1, 2. Nwane mɔ a vi Felepae ɛlɛkɔ Tɛsalonaeka a, na duzu a ɔbayɛ kɛ bɛlɛdwenle nwo a?

 MENLI dɔɔnwo fa adenle ɛhye mɔɔ Wulomuma mɔɔ ɛbe adenle ɛyɛlɛ nu la a yɛle na ɔla awoka zo la azo. Saa ɛlua adenle ɛhye azo a, ɛte ninyɛne dɔɔnwo​—le kɛ asoaso ɛzunlɛ, ehwili mɔɔ ɛlɛyɛ dede yɛɛ sogyama, gualilɛma nee dwinvolɛma mɔɔ ɛlɛtu adenle la ane. Agɔnwolɛma nsa​—Pɔɔlo, Saelase nee Timote​—noko lua adenle ɛhye azo, ɔvi Felepae mɔɔ kɔ Tɛsalonaeka la, bɛbapɛ mayɛlɛ mɔɔ bo 80. Adendulɛ ne ɛnla aze ɛmmaa Pɔɔlo nee Saelase. Mbaka mɔɔ bɛbilale bɛ wɔ Felepae la nganlɛ ne mɔ ɛtɛkɔle.​—Gyi. 16:22, 23.

² Duzu a boale bɛ ɔmaanle bɛyele bɛ adwenle bɛvile adenle tendenle ne mɔɔ la bɛ nyunlu la azo a? Adwelielilɛ boale bɛ kpalɛ. Bɛkakye pilizama sinzavolɛ ne nee ye sua nu amra mɔɔ rayɛle diedima wɔ Felepae la anwubielɛ kɛnlɛma ne. Anwubielɛ zɔhane ɛmaa adenduvoma ne ɛbɔ kpɔkɛ kɛ bɛbahɔ zo bɛabɔ Nyamenle edwɛkɛ ne nolo. Noko, mɔɔ ɔka ekyii bɛdwu Tɛsalonaeka mɔɔ wɔ ɛnweanloa la, bie a bɛdwenlenle kɛzi Dwuuma mɔɔ wɔ ɛkɛ ne la bayɛ bɛ la anwo. Asoo bɛbadwazo bɛatia bɛ na bie a bɛabo bɛ kɛ mɔɔ ɔdole bɛ wɔ Felepae la ɔ?

3. Kɛzi akɛnrazilɛ mɔɔ Pɔɔlo vale hanle edwɛkɛ ne la le neazo mɔɔ baboa yɛ ɛnɛ ɛ?

³ Nzinlii Pɔɔlo hanle nganeɛ mɔɔ ɔdele la anwo edwɛkɛ wɔ kɛlata bie mɔɔ ɔhɛlɛle ɔhɔmaanle Kilisienema mɔɔ bɛwɔ Tɛsalonaeka la anu kɛ: “Yɛlimoale yɛnwunle amaneɛ na bɛbɔle yɛ aholoba wɔ Felepae bɔbɔ ɛdeɛ, noko yɛ Nyamenle ne maanle yɛnyianle akɛnrazilɛ kɛ yɛha Nyamenle edwɛkpa ne yɛhile bɛ wɔ dwazotia dɔɔnwo anu.” (1 Tɛs. 2:2) Ɔti ɛnee Pɔɔlo ɛlɛkile kɛ ɛnee ɔsulo kɛ ɔbahɔ Tɛsalonaeka ɔlua mɔɔ dole ye wɔ Felepae la ati. Ɛ nee Pɔɔlo yɛ adwenle ɔ? Ɔdwu mekɛ ne bie a ɔyɛ se ɔmaa wɔ kɛ ɛbabɔ edwɛkpa ne nolo ɔ? Pɔɔlo vale ɔ nwo dole Gyihova anwo zo kɛ ɔboa ye ɔmaa ɔnyia akɛnrazilɛ. Saa ɛsukoa Pɔɔlo neazo ne a ɔbaboa ɛdawɔ noko yeamaa wɔayɛ zɔ.​—1 Kɔl. 4:16.

