛkɛ ne anwo la, ɔhanle edwɛkɛ bie mɔɔ wɔ Gilikima mbuluku nu mɔɔ ɔbayɛ kɛ ye tievolɛma ze ye kpalɛ la. e Kɛ mɔɔ Pɔɔlo neazo ne kile la, ɔyɛ a yɛbahola yɛaha tetedwɛkɛ, encyclopedia anzɛɛ neɛnleanu mbuluku mɔɔ menli ɛhɛlɛ la bie mɔ anu edwɛkɛ. Kɛ neazo la, edwɛkɛ mɔɔ vi ɛleka mɔɔ menli dɔɔnwo die to nu la bahola aboa awie mɔɔ ɛnle Dasevolɛ la yeamaa yeanwu ɛleka mɔɔ adalɛ ɛzonlenlɛ nyɛleɛ anzɛɛ ɛvoyia bie abo vi la.
18 Pɔɔlo dendɛle too mekɛ hɔle bie la, ɔmaanle bɛnwunle Nyamenle anwo nɔhalɛ titili bie mɔ na ɔhanle ye wɔ adenle mɔɔ ye tievolɛma bade ɔ bo la azo. Duzu a ɛnee Pɔɔlo kpondɛ kɛ Atɛnsema mɔɔ ɛlɛtie ye la yɛ wɔ edwɛkɛ ɛhye mɔɔ hyia la anwo a? Ɔhanle ye ndɛndɛ ne ala ɔhilele bɛ.
‘Menli Kɔsɔɔti Mɔɔ Wɔ Ɛleka Biala La Ɛnlu Bɛ Nwo’ (Gyima ne 17:29-31)
19, 20. (a) Kɛzi Pɔɔlo luale nrɛlɛbɛ adenle zo maanle bɛnwunle kɛ nvasoɛ ɛnle awozonlezonlenlɛ zo ɛ? (b) Duzu a ɛnee ɔwɔ kɛ menli mɔɔ ɛlɛtie Pɔɔlo la yɛ a?
19 Ɛnee Pɔɔlo ɛlɛmaa ye tievolɛma anwosesebɛ kɛ bɛyɛ mɔɔ bɛde la anwo debie. Ɔziale ɔhwenle adwenle ɔhɔle Giliki buluku ne azo na ɔhanle kɛ: “Ɛhye ati, kɛmɔ yɛle Nyamenle amra la ati, ɔnle kɛ yɛdwenle kɛ Nyamenle le kɛ nvutuke anzɛɛ dwɛtɛ fufule anzɛɛ bolɛ, anzɛɛ debie mɔɔ sonla ɛva ye adwenle ɛhyehyɛ na yeyɛ la.” (Gyi. 17:29) Nɔhalɛ nu, saa Nyamenle a bɔle alesama a, ɛnee kɛzi Nyamenle kola yɛ kɛ ananze mɔɔ menli ɛyɛ la ɛ? Kɛzi Pɔɔlo nee bɛ zuzule edwɛkɛ nwo la maanle bɛnwunle kɛ nvasoɛ ɛnle ananze mɔɔ menli ɛyɛ la ɛzonlenlɛ zo. (Edw. 115:4-8; Aye. 44:9-20) Kɛmɔ Pɔɔlo hanle kɛ “ɔnle kɛ yɛdwenle kɛ” la ati, bɛande nganeɛ kɛ ɔlɛtea bɛ.
20 Pɔɔlo maanle bɛnwunle ye kɛ ɔwɔ kɛ bɛyɛ debie: “Nyamenle ɛbu ɔ nye ɛgua mekɛ mɔɔ ɛnee menli ɛnze ye la azo; noko kɛkala ɔlɛka yeahile menli kɔsɔɔti mɔɔ wɔ ɛleka biala la kɛ bɛnlu bɛ nwo.” (Gyi. 17:30) Bie a ɔzinle Pɔɔlo tievolɛma ne anwo kɛ ɔse bɛnlu bɛ nwo la. Noko ye ɛdendɛlɛ ɛhye mɔɔ tumi wɔ nu la maanle bɛnwunle kɛ Nyamenle a maanle bɛ ngoane a, na bɛbabu nwolɛ mgbonda bɛahile ye. Ɛnee ɔhyia kɛ bɛkpondɛ Nyamenle, bɛsukoa ɔ nwo nɔhalɛ ne na bɛfa nɔhalɛ ne bɛbɔ bɛ ɛbɛla. Ɛnee ɔwɔ kɛ Atɛnsema nwu kɛ awozonlezonlenlɛ le ɛtane na bɛtwe bɛ nwo bɛfi nwolɛ.
