TILE 19
“Kɔ Zo Ka Edwɛkɛ Ne, Mmagyakyi”
Pɔɔlo yɛle gyima nleanle ɔ nwo noko ɔvale ye ɛzonlenlɛ gyima ne ɔlimoale
Ɔgyi Gyima ne 18:1-22 azo
1-3. Duzu ati a ɛzoanvolɛ Pɔɔlo hɔle Kɔlente a, na ngyegyelɛ boni mɔ a ɔyiale a?
ƐNEE ɔka ekyii ɛvolɛ 50 Y.M. kɔ ye awieleɛ. Ɛzoanvolɛ Pɔɔlo wɔ Kɔlente, sua mɔɔ ɛlie duma wɔ gualilɛ nu mɔɔ Gilikima, Wulomuma yɛɛ Dwuuma dɔɔnwo wɔ ɛkɛ la. a Tɛ gualilɛ anzɛɛ gyima mɔɔ Pɔɔlo kpondɛ la ati a yera ɛke a. Debie bie mɔɔ hyia kpalɛ la a ɛmaa yera ɛke a—ɔba yearabɔ Nyamenle Belemgbunlililɛ ne nolo. Noko, ɔhyia kɛ Pɔɔlo nyia ɛleka tɛnla, na yebɔ kpɔkɛ kɛ ɔnrɛyɛ adesoa ɔnrɛmaa awie biala. Ɔngulo kɛ ɔmaa awie nyia adwenle kɛ edwɛkpa ne mɔɔ ɔlɛbɔ ye nolo la ati ɔwɔ kɛ bɛnea ye. Duzu a ɔbayɛ a?
2 Pɔɔlo lɛ ɔ sa anloa gyima—ɔyɛ ɛdanlɛsua. Ɛdanlɛsua ɛyɛlɛ ɛnla aze, noko ɛnee ɔlɛ ɛhulolɛ kɛ ɔbava ɔ sa yeayɛ gyima yeanlea ɔ nwo. Nienwu a ɔbanyia gyima wɔ sua ɛhye mɔɔ alagye ɛnle zo la azo a? Ɔbanyia ɛleka yeadɛnla ɔ? Ɔnva nwo kɛ ɔyiale ngyegyelɛ ɛhye mɔ la, ɔ rɛle anvi ye gyima titili mɔɔ le ye ɛzonlenlɛ gyima ne la.
3 Ɔbayɛ kɛ Pɔɔlo dɛnlanle Kɔlente hyɛle ekyii na ye ɛzonlenlɛ gyima ne zole ma dɔɔnwo wɔ ɛkɛ. Duzu a yɛbahola yɛazukoa yɛavi gyima mɔɔ Pɔɔlo yɛle ye wɔ Kɔlente la anu amaa yɛali Nyamenle Belemgbunlililɛ ne anwo daselɛ bɔkɔɔ wɔ yɛ azɛlɛsinli ne anu a?
“Ɛnee Bɛyɛ Ɛdanlɛsua” (Gyima ne 18:1-4)
4, 5. (a) Nienwu a Pɔɔlo dɛnlanle wɔ Kɔlente a, na duzu a ɔyɛle a? (b) Kɛzi Pɔɔlo zukoale ɛdanlɛsua ɛyɛlɛ ɛ?