4. Duzu ati a ɔbayɛ kɛ Pɔɔlo lile dapɛne mɔɔ bo nsa la wɔ Tɛsalonaeka ɛ?

⁴ Kɛlɛtokɛ ne ka kɛ mɔɔ bɛwɔ Tɛsalonaeka la, Pɔɔlo vale Ɛnwomenlelielɛ kenle nsa hanle edwɛkɛ ne wɔ nyianusua ne anu. Asoo ɛhye kile kɛ ɔlile dapɛne nsa pɛ wɔ ɛkɛ ɔ? Ɔngile zɔ. Saa Pɔɔlo dwule sua ne azo la ɛkɛ ne ala a ɔhɔle nyianusua ne anu a yɛnze. Bieko, ɔwɔ Pɔɔlo ngɛlata ne mɔ anu kɛ, mɔɔ ɔwɔ Tɛsalonaeka la ɔ nee ɔ gɔnwo mɔ yɛle gyima bɛvale bɛnleanle bɛ nwo. (1 Tɛs. 2:9; 2 Tɛs. 3:7, 8) Eza mekɛ mɔɔ Pɔɔlo wɔ ɛkɛ ne la, mediema mɔɔ wɔ Felepae la nwanle ye ninyɛne fane nwiɔ. (Fel. 4:16) Ɔti ɔbayɛ kɛ ɔlile dapɛne mɔɔ bo nsa la wɔ Tɛsalonaeka.

5. Kɛzi Pɔɔlo maanle ye edwɛkɛ ne hanle menli ne ahonle ɛ?

⁵ Pɔɔlo vale akɛnrazilɛ dendɛle hilele menli mɔɔ wɔ nyianusua ne anu la. Kɛ mɔɔ ɔta ɔyɛ ye la, “ɔ nee bɛ zuzule Ngɛlɛlera ne anwo, ɔhilehilele nu na ɔgyinlanle mɔɔ bɛhɛlɛ la azo ɔhilele kɛ ɔwɔ kɛ Kelaese ne nwu amaneɛ na bɛdwazo ye bɛfi mowuamra anu, na ɔhanle kɛ: ‘Ɛhye a le Kelaese ne, Gyisɛse ne mɔɔ melɛka ɔ nwo edwɛkɛ meahile bɛ la.’” (Gyi. 17:2, 3) Yɛ ye nzonlɛ kɛ Pɔɔlo ammaa edwɛkɛ ne anyɛ bɛ fɛ ala; ɔ nee bɛ zuzule nwolɛ. Ɛnee ɔze kɛ menli mɔɔ wɔ nyianusua ne anu la ze Ngɛlɛlera ne anu edwɛkɛ ne yɛɛ bɛdie bɛto nu. Noko, ɛnee bɛnde ɔ bo kpalɛ. Ɔti Pɔɔlo nee bɛ zuzule nwo, ɔhilehilele nu na ɔgyinlanle Ngɛlɛlera ne azo ɔhilele kɛ Gyisɛse mɔɔ vi Nazalɛte la a le Mɛzaya, anzɛɛ Kelaese ne mɔɔ bɛbɔ ɔ nwo ɛwɔkɛ la.

6. Kɛzi Gyisɛse nee menli zuzule Ngɛlɛlera ne anwo ɛ, na duzu a vi nu rale a?

⁶ Pɔɔlo zukoale Gyisɛse mɔɔ ɛnee ye ngilehilelɛ ne gyi Ngɛlɛlera ne azo la. Wɔ Gyisɛse ɛzonlenlɛ gyima ne anu, ɔhanle ɔhilele ye ɛdoavolɛma ne kɛ Ngɛlɛlera ne ka kɛ ɔwɔ kɛ sonla Ra ne nwu amaneɛ, bɛku ye na bɛdwazo ye bɛfi mowuamra anu. (Mat. 16:21) Mɔɔ bɛdwazole Gyisɛse la, ɔyele ɔ nwo ɔhilele ye ɛdoavolɛma ne. Yemɔ ala bɔbɔ maanle bɛnwunle kɛ mɔɔ ɔhanle la le nɔhalɛ. Noko, ɔyɛle dɔɔnwo ɔbokale nwo. Yɛkenga mɔɔ ɔhanle ɔhilele ye ɛdoavolɛ bie mɔ la kɛ: “Ɔbɔle ɔ bo ɔvile Mosisi nee Ngapezoma ne kɔsɔɔti anwo zo, na ɔhilehilele bɛ ninyɛne mɔɔ fale ɔ nwo mɔɔ wɔ Ngɛlɛlera ne anu la kɔsɔɔti anu.” Duzu a vi nu rale a? Ɔzinle ɛdoavolɛma ne anwo na bɛhanle kɛ: “Asoo mekɛ mɔɔ ɔlɛtendɛ yeahile yɛ wɔ adenle ne anu na ɔlɛkilehile Ngɛlɛlera ne anu yeahile yɛ la, yeanga yɛ ahonle kpole ɔ?”​—Luku 24:13, 27, 32.

