Gyihova se menli ngakyile kɔsɔɔti ɛbikye ye wɔ asɔneyɛlɛ nu. (Edwɛne 65:2) Noko tɛ asɔneyɛlɛ kɔsɔɔti a ɔtie a. Kɛ neazo la, nrenyia mɔɔ kile ɔ ye ateetee la asɔneyɛlɛ nwo adenle kola tua. (1 Pita 3:7) Bieko, mekɛ mɔɔ Yizilayɛma hɔle zo yɛle ɛtane la, Nyamenle andie bɛ asɔneyɛlɛ. Ɔda ali kɛ asɔneyɛlɛ le nwolɛ adenle kpole. Noko saa menli mɔɔ yɛ ɛtane kpole bɔbɔ la nu bɛ nwo a, Nyamenle tie bɛ asɔneyɛlɛ.​—Kenga Ayezaya 1:15; 55:7.

Nea Asoo Nyamenle Tie Nzɛlɛlɛ Kɔsɔɔti? vidio ne.

Asɔneyɛlɛ boka yɛ ɛzonlenlɛ nwo, yemɔti ɔwɔ kɛ yɛ Bɔvolɛ Gyihova angomekye a yɛfa yɛ asɔneyɛlɛ yɛto ɔ nyunlu a. (Mateyu 4:10; 6:9) Bieko, kɛmɔ yɛnli munli la ati, ɔwɔ kɛ yɛyɛ asɔne wɔ Gyisɛse duma nu ɔluakɛ yɛ ɛtane ti a ɔwule a. (Dwɔn 14:6) Gyihova ɛmkpondɛ kɛ yɛka edwɛkɛ mɔɔ yɛhwi yɛgua yɛ ti anu anzɛɛ yɛhɛlɛ la. Ɔkulo kɛ yɛfi yɛ ahonle nu yɛyɛ asɔne.​—Kenga Mateyu 6:7; Felepaema 4:6, 7.

Yɛ Bɔvolɛ ne te asɔne mɔɔ yɛyɛ ye yɛ ti anu bɔbɔ la. (1 Samoɛle 1:12, 13) Ɔse yɛyɛ asɔne mekɛ biala, nwonlomɔ nee nɔsolɛ, aleɛlilɛ mekɛ nee mekɛ mɔɔ yɛkɛyia ngyegyelɛ la. ​—Kenga Edwɛne 55:22; Mateyu 15:36.

Ɔnla aze kɛ yɛbabikye Nyamenle ɔluakɛ yɛ nee menli mɔɔ ɛnlie Nyamenle ɛnli na bɛgolo ɛwɔkɛ mɔɔ yebɔ kɛ ɔbamaa anzodwolɛ ara azɛlɛ ye azo anwo la a ade a. (2 Timote 3:1, 4; 2 Pita 3:3, 13) Ɔti, ɔwɔ kɛ yɛ nee yɛ mediema diedima yia na yɛmaa yɛ nwo anwosesebɛ ngoko. ​—Kenga Hibuluma 10:24, 25.

 Saa yɛ nee menli mɔɔ kulo Nyamenle la bɔ nu yia a, ɔmaa yɛbikye Nyamenle. Gyihova Alasevolɛ debiezukoalɛ ne mɔ le adenle kɛnlɛma mɔɔ maa yɛ gɔnwo mɔ diedi boa yɛ a.​—Kenga Wulomuma 1:11, 12.

Ɛbahola wɔabikye Gyihova ɔlua mɔɔ wɔzukoa wɔvi ye Edwɛkɛ ne anu mɔɔ ɛbadwenledwenle nwo la azo. Dwenledwenle ye gyimayɛlɛ, ye folɛdulɛ nee ye ɛwɔkɛ ne mɔ anwo. Asɔneyɛlɛ mɔɔ yɛfa yɛdwenledwenle ninyɛne nwo la maa yɛnyia Nyamenle ɛlɔlɛ nee ye nrɛlɛbɛ ne anwo anyezɔlɛ. ​—Kenga Dwɔhyua 1:8; Edwɛne 1:1-3.

Saa ɛbahola wɔabikye Nyamenle a, kyesɛ ɛfa ɛ nwo ɛto ɔ nwo zo na ɛnyia diedi wɔ ye nu. Noko diedi le kɛ baka mɔɔ hyia nzule la. Ɔwɔ kɛ dahuu ɛmaa wɔ diedi ne aleɛ ɔlua mɔɔ wɔ diedi ne gyi zo mɔɔ ɛbahɔ zo wɔadwenledwenle nwo la azo.​—Kenga Mateyu 4:4; Hibuluma 11:1, 6.

Gyihova dwenle bɛdabɛ mɔɔ bɛkulo ye la anwo. Ɔkola ɔbɔ bɛ nwo bane wɔ debie biala mɔɔ bahola azɛkye bɛ diedi nee bɛ dahuu ngoane anyelazo ne la anwo. (Edwɛne 91:1, 2, 7-10) Ɔbɔ yɛ kɔkɔ wɔ ɛbɛlabɔlɛ mɔɔ sɛkye yɛ kpɔkɛdelɛ nee yɛ anyelielɛ la anwo. Gyihova kilehile yɛ ɛbɛla kpalɛ mɔɔ ɔwɔ kɛ yɛbɔ la.​—Kenga Edwɛne 73:27, 28; Gyemise 4:4, 8.