Duzu ati a menli ɛhye mɔ anye ɛlie zɛhae ɛ? Bɛlɛkɔ yɛ nyianu ne mɔ ko la ati ɔ. Kɛ mɔɔ bɛhanle bɛhilele Nyamenle azonvolɛ wɔ tete ne kɛ bɛyia nu fane nsa ɛvolɛ biala la, yɛ nye la kɛ yɛbayɛ nyianu mgbole. (Ditilɔnomi 16:16) Ɛvolɛ biala, yɛyɛ nyianu nsa: kenle ko maangyebakyi nyianu fane nwiɔ yɛɛ kenle nsa maanzinli nyianu ko. Kɛzi nyianu ɛhye mɔ boa yɛ ɛ?

Bɛmaa yɛ Kilisiene mediemayɛlɛ ne anu mia. Kɛ mɔɔ Yizilayɛma vale anyelielɛ yele Gyihova ayɛlɛ wɔ “ayia” ngakyile bo la, yɛdayɛ noko yɛfa anyelielɛ yɛbɔ nu yɛsonle ye wɔ mekɛ titili bie mɔ anu. (Edwɛne 26:12, ɔbodwɛkɛ; 111:1) Nyianu ɛhye mɔ maa yɛ nee Alasevolɛ mɔɔ bɛvi asafo ngakyile anzɛɛ maanle gyɛne zo bɔbɔ la yia nu di adwelie. Saa yɛkpɔne ewiazo gyimalilɛ ne a, yɛbɔ nu yɛdi aleɛ wɔ nyianu ne abo, na ɔmaa sunsum nu agɔnwolɛvalɛ kɔ zo wɔ mekɛ ɛhye mɔ anu. (Gyima ne 2:42) Wɔ ɛkɛ ne, yɛnwu kɛzi ɛlɔlɛ maa yɛkulo yɛ “mediema muala” mɔɔ wɔ ewiade la.​—1 Pita 2:17.

Bɛmaa yɛnyia sunsum nu anyuhɔlɛ. Yizilayɛma noko dele Ngɛlɛlera ne anu ‘edwɛkɛ ne mɔɔ bɛhilehilele nu bɛhilele bɛ la abo’ na ɔboale bɛ. (Nihɛmaya 8:8, 12) Yɛdayɛ noko yɛ nye sɔ Baebolo ngilehilelɛ mɔɔ yɛnyia ye wɔ yɛ nyianu ne mɔ abo la. Nyianu ngyehyɛleɛ biala gyi Ngɛlɛlera ne anu edwɛkɛtile bie azo. Yɛsukoa kɛzi yɛbayɛ Nyamenle ɛhulolɛdeɛ wɔ yɛ ɛbɛlabɔlɛ nu la yɛfi ɛdendɛlɛ ngɛnlɛma, ɛdendɛlɛ mɔɔ bɛhyehyɛ nu nee yɛkile ngakyile nu. Saa yɛte Kilisienema mɔɔ ɛlɛgyinla ngyegyelɛ nloa wɔ mekɛ ɛhye mɔɔ anu yɛ se la anu anwubielɛ a, ɔmaa yɛ anwosesebɛ. Baebolo mekɛ zo drama maa yɛte Baebolo ne anu edwɛkɛ bo kpalɛ wɔ yɛ maanzinli nyianu ne mɔ abo. Wɔ nyianu mgbole biala abo, bɛsɔne bɛdabɛ mɔɔ bɛyila bɛ nwo zo bɛmaa Nyamenle la bɛfa bɛyɛ nwolɛ sɛkɛlɛneɛ.

• Duzu ati a nyianu mekɛ maa yɛ nye die a?

• Kɛzi ɛkɔ nyianu a ɔbaboa wɔ ɛ?