7. Duzu ati a ɔwɔ kɛ yɛmaa yɛ ngilehilelɛ ne gyinla Ngɛlɛlera ne azo a?

⁷ Tumi wɔ Nyamenle Edwɛkɛ ne anu. (Hib. 4:12) Ɔti ɛnɛ, Kilisienema fa bɛ ngilehilelɛ ne gyinla Baebolo ne azo kɛ mɔɔ Gyisɛse, Pɔɔlo nee ɛzoanvolɛma gyɛne yɛle la. Yɛdayɛ noko yɛ nee menli suzu edwɛkɛ nwo, yɛkilehile mɔɔ Ngɛlɛlera ne ka la anu yɛɛ yɛbuke Baebolo ne anu yɛmaa suamenlema nwu mɔɔ ɔka la wɔ mekɛ mɔɔ yɛlɛkilehile bɛ la. Ɔluakɛ edwɛkɛ ne ɛnle yɛ ɛdeɛ. Saa yɛta yɛfa Baebolo ne yɛdi gyima a, yɛmaa menli nwu ye kɛ mɔɔ yɛkilehile  bɛ la ɛnle yɛ ti anwo nzuzulɛ, emomu ɔle Nyamenle ngilehilelɛ. Eza ɔwɔ kɛ yɛkakye kɛ edwɛkɛ ne mɔɔ yɛka la gyi Nyamenle Edwɛkɛ ne azo. Bɛfa bɛ nwo bɛto zo a ɔyɛ boɛ. Asoo ɛhye ɛmmaa wɔ anwodozo kɛ ɛva akɛnrazilɛ ɛha edwɛkɛ ne kɛ mɔɔ Pɔɔlo yɛle ye la ɔ?

8-10. (a) Kɛzi menli mɔɔ wɔ Tɛsalonaeka la yɛle bɛ nyɛleɛ wɔ edwɛkpa ne anwo ɛ? (b) Duzu ati a ɛnee Dwuuma bie mɔ anye bolo Pɔɔlo a? (d) Duzu a Dwuu dwazotiama ne yɛle a?

⁸ Mɔɔ dole Pɔɔlo la maanle ɔnwunle kɛ Gyisɛse edwɛkɛ ɛhye le nɔhalɛ: “Akɛlɛ ɛnle kpole ɛndɛla ɔ menle. Saa bɛyɛle me kpɔdekpɔde a, ɛnee bɛbayɛ bɛdabɛ noko kpɔdekpɔde; saa bɛlile me edwɛkɛ zo a, ɛnee bɛbali bɛdabɛ noko bɛ edwɛkɛ zo.” (Dwɔn 15:20) Menli mɔɔ diele Pɔɔlo wɔ Tɛsalonaeka la anu hyɛle nwiɔ​—bie mɔ anye liele kɛ bɛbali edwɛkɛ ne azo yɛɛ bie mɔ dwazole tiale ye. Luku hanle bɛdabɛ mɔɔ bɛdiele la anwo edwɛkɛ kɛ: “Bɛ nuhua bie mɔ [mɔɔ le Dwuuma la] rayɛle diedima [Kilisienema] na bɛrabokale Pɔɔlo nee Saelase anwo, na zɔhane ala a menli dɔɔnwo mɔɔ bɛle Gilikima na bɛsonle Nyamenle la nee mraalɛ titili bie mɔ noko yɛle a.” (Gyi. 17:4) Nɔhalɛ nu, ɛdoavolɛma fofolɛ ɛhye mɔ anye liele kɛ bɛdele Ngɛlɛlera ne abo kpalɛ la.

