TILE 11
‘Fɛlɛkolilɛ Nee Sunsum Nwuanzanwuanza Yile Bɛ’
Kɛzi Pɔɔlo gyinlanle basabasayɛlɛ nee anyetele nloa la le neazo
Ɔgyi Gyima ne 13:1-52 azo
1, 2. Duzu a maa Baanabase nee Sɔɔlo adendulɛ ɛhye yɛ ngakyile a, na kɛzi bɛ gyima ne bamaa Gyima ne 1:8 ara nu ɛ?
ƆLE anyelielɛ kenle ɔmaa Anteɔko asafo ne. Sunsum nwuanzanwuanza ne ɛkpa Baanabase nee Sɔɔlo ɛvi ngapezoma nee kilehilevolɛma kɔsɔɔti mɔɔ wɔ ɛkɛ ne la anu kɛ bɛhɔbɔ edwɛkpa ne nolo wɔ moamoa. a (Gyi. 13:1, 2) Nɔhalɛ nu, ɛnee bɛlimoa bɛzoa mrenyia mɔɔ fɛta la ɛlɛ. Noko edwɛkpatɛlɛvolɛma zɔhane mɔ hɔle ɛleka mɔɔ ɛnee bɛlimoa bɛlie Kilisiene ɛzonlenlɛ ne bɛdo nu la. (Gyi. 8:14; 11:22) Noko mekɛ ɛhye, Baanabase nee Sɔɔlo—yɛɛ Dwɔn Maake mɔɔ bayɛ bɛ boavolɛ la—ɛlɛkɔ ɛleka mɔɔ menli dɔɔnwo ɛtɛtele edwɛkpa ne la.
2 Wɔ ɛvolɛ 14 mɔɔ ɛpɛ nu la anu, Gyisɛse hanle hilele ye ɛdoavolɛma kɛ: “[Bɛbayɛ] me alasevolɛ wɔ Gyɛlusalɛm nee Dwudiya nee Samɛlea amuala, bɛahɔdwu azɛlɛ ye azo ɛleka biala.” (Gyi. 1:8) Baanabase nee Sɔɔlo mɔɔ bɛkpa bɛ kɛ edwɛkpatɛlɛvolɛma la bamaa Gyisɛse ngapezo ne ara nu! b
Bɛyele Bɛ Bɛmaanle “Gyima Ne” (Gyima ne 13:1-12)
3. Duzu a maanle adendulɛ yɛle se wɔ ɛvoya mɔɔ limoa la anu a?
3 Ɛnɛ, ninyɛne le kɛ kale nee alopile maa menli kola pɛ adenle tendenle wɔ dɔnehwele ko anzɛɛ nwiɔ anu. Tɛ kɛ ɛnee ɔde ye wɔ ɛvoya mɔɔ limoa Y.M. la anu la ɛne. Wɔ mekɛ zɔhane, saa awie badu adenle a kyesɛ ɔtia, fane dɔɔnwo ne ala wɔ adenle mɔɔ ɛnle kpalɛ la azo. Kenle ko adenle bayɛ kɛ mayɛlɛ 20 pɛ, na nuhua le ɛvɛlɛ ngome! c Ɔti, ɛnee Baanabase nee Sɔɔlo anye la kɛ bɛbabɔ bɛ gyima ne abo noko ɛnee bɛze kɛ ɔbahyia mɔdenlebɔlɛ yɛɛ afɔlebɔlɛ dɔɔnwo.—Mat. 16:24.
4. (a) Duzu a maanle bɛkpale Baanabase nee Sɔɔlo a, na duzu a bɛ gɔnwo mɔ diedima yɛle ye wɔ nwo a? (b) Kɛ ɔkɛyɛ na yɛaboa menli mɔɔ kɛnyia gyimalilɛ wɔ ahyehyɛdeɛ ne anu la ɛ?
