BƆ ADAWUBƆLƐ BO
ƐZUKOALƐDEƐ 5
Nrɛlɛbɛ Adenle Zo
Ngyinlazo: “Bɛmaa bɛ ɛdendɛlɛ ɛyɛ fɛ dahuu.”—Kɔl. 4:6.
Mɔɔ Pɔɔlo Yɛle La
1. Nea VIDIO ne, anzɛɛ kenga Gyima ne 17:22, 23. Akee suzu kpuya ɛhye mɔ anwo:
-
Duzu a Pɔɔlo yɛle ye wɔ adalɛ ɛzonlenlɛ nyɛleɛ mɔɔ ɔnwunle ye wɔ Atɛnse la anwo a?—Nea Gyima ne 17:16.
-
Kɛ anrɛɛ Pɔɔlo badendɛ atia Atɛnsema la, kɛzi ɔluale nrɛlɛbɛ adenle zo ɔgyinlanle bɛ diedi ne azo ɔbɔle edwɛkpa ne nolo ɛ?
Duzu A Yɛsukoa Yɛfi Pɔɔlo Ɛkɛ A?
2. Saa yɛnea edwɛkɛ mɔɔ yɛbaha, kɛzi yɛbaha ye yɛɛ mekɛ mɔɔ yɛbaha la boɛ a, menli anye balie kɛ bɛbadie yɛ.
Sukoa Pɔɔlo
3. Ka edwɛkɛ mɔɔ bɛ nye balie nwo la. Kɛ neazo la, saa ɛ nee awie mɔɔ ɛnle Kilisienenli la ɛlɛtendɛ a, bie a ɔwɔ kɛ ɛnea kɛzi ɛbaha Baebolo ne anzɛɛ Gyisɛse anwo edwɛkɛ la boɛ.
4. Mmayɛ ye ndɛ ɛtenrɛ ahenle. Maa ɔnyia adenle ɔdendɛ. Saa ɔka edwɛkɛ mɔɔ ɛngyi Baebolo ne azo la bɔbɔ a, ɛ nee ye mmasu kpolera. (Gye. 1:19) Saa ɛtie ye a, ɔbamaa wɔanwu mɔɔ wɔ ye adwenle nu la.—Mrɛ. 20:5.
5. Ɛ nee ahenle ɛyɛ adwenle na kanvo ye kɛ mɔɔ ɔfɛta la. Bie a ɔdie ɔdi kɛ mɔɔ ye ɛzonlenlɛ ne ka la le nɔhalɛ. Ɛ nee ye ɛlimoa ɛha ninyɛne mɔɔ bɛ adwenle yia wɔ nwolɛ la anwo edwɛkɛ, na akee boa ye ngyikyi ngyikyi maa ɔde mɔɔ Baebolo ne ka la abo.