⁹ Bie mɔ anye liele Pɔɔlo edwɛkɛ ne anwo ɛdeɛ, noko bie mɔ vale ɔ nwo ɛya. Tɛsalonaekama bie mɔ anye bolole Pɔɔlo kɛ “menli dɔɔnwo mɔɔ bɛle Gilikima” la ɛlɛtie ye la. Ɛnee Dwuuma zɔhane kulo kɛ bɛmaa menli kakyi bayɛ Dwuuma, na kɛmɔ ɛnee bɛva Hibulu Ngɛlɛlera ne bɛhilehile maanle maanle ne anu amra mɔɔ bɛle Gilikima la ati, ɛnee bɛbu bɛ kɛ bɛle bɛ menli. Akee arɛlevilɛ nu ala, Pɔɔlo ngilehilelɛ ne ɛlɛmaa Gilikima ne ahwe bɛ nwo avi Dwuuma ne anwo, yɛɛ ɔlɛyɛ ɛhye wɔ nyianusua ne anu! Dwuuma ne vale ɛya kpole.

¹⁰ Luku hanle mɔɔ zile la: “Dwuuma ne vale ɛya na bɛboɔboale amumuyɛma bie mɔ mɔɔ bɛluolua gua ne anu la anloa, bɛyɛle bɛ menli ekpunli na bɛbɔle ɔ bo bɛyɛle basabasa wɔ sua ne azo. Bɛhɔle Gyeesen sua nu ɛkɛ, ɛnee bɛkpondɛ kɛ ɔye Pɔɔlo nee Saelase ɔmaa menli ne. Mɔɔ bɛannwu bɛ la, bɛhwenle Gyeesen nee mediema ne mɔ bie bɛhɔle suakpole ne azo mgbanyima ne mɔ ɛkɛ, na bɛdeɛdeanle nu kɛ: ‘Menli ɛhye mɔ mɔɔ maa basabasayɛlɛ kɔ zo wɔ ɛleka biala la ɛra ɛke noko, na Gyeesen ɛlie bɛ kɛ ye nyɛvolɛ. Menli ɛhye mɔ amuala dwazo tia mɛla mɔɔ Siza ɛli la, na bɛka kɛ belemgbunli fofolɛ wɔ ɛkɛ, bɛfɛlɛ ye Gyisɛse.’” (Gyi. 17:5-7) Kɛzi basabasayɛlɛma ne nyɛleɛ baha Pɔɔlo nee ɔ gɔnwo mɔ ɛ?

11. Somolɛ boni a bɛbɔle Pɔɔlo nee ɔ gɔnwo mɔ nolobɔlɛma a, na ɔbayɛ kɛ mɛla boni a ɛnee wɔ dwazotiama ne adwenle nu a? (Nea ɔbodwɛkɛ.)

¹¹ Basabasayɛlɛ ɛnle kpalɛ fee. Ɔle kɛ azule mɔɔ ɛlɛse kpole la​—ɔsɛkye ninyɛne yɛɛ bɛngola bɛnzi ye adenle. Ɛhye a Dwuuma ne yɛle amaa Pɔɔlo nee  Saelase avi bɛ nwo ɛkɛ a. Mekɛ mɔɔ bɛmaanle menli yɛle “basabasa” wɔ sua ne azo wiele la, bɛbɔle mɔdenle kɛ bɛmaa mgbanyima ne mɔ alie ali kɛ somolɛ ne mɔɔ bɛbɔle la le anyebolo edwɛkɛ. Somolɛ mɔɔ limoa la a le kɛ Pɔɔlo nee ɔ gɔnwo mɔ nolobɔlɛma ‘maa basabasayɛlɛ kɔ zo wɔ ɛleka biala,’ noko ɛnee Pɔɔlo nee ɔ gɔnwo mɔ ɛtɛmaanle basabasayɛlɛ ɛtɛbale Tɛsalonaeka! Somolɛ mɔɔ tɔ zo nwiɔ la anu yɛ se kpalɛ. Dwuuma ne hanle kɛ bɛlɛka Belemgbunli fofolɛ bie mɔɔ le Gyisɛse la anwo edwɛkɛ na ɛnee ɛhye tia maanle maanle belemgbunli ne mɛla. a