4 Mɔɔ Pɔɔlo dwule Kɔlente la, yeangyɛ biala ɔyiale agyalɛma bie mɔɔ bɛkulo nyɛvolɛlielɛ la—Dwuunli bie mɔɔ bɛfɛlɛ ye Akoyela nee ɔ ye Pelesela anzɛɛ Peleseka. Agyalɛma ne rale Kɔlente ɔluakɛ ɛnee maanle maanle Belemgbunli Kolɔdeɛse ɛha kɛ “Dwuuma kɔsɔɔti ɛvi Wulomu.” (Gyi. 18:1, 2) Akoyela nee Pelesela liele Pɔɔlo wɔ bɛ sua nu na bɛ nee ye yɛle gyima. Yɛkenga kɛ: “Kɛmɔ [Pɔɔlo] nee bɛ yɛ gyima ko la ati, ɔdɛnlanle bɛ sua nu na ɔ nee bɛ yɛle gyima, ɔluakɛ ɛnee bɛyɛ ɛdanlɛsua.” (Gyi. 18:3) Pɔɔlo nee agyalɛma ɛhye mɔɔ kulo nyɛvolɛlielɛ la dɛnlanle wɔ mekɛ mɔɔ ɛnee ɔlɛyɛ ye ɛzonlenlɛ gyima ne wɔ Kɔlente la. Ɔbayɛ kɛ mekɛ mɔɔ Pɔɔlo nee Akoyela nee Pelesela de la, ɔhɛlɛle ngɛlata ne mɔɔ nzinlii bɛvale bɛbokale Baebolo ne anwo la bie mɔ. b
5 Kɛ ɔyɛle mɔɔ Pɔɔlo mɔɔ ‘Gameeleɛle hilele ye debie’ la eza yɛ ɛdanlɛsua ɛ? (Gyi. 22:3) Ɛnee ɛvoya mɔɔ limoa Dwuuma ɛnze nyiane kɛ bɛbamaa bɛ mra azukoa bɛ sa anloa gyima, ɔnva nwo kɛ bie a ngakula ne mɔ hɔle sukulu la. Kɛmɔ Pɔɔlo vi Taasɛse mɔɔ wɔ Selea, mɔɔ ɛlie duma wɔ cilicium mɔɔ bɛfa bɛyɛ ɛdanlɛsua la anu la ati, ɔbayɛ kɛ Pɔɔlo zukoale gyima ɛhye wɔ ye mgbavolɛ nu. Kɛzi bɛyɛ ɛdanlɛsua ɛ? Bɛnwo ɛdanlɛ ne mɔɔ bɛfa bɛyɛ ɛdanlɛsua ne la anzɛɛ bɛpepɛ ɛdanlɛ ketekete ne na bɛkpomgba bɛyɛ ɛdanlɛsua. Ɛnee nuhua biala le gyima ɛsesebɛ.
6, 7. (a) Kɛzi Pɔɔlo bule ɛdanlɛsua gyima ne ɛ, na duzu a kile kɛ ɛnee Akoyela nee Pelesela lɛ adwenle ko ne ala bie ɛ? (b) Kɛzi Kilisienema sukoa Pɔɔlo, Akoyela nee Pelesela neazo ne ɛnɛ ɛ?
6 Pɔɔlo anva ye mekɛ ne kɔsɔɔti anyɛ ɛdanlɛsua gyima ne. Ɔyɛle gyima ɛhye ɔvale ɔnleanle ɔ nwo wɔ ye ɛzonlenlɛ gyima ne anu amaa yeabɔ edwɛkpa ne nolo mɔɔ ‘ɔnlie ɛhwee’ a. (2 Kɔl. 11:7) Kɛzi Akoyela nee Pelesela bule bɛ gyima ne ɛ? Kɛmɔ bɛle Kilisienema la ati, ɛnee bɛlɛ adwenle mɔɔ Pɔɔlo lɛ ye wɔ gyima nwo la bie. Nɔhalɛ nu, mɔɔ Pɔɔlo vile Kɔlente wɔ 52 Y.M. la, Akoyela nee Pelesela nee ye hɔle Ɛfɛsɛse na ɛnee asafo mɔɔ wɔ ɛkɛ ne la yia wɔ bɛ sua nu. (1 Kɔl. 16:19) Nzinlii bɛrale Wulomu na bɛziale bɛhɔle Ɛfɛsɛse bieko. Agyalɛma ɛhye mɔɔ bɔ mɔdenle la vale Belemgbunlililɛ ne limoale yɛɛ bɛvile bɛ ɛhulolɛ nu bɛzonlenle awie mɔ, ɔti “asafo ne mɔ mɔɔ wɔ maanle maanle ne anu la amuala” anye liele bɛ nwo.—Wlo. 16:3-5; 2 Tim. 4:19.
