ƐZUKOALƐDEƐ 13
Ɛzonlenlɛ Nwo Edwɛkpa Boni A Wɔ Ɛkɛ A?
1. Asoo ɛzonlenlɛ kɔsɔɔti le kpalɛ?
Menli mɔɔ lɛ ahonle kpalɛ la wɔ ɛzonlenlɛ kɔsɔɔti anu. Edwɛkpa ne a le kɛ Nyamenle nwu menli zɛhae mɔ na ɔdwenle bɛ nwo. Noko ɔyɛ alɔbɔlɛ kɛ menli ɛlua ɛzonlenlɛ zo ɛyɛ ninyɛndane la. (2 Kɔlentema 4:3, 4; 11:13-15) Amaneɛbɔlɛ kile kɛ ɛzonlenlɛ bie mɔ bɔbɔ fa bɛ nwo wulowula amumuyɛyɛlɛ, menli ɛhunlɛ, konle nu yɛɛ bɛyɛ ngakula basabasa. Nea kɛzi ɛhye maa Nyamenle nɔhalɛ azonvolɛ di nyane a!—Kenga Mateyu 24:3-5, 11, 12.
Nɔhalɛ ɛzonlenlɛ wula Nyamenle anyunlunyia noko adalɛ ɛzonlenlɛ yɛ mɔɔ ɔngulo la. Ɔkilehile ninyɛne mɔɔ ɛnle Baebolo ne anu, mɔɔ adalɛ edwɛkɛ mɔɔ fale Nyamenle nee mowuamra anwo boka nwo la. Noko Gyihova kulo kɛ menli nwu ɔ nwo nɔhalɛ ne.—Kenga Yizikeɛle 18:4; 1 Timote 2:3-5.
2. Ɛzonlenlɛ nwo edwɛkpa boni a wɔ ɛkɛ a?
Ɔyɛ anyelielɛ kɛ, ɛzonlenlɛma mɔɔ bɛka kɛ bɛkulo Nyamenle noko Seetan ewiade ne emomu a bɛkulo la ɛngola ɛmbɛlɛbɛla Nyamenle. (Gyemise 4:4) Nyamenle Edwɛkɛ ne fɛlɛ adalɛ ɛzonlenlɛ kɔsɔɔti kɛ “Babelɔn Kpole.” Babelɔn a le tete suakpole ne mɔɔ adalɛ ɛzonlenlɛ bɔle ɔ bo wɔ ɛkɛ wɔ Nowa Azuyilɛ ne anzi la. Ɔnrɛhyɛ Nyamenle bazɛkye ɛzonlenlɛ mɔɔ bɛlɛbɛla alesama na ɔmaa bɛnwu amaneɛ la. —Kenga Yekile 17:1, 2, 5, 16, 17; 18:8.
Edwɛkpa dɔɔnwo tɛbɔ ɛkɛ. Gyihova arɛle ɛtɛfile ahonlekpalɛma mɔɔ wɔ adalɛ ɛzonlenlɛ ne mɔ anu wɔ ewiade amuala la. Ɔlɛkilehile menli ɛhye mɔ nɔhalɛ ne na yeaha bɛ yeabɔ nu.—Kenga Maeka 4:2, 5.
3. Duzu a ɔwɔ kɛ menli mɔɔ lɛ ahonle kpalɛ la yɛ a?
Nɔhalɛ ɛzonlenlɛ ɛlɛka menli abɔ nu
Gyihova dwenle menli mɔɔ kulo mɔɔ le kpalɛ nee nɔhalɛ la anwo. Ɔtu bɛ folɛ kɛ bɛvi adalɛ ɛzonlenlɛ nu. Menli mɔɔ kulo Nyamenle la yɛ nzenzaleɛ mɔɔ bamaa bɛazɔ ɔ nye la.—Kenga Yekile 18:4.
Wɔ ɛvoya mɔɔ limoa la anu, mekɛ mɔɔ menli mɔɔ lɛ ahonle kpalɛ la dele edwɛkpa ne vile ɛzoanvolɛma ne ɛkɛ la, bɛ nye liele nwolɛ. Bɛzukoale ɛbɛlabɔlɛ fofolɛ mɔɔ yɛ anyelielɛ mɔɔ lɛ bodane nee anyelazo la bɛvile Gyihova ɛkɛ. Bɛyɛle neazo kpalɛ bɛmaanle yɛ ɔluakɛ bɛ nye liele edwɛkpa ne anwo na bɛvale Gyihova bɛlimoale bɛ ɛbɛlabɔlɛ nu. —Kenga 1 Tɛsalonaekama 1:8, 9; 2:13.
Gyihova die bɛdabɛ mɔɔ bɛgyakyi adalɛ ɛzonlenlɛ na bɛbaboka ye menli mɔɔ ɛlɛsonle ye la anwo la. Saa ɛdie Gyihova ɛsalɛdolɛ ne ɛto nu a, ɛbayɛ ɔ gɔnwo, ɛbanyia abusua fofolɛ mɔɔ nuhua menli lɛ ɛlɔlɛ na bɛsonle Gyihova la na wɔanyia dahuu ngoane.—Kenga Maake 10:29, 30; 2 Kɔlentema 6:17, 18.
4. Kɛzi Nyamenle bamaa anyelielɛ ara ɛleka biala ɛ?
Ndɛne mɔɔ bɛbabua adalɛ ɛzonlenlɛ la le edwɛkpa. Ɔbamaa menli mɔɔ bɛlɛsisi bɛ la anwo adɔ bɛ wɔ ewiade amuala. Adalɛ ɛzonlenlɛ ɛnrɛbɛlɛbɛla alesama yɛɛ ɔnrɛva mgbakyemgbakyenu ɔnrɛra bieko. Menli kɔsɔɔti badɛnla aze wɔ koyɛlɛ nu azonle nɔhalɛ Nyamenle kokye ne. —Kenga Yekile 18:20, 21; 21:3, 4.
