Duzu ati a Seetan nee ye sunsum evinli ne mɔ bɔ mɔdenle kɛ bɛkɛbɛlɛbɛla menli ɛ? Bɛkpondɛ kɛ yɛboka bɛ yɛte atua la ati ɔ. Bɛkpondɛ kɛ yɛsonle bɛ. Bɛkpondɛ kɛ yɛdie bɛ adalɛ edwɛkɛ ne yɛto nu na yɛyɛ ninyɛne mɔɔ Gyihova ɛngulo la. Ninyɛne ɛhye mɔ anu dɔɔnwo le amaamuo mɔɔ bɛbu ye wɔ mekɛ mɔɔ awie kɛwu la.

Dɔvolɛ ewule le debie mɔɔ yɛ nyane kpole kpalɛ, na ɛtane biala ɛnle nwolɛ kɛ yɛkɛzu na yɛkɛli nyane. Mɔɔ ɔ gɔnwo Lazalɛse wule la “Gyisɛse zunle.”—Dwɔn 11:35.

Amaamuo dɔɔnwo wɔ ɛkɛ mɔɔ bɛyɛ bɛmaa mɔwuamra a, na maanle biala lɛ mɔɔ bɛyɛ ye nu a. Nuhua dɔɔnwo ɛntia Baebolo ngyinlazo. Noko akee, bie mɔ gyi ndelebɛbo mɔɔ menli lɛ kɛ mɔwuamra de aze na bɛkola bɛnwu anyewɔzoamra la azo. Epezilɛ, nyanelilɛ molozo, nee ɛzɛnemgbole ɛyɛlɛ gyi ɛzulolɛ mɔɔ menli sulo kɛ bɛkɛvo mɔwuamra sunsum la azo. Noko kɛmɔ “mɔwuamra ɛnze ɛhwee” la ati bɛdabɛ mɔɔ bɛyɛ ɛhye mɔ la ɛlɛtɛlɛ Seetan adalɛ ne anu.—Nolobɔvo ne 9:5.

Amaamuo anzɛɛ nyɛleɛ bie mɔ noko vi diedi mɔɔ kile kɛ mɔwuamra hyia anyewɔzoamra moalɛ na  saa anyewɔzoamra amkpɔda bɛ a bɛbagyegye bɛ la azo. Wɔ maanle bie mɔ anu saa awie wu a bɛto aleɛ na bɛbɔ afɔle wɔ ye kenle 40 ne azo anzɛɛ ye ɛvolɛ nloa. Bɛsuzu kɛ nyɛleɛ ɛhye boa ahenle mɔɔ ɛwu la maa ‘ɔpɛ azule’ ɔkɔ sunsum ɛleka ne. Nyɛleɛ bieko mɔɔ bɛta bɛyɛ la a le kɛ bɛkɛva aleɛ nee nza bɛkɛmaa mɔwuamra.

Ninyɛne ɛhye mɔ le ɛtane ɔboalekɛ bɛdi bɛboa adalɛ mɔɔ Seetan bɔ ye mɔwuamra anwo la. Asoo saa yɛfa yɛ nwo yɛwula amaamuo ɛhye mɔ mɔɔ gyi sunsum evinli ngilehilelɛ zo la anu a Gyihova balie yɛ ado nu? Ɔnrɛlie yɛ ɔnrɛdo nu ɛlɛ!— 2 Kɔlentema 6:14-18.

Nɔhalɛ Nyamenle ne azonvolɛ ɛnva bɛ nwo ɛnwula nyɛleɛ mɔɔ di boa Seetan adalɛ ne la anu. Emomu mɔɔ bɛdwenle nwo la a le kɛ bɛbavi ɛlɔlɛ nu bɛaboa anyewɔzoamra na bɛakyekye bɛ rɛle. Bɛze kɛ saa awie wu a, Gyihova angomekye a kola boa zɔhane sonla ne a.—Dwobu 14:14, 15.

Menli ne bie dua menli mɔɔ tendɛ sunsum evinli nloa azo la anwo zo nee sunsum evinli ne mɔ di ngitanwo anzɛɛ bɛdabɛ mumua ne bɛfɛlɛ bɛ. Ɛhye le sunsum evinli nyɛleɛ. Ahɔnelilɛ, bayivolɛ ɛbɛla, ngonyiayelɛ, munzule ɛbɔlɛ, nee nwomenle ɛvɛlɛlɛ kɔsɔɔti le sunsum evinli nyɛleɛ.

Baebolo ne tua ninyɛne ɛhye mɔ, ɔka kɛ: “Bɛ nuhua biala mmayɛ sunsum nu debie biala mɔɔ kile kɛ ɔbiza awie anwo edwɛkɛ, anzɛɛ ɔbɔ awie munzule, anzɛɛ ɔye ngonyia, anzɛɛ ɔkye awie mɔ sili, anzɛɛ ɔtendɛ nwomenle nloa azo, anzɛɛ ɔbɔ bayivolɛ ɛbɛla. Awie biala mɔɔ yɛ ninyɛne ɛhye mɔ la bɔ munzule wɔ [Gyihova] anyunlu.”—Mɛla ne 18:10-12.

Duzu ati a Gyihova bɔ yɛ kɔkɔ ɛsesebɛ wɔ nyɛleɛ ɛhye mɔ anwo ɛ?

Yɛdayɛ mumua ne yɛ boɛyɛlɛ ti a Gyihova bɔ yɛ kɔkɔ wɔ sun sum evinli nyɛleɛ kɔsɔɔti nwo a. Ɔkulo menli yɛɛ ɔdwenle bɛ nwo, na ɔze kɛ, kɛ ɔkɛyɛ biala la bɛdabɛ mɔɔ bɛfa bɛ nwo bɛwula sunsum evinli nyɛleɛ nu la banwu amaneɛ.

Menli zɛhae mɔ anu ko a le Nilda mɔɔ ɛnee bɔ menli munzule wɔ Brazil la. Sunsum evinli ne mɔ manle ɔ nwo yɛle alɔbɔlɛ. Ɔhanle kɛ: “Sunsum evinli ne mɔ . . . to me, bɛmaa mekpɔsɛkpɔsa. Ɔyɛ a me nye zo bulu me ɛnee me nye ɛra zo ekyii, na bɛvale me bɛhɔdole asopiti kɛ awie mɔɔ ɛnyia adwenle nu ewule la. Sunsum evinli ne mɔ yɛle me kpɔdekpɔde dedee me ndinli nu tutole. Menvale ayile mɔɔ maa bɛda la dahuu na membɔle ɔ bo kɛ meno nza nee sigalɛte. Ɛhye hɔle zo ɛvolɛ dɔɔnwo.”

Mekɛ hɔle bie la, ɔlua Gyihova nee ye Alasevolɛ mɔɔ wɔ azɛlɛ ye azo la moalɛ zo Nilda hwenle ɔ nwo vile sunsum evinli ne mɔ tumi bo na kɛkala ɔbɔ ɛbɛla kpalɛ na ɔ nwo tɔ ye. Ɔse: “Mewula awie biala anwosesebɛ kɛ, ɔ nee sunsum [atisesebɛ] ne mɔ mmadi ngitanwo ekyii bɔbɔ ɛlɛ.”