7 Ɛnɛ, Kilisienema sukoa Pɔɔlo, Akoyela nee Pelesela neazo ne. Azonvolɛ mɔɔ bɔ mɔdenle ɛnɛ la yɛ gyima ɛsesebɛ ‘amaa bɛanyɛ adesoa kpole bɛammaa’ awie mɔ. (1 Tɛs. 2:9) Ɔyɛ anyelielɛ kɛ nolobɔlɛma mɔɔ bɛfa mekɛ dɔɔnwo bɛka edwɛkɛ ne la fa bɛ mekɛ ne bie yɛ gyima amaa bɛava bɛanlea bɛ nwo wɔ Kilisiene ɛzonlenlɛ gyima ne mɔɔ hyia bɛ kpalɛ la anu. Kɛ mɔɔ Akoyela nee Pelesela yɛle la, Gyihova azonvolɛ dɔɔnwo mɔɔ kulo nyɛvolɛlielɛ la maa maangyebakyi zo neavolɛma basokoɛ bɛ. Menli mɔɔ ‘bɛdie nyɛvolɛ dahuu’ la ze kɛzi ɔmaa bɛnyia anwosesebɛmaanlɛ na bɛ nye die la.—Wlo. 12:13.
“Kɔlentema Dɔɔnwo . . . Liele Lile” (Gyima ne 18:5-8)
8, 9. Kɛzi Pɔɔlo yɛle ye nyɛleɛ wɔ mekɛ mɔɔ Dwuuma mɔɔ ɔlile bɛ daselɛ kpalɛ la ati ɔyiale dwazotia la ɛ, na nienwu a akee ɔhɔhanle edwɛkɛ ne a?
8 Pɔɔlo yɛle gyima vale nleanle ɔ nwo wɔ ye ɛzonlenlɛ gyima ne anu na ɛhye lale ali wɔ mekɛ mɔɔ Saelase nee Timote vale ahyɛlɛdeɛ vile Masidonea rɛlɛle ye la. (2 Kɔl. 11:9) Ndɛndɛ ne ala, Pɔɔlo “vale ye mekɛ muala hanle edwɛkɛ ne.” (Gyi. 18:5) Noko, daselɛ kpalɛ mɔɔ ɔlile Dwuuma la maanle ɔyiale dwazotia. Pɔɔlo kpokpole ye tɛladeɛ ne anu vale hilele kɛ ɔnli Dwuuma mɔɔ andie Kelaese anwo ngoanelielɛ edwɛkɛ ne la anwo fɔlɛ, na ɔhanle kɛ: “Bɛ mogya ɛgua bɛdabɛ mumua ne bɛ ti zo. Menli awie biala mogya nwo fɔlɛ. Ɔvi ɛnɛ mɔɔ kɔ la mebahɔ maanle maanle ne anu amra ɛkɛ.”—Gyi. 18:6; Yiz. 3:18, 19.
9 Nienwu a akee Pɔɔlo baha edwɛkɛ ne a? Nrenyia bie mɔɔ bɛfɛlɛ ye Taeteɛse Gyɛsetɛse mɔɔ bie a yehakyi yerayɛ Dwuunli mɔɔ ye sua nu bikye nyianusua ne la vale ye sua nu ɛkɛ ne maanle Pɔɔlo. Ɔti Pɔɔlo vile nyianusua ne anu hɔle Gyɛsetɛse sua nu. (Gyi. 18:7) Pɔɔlo hɔle zo dɛnlanle Akoyela nee Pelesela sua nu wɔ Kɔlente, noko ɔyɛle ye edwɛkɛhanlɛ gyima ne wɔ Gyɛsetɛse sua nu ɛkɛ ne.