4 Noko duzu ati a sunsum nwuanzanwuanza ne kpale Baanabase nee Sɔɔlo kɛ bɛyɛ “gyima ne” ɛ? (Gyi. 13:2) Baebolo ne anga. Yɛze kɛ sunsum nwuanzanwuanza ne a maanle bɛkpale mrenyia ɛhye mɔ a. Debie biala ɛngile kɛ ngapezoma nee kilehilevolɛma mɔɔ wɔ Anteɔko la hanle kpɔkɛzilɛ ne anwo edwɛkɛ ɛtane. Emomu, bɛvile bɛ ahonle muala anu bɛliele bɛdole nu. Nea kɛzi Baanabase nee Sɔɔlo anye liele kɛ bɛ sunsum nu mediema ne mɔ anye ambolo bɛ la, emomu mɔɔ “bɛhyele ɛhɔne na bɛyɛle nzɛlɛlɛ bɛwiele la, bɛvale bɛ sa bɛguale bɛ nwo zo na bɛmaanle bɛhɔle.” (Gyi. 13:3) Ɔwɔ kɛ yɛdayɛ noko yɛboa mediema mɔɔ kɛnyia gyimalilɛ wɔ ahyehyɛdeɛ ne anu, mɔɔ bie a le mrenyia mɔɔ sonle kɛ neavolɛma wɔ asafo ne anu la. Kɛ anrɛɛ yɛ nye kɛbolo bɛ la, bɛmaa “[yɛli] bɛ eni kpole kpalɛ wɔ ɛlɔlɛ nu ɔlua bɛ gyima ne mɔɔ bɛyɛ la ati.”—1 Tɛs. 5:13.
5. Ka kɛzi ɛnee Saepelɛse bɔra ne azo daselɛlilɛ ne de la anwo edwɛkɛ.
5 Mɔɔ Baanabase nee Sɔɔlo diale hɔle Sɛlusea mɔɔ le habɔ bie mɔɔ bikye Anteɔko la, bɛvale ɛlɛne bɛhɔle Saepelɛse mɔɔ ye tendenle bayɛ kɛ mayɛlɛ 120 la. d Kɛmɔ Baanabase vi Saepelɛse la ati, ɔ nye liele kɛ ɔbamaa ye sua zo amra ade edwɛkpa ne. Mɔɔ bɛdwule Salamese, sua bie mɔɔ wɔ bɔra ne aduduleɛ la, mrenyia ɛhye mɔ anzɛkye mekɛ fee. Ndɛndɛ ne ala, “bɛbɔle ɔ bo bɛhanle Nyamenle edwɛkɛ ne wɔ Dwuuma nyianu azua ne mɔ anu.” e (Gyi. 13:5) Baanabase nee Sɔɔlo hɔkpɔsale Saepelɛse azo, bie a bɛhanle edwɛkɛ ne wɔ azua titili mɔɔ wɔ adenle nu la bie mɔ azo. Bie a adenle mɔɔ edwɛkpatɛlɛvolɛma ɛhye mɔ vale zo la maanle bɛdiale adenle mɔɔ ye tendenle bayɛ mayɛlɛ 100 la!
6, 7. (a) Sɛgyeɛse Pɔɔlɛse a le nwane, na duzu ati a ɛnee Baa-Gyisɛse ɛngulo kɛ ɔtie edwɛkpa ne a? (b) Kɛzi Sɔɔlo lile Baa-Gyisɛse dwazotia ne anwo gyima ɛ?
