Mediema Mrenyia Nee Mraalɛ:

Ɛlɔlɛ mɔɔ yɛlɛ yɛmaa Nyamenle nee menli la ka yɛ maa ‘yɛkɔyɛ maanle maanle kɔsɔɔti anu menli ɛdoavolɛma, na yɛsɔne bɛ.’ (Mat. 28:​19, 20; Maake 12:​28-31) Menli nwo ɛlɔlɛ zɛhae ka yɛ maa yɛboa “bɛdabɛ mɔɔ bɛ subane kile kɛ bɛfɛta dahuu ngoane la.”—Gyi. 13:48.

Dɛba ne, ɛnee yɛfa yɛ adwenle yɛsie edwɛkɛ mɔɔ yɛbaha nee mbuluku mɔɔ yɛbava yɛamaa la azo. Noko, kɛkala ɔwɔ kɛ yɛnwu kɛzi yɛbahola yɛ nee menli ali adwelie kpalɛ la. Yɛkulo kɛ yɛka ninyɛne mɔɔ menli anye die nwo la anwo edwɛkɛ yɛfa yɛkile kɛ yɛkulo bɛ. Ɛhye kile kɛ ɔwɔ kɛ yɛkakyi yɛ edwɛkɛ ne anu na yɛsuzu awie biala ngyianlɛ nee mɔɔ ɔ nye die nwo la anwo kpalɛ. Kɛzi brohyua ɛhye baboa yɛ yeamaa yɛayɛ zɔ ɛ?

Ɛzukoalɛdeɛ 12 mɔɔ maa yɛnwu subane mɔɔ ɔwɔ kɛ yɛnyia amaa yɛahulo menli na yɛamaa bɛayɛ ɛdoavolɛma la a wɔ brohyua ne anu a. Ɛzukoalɛdeɛ ko biala gyi Baebolo ne anu kɛlɛtokɛ mɔɔ maa yɛnwu subane fɔɔnwo bie mɔɔ Gyisɛse anzɛɛ ɛvoya mɔɔ limoa edwɛkpakavolɛ bie lale ye ali wɔ ɛzonlenlɛ gyima ne anu la azo. Tɛ yɛ bodane a le kɛ yɛkye edwɛkɛ bie yɛagua yɛ ti anu, emomu, yɛkpondɛ ndenle mɔɔ yɛbalua zo yɛahile kɛ yɛkulo menli la. Subane ko biala anwo hyia wɔ yɛ ɛzonlenlɛ gyima afoa kɔsɔɔti anu, noko yɛbazuzu kɛzi subane bie mɔ hyia titili wɔ mekɛ mɔɔ yɛlɛbɔ adwelielilɛ bo, yɛlɛyɛ sia kɔkpɔla anzɛɛ mekɛ mɔɔ yɛlɛyɛ Baebolo ɛzukoalɛ la anwo.

Saa ɛlɛsuzu ɛzukoalɛdeɛ ko biala anwo a, dwenle kɛzi ɛ nee awie ɛlɛtendɛ wɔ ɛleka mɔɔ ɛwɔ la a ɛbahola wɔala subane zɔhane ali la anwo kpalɛ. Bɔ mɔdenle kɛ ɛbamaa ɛlɔlɛ mɔɔ ɛlɛ ɛmaa Gyihova nee menli la ayɛ kpole. Ɛlɔlɛ zɔhane bamaa wɔaboa menli wɔamaa bɛayɛ ɛdoavolɛma, ɛlɔlɛ zɔhane hyia tɛla mɔdenlebɔlɛ gyɛne biala.

Yɛ nye sɔ nwolɛ adenle kpole mɔɔ yɛnyia yɛ nee bɛ ɛlɛbɔ nu ayɛ gyima la. (Zɛf. 3:9) Gyihova ɛyila bɛ wɔ mekɛ mɔɔ bɛlɛkɔ zo bɛahulo menli na bɛamaa bɛayɛ ɛdoavolɛma la!