10. Duzu a kile kɛ ɛnee Pɔɔlo ɛtɛyɛle ye adwenle kɛ ɔka edwɛkɛ ne yeahile maanle maanle ne anu amra angomekye a?
10 Mekɛ mɔɔ Pɔɔlo hanle kɛ ɔbahɔ maanle maanle ne anu amra ɛkɛ ne la, asoo ɛnee ɔlɛkile kɛ ɔnrɛha edwɛkɛ ne ɔnrɛhile Dwuuma nee menli mɔɔ ɛhakyi ɛrayɛ Dwuuma, bɔbɔ bɛdabɛ mɔɔ babadie ye la ɔ? Kyɛkyɛ, ɔnle zɔ. Kɛ neazo la, “Kelesepɛse, nyianusua ne azo neavolɛ ne nee ye sua nu amra amuala liele Awulae lile.” Ɔbayɛ kɛ menli mɔɔ yɛ gyima wɔ nyianusua ne anu la bie mɔ rabokale Kelesepɛse anwo ɔluakɛ Baebolo ne ka kɛ: “Kɔlentema dɔɔnwo mɔɔ dele edwɛkpa ne la liele lile na bɛzɔnenle bɛ.” (Gyi. 18:8) Ɔti Taeteɛse Gyɛsetɛse sua nu rayɛle ɛleka mɔɔ ɛnee Kilisiene asafo fofolɛ ne mɔɔ bɛde ye wɔ Kɔlente la yia a. Saa Luku hɛlɛle Gyima ne anu kɛlɛtokɛ ne nidizo nidizo kɛ mɔɔ ɔta ɔyɛ ye la a, ɛnee ɔkile kɛ Dwuuma anzɛɛ menli mɔɔ ɛhakyi ɛrayɛ Dwuuma la rayɛle Kilisienema wɔ mekɛ mɔɔ Pɔɔlo kpokpole ye tɛladeɛ ne anu la anzi. Edwɛkɛ ɛhye maa ɔda ali kɛ Pɔɔlo kola di tɛnlabelɛ biala anwo gyima.
11. Kɛzi Gyihova Alasevolɛ ɛlɛdi Kilisienemaanle ne anu amra daselɛ ɛnɛ a bɛsukoa Pɔɔlo neazo ne ɛ?
11 Wɔ maanle dɔɔnwo azo, asɔne ngakyile ne mɔ ɛlie duma yɛɛ bɛlɛ bɛ menli ne anwo zo tumi kpalɛ. Wɔ maanle nee mbɔra bie mɔ azo, Kilisienemaanle ne anu amra ɛhwe menli dɔɔnwo ɛra bɛ ɛzonlenlɛ ne anu. Menli dɔɔnwo mɔɔ ka kɛ bɛle Kilisienema la di amaamuo nzi kɛ mɔɔ ɛnee ɛvoya mɔɔ limoa Dwuuma yɛ wɔ Kɔlente la. Noko, Gyihova Alasevolɛ gyinla Ngɛlɛlera ne anu ndelebɛbo mɔɔ bɛlɛ la azo bɛfa mɔdenlebɔlɛ bɛka edwɛkɛ ne bɛkile menli ɛhye mɔ kɛ mɔɔ Pɔɔlo yɛle la. Saa bɛdwazo bɛtia yɛ anzɛɛ bɛ ɛzonlenlɛ nu mgbanyima yɛ yɛ kpɔdekpɔde bɔbɔ a, yɛ sa nu ɛndo. Menli mɔɔ “bɛbɔ Nyamenle ɛzonlenlɛ nwo mɔdenle, noko ɔngyi nɔhalɛ ndelebɛbo zo” la dɔɔnwo boka menli ɛhye mɔ anwo na ɔwɔ kɛ yɛkpondɛ bɛ na yɛnwu bɛ.—Wlo. 10:2.