12. Duzu a maa yɛnwu kɛ somolɛ mɔɔ bɛbɔle Tɛsalonaeka Kilisienema la anrɛɛ bahola ayɛ edwɛkɛ kpole a?

¹² Kakye kɛ ɛzonlenlɛ nu mgbanyima ne bɔle Gyisɛse somolɛ ko ne ala bie. Bɛhanle bɛhilele Paelɛte kɛ: “Yɛhyele nrenyia ɛhye kɛ ɔlɛte atua yeatia yɛ maanle ne . . . yɛɛ ɔse ɔdaye mumua ne ɔle belemgbunli Kelaese.” (Luku 23:2) Bie a ɛnee Paelɛte sulo kɛ maanle maanle belemgbunli ne baha kɛ ɔlɛboa Gyisɛse yeamaa yeade atua la ati ɔmaanle bɛhunle Gyisɛse. Zɔhane ala a anrɛɛ somolɛ mɔɔ bɛbɔle Kilisienema ne la bahola ayɛ edwɛkɛ kpole a. Buluku bie hanle kɛ: “Anrɛɛ edwɛkɛ ɛhye bava esiane kpole ara, ɔluakɛ ‘saa bɛbɔ awie somolɛ kɛ ɔlɛte atua yeatia maanle maanle belemgbunli ne a, ɛnee ɔle ewule edwɛkɛ.’” Asoo adwenle ɛtane ɛhye yɛle gyima?

13, 14. (a) Duzu ati a adwenle ɛtane mɔɔ menli ne nyianle la anyɛ gyima a? (b) Kɛzi Pɔɔlo nleanle ɔ nwo boɛ kɛ Kelaese ɛ, na kɛ ɔkɛyɛ ne yɛazukoa ye neazo ne ɛ?

¹³ Menli ne angola anzi edwɛkɛhanlɛ gyima ne adenle wɔ Tɛsalonaeka. Kɛmɔti ɛ? Deɛmɔti ɔrale ye zɔ la a le kɛ, bɛannwu Pɔɔlo nee Saelase. Eza sua ne azo mgbanyima ne mɔ anlie edwɛkɛ ne anli. Bɛliele “ezukoa” na bɛgyakyile Gyeesen nee mediema ne mɔ mɔɔ bɛ nee bɛ hɔle mgbanyima ne mɔ anyunlu la bɛmaanle bɛhɔle. (Gyi. 17:8, 9) Pɔɔlo diele Gyisɛse edwɛkɛ mɔɔ se “bɛmaa bɛ nye ɛla ɛkɛ kɛ nwɔlɛ na bɛyɛ bɛlɛvo kɛ abubule” la na ɔnleanle ɔ nwo boɛ amaa yeahola yeaha edwɛkɛ ne wɔ ɛleka gyɛne. (Mat. 10:16) Ɛnee Pɔɔlo lɛ akɛnrazilɛ, noko ɔngile kɛ ɔnnea ɔ nwo boɛ. Kɛ ɔkɛyɛ na Kilisienema azukoa ye neazo ne ɛnɛ ɛ?

¹⁴ Wɔ yɛ mekɛ ye azo noko Kilisienemaanle ne ɛsɔfoma wulowula menli bo bɛmaa bɛdwazo bɛtia Gyihova Alasevolɛ. Bɛmaa maanle mgbanyima nyia adwenle kɛ Alasevolɛ ne mɔ le maamɔvo yɛɛ bɛdwazo bɛtia tumililɛ. Kɛ mɔɔ ɛvoya mɔɔ limoa dwazotiama ne yɛle la, anyebolo a maa dwazotiama mɔɔ wɔ ɛkɛ ne ɛnɛ la yɛ zɔ a. Kɛzi ɔde ye biala la, nɔhalɛ Kilisienema ɛnva bɛ nwo ɛndo esiane nu. Yɛ nee menli mɔɔ ɛva ɛya la ɛnzu kpolera, emomu  yɛkɔ zo yɛyɛ yɛ gyima ne anzodwolɛ nu, bie a yɛfi ɛkɛ ne yɛkɔ na nzinlii yɛazia yɛara.

