Kilisiene Ɛbɛlabɔlɛ Nwo Ngɛlɛlera buluku ne bamaa wɔahola wɔanwu Baebolo tɛkese nee kɛlɛtokɛ mɔɔ baboa wɔ yeamaa wɔali ngyegyelɛ mɔɔ ɛlɛyia la anwo gyima ndɛndɛ. Eza ɔbaboa wɔ yeamaa wɔanwu Baebolo ne anu edwɛkɛ bie mɔɔ ɛbava wɔamaa awie mɔ anwosesebɛ na wɔaboa bɛ wɔamaa bɛazi kpɔkɛ mɔɔ sɔ Gyihova anye la. Nea edwɛkɛtile mɔɔ ɛ nye die nwo la, na maa kpuya nee Baebolo kɛlɛtokɛ mɔɔ wɔ nwolɛ la ɛboa wɔ. (Nea ɛlɛka “ Kɛzi Ɛbava Buluku Ɛhye Wɔali Gyima La.”) Ɛbanwu folɛdulɛ, adehilelɛ nee arɛlekyekyelɛ mɔɔ baboa wɔ kpalɛ la wɔ Nyamenle Edwɛkɛ ne anu. Eza ɛbanyia Baebolo ne anu ngyinlazo dɔɔnwo mɔɔ ɛbava wɔaboa awie mɔ na wɔamaa bɛ anwosesebɛ la.

Edwɛkɛtile biala anwo ngɛlɛlera kɔsɔɔti ɛnle buluku ɛhye anu. Noko ɔle buluku mɔɔ ɛbahola wɔava wɔayɛ neɛnleanu kpalɛ a. (Mrɛ 2:​1-6) Amaa wɔahola wɔazukoa ninyɛne dɔɔnwo la, fa edwɛkɛ mɔɔ bɛhyehyɛ nee study notes mɔɔ wɔ New World Translation of the Holy Scriptures ne anu la di gyima. Fa Gyihova Alasevolɛ Neɛnleanu Buluku ne anzɛɛ Watch Tower Publications Index ne di gyima amaa wɔade ngɛlɛlera bie nee kɛzi ɛbava wɔali gyima la abo kpalɛ. Nea edwɛkɛ mɔɔ bɛhɛlɛ ye kenlensa ye la amaa wɔanwu ngɛlɛlera ne anu nɔhalɛ fofolɛ mɔɔ ɛra la.

Yɛ nye la kɛ Kilisiene Ɛbɛlabɔlɛ Nwo Ngɛlɛlera buluku ne baboa wɔ yeamaa wɔanwu nrɛlɛbɛ, adwenle yɛɛ ndelebɛbo mɔɔ wɔ Ngɛlɛlera Nwuanzanwuanza ne anu la. Mekɛ mɔɔ ɛlɛfa buluku ɛhye wɔali gyima la, ɛbanwu ye bɔkɔɔ kɛ “Nyamenle edwɛkɛ ne de ngoane nu yɛɛ tumi wɔ nu.”—Hi 4:12.