“Melɛ Menli Dɔɔnwo Wɔ Suakpole Ɛhye Azo” (Gyima ne 18:9-17)
12. Anwosesebɛmaanlɛ boni a Pɔɔlo nyianle ye wɔ ɛnyelɛzodeɛnwunlɛ nu a?
12 Saa Pɔɔlo adwenle nu yɛle ye kesee wɔ ɛzonlenlɛ gyima ne mɔɔ ɔlɛyɛ ye wɔ Kɔlente la anwo a, bie a ɔhakyile ye adwenle ɔluakɛ Gyisɛse yele ɔ nwo hilele ye wɔ ɛnyelɛzodeɛnwunlɛ nu na ɔhanle ɔhilele ye kɛ: “Mmasulo, kɔ zo ka edwɛkɛ ne, mmagyakyi, na me nee wɔ lua yemɔti awie biala ɛnrɛbo wɔ ɛnrɛboda wɔ; ɔluakɛ melɛ menli dɔɔnwo wɔ suakpole ɛhye azo.” (Gyi. 18:9, 10) Edwɛkɛ mɔɔ maa anwosesebɛ la boni ɛne! Awulae mumua ne maanle Pɔɔlo anwosesebɛ kɛ ɔbabɔ ɔ nwo bane yɛɛ ɔhanle kɛ ɔlɛ menli dɔɔnwo wɔ suakpole ne azo. Duzu a Pɔɔlo yɛle ye wɔ ɛnyelɛzodeɛnwunlɛ ne anwo a? Yɛkenga kɛ: “Ɔdɛnlanle ɛkɛ ne ɛvolɛ ko siane nsia, ɔhilehilele bɛ Nyamenle edwɛkɛ ne.”—Gyi. 18:11.
13. Duzu a bie a Pɔɔlo dwenlenle nwo wɔ mekɛ mɔɔ ɔlɛkɔ ndɛnebualɛ ebia ne anyunlu la ɛ, na kɛzi ɔnwunle kɛ bɛnrɛyɛ ye ɛhwee ɛ?
13 Mɔɔ Pɔɔlo lile kɛyɛ ɛvolɛ ko wɔ Kɔlente la, ɔnwunle daselɛ bieko mɔɔ kile kɛ Awulae ɛlɛboa ye la. “Dwuuma ne yɛle ko na bɛdwazole bɛtiale Pɔɔlo na bɛvale ye bɛhɔle ndɛnebualɛ ebia ne” mɔɔ bɛfɛlɛ ye beʹma la anyunlu. (Gyi. 18:12) Bie mɔ suzu kɛ beʹma ne le bama bie mɔɔ bɛva mabolo buluwu nee fufule bɛyɛ mɔɔ bɛdolɔdɔlɔ ninyɛne bɛgua nwo la, na ɔbayɛ kɛ ɛnee ɔwɔ Kɔlente gua ne anu. Ɛleka kpole wɔ beʹma ne anyunlu mɔɔ menli dɔɔnwo kola yia ɛkɛ a. Menli mɔɔ tudu azɛlɛ nwo kpondɛ tete ninyɛne la suzu kɛ bie a ɛnee ndɛnebualɛ ebia ne nee nyianusua ne avinli anwa, ɔti ɔbikye Gyɛsetɛse sua ne. Mɔɔ Pɔɔlo ɛlɛbikye beʹma ne la, bie a ɔdwenlenle awolɛ mɔɔ bɛzile Sitivin, mɔɔ ɔyɛ a bɛka kɛ ɔle Kilisienenli mɔɔ bɛlimoa bɛhunle ye ɔlua ye daselɛlilɛ ti la anwo. Pɔɔlo mɔɔ ɛnee bɛfɛlɛ ye Sɔɔlo la liele ye “ɛhunlɛ ne dole nu.” (Gyi. 8:1) Asoo ɛhye bie bado Pɔɔlo? Kyɛkyɛ, ɔluakɛ ɛnee bɛbɔ ye ɛwɔkɛ kɛ: “Awie biala . . . ɛnrɛboda wɔ.”—Gyi. 18:10.