6 Ɛnee adalɛ ɛzonlenlɛ ɛbu zo wɔ Saepelɛse wɔ ɛvoya mɔɔ limoa la anu. Ɛhye lale ali wɔ mekɛ mɔɔ Baanabase nee Sɔɔlo dwule Peefɔso mɔɔ wɔ bɔra ne adɔleɛ ɛnweazo la. Bɛyiale “Dwuunli nrenyia bie mɔɔ bɛfɛlɛ ye Baa-Gyisɛse la, ɔle silikyevo yɛɛ adalɛ ngapezonli. Ɛnee ɔwɔ amɛnlado Sɛgyeɛse Pɔɔlɛse, nrenyia bie mɔɔ ze nrɛlɛbɛ la anwo ɛkɛ.” f Wɔ ɛvoya mɔɔ limoa la anu, ɛnee Wulomuma dɔɔnwo mɔɔ lɛ dibilɛ—le kɛ Sɛgyeɛse Pɔɔlɛse “mɔɔ ze nrɛlɛbɛ” bɔbɔ la—kpondɛ moalɛ fi silikyevoma nee nwɔlɔra neɛnleanuma ɛkɛ kolaa na bɛazi kpɔkɛ bie mɔɔ anwo hyia la. Noko ɛnee Sɛgyeɛse Pɔɔlɛse anye die Belemgbunlililɛ edwɛkɛ ne anwo yɛɛ ɛnee ‘ɔkulo kɛ ɔtie Nyamenle edwɛkɛ ne.’ Baa-Gyisɛse mɔɔ eza bɛfɛlɛ ye Ɛlemase mɔɔ ɔ bo kile “silikyevo” la anye anlie ɛhye anwo.—Gyi. 13:6-8.
7 Baa-Gyisɛse dwazole tiale Belemgbunlililɛ edwɛkɛ ne. Nɔhalɛ nu, ɛnee debie mɔɔ ɔbahola yeayɛ yeava yeabɔ ye dibilɛ ne anwo bane kɛ Sɛgyeɛse Pɔɔlɛse folɛtuvolɛ la a le kɛ ɔbahakyi “amɛnlado ne adwenle yeavi diedi ne anwo.” (Gyi. 13:8) Noko Sɔɔlo ammaa ngonyianli ne anzɛkye anyelielɛ mɔɔ Sɛgyeɛse Pɔɔlɛse nyianle la. Ɔti, duzu a Sɔɔlo yɛle a? Kɛlɛtokɛ ne ka kɛ: “Sunsum nwuanzanwuanza ne yile Sɔɔlo mɔɔ eza bɛfɛlɛ ye Pɔɔlo la tɛkɛɛ, na ɔnleanle ye [Baa-Gyisɛse] koonwu na ɔhanle kɛ: ‘Wɔmɔ mɔɔ nzisi kɔsɔɔti nee amumuyɛ muala ɛyi wɔ tɛkɛɛ, Abɔnsam ara, wɔmɔ mɔɔ ɛle debie biala mɔɔ le tenlene kpɔvolɛ la, ɛnrɛgyakyi kɛ ɛbahakyi Gyihova ndenle fɔɔnwo ne anye ɔ? Nea! Gyihova babua wɔ ndɛne na ɛ nye bazi, ɛnrɛnwu wienyi kɔkpula mekɛ bie.” Ɛkɛ ne ala ɔ nye zo yɛle ye kisii, awozinli vale ye na ɔlile nvuovua kɛ ɔkpondɛ awie azɔ ɔ sa ahile ye adenle.” g Duzu a vi nwanwane deɛ ɛhye anu rale a? “Mɔɔ amɛnlado ne nwunle mɔɔ ɛzi la, ɔrayɛle diedinli ɔluakɛ Gyihova ngilehilelɛ ne yɛle ye azibɛnwo.”—Gyi. 13:9-12.
