Dauda mɔɔ vi Sierra Leone la hanle kɛ: “Bɛtetele me namule ekyi bie anu wɔ maanle ne sɔlɔ maanzinli ne anu.” Ɔdoale zo kɛ: “Mele kakula la, kenle ko azɛlɛ nwo manzonle dɔle abusua bie nee yɛ ɛdeɛ ne avinli. Ɛnee mbusua nwiɔ ɛhye ɛlɛpele azɛlɛ ko ne ala anwo. Amaa bɛaziezie edwɛkɛ ne la, bɛhɔvale ninsinli bie bɛrale. Ɔvale neanleɛ ɔwulale nrenya ko asa nu, na akee ɔvale kisane ɔhedale ɔ nwo zo. Yeangyɛ biala yɛɛ nrenya ne mɔɔ vea ɛdanlɛ ne abo la anwo bɔle ɔ bo kɛ ɔwozo ye na yeadu ɛhɛlɛnra a. Mɔɔ ɔ nye gyi neanleɛ ne anu la, ɔdeanle nu kɛ: ‘Menwu nrenya kpanyinli bie kɛ ɔlɛba! Ɔwula tɛladeɛ fufule. Ɔwale yɛɛ ɔ nye ɛvi, ɔ ti zo le egyɛne, yɛɛ ye avinli ɛkpo ekyii.’

“Ɛnee ɔlɛka Nenya anwo edwɛkɛ! Akee ɛzulolɛ kpole hanle ye na ɔdeanle nu kɛ: ‘Saa bɛnlie mɔɔ melɛka la bɛnli a, ɛnee bɛdabɛ bɛranlea!’ Nɔhalɛ nu, yɛ nuhua biala annyia akɛnrazilɛ angɔnnea! Ninsinli ne vale ayile bie mɔɔ ɔlɛ ye awa nu la, ɔkpondenle nrenya ne anwo ɔmanle ɔyɛle koonwu.

“‘Nenya’ luale nrenya ne mɔɔ lɛ neanleɛ ne ɔ sa nu la anwo zo hanle kɛ azɛlɛ ne le yɛ abusua ne ɛdeɛ. Ɔzele me nana kɛ ɔmmasulo na ɔyɛ azɛlɛ ne azo gyima. Abusua ko ne dele edwɛkɛ ne abo. Yemɔti edwɛkɛ ne abo pɛle.”

 Edwɛkɛ mɔɔ le kɛ ɛhye mɔ la ɛbu zo wɔ Afeleka Adɔleɛ. Kɛmɔ ɔde ye wɔ ewiade ɛleka ne bie mɔ la, zɔhane ala a ɛke noko, menli mgbe mgbe die di kɛ menli mɔɔ ɛwu la wɔ sunsum ewiade nu, ɛleka mɔɔ bɛkola bɛnwu menli mɔɔ de azɛlɛ ye azo na bɛnyia bɛ ɛbɛlabɔlɛ zo tumi la. Asoo diedi ɛhye le nɔhalɛ? Mɔwuamra wɔ ngoane nu ɔ? Saa bɛnle ngoane nu a, ɛnee nwane mɔ yɛɛ kakyi bɛ nwo kɛ mɔwuamra sunsum a? Nwolɛ hyia kpalɛ kɛ ɛbanyia kpuyia ɛhye mɔ anwo nɔhalɛ nyelebɛnloa. Ɔle ewule nee ngoane edwɛkɛ.