“Na ɔvoanle bɛ ɔvile ndɛnebualɛ ebia ne anyunlu.”—Gyima ne 18:16
14, 15. (a) Ɛzonle boni a Dwuuma ne dole Pɔɔlo a, na kɛmɔti a Galeyo bɔle edwɛkɛ ne guale ɛ? (b) Duzu a dole Sɔsetinɛse a, na duzu a bie a ɔyɛle a?
14 Mɔɔ Pɔɔlo hɔle ndɛnebualɛ ebia ne anyunlu la, duzu a zile a? Ɛnee Akɛya amɛnlado Galeyo a le edwɛkɛdivolɛ ne a—Wulomu nrɛlɛbɛvolɛ Seneca adiema nrenyia kpanyinli ne. Dwuuma ne dole Pɔɔlo ɛzonle kɛ: “Nrenyia ɛhye ɛlɛkilehile menli kɛ bɛzonle Nyamenle wɔ adenle mɔɔ tia mɛla ne la azo.” (Gyi. 18:13) Ɛnee Dwuuma ne ɛlɛkile kɛ Pɔɔlo ɛlɛdua adenle ɛtane zo amaa menli arayɛ Kilisienema. Noko, Galeyo nwunle kɛ Pɔɔlo ɛtɛyɛle “ɛtane” yɛɛ ɔnli fɔlɛ wɔ “amumuyɛ kpole” biala anwo. (Gyi. 18:14) Ɛnee Galeyo ɛngulo kɛ ɔfa ɔ nwo ɔwulowula Dwuuma edwɛkɛ nu. Ɔti Galeyo ammaa Pɔɔlo ambuke ɔ nloa bɔbɔ na yeabɔ edwɛkɛ ne yeagua! Dwazotiama ne vale ɛya. Bɛvale bɛ anyebolo bɛguale Sɔsetinɛse mɔɔ bie a ɔralile Kelesepɛse agyakɛ anu kɛ nyianusua ne azo neavolɛ la anwo zo. Bɛhyele Sɔsetinɛse “na bɛbole ye wɔ ndɛnebualɛ ebia ne anyunlu.”—Gyi. 18:17.
15 Duzu ati a Galeyo anzi menli mɔɔ ɛnee ɛlɛbo Sɔsetinɛse la adenle a? Bie a ɛnee Galeyo suzu kɛ Sɔsetinɛse a li menli mɔɔ dole Pɔɔlo ɛzonle la anyunlu a, ɔti ɔfɛta ɛbolɛ. Kɛzi edwɛkɛ ne de biala la, ɔbayɛ kɛ debie kpalɛ vi nu rale. Wɔ kɛlata mɔɔ Pɔɔlo limoale hɛlɛle hɔmaanle Kɔlentema wɔ ɛvolɛ dɔɔnwo anzi la anu, ɔhanle adiema Sɔsetinɛse bie anwo edwɛkɛ. (1 Kɔl. 1:1, 2) Asoo Sɔsetinɛse ɛhye a bɛbole ye wɔ Kɔlente la ɔ? Saa ɔle zɔ a, ɛnee mɔɔ dole ye la a maanle ɔrayɛle Kilisienenli a.
16. Kɛzi Awulae edwɛkɛ ne mɔɔ se, “Mmasulo, kɔ zo ka edwɛkɛ ne, mmagyakyi, na me nee wɔ lua” la fale yɛ ɛzonlenlɛ gyima ne anwo ɛ?
