Yɛyɛ wɔ mo kɛ wɔnyia mekɛ wɔzukoa brohyua ɛhye amaa wɔanwu menli holɛ mɔɔ Gyihova Alasevolɛ de, wɔanwu yɛ gyima ne nee mɔɔ yɛ ahyehyɛdeɛ ne ɛlɛyɛ la. Yɛlɛ anyelazo kɛ yemaa wɔnwu ye kɛ yɛdayɛ a yɛlɛyɛ Gyihova ɛhulolɛdeɛ ɛnɛ a. Yɛmaa wɔ anwosesebɛ kɛ kɔ zo nyia Nyamenle anwo ndelebɛbo, na ka mɔɔ ɛlɛsukoa la anwo edwɛkɛ kile wɔ abusua ne nee ɛ gɔnwo mɔ mɔɔ ɛha la, na baboka yɛ nwo wɔ yɛ Kilisiene ayia bo dahuu.​—Hibuluma 10:23-25.

Ɛbanwu kɛ saa ɛsukoa Gyihova anwo ninyɛne dɔɔnwo a, yɛɛ ɛbanwu kɛ ɔkulo wɔ kpalɛ a. Ɛhye bamaa wɔayɛ biala mɔɔ ɛkɛhola la wɔava wɔahile kɛ ɛdawɔ noko ɛkulo ye. (1 Dwɔn 4:8-10, 19) Noko kɛ ɔkɛyɛ na wɔala ɛhulolɛ zɔhane ali wɔ wɔ ɛbɛlabɔlɛ nu ɛ? Duzu ati a ɛdi ye ɛbɛlabɔlɛ nwo ngyinlazo ne mɔ azo a ɔbaboa wɔ ɛ? Na duzu a bamaa wɔaboka yɛ nwo yɛayɛ Nyamenle ɛhulolɛdeɛ a? Wɔ Baebolo kilehilevolɛ ne anye balie nwo kɛ ɔ nee wɔ bakpondɛ mualɛ ne amaa ɛ nee wɔ abusua ne ‘ava bɛ nwo azie Nyamenle ɛlɔlɛ ne anu, na yeahɔwie dahuu ngoane nu.’​—Dwuudu 21.

Yɛfa anyelielɛ yɛaze wɔ kɛ ɛzukoa buluku ne mɔɔ se “Bɛzie Bɛ Nwo Wɔ Nyamenle Ɛhulolɛ Ne Anu” na kɔ zo nyia anyuhɔlɛ wɔ nɔhalɛ ne anu .