15. Duzu a menli mɔɔ wɔ Bɛlia la yɛle wɔ edwɛkpa ne anwo a?

¹⁵ Amaa Pɔɔlo nee Saelase anyia banebɔlɛ la, bɛpɛle adenle mayɛlɛ 40 bɛhɔle Bɛlia. Mɔɔ bɛhɔdwule la, Pɔɔlo hɔle nyianusua ne anu na ɔ nee menli mɔɔ ɛyia ɛkɛ ne la dendɛle. Nea kɛzi ɔ nye liele kɛ menli ne diele ye la! Luku hɛlɛle kɛ ɛnee Dwuuma mɔɔ wɔ Bɛlia la “kulo debiezukoalɛ tɛla bɛdabɛ mɔɔ bɛwɔ Tɛsalonaeka la, ɔluakɛ bɛvale bɛ adwenle amuala bɛliele edwɛkɛ ne na dahuu bɛnleɛnleanle Ngɛlɛlera ne anu kpalɛ kɛ saa ninyɛne ɛhye mɔ le zɔhane a.” (Gyi. 17:10, 11) Asoo edwɛkɛ ɛhye kile kɛ menli mɔɔ wɔ Tɛsalonaeka mɔɔ bɛliele nɔhalɛ ne bɛdole nu la ambɔ mɔdenle ɔ? Kyɛkyɛ. Nzinlii Pɔɔlo hɛlɛle kɛ: “Ɛhye ati a dahuu yɛda Nyamenle ase la, ɔluakɛ mekɛ mɔɔ bɛnyianle Nyamenle edwɛkɛ ne mɔɔ bɛdele bɛvile yɛ ɛkɛ ne la, bɛanlie ye kɛ sonla edwɛkɛ, emomu bɛliele ye kɛ Nyamenle edwɛkɛ kɛ mɔɔ ɔde ye nɔhalɛ nu ala la, na yemɔ noko a ɛlɛyɛ gyima wɔ bɛmɛ diedima anu a.” (1 Tɛs. 2:13) Noko, duzu a maanle Dwuuma mɔɔ wɔ Bɛlia la hulole debiezukoalɛ a?

16. Duzu ati a bɛhanle kɛ menli mɔɔ wɔ Bɛlia la “kulo debiezukoalɛ” a?

¹⁶ Edwɛkɛ mɔɔ Bɛliama dele la le fofolɛ maa bɛ, noko bɛanzu nwolɛ kpolera; yɛɛ bɛanlie bɛanli ala. Mɔɔ limoa la, bɛdiele mɔɔ ɛnee Pɔɔlo ɛlɛka la kpalɛ. Akee bɛnleɛnleanle Ngɛlɛlera ne anu saa mɔɔ Pɔɔlo hilehilele nu hilele bɛ la le zɔ a. Bieko, bɛbɔle mɔdenle bɛzukoale  Nyamenle Edwɛkɛ ne kpalɛ, bɛyɛle ɛhye dahuu na tɛ Ɛnwomenlelielɛ kenle ala. Eza “bɛvale bɛ adwenle amuala” bɛyɛle zɔ na bɛkpondɛle mɔɔ Ngɛlɛlera ne ka ye wɔ ngilehilelɛ fofolɛ ne anwo la. Awieleɛ kolaa ne, bɛvile mɛlɛbɛnwoaze nu bɛyɛle nzenzaleɛ ɔluakɛ “bɛ nuhua dɔɔnwo rayɛle diedima.” (Gyi. 17:12) Ɔnyɛ nwanwane kɛ Luku hanle kɛ ‘bɛkulo debiezukoalɛ’ la!

17. Duzu ati a Bɛliama fɛta nganvolɛ wɔ neazo kpalɛ mɔɔ bɛyɛle la anwo a, na saa yɛle diedima dɛba bɔbɔ a kɛ ɔkɛyɛ na yɛazukoa bɛ ɛ?