16 Kakye kɛ mɔɔ Dwuuma andie Pɔɔlo edwɛkɛ ne la, Awulae Gyisɛse hanle hilele ye kɛ: “Mmasulo, kɔ zo ka edwɛkɛ ne, mmagyakyi, na me nee wɔ lua.” (Gyi. 18:9, 10) Ɔwɔ kɛ yɛkakye ɛhye titili wɔ mekɛ mɔɔ bɛandie yɛ edwɛkɛ ne la. Mmamaa ɛ rɛle fi kɛ Gyihova nwu mɔɔ wɔ ahonle nu la na ɔtwe ahonlekpalɛma ɔba ɔ nwo. (1 Sa. 16:7; Dwɔn 6:44) Nea kɛzi ɛhye maa yɛ anwosesebɛ maa yɛkɔ zo yɛyɛ dɔɔnwo wɔ ɛzonlenlɛ gyima ne anu a! Bɛsɔne menli dɔɔnwo ɛvolɛ biala, kenle ko biala bɛsɔne menli ɛya dɔɔnwo. Gyisɛse ɛmaa menli mɔɔ di edwɛkɛ mɔɔ se “bɛyɛ maanle maanle kɔsɔɔti anu menli me ɛdoavolɛma” azo la anwosesebɛ kɛ: “Me nee bɛ lua dahuu kɔkpula mekɛ ɛhye awieleɛ.”—Mat. 28:19, 20.
“Saa Ɔyɛ Gyihova Ɛhulolɛ A” (Gyima ne 18:18-22)
17, 18. Mɔɔ Pɔɔlo lua nyevile zo ɔlɛkɔ Ɛfɛsɛse la, duzu a ɔbayɛ kɛ ɔdwenledwenle nwolɛ a?
17 Saa mɔɔ Galeyo yɛle hilele menli mɔɔ dole Pɔɔlo ɛzonle la maanle Kilisiene asafo fofolɛ ne mɔɔ wɔ Kɔlente la nyianle anzodwolɛ a yɛnze. Noko Pɔɔlo lile “mekɛ ekyi” wɔ Kɔlente mediema ne mɔ anwo ɛkɛ kolaa na ɔ nee bɛ ali nrɛlaleɛ. Wɔ 52 Y.M. nyenyesuo mekɛ nu, Pɔɔlo yɛle ngyehyɛleɛ na ɔluale nyevile zo ɔvi Sɛnkilia habɔ ɔhɔle Selea mɔɔ wɔ Kɔlente aduduleɛ kɛyɛ mayɛlɛ nsuu la. Noko, kolaa na Pɔɔlo avi Sɛnkilia la, “ɔpepɛle ye enrinli ne ɔmaanle ɔhanle aze . . . , ɔluakɛ ɛnee yebɔ ɛwɔkɛ.” c (Gyi. 18:18) Ɛhye anzi, ɔ nee Akoyela yɛɛ Pelesela pɛle Aegea Nyevile ne hɔle Ehyia Ekyi.
18 Mɔɔ Pɔɔlo lua Sɛnkilia nyevile ne azo la, bie a ɔdwenlenle mɔɔ ɔyɛle ye wɔ Kɔlente la anwo. Ɔnwunle kɛ ɔyɛle ninyɛne mgbalɛ dɔɔnwo na yemɔ maanle ɔ nye liele. Siane 18 mɔɔ ɔvale ɔyɛle ɛzonlenlɛ gyima ne wɔ ɛkɛ ne la zole ma. Bɛdele asafo mɔɔ limoa la wɔ Kɔlente na ɛnee bɛyia wɔ Gyɛsetɛse sua nu. Menli mɔɔ rayɛle diedima la bie mɔ a le Gyɛsetɛse, Kelesepɛse nee ye sua nu amra yɛɛ menli gyɛne dɔɔnwo. Ɛnee Pɔɔlo kulo diedima fofolɛ ɛhye mɔ edwɛkɛ kpalɛ ɔluakɛ ɔboale bɛ ɔmaanle bɛrayɛle Kilisienema. Nzinlii ɔhɛlɛle bɛ na ɔhanle bɛ nwo edwɛkɛ kɛ bɛle kɛ nganvolɛ ngɛlata mɔɔ bɛhɛlɛ ye wɔ ye ahonle zo la. Yɛdayɛ noko yɛkulo menli mɔɔ yɛhola yɛboa bɛ yɛmaa bɛra nɔhalɛ ɛzonlenlɛ nu la edwɛkɛ kpalɛ. Nea kɛzi yɛ nye die kɛ yɛbanwu “nganvolɛ ngɛlata” ɛhye mɔ la!—2 Kɔl. 3:1-3.