Yɛfa akɛnrasesebɛ yɛdi nɔhalɛ ne anwo daselɛ wɔ dwazotia mekɛ nu kɛ Pɔɔlo la
8. Kɛzi yɛbahola yɛazukoa Pɔɔlo akɛnrazilɛ ne ɛnɛ ɛ?
8 Pɔɔlo anzulo Baa-Gyisɛse. Zɔhane ala a yɛdayɛ noko saa dwazotiama bɔ mɔdenle kɛ bɛsɛkye menli mɔɔ anye die edwɛkɛ ne anwo la diedi a ɔnle kɛ yɛmaa ɛzulolɛ ka yɛ a. Nɔhalɛ nu, ɔwɔ kɛ yɛmaa yɛ ɛdendɛlɛ ‘yɛ fɛ dahuu na ngyenle ba nu.’ (Kɔl. 4:6) Noko, eza yɛngyakyi kɛ yɛbaboa awie mɔɔ anye die edwɛkɛ ne anwo la ɔluakɛ ɔbahola yeava akɛsakɛsa yeara la ati. Yɛɛ ɔnle kɛ yɛmaa ɛzulolɛ ka yɛ na yɛgyakyi kɛ yɛbakpa adalɛ ɛzonlenlɛ mɔɔ ɔkɔ zo ‘ɔkakyi Gyihova ndenle fɔɔnwo ne anye’ kɛ Baa-Gyisɛse la anwo ɛdanlɛ. (Gyi. 13:10) Bɛmaa yɛva akɛnrazilɛ yɛli nɔhalɛ ne anwo daselɛ na yɛmaa ahonlekpalɛma anye ɛlie nwolɛ. Bie a yɛnrɛnwu Nyamenle moalɛ ne wienyi kɛ Pɔɔlo la ɛdeɛ, noko yɛbahola yɛanyia anwodozo kɛ Gyihova bava ye sunsum nwuanzanwuanza ne yeahwe menli mɔɔ fɛta la yeara nɔhalɛ ne anu.—Dwɔn 6:44.
‘Edwɛkɛ Mɔɔ Maa Anwosesebɛ La’ (Gyima ne 13:13-43)
9. Kɛzi Pɔɔlo nee Baanabase yɛle neazo kɛnlɛma maanle menli mɔɔ li asafo ne anyunlu ɛnɛ la ɛ?
9 Ɔbayɛ kɛ ninyɛne hakyile wɔ mekɛ mɔɔ bɛvile Peefɔso na bɛvale nyevile zo bɛpɛle adenle mayɛlɛ 150 bɛhɔle Pɛga mɔɔ wɔ Ehyia Ekyi ɛnweanloa la. Bɛha bɛ nwo edwɛkɛ wɔ Gyima ne 13:13 kɛ “Pɔɔlo nee ɔ gɔnwo mɔ.” Edwɛkɛ ɛhye maa ɔda ali kɛ ɛnee Pɔɔlo a li bɛ anyunlu a. Noko, debie biala ɛngile kɛ Baanabase anye bolole Pɔɔlo. Emomu, mrenyia nwiɔ ne bɔle nu yɛle gyima maanle Nyamenle ɛhulolɛdeɛ hɔle zo. Pɔɔlo nee Baanabase yɛle neazo kɛnlɛma maanle bɛdabɛ mɔɔ bɛli asafo ne anyunlu ɛnɛ la. Kilisienema ɛmpele ɛmkpondɛ dibilɛ emomu bɛkakye Gyisɛse edwɛkɛ ɛhye: “Bɛ muala bɛle mediema.” Ɔhanle ɔdoale zo kɛ: “Awie biala mɔɔ kɛmemaa ɔ nwo zo la, bɛkɛha ye aze, na awie biala mɔɔ kɛbɛlɛ ɔ nwo aze la, bɛkɛmaa ye zo.”—Mat. 23:8, 12.
10. Ka Pɛga mɔɔ kɔ Anteɔko mɔɔ wɔ Pesedea la adendulɛ ne anwo edwɛkɛ.
10 Mɔɔ bɛdwule Pɛga la, Dwɔn Maake gyakyile Pɔɔlo nee Baanabase ɛkɛ ne ziale hɔle Gyɛlusalɛm. Bɛanga deɛmɔti ɔvile ɛkɛ ne arɛlevilɛ nu la. Pɔɔlo nee Baanabase vile Pɛga hɔle Anteɔko mɔɔ wɔ Pesedea mɔɔ wɔ Galeehyea maanzinli nu la. Ɛnee adendulɛ ɛhye ɛnla aze ɔluakɛ Anteɔko mɔɔ wɔ Pesedea la gua boka mɔɔ ye tendenle bayɛ kɛ fuutu 3,600 la azo. Ɛnee nwulema ta gyegye menli mɔɔ fa adenle ne azo la. Eza yeanga ye zɔ, ɔbayɛ kɛ mekɛ ɛhye a ɛnee anwodolɛ ɛlɛgyegye Pɔɔlo la. h
11, 12. Mɔɔ Pɔɔlo hɔle Anteɔko mɔɔ wɔ Pesedea nyianusua ne anu la, kɛzi ɔmaanle ye tievolɛma ne anye liele ye edwɛkɛ ne anwo ɛ?
