Saa ɛ nee Gyihova Alasevolɛ ne mɔ anu ko ɛlɛsukoa Baebolo ne a, ɔda ali kɛ ɛbɔ mɔdenle ɛdimoa ɛneɛnlea debiezukoalɛ ko biala anu. Ɔle kpalɛ kɛ ɛbayɛ ye zɔ kolaa na wɔahɔ debiezukoalɛ. Saa dahuu yɛyɛ zɔ a debie kpalɛ fi nu ba.

Kpa mekɛ nee ɛleka mɔɔ ɛbazukoa debie la. Mekɛ boni a ɛbahola wɔazukoa debie kpalɛ a? Nwonlomɔ mangyee, kolaa na wɔabɔ alehyenlɛ ne anu gyima bo, anzɛɛ nɔsolɛ nu mɔɔ ngakula ne mɔ ɛhɔla la ɔ? Saa ɛnrɛhola ɛnrɛzukoa debie mekɛ tendenle bɔbɔ a, si mekɛ dodo mɔɔ ɛbava wɔazukoa la anwo kpɔkɛ, na bɔ mɔdenle kɛ ɛbali zo. Kpondɛ ɛleka mɔɔ le koonwu la na nua debie biala mɔɔ bahola ahwehwe wɔ adwenle mɔɔ le kɛ riledio, tɛlevihyɛne yɛɛ moba la. Ɛdimoa ɛyɛ asɔne na wɔazukoa a ɔbamaa alehyenlɛ ne anu adwenleadwenle avi ɛ nwo zo amaa wɔahola wɔava wɔ adwenle wɔazie Nyamenle Edwɛkɛ ne azo.​—Felepaema 4:6, 7.

Pepɛ edwɛkɛ ne abo, na siezie ɛ nwo kɛ ɛbamaa mualɛ. Dimoa nea kɛ ɛbade edwɛkɛ ne kɔsɔɔti abo. Dwenle edwɛkɛtile ne anwo, suzu kɛzi tile ekyi ko biala fale edwɛkɛtile ne anwo la, na suzu nvoninli nee ndinu kpuya ne mɔ mɔɔ si edwɛkɛ titili mɔɔ wɔ nu azo la anwo. Akee kenga ɛdendɛkpunli ko biala na kpondɛ kpuya ne anwo mualɛ. Kenga ngɛlɛlera mɔɔ bɛanga nwolɛ edwɛkɛ wɔ nu la, na suzu kɛzi ɔboa ɔmaa edwɛkɛ ne anu da ɛkɛ la anwo. (Gyima ne 17:11) Saa ɛnwu kpuya ne anwo mualɛ a, pɛ edwɛkɛ agbɔkɛ ekyi anzɛɛ ɛdendɛfoa mɔɔ wɔ ɛdendɛkpunli ne anu mɔɔ baboa wɔ yeamaa wɔahakye mualɛ ne la abo. Akee, saa ɛkɔ debiezukoalɛ a, ɛbahola wɔamaa ɛ sa zo na wɔava wɔ edwɛkɛ wɔamaa mualɛ sikalɛ.

Saa ɛsuzu ninyɛne ngakyile mɔɔ bɛsukoa ye dapɛne biala wɔ debiezukoalɛ bo la anwo a, ɛbanwu ninyɛne fofolɛ wɔaboka wɔ Baebolo ne anu ndelebɛbo nwo na wɔava wɔazie ‘ɛleka mɔɔ ɛfa wɔ ninyɛne ɛsie la.’​—Mateyu 13:51, 52.

• Kɛzi ɛbaziezie ɛ nwo wɔamaa debiezukoalɛ ne mɔ dahuu ɛ?

• Kɛzi ɛbaziezie ɛ nwo na wɔamaa mualɛ wɔ debiezukoalɛ bo ɛ?