19, 20. Mɔɔ Pɔɔlo dwule Ɛfɛsɛse la duzu a ɔyɛle a, na duzu a yɛsukoa yɛfi ye ɛkɛ wɔ mekɛ mɔɔ yɛlɛfa sunsum nu bodane bie yɛazie yɛ nye zo la ɛ?
19 Mekɛ mɔɔ Pɔɔlo dwule Ɛfɛsɛse ala la ɔhɔle ye gyima ne azo. “Ɔhɔle nyianusua ne anu na ɔ nee Dwuuma ne hɔzuzule edwɛkɛ nwo.” (Gyi. 18:19) Pɔɔlo angyɛ wɔ Ɛfɛsɛse wɔ mekɛ zɔhane. Bɛhanle kɛ ɔdɛnla ɛkɛ ne ɔhyɛ ekyii ɛdeɛ, “noko yeamkponle.” Mekɛ mɔɔ ɔ nee Ɛfɛsɛsema ɛlɛdi nrɛlaleɛ la ɔhanle kɛ: “Saa ɔyɛ Gyihova ɛhulolɛ a, mebazia meara bɛ nwo ɛke bieko.” (Gyi. 18:20, 21) Ɔda ali kɛ ɛnee Pɔɔlo ze kɛ ɔwɔ kɛ bɛka edwɛkɛ ne dɔɔnwo wɔ Ɛfɛsɛse. Ɛnee ɔkulo kɛ ɔsia ɔba noko ɔgyakyile ɔmaanle Gyihova. Asoo ɛhye ɛnle neazo kpalɛ ɛmmaa yɛ ɔ? Amaa yɛadwu yɛ sunsum nu bodane nwo la, ɔwɔ kɛ yɛdimoa yɛtu nwolɛ agyakɛ. Noko, ɔwɔ kɛ dahuu yɛkpondɛ Gyihova adehilelɛ na yɛyɛ mɔɔ ɔ nee ye ɛhulolɛdeɛ le ko la.—Gye. 4:15.
20 Pɔɔlo gyakyile Akoyela nee Pelesela wɔ Ɛfɛsɛse, na ɔvale nyevile zo ɔhɔle Sizalia. Ɔbayɛ kɛ “ɔhɔkpɔlale” asafo ne mɔɔ wɔ Gyɛlusalɛm la. (Gyi. 18:22) Akee Pɔɔlo hɔle ɛleka mɔɔ ɔwɔ la wɔ Selea mɔɔ wɔ Anteɔko la. Yeva ye edwɛkpatɛlɛvolɛ adendulɛ mɔɔ tɔ zo nwiɔ la yera awieleɛ anzodwolɛ nu. Duzu a bado ye wɔ ye adendulɛ mɔɔ li awieleɛ la anu a?
a Nea ɛlɛka mɔɔ se “ Kɔlente—Ɔla Nyevile Nwiɔ Avinli.”
b Nea ɛlɛka ne mɔɔ se “ Ngɛlata Mɔɔ Sunsum Ne Maanle Bɛhɛlɛle Mɔɔ Maa Anwosesebɛ.”
c Nea ɛlɛka mɔɔ se “ Pɔɔlo Ɛwɔkɛ Ne.”