11 Pɔɔlo nee Baanabase hɔle Anteɔko mɔɔ wɔ Pesedea la nyianusua ne anu wɔ Ɛnwomenlelielɛ kenle. Kɛlɛtokɛ ne ka kɛ: “Mekɛ mɔɔ bɛgengale Mɛla ne nee Ngapezoma ne mbuluku ne mɔ bɛwiele la, nyianusua ne neavolɛma ne zele bɛ kɛ: ‘Mediema, saa bɛlɛ edwɛkɛ bie mɔɔ maa anwosesebɛ la bɛmaa menli ne a, bɛha.’” (Gyi. 13:15) Pɔɔlo dwazole dendɛle.
12 Pɔɔlo hanle hilele ye tievolɛma kɛ: “Mediema, Yizilayɛma nee bɛdabɛ mɔɔ bɛsulo Nyamenle la.” (Gyi. 13:16) Ɛnee Dwuuma nee bɛdabɛ mɔɔ bɛhakyi bɛrayɛ Dwuuma la a ɛlɛtie Pɔɔlo a. Kɛ ɔkɛyɛ na Pɔɔlo amaa ye tievolɛma mɔɔ bɛnlie Gyisɛse bɛnli kɛ ɔle Mɛzaya la anye alie edwɛkɛ ne anwo ɛ? Mɔɔ limoa, Pɔɔlo hanle Dwuu maanle ne anwo tetedwɛkɛ. Ɔhilehilele kɛzi Gyihova “kpale [bɛ] nenyia mɔ wɔ mekɛ mɔɔ ɛnee bɛle nyɛvolɛ wɔ Yigyibiti azɛlɛ zo” nee kɛzi mekɛ mɔɔ Nyamenle yele bɛ la anzi ɔnyianle “bɛ nwo abotane wɔ fienemgbole ne anu ɛvolɛ kɛyɛ 40” la anu. Eza Pɔɔlo hanle kɛzi Yizilayɛma asa hanle Ɛwɔkɛ Azɛlɛ ne nee kɛzi Gyihova ‘vale bɛ azɛlɛ ne maanle bɛ kɛ agyapadeɛ’ la anwo edwɛkɛ. (Gyi. 13:17-19) Bie mɔ suzu kɛ ɔbayɛ kɛ ɛnee Pɔɔlo ɛlɛtwe adwenle ahɔ Ngɛlɛlera ne foa bie mɔ mɔɔ bɛlimoa bɛgenga la azo kɛ mɔɔ ɛnee bɛta bɛyɛ ye wɔ Ɛnwomenlelielɛ kenle la. Saa ɔle zɔ a, ɛnee ɛhye le neazo bieko mɔɔ kile kɛ Pɔɔlo ze kɛzi ‘ɔbayɛ ɔ nwo debie biala yeamaa menli ngakyile kɔsɔɔti la.’—1 Kɔl. 9:22.
13. Kɛ ɔkɛyɛ na yɛamaa yɛ edwɛkɛ ne aha yɛ tievolɛma ahonle ɛ?
13 Ɔwɔ kɛ yɛdayɛ noko yɛbɔ mɔdenle kɛ yɛbamaa yɛ edwɛkɛ ne aha menli mɔɔ tie yɛ la ahonle. Kɛ neazo la, saa yɛze ɛzonlenlɛ mɔɔ awie wɔ nu la a ɔbaboa yɛ yeamaa yɛakpa edwɛkɛtile mɔɔ ɔ nye balie nwo la. Bieko, yɛbahola yɛaha Baebolo ne anu edwɛkɛ mɔɔ bie a ahenle ze ye la. Saa yɛmaa ahenle kenga fi ɔdaye mumua ne ye Baebolo ne anu a ɔbaboa kpalɛ. Kpondɛ ndenle dua zo maa wɔ edwɛkɛ ne ɛha wɔ tievolɛma ahonle.