¹⁷ Ɛnee Bɛliama ɛnze kɛ bɛbahɛlɛ kɛzi bɛyɛle bɛ nyɛleɛ wɔ edwɛkpa ne anwo la wɔ Nyamenle Edwɛkɛ ne anu bɛamaa yɛ. Bɛyɛle mɔɔ ɛnee Pɔɔlo anye la kɛ bɛbayɛ la pɛpɛɛpɛ na ɛnee Gyihova noko kulo kɛ bɛyɛ zɔ. Zɔhane ala a yɛmaa menli anwosesebɛ kɛ bɛyɛ a​—kɛ bɛnleɛnlea Baebolo ne anu kpalɛ amaa bɛ diedi ne ayɛ mɔɔ gyi Nyamenle Edwɛkɛ ne azo a. Noko saa yɛle diedima a asoo ɔkile kɛ ɔnle kɛ yɛkulo debiezukoalɛ ɔ? Kyɛkyɛ, emomu mekɛ zɔhane bɔbɔ a ɔwɔ kɛ yɛ nye bolo yɛsukoa Gyihova anwo debie dɔɔnwo na yɛyɛ ye ndɛndɛ yɛfa yɛyɛ gyima a. Saa yɛyɛ zɔ a, yɛmaa Gyihova adenle yɛmaa ɔnwo yɛ na ɔtete yɛ kɛ mɔɔ ye ɛhulolɛdeɛ de la. (Aye. 64:8) Ɛhye maa yɛ anwuma Selɛ ne fa yɛ di gyima na ɔ nye die yɛ nwo.

18, 19. (a) Duzu ati a Pɔɔlo vile Bɛlia a, noko kɛzi ɔfɛta kɛ yɛsukoa mɔdenle mɔɔ ɔbɔle la ɛ? (b) Nwane mɔ bieko a Pɔɔlo dendɛle hilele bɛ a, na ɛnee bɛwɔ ni?

¹⁸ Pɔɔlo andɛnla Bɛlia angyɛ. Yɛkenga kɛ: “Mɔɔ Dwuuma mɔɔ vi Tɛsalonaeka dele kɛ Pɔɔlo ɛlɛka edwɛkɛ ne wɔ Bɛlia noko la, bɛrale ɛkɛ ne na bɛlile bɛwulale menli dɔɔnwo ne bɛmaanle bɛvale ɛya. Na ndɛndɛ ne ala mediema ne mɔ hɔzɔhonle Pɔɔlo wɔ nyevile ne anloa, noko Saelase nee Timote hale ɛkɛ. Noko menli mɔɔ hɔle Pɔɔlo ɛzɔhonlɛ ne la vale ye hɔle too hɔdwule Atɛnse, na mɔɔ Pɔɔlo hanle hilele bɛ kɛ ɔwɔ kɛ Saelase nee Timote ba ɔ nwo lɔ ndɛndɛ la, bɛziale.” (Gyi. 17:13-15) Ɛnee menli mɔɔ dwazo tia edwɛkpa ne la anye ɛbolo kpalɛ! Bɛmaanle Pɔɔlo vile Tɛsalonaeka noko bɛ kunlu ɛtɛdwole; bɛdoale ye wɔ Bɛlia na bɛbɔle mɔdenle kɛ bɛyɛ basabasa​—noko yeanyɛ boɛ. Ɛnee Pɔɔlo ze kɛ ye azɛlɛsinli ne le kpole; ɔti ɔvile ɛkɛ ne na ɔhɔle ɛleka fofolɛ. Bɛmaa yɛdayɛ noko yɛbɔ kpɔkɛ ɛnɛ kɛ yɛnrɛmaa menli mɔɔ kulo kɛ yɛgyakyi edwɛkɛhanlɛ ne la ɛnrɛli konim!

¹⁹ Mɔɔ Pɔɔlo lile Dwuuma mɔɔ wɔ Tɛsalonaeka nee Bɛlia daselɛ bɔkɔɔ la, ɔzukoale kɛzi ɔhyia kɛ yɛfa akɛnrazilɛ yɛdi daselɛ na yɛ nee menli suzu Ngɛlɛlera ne anwo la. Ɔwɔ kɛ yɛdayɛ noko yɛyɛ zɔ. Noko, kɛkala ɔwɔ kɛ Pɔɔlo ka edwɛkɛ ne kile menli fofolɛ​—maanle maanle ne anu amra mɔɔ wɔ Atɛnse la. Kɛzi ye gyima ne bahɔ zo wɔ ɛkɛ ɛ? Yɛbanwu mɔɔ hɔle zo la wɔ tile bieko anu.