Yɛ muala yɛlɛ kpɔkɛ yɛsi. Kɛ yɛbazonle Gyihova anzɛɛ yɛbazonle Seetan nee ye sunsum evinli ne mɔ. Yɛnrɛhola yɛnrɛzonle bɛ mu nwiɔ. Nea nrɛlɛbɛ mɔɔ wɔ nu kɛ yɛkɛzonle Gyihova a!

Kɛmɔ yɛlumua yɛnwu ye la, sunsum evinli ne mɔ anye die kɛ bɛkɛhile menli nyane na bɛkɛbɛlɛbɛla bɛ. Gyihova ɛnle zɔhane. Ɔkulo alesama kɛmɔ selɛ kulo ɔ mra la. Ɔle “ɛlolɛdeɛ kpalɛ biala nee ahyɛlɛdeɛ biala mɔɔ di munli la” Maavolɛ. (Gyemise 1:17) Ɔnva debie kpalɛ biala ɔnvea alesama, saa deɛ ne bamaa yeaminli debie kpole bɔbɔ a.—Ɛfɛsɛsema 2:4-7.

Dwenle ninyɛne mɔɔ Gyisɛse, Nyamenle Ara ne, yɛle ye wɔ azɛlɛ ye azo la anwo nea. Ɔmanle mumule dendɛle yɛɛ anyezinliravolɛ noko nwunle debie. Ɔmanle kokobɛvolɛ nwo zale na abubura dwazole diale. Ɔdule sunsum evinli na ɔyɛle ewule ngakyile kɔsɔɔti ayile. Ɔlua Nyamenle tumi zo, Gyisɛse dwazole mɔɔ ɛwu la bɔbɔ.—Mateyu 9:32-35; 15:30, 31; Luku 7:11-15.

Kɛ anrɛɛ Nyamenle kɛbɔ adalɛ kɛbɛlɛbɛla yɛ la, ɔka nɔhalɛ dahuu. Ɔmbɛlɛbɛla awie biala.—Ɛdianlɛ 23:19.

Kɛmɔ kɛdɛba ndenda kola kye kɛkɛba la, zɔhane ala a diedi mgbane nee adalɛ ngilehilelɛ ɛhye menli mgbe mgbe a. Bɛsulo mɔwuamra. Bɛsulo sunsum evinli ne mɔ. Bɛ ahonle tu wɔ amowa, munzule ɛbɔlɛ, silihyelɛ, nee ayile ɛdolɛ nwo. Bɛrayɛ diedi nee amaamuo mɔɔ gyi Seetan Abɔnsam adalɛ ne azo la anwo ngɛkɛlɛ. Nyamenle azonvolɛ ɛnzulo ninyɛne ɛhye mɔ biala.

Gyihova tumi bo Seetan ɛdeɛ ne azo faa. Saa ɛsonle Gyihova a, ɔbabɔ ɛ nwo bane yeavi sunsum evinli ne mɔ anwo. (Gyemise 4:7) Bɛto wɔ ayile a ɔnrɛha wɔ. Kɛ neazo la, ninsivolɛma nsa bie mɔɔ ɛbe kpalɛ la dole Gyihova Dasevolɛ bie mɔɔ anvi sua bie azo andu kɛmɔ bɛhanle la ayile wɔ Nigeria kɛ bɛku ye. Mekɛ mɔɔ ayile ne angola ye ɛhwee yɛ la ninsivolɛma ne anu ko ahonle dule. Yemɔti ɔhɔle Dasevolɛ ne ɛkɛ ne kɛ ɔkakpɔda ye amaa yeava ye ɛtane yeahyɛ ye.

Saa sunsum evinli ɛlɛgyegye wɔ a, ɛbahola wɔabɔ Gyihova duma wɔavɛlɛ ye, na ɔbabɔ ɛ nwo bane. (Mrɛlɛbulɛ 18:10) Noko amaa wɔanyia Nyamenle anwobanebɔlɛ la, ɔwɔ kɛ ɛtwe ɛ nwo ɛfi debie biala mɔɔ bɛfa bɛdi gyima wɔ sunsum evinli nyɛleɛ anzɛɛ sunsum evinli ɛzonlenlɛ nu la anwo bɔkɔɔ. Nyamenle azonvolɛ mɔɔ ɛnee wɔ tete Ɛfɛsɛse la yɛle zɔ. Bɛvale bɛ ngonyia mbuluku ne mɔ kɔsɔɔti bɛrale bɛmanle bɛyelale bɛ. (Gyima ne 19:19, 20) Ɔwɔ kɛ Nyamenle azonvolɛ mɔɔ wɔ ɛkɛ ne ɛnɛ la noko yɛ zɔhane ala. Ɔwɔ kɛ bɛye ngɛba, banzɛlɛ, kiti, dufuakɛ, ngonyia mbuluku, nee debie biala mɔɔ bɛdua zo bɛ nee sunsum evinli di ngitanwo la bɛfi bɛ nwo.

Saa ɛkulo kɛ ɛsɔ Nyamenle anye a, tɛ adalɛ ɛzonlenlɛ nee ninyɛndane ɛyɛlɛ angome a ɔwɔ kɛ ɛkoati a. Ɔwɔ kɛ ɛfa ɛ nwo ɛwula nɔhalɛ ɛzonlenlɛ nu. Baebolo ne kile mɔɔ ɔwɔ kɛ ɛyɛ la:

Seetan nee sunsum evinli ne mɔ lɛ menli wɔ azɛlɛ ye azo mɔɔ kilehile na bɛyɛ ninyɛndane a. Noko Gyihova lɛ ye menli. Bɛmɛ a le Gyihova Alasevolɛ. (Ayezaya 43:10) Alasevolɛ mɔɔ bo mgbe nsia la a wɔ azɛlɛ ye kɔsɔɔti azo a. Bɛ kɔsɔɔti bɛbɔ mɔdenle ɛsesebɛ kɛ bɛbayɛ ninyɛne kpalɛ na bɛahilehile menli nɔhalɛ ne. Wɔ maanle dɔɔnwo azo, ɛbanwu bɛ wɔ Belemgbunlililɛ Asalo, ɛleka mɔɔ bɛ nye balie kɛ bɛbalie wɔ kɛnlɛma la.

Bɛ gyima a le kɛ bɛkɛboa menli bɛkɛmaa bɛkɛzonle Nyamenle. Bɛ nee wɔ bazukoa Baebolo ne wɔ wɔ sua nu, na bɛaboa wɔ bɛamaa wɔanwu adenle kpalɛ mɔɔ ɔwɔ kɛ ɛfa zo ɛsonle Gyihova la. Bɛndua ɛhye anwo ɛhwee. Ɔyɛ Alasevolɛ ne mɔ fɛ kɛ bɛkɛhilehile wɔ nɔhalɛ ne ɔluakɛ bɛkulo menli yɛɛ bɛkulo Gyihova Nyamenle.