14. (a) Kɛzi Pɔɔlo bɔle Gyisɛse anwo edwɛkpa ne abo ɛ, na kɔkɔbɔlɛ boni a ɔvale ɔmaanle a? (b) Duzu a menli ne yɛle ye wɔ Pɔɔlo ɛdendɛlɛ ne anwo a?
14 Eza Pɔɔlo hanle kɛzi Yizilayɛ arelemgbunli le “ngoanedievolɛ Gyisɛse” nenyia mɔ nee Dwɔn Sɔnevolɛ ne mɔɔ lile ɔ nwo daselɛ la anwo edwɛkɛ. Akee Pɔɔlo hanle kɛzi bɛhunle Gyisɛse na bɛdwazole ye bɛvile mowuamra anu la anwo edwɛkɛ. (Gyi. 13:20-37) Pɔɔlo hanle kɛ, “Mekpondɛ kɛ bɛnwu ye kɛ Nyamenle bava bɛ ɛtane ahyɛ bɛ ɔlua nrenyia ɛhye ewule ne ati . . . Nyamenle babu awie biala mɔɔ kɛlie kɛli la tenlenenli.” Akee Pɔɔlo bɔle ye tievolɛma kɔkɔ kɛ: “Bɛnlea boɛ na mɔɔ Ngapezoma ne hanle la amba bɛ nwo zo: ‘Bɛnlea ye boɛ, bɛmɛ agolobɛnwoma, na ɔyɛ bɛ azibɛnwo, na bɛminli, ɔluakɛ melɛyɛ gyima bie wɔ bɛ mekɛ zo, gyima mɔɔ saa awie ka nwolɛ edwɛkɛ kɔsɔɔti kile bɛ bɔbɔ a bɛnrɛlie bɛnrɛli la.’” Mɔɔ bɛyɛle ye wɔ Pɔɔlo ɛdendɛlɛ ne anwo la yɛ nwanwane. Baebolo ne ka kɛ, “Menli ne zɛlɛle bɛ kɛ bɛraha ɛhye mɔ anwo edwɛkɛ dɔɔnwo bɛhile bɛ wɔ Ɛnwomenlelielɛ kenle bieko.” Eza mekɛ mɔɔ menli mɔɔ yiale nyianusua ne anu zandele la, “Dwuuma dɔɔnwo nee bɛdabɛ mɔɔ bɛhakyi bɛrayɛ Dwuuma mɔɔ bɛsonle Nyamenle la doale Pɔɔlo nee Baanabase.”—Gyi. 13:38-43.
“Yɛlɛkɔ Maanle Maanle Ne Anu” (Gyima ne 13:44-52)
15. Duzu a zile wɔ Ɛnwomenlelielɛ kenle bieko wɔ Pɔɔlo ɛdendɛlɛ ne anzi a?
15 Ɛnwomenlelielɛ kenle bieko dwule la, “asɛɛ suakpole ne azo amra amuala” yiale nu kɛ bɛtie Pɔɔlo. Dwuuma bie mɔ anye anlie nwo na “bɛbɔle ɔ bo bɛhanle munzule edwɛkɛ bɛtiale mɔɔ Pɔɔlo ɛlɛka la.” Ɔ nee Baanabase vale akɛnrazilɛ dendɛle hilele bɛ kɛ: “Ɛnee ɔhyia kɛ yɛdimoa yɛka Nyamenle edwɛkɛ ne yɛkile bɛ. Na kɛmɔ bɛlɛkpo na bɛ subane ɛngile kɛ bɛfɛta kɛ bɛkɛnyia dahuu ngoane la ati, nea! yɛlɛkɔ maanle maanle ne anu. Ɔluakɛ Gyihova ɛha ɛhye ɛhile yɛ kɛ: ‘Mekpa wɔ kɛ maanle maanle ne kɛnlaneɛ amaa wɔava ngoanelielɛ wɔahɔ azɛlɛ ye azo ɛleka biala.’”—Gyi. 13:44-47; Aye. 49:6.