21, 22. Edwɛkɛ mɔɔ tumi wɔ nu la boni a Pɔɔlo vale dwulale ye ɛdendɛlɛ ne a, na duzu a ɛhye kile maa yɛ ɛnɛ a?
21 Pɔɔlo vale edwɛkɛ mɔɔ tumi wɔ nu la dwulale ye ɛdendɛlɛ ne kɛ: “[Nyamenle ɛye kenle bie ɛzie] ɛkɛ ne mɔɔ ɔbalua nrenyia bie mɔɔ yekpa ye la anwo zo yeabua azɛlɛ ye azo amra kɔsɔɔti ndɛne wɔ tenleneyɛlɛ nu a, na yedwazo ye yevi mowuamra anu yeva yeyɛ ngyinlazo yemaa menli kɔsɔɔti.” (Gyi. 17:31) Ndɛnebualɛ Kenle ɛlɛba—nea deɛmɔti ɔwɔ kɛ bɛkpondɛ nɔhalɛ Nyamenle ne na bɛnwu ye la! Pɔɔlo angile ahenle mɔɔ bɛkpa ye kɛ Ndɛnebuavolɛ la. Noko, Pɔɔlo hanle Ndɛnebuavolɛ ɛhye anwo edwɛkɛ kɛnlɛma: Ɔdɛnlanle aze kɛ sonla, ɔwule na Nyamenle ɛdwazo ye ɛvi ewule nu!
22 Adwulaleɛ edwɛkɛ zɔhane mɔɔ ɔyɛ anyelielɛ la anwo hyia yɛ ɛnɛ kpalɛ. Yɛze kɛ Ndɛnebuavolɛ ne mɔɔ Nyamenle ɛkpa ye la a le Gyisɛse Kelaese mɔɔ bɛdwazo ye la. (Dwɔn 5:22) Eza yɛze kɛ Ndɛnebualɛ Kenle ne bayɛ ɛvolɛ apenle ko yɛɛ ɔlɛbikye ndɛndɛ. (Yek. 20:4, 6) Yɛnzulo Ndɛnebualɛ Kenle ne, ɔluakɛ yɛze kɛ ɔbamaa bɛdabɛ mɔɔ bɛbabua bɛ benle la anyia nyilalɛ dɔɔnwo. Yɛ anyelazo kɛnlɛma ne mɔɔ bara nu kenle bie la gyi nwanwane debie mɔɔ tɛla biala la zo—Gyisɛse Kelaese ewudwazo ne!
‘Bie Mɔ Rayɛle Diedima’ (Gyima ne 17:32-34)
23. Kɛzi menli mɔɔ diele Pɔɔlo ɛdendɛlɛ ne la anu hyɛle nwiɔ ɛ?
23 Menli mɔɔ diele Pɔɔlo ɛdendɛlɛ ne la anu hyɛle nwiɔ. “Bie mɔ golole ɔ nwo” wɔ mekɛ mɔɔ bɛdele ewudwazo ne la. Bie mɔ noko anzi kpɔkɛ kɛ bɛnu bɛ nwo na bɛayɛ diedima na bɛhanle kɛ: “Yɛbadie wɔ bieko wɔ ɛhye anwo.” (Gyi. 17:32) Noko, bɛ nuhua ekyi yɛle nwolɛ debie: “Bɛ nuhua bie mɔ a le Dayoneseɛse mɔɔ le Alɛyɔpagɛse kɔɔto ndɛnebuavolɛ ne, nee raalɛ bie mɔɔ bɛfɛlɛ ye Damalese la, yɛɛ menli gyɛne mɔɔ boka bɛ nwo la.” (Gyi. 17:34) Yɛnwu ɛhye bie wɔ yɛ edwɛkɛhanlɛ gyima ne anu. Bie mɔ golo yɛ nwo yɛɛ bie mɔ tie yɛ noko bɛndu agyakɛ biala. Noko, saa bie mɔ tie edwɛkɛ ne na bɛbayɛ diedima a, yɛ nye die kpalɛ.
