Seetan nee ye sunsum evinli ne mɔ ɛnrɛbɛlɛbɛla alesama ɛnrɛhyɛ bieko. Gyihova ɛdu bɛ ɛvi anwuma. (Yekile 12:9) Ɔnrɛhyɛ, Nyamenle badwazo Seetan nee ye sunsum evinli ne mɔ anwo zo bieko. Dwɔn hanle ye wɔ ɛnyelɛzodeɛnwunlɛ bie mɔɔ Nyamenle vale manle ye la anu kɛ: “Akee menwunle kɛ [anwumabɔvolɛ] ko vi anwuma ɛlɛdwu, na ɔlɛ azɛlɛ kuma ne mɔɔ ɛnlɛ ɔ bo la sanvɛ ne nee nwɔnzɔnwɔnzɔ kpole bie ɔ sa nu. Ɔhyele nane anwo ɛzulolɛ ne mɔɔ le kɛ ɛlɛnrɛne la, ɛwɔlɛ dɛba ne, mɔɔ bɛfɛlɛ ye Abɔnsam anzɛɛ Seetan la, na ɔguale ye anga mɔɔ kyesɛ ɛvolɛ apenle ko pɛ nu kolaa na bɛazianyi ye la. [Anwumabɔvolɛ] ne vuandinle ye dole azɛlɛ kuma ne mɔɔ ɛnlɛ ɔ bo la anu, ɔhanle kuma ne ɔnwinle nwolɛ, na ɔzɔle ɔ nloa, amaa yeangola finde na yeabɛlɛbɛla maanle maanle bieko kyesɛ ɛvolɛ apenle ko ne pɛ nuhua.” (Yekile 20:1-3) Ɛhye anzi, bɛbazɛkye Abɔnsam nee ye sunsum evinli ne mɔ bɔkɔɔ.—Yekile 20:10.

Bɛbazɛkye ɛtanevolɛma mɔɔ wɔ azɛlɛ ye azo la noko.—Edwɛndolɛ 37:9, 10; Luku 13:5.

Saa Gyihova ye Seetan nee sunsum evinli ne mɔ fi ɛkɛ a, Ɔbava nyilalɛ dɔɔnwo yearɛlɛ alesama. Ɛkakye kɛ mɔwuamra ɛnle ngoane nu, bɛnde aze. Gyisɛse vale ewule dole nlafelɛ nwo—nlafelɛ mɔɔ bɛda ye botoo mɔɔ bɛnga ɛlalɛ la. (Dwɔn 11:11-14) Ɔyɛle ɛhye ɔluakɛ ɛnee ɔze kɛ mekɛ bie bara mɔɔ menli mɔɔ ɛla wɔ ewule nu la badwazo ara ngoane nu a. Ɔhanle kɛ: “Mekɛ ɛlɛba mɔɔ mɔwuamra amuala bade ɔ ne . . . , na bɛvi bɛ nla ne mɔ anu bɛbavinde.”—Dwɔn 5:28, 29; Fa to Gyima ne 24:15 anwo.

Bɛbadwazo bɛ bɛara ngoane nu bieko wɔ azɛlɛ ɛhye azo. Kɛ anrɛɛ yɛbade menli mɔɔ ɛwu la anwo amaneɛbɔlɛ la, menli mɔɔ bɛdwazo bɛ bɛra ngoane nu bieko la anwo amaneɛ fɛlɛko a yɛbade a! Nea anyelielɛ mɔɔ ɔbayɛ kɛ yɛbayɛ yɛ alɔvolɛ mɔɔ bɛdwazo bɛ bɛvi ewule nu la awa-awa-atuu a!