‘Bɛyɛle Pɔɔlo nee Baanabase kpɔdekpɔde na sunsum nwuanzanwuanza ne hɔle zo yile ɛdoavolɛma ne tetɛkɛɛ.’—Gyima ne 13:50-52
16. Kɛzi Dwuuma ne yɛle bɛ nyɛleɛ wɔ edwɛkɛ mɔɔ anu yɛ se mɔɔ bɛdele la anwo ɛ, na duzu a Pɔɔlo nee Baanabase yɛle ye wɔ dwazotia ne anwo a?
16 Mɔɔ maanle maanle ne anu amra dele la maanle bɛlile fɛlɛko na “bɛdabɛ mɔɔ bɛ subane kile kɛ bɛfɛta dahuu ngoane la amuala rayɛle diedima.” (Gyi. 13:48) Yeangyɛ Gyihova edwɛkɛ ne dɛlɛle maanle ne anu amuala. Edwɛkɛ ne anyɛ Dwuuma ne fɛ. Edwɛkpatɛlɛvolɛma ne maanle bɛnwunle ye kɛ bɛlimoale bɛhanle Nyamenle edwɛkɛ ne bɛhilele bɛ noko kɛmɔ bɛkpole Mɛzaya ne la ati Nyamenle ndɛnebualɛ mɔɔ anu yɛ se la bara bɛ nwo zo. Dwuuma ne maanle mraalɛ mgbanyima mɔɔ bɛsulo Nyamenle nee mrenyia mgbanyima mɔɔ wɔ suakpole ne azo la yɛle “Pɔɔlo nee Baanabase kpɔdekpɔde na bɛvoanle bɛ bɛvile sua ne azo.” Duzu a Pɔɔlo nee Baanabase yɛle a? “Bɛkpokpole bɛ gyakɛ abo munlutu bɛguale bɛ nwo zo na bɛhɔle Ayekoneɛm.” Asoo Kilisiene ɛzonlenlɛ ne rale awieleɛ wɔ Anteɔko mɔɔ wɔ Pesedea la ɔ? Kyɛkyɛ! “Fɛlɛkolilɛ nee sunsum nwuanzanwuanza ne hɔle zo yile” ɛdoavolɛma mɔɔ bɛgyakyile bɛ ɛkɛ ne la.—Gyi. 13:50-52.
17-19. Ndenle boni mɔ a yɛbahola yɛalua zo yɛazukoa neazo kɛnlɛma mɔɔ Pɔɔlo nee Baanabase yɛle la ɛ, na kɛzi yɛyɛ zɔ a ɔbamaa yɛ nye alie ɛ?
17 Kɛzi nɔhavoma ɛhye mɔ gyinlanle dwazotia nloa la le ɛzukoalɛdeɛ kpole maa yɛ. Saa menli mɔɔ lɛ dibilɛ wɔ ewiade ne anu la bɔ mɔdenle kɛ bɛmaa yɛagyakyi edwɛkɛ ne ɛhanlɛ a, yɛndie bɛ. Eza noko kakye kɛ, mekɛ mɔɔ menli mɔɔ wɔ Anteɔko andie edwɛkɛ ne la, Pɔɔlo nee Baanabase ‘kpokpole bɛ gyakɛ abo’—ɛhye ɛngile kɛ bɛvale ɛya emomu, ɔkile kɛ bɛnli bɛ nwo ɛzonle. Edwɛkpatɛlɛvolɛma ɛhye mɔ nwunle kɛ bɛnrɛhola bɛnrɛyɛ kɛzi menli bayɛ bɛ nyɛleɛ la anwo ɛhwee. Mɔɔ bɛbahola bɛayɛ la a le kɛ bɛbaha edwɛkɛ ne anzɛɛ bɛbagyakyi. Ɔti, bɛhɔle Ayekoneɛm bɛhɔhanle edwɛkɛ ne!