24. Duzu a yɛsukoa yɛfi Pɔɔlo ɛdendɛlɛ ne mɔɔ ɔmaanle ye wɔ Alɛyɔpagɛse ne avinli la anu a?
24 Saa yɛsuzu Pɔɔlo ɛdendɛlɛ ne anwo a, ɔmaa yɛsukoa kɛzi bɛkilehile edwɛkɛ bie anu bɛmaa nuhua da ɛkɛ nee kɛzi yɛkola yɛkakyi yɛ edwɛkɛ nu yɛboa yɛ tievolɛma la. Bieko, yɛsukoa kɛzi yɛbanyia menli mɔɔ adalɛ diedi bie ɛzi bɛ nye la anwo abotane na yɛalua nrɛlɛbɛ adenle zo yɛ nee bɛ adendɛ la. Eza yɛsukoa debie mɔɔ hyia la: Ɔnle kɛ yɛkakyi Baebolo ne anu nɔhalɛ bie kɛ yɛmaa yɛ tievolɛma anye alie nwo. Noko, saa yɛsukoa ɛzoanvolɛ Pɔɔlo neazo ne a, yɛbayɛ kilehilevolɛma kpalɛ wɔ daselɛlilɛ gyima ne anu. Eza ɔbamaa neavolɛma ahilehile kpalɛ wɔ asafo ne anu. Na ɛhye bamaa yɛaziezie yɛ nwo kpalɛ yɛaboa menli yɛamaa ‘bɛakpondɛ Nyamenle na bɛanwu ye.’—Gyi. 17:27.
a Nea ɛlɛka “ Atɛnse—Tete Suakpole Mɔɔ Ɛnee Maamulɛ Kɔ Zo Wɔ Ɛkɛ.”
b Nea ɛlɛka “ Ɛpekulɛsema Nee Setɔyekema.”
c Ɛnee Alɛyɔpagɛse ne mɔɔ le ɛleka mɔɔ Atɛnse mgbanyima yia la wɔ Akolɔpɔlese sɔlɔ adɔleɛ. “Alɛyɔpagɛse” ne kola kile mgbanyima mɔɔ yia ɛkɛ ne la anzɛɛ boka ekyi bie. Ɔti, asolo adwenle mɔɔ mbɔlɔba bie mɔ lɛ ye wɔ ɛleka mɔɔ bɛ nee Pɔɔlo hɔle la anwo. Bie mɔ suzu kɛ bɛ nee Pɔɔlo hɔle boka ne anwo anzɛɛ ɛleka mɔɔ bikye ɛkɛ la anzɛɛ bie a bɛ nee ye hɔle mgbanyima ne mɔ anyunlu wɔ gua ne anu.
d Giliki edwɛkɛkpɔkɛ mɔɔ bɛhile ɔ bo “ewiade” la a le koʹsmos, na Gilikima fa ka ewiade ne ala anwo edwɛkɛ. Noko eza ɔkile menli. Ɔbayɛ kɛ ɛnee Pɔɔlo kpondɛ kɛ ɔka ninyɛne mɔɔ Gilikima anye die nwo la ati a ɔvale ɔlile gyima wɔ ɛke a.
e Pɔɔlo hanle edwɛkɛdwɛndolɛ Phaenomena mɔɔ Setɔyeke nrɛlɛbɛvolɛ Aratus hɛlɛle la anu edwɛkɛ. Edwɛkɛ zɛhae bie mɔ noko wɔ Giliki mbuluku gyɛne le kɛ Hymn to Zeus mɔɔ Setɔyeke kɛlɛvolɛ Cleanthes hɛlɛle la anu.
