Sunsum Evinli Ne Mɔ Le Ahɔdiawu!
Seetan nee sunsum evinli ne mɔ ati ɛhɔ zo ɛyɛ se na bɛ nwo ɛyɛ ɛzulolɛ. Seetan hunle nɔhavo Dwobu nyɛmoa nee ye sonvolɛma wɔ tete ne. Akee Seetan manle “ahumu kpole bie” dule rabubule sua ne mɔɔ Dwobu amra bulu ne wɔ nu la hunle bɛ. Wɔ ɛhye anzi, Seetan “hɔle na ɔhɔdele nganlɛ mgbole ɔkpondenle Dwobu anwo. Ɔvi ɔ ti zo mɔɔ dwu ɔ gyakɛ akunlu la yɛle nganlɛ ngome.”—Dwobu 1:7-19; 2:7.
Wɔ Gyisɛse mekɛ zo, sunsum evinli ne mɔ manle menli dɔle amumule na bɛ nye zinle. (Mateyu 9:32, 33; 12:22) Bɛhilele nrenya bie nyane na bɛmanle ɔvale awolɛ ɔpepɛle ɔ nwo. (Maake 5:5) Eza bɛmanle kakula bie deɛdeanle nu, vale ɔ nwo finle azɛlɛ nwo, na ɔpɛle mgbutike.—Luku 9:42.
Tete ne, sunsum evinli ne mɔ manle menli bie mɔ anwo dole bɛ yɛɛ bɛmanle bie mɔ noko pɛle mgbutike
Ɛnɛ, Seetan nee sunsum evinli ne mɔ ɛrayɛ ahɔdiawu ɛdɛla mekɛ biala. Nɔhalɛ nu, ɔbɔ ye mekɛ mɔɔ bɛdule bɛ bɛvile anwuma la bɛ nyɛleɛ ɛtane ne ɛhɔ ɔ nyunlu. Ninyɛne mɔɔ ɛlɛsisi ewiade la di bɛ atisesebɛ nyɛleɛ ne anwo daselɛ. Bɛfa anwodolɛ bɛgyegye menli bie mɔ. Bɛgyegye bie mɔ noko nɔɔzo, bɛmmaa bɛnla anzɛɛ bɛmaa bɛka ɛlalɛ ɛzulolɛ. Eza bɛ nee bie mɔ da. Yɛɛ akee noko bɛmaa bie mɔ bɔ ɛlane, ku menli anzɛɛ ku bɛ nwo.
Ɛnɛ, sunsum evinli ne mɔ maa menli ne bie yɛ ninyɛndane; bɛgyegye bie mɔ nɔɔzo, na bɛmaa bɛka ɛlalɛ ɛzulolɛ
Lintina mɔɔ de Suriname la hanle kɛ, sunsum evinli anzɛɛ sunsum ɛtane bie hunle menli 16 wɔ ye abusua ne anu na bɛmanle ɔdele nyane wɔ nwonane nee adwenle nu ɛvolɛ 18. Ɔhanle mɔɔ ɔnwunle ye la anwo edwɛkɛ kɛ sunsum evinli ne mɔ “anye die nwo kɛ bɛbayɛ menli mɔɔ ɛngulo kɛ bɛkɛnwu amaneɛ wɔ bɛ sa nu la ateetee kɔkpula kɛ bɛkɛwu.”
Noko Gyihova kola bɔ ye azonvolɛ nwo bane fi Seetan asa nu.—Mrɛlɛbulɛ 18:10.
Bie A Eza Ɛ Nye Balie
BAEBOLO KPUYA MƆƆ BƐBUA
Asoo Amaneɛnwunlɛ Kɔsɔɔti Vi Abɔnsam?
Baebolo ne maa yɛnwu deɛmɔti alesama nwu amaneɛ la.