18 Na ɛdoavolɛma mɔɔ bɛgyakyile bɛ wɔ Anteɔko la ɛ? Nɔhalɛ nu, ɛnee bɛ azɛlɛsinli ne ɛnzo ma. Noko ɛnee tɛ edwɛkpa ne mɔɔ menli badie la a bamaa bɛali fɛlɛko a. Gyisɛse hanle kɛ: “Anyelielɛ a le bɛdabɛ mɔɔ bɛtie Nyamenle edwɛkɛ ne na bɛdi zo la!” (Luku 11:28) Na ɛhye a ɛdoavolɛma mɔɔ wɔ Anteɔko mɔɔ wɔ Pesedea la bɔle kpɔkɛ kɛ bɛbayɛ a.
19 Ɔwɔ kɛ yɛkakye kɛ ɔle yɛ gyima kɛ yɛbabɔ edwɛkpa ne nolo kɛ mɔɔ Pɔɔlo nee Baanabase yɛle la. Yɛ tievolɛma a bazi kpɔkɛ kɛ bɛbadie edwɛkɛ ne anzɛɛ bɛnrɛdie a. Saa menli mɔɔ yɛka edwɛkɛ ne yɛkile bɛ la andie yɛ a, yɛbahola yɛazukoa ɛvoya mɔɔ limoa ɛdoavolɛma ne. Saa yɛkile nɔhalɛ ne anwo anyezɔlɛ na yɛmaa sunsum nwuanzanwuanza ne kile yɛ adenle a, yɛbali fɛlɛko wɔ mekɛ bɔbɔ mɔɔ yɛlɛyia dwazotia la.—Gal. 5:18, 22.
a Nea ɛlɛka “ Baanabase—‘Arɛlekyekyelɛ Ralɛ’.”
b Mekɛ ɛhye, ɛnee asafo bie mɔ wɔ moamoa le kɛ Selea mɔɔ wɔ Anteɔko la—kɛyɛ mayɛlɛ 350 wɔ Gyɛlusalɛm sɔlɔ.
d Wɔ ɛvoya mɔɔ limoa la anu, ɛnee saa maanle nu le kpalɛ a meli kola pɛ mayɛlɛ ɛya ko kenle ko. Noko saa maanle nu ɛnle kpalɛ a, ɔmaa adendulɛ ne kyɛ.
e Nea ɛlɛka “ Dwuuma Nyianu Azua Nu.”
f Ɛnee Wulomuma a nea Saepelɛse azo a. Ɛnee bɛye amɛnlado bɛmaa ɔgyinla bɛ gyakɛ anu wɔ bɔra ne azo.
g Ɔvi ɛke too mɔɔ kɔ la, bɛhakyile Sɔɔlo duma bɛyɛle ye Pɔɔlo. Bie mɔ ka kɛ ɔvale Wulomu duma ɛhye ɔdonle ɔ nwo ɔvale ɔlile Sɛgyeɛse Pɔɔlɛse eni. Noko, mɔɔ ɔvile Saepelɛse bɔbɔ la ɛnee bɛtɛfɛlɛ ye Pɔɔlo na ɛhye maa ɔda ali kɛ debie bie ati a ɔyɛle zɔ a—yemɔ a le kɛ ɛnee Pɔɔlo le ‘ɛzoanvolɛ maa maanle maanle ne’ na ɔbɔle kpɔkɛ kɛ ɔbava Wulomu duma ne yeado ɔ nwo zo. Eza ɔbayɛ kɛ ɔhakyile ye duma ne ɔyɛle ye Pɔɔlo ɔluakɛ kɛzi bɛbɔ ye Hibulu duma Sɔɔlo ne wɔ Giliki nu la nee Giliki edwɛkpɔkɛ bie mɔɔ kile debie mɔɔ ɛnle kpalɛ la le ko.—Wlo. 11:13.
