Bɛkpogya ɛnyelɛzodeɛnwunlɛ ne anu ɛzonlenlɛsua ne zo wɔ “boka tendenle bie” azo (1). Asoo yɛkpogya nɔhalɛ ɛzonlenlɛ zo na yɛmaa nwolɛ ɛhyia yɛ kpalɛ wɔ yɛ ɛbɛlabɔlɛ nu ɔ?

Azɛlɛ ne anloa bane ne (2), mɔɔ la sua ne amuala anwo wɔ azɛlɛ tɛtɛlɛ ne avinli la (3), kakye yɛ kɛ ɔnle kɛ yɛmaa debie biala gua Gyihova ɛzonlenlɛ ne anwo evinli ɛlɛ. Saa ɛnee ɔwɔ kɛ bɛye ninyɛne mɔɔ “awie biala kola” yɛ bie bɔbɔ la bɛfi nɔhalɛ ɛzonlenlɛ nu a, ɛnee fane nyɛ a ɔnle kɛ yɛtwe yɛ nwo yɛfi nyɛleɛ evinli anzɛɛ ɛbɛlatane nwo ɛnɛ a!​—Yiz. 42:20.

Azudenle bie vi ɛzonlenlɛsua ne anu zenle, ɔdɛlɛle ɔyɛle azule kpole na ɔmaanle debie biala nyianle ngoane na azɛlɛ ne hyenle aleɛ (4). Yɛbazuzu nyilalɛ ɛhye mɔ anwo wɔ Tile 19 ne anu.

Findezo nlenkɛ mgbole ndendenle ne (5) nee ɔ kunlu lɔ nlenkɛ mgbole ne mɔ (9) kakye yɛ ɛbɛlabɔlɛ nwo ngyinlazo mɔɔ kpogya mɔɔ ɔwɔ ɛkɛ ɔmaa nɔhalɛ ɛzonlenlɛma kɔsɔɔti la. Findezo nee ɔ kunlu lɔ nlenkɛ mgbole ne mɔ amuala ndendenle nee bɛ mgbole sɛ. Ɛhye fɛta, ɔluakɛ Gyihova tenlene ngyinlazo ko ne ala a wɔ ɛkɛ maa ye azonvolɛ kɔsɔɔti, ɔnva nwo bɛ gyinlabelɛ anzɛɛ nwolɛ adenle mɔɔ bɛlɛ la a.

Aleɛlilɛ azua ne mɔ (8) kakye yɛ kɛ, ɛnee menli ne kola di afɔlebɔdeɛ ne mɔ mɔɔ bɛfa bɛba ɛzonlenlɛsua ne anu la bie, ɔlua zo, bɛ nee Gyihova bɔ nu di aleɛ. Ɔle ngakyile ɔfi sunsum nu ɛzonlenlɛsua ne mɔɔ Kilisienema sonle wɔ ɛkɛ ne ɛnɛ la anwo, ɔluakɛ bɛbɔ “afɔle kokye” ne bɛwie. (Hib. 10:12) Noko yɛtɛbɔ yɛ ayɛlɛyelɛ afɔle ne.​—Hib. 13:15.

Bie a ninyɛne mɔɔ bɛzuzule la amuala bazi ɛ nwo. Noko ɛzukoalɛdeɛ titili bie wɔ nu: Gyihova bodane mɔɔ ɔlɛ kɛ ɔfa nɔhalɛ ɛzonlenlɛ yeazie ɛkɛ ne bieko la le nɔhalɛ na ɔbara nu, kɛ mɔɔ ɛzuzudeɛ ne mɔ le pɛpɛɛpɛ na bɛngola bɛngakyi bɛ la. Yeanga kɛ ɔnwunle dasanli bie, noko ɔhɛlɛle kɛ Gyihova vale folɛdulɛ mɔɔ anu yɛ se la maanle ɛsɔfoma ne, mgbanyima ne mɔ yɛɛ menli ne. Ɔwɔ kɛ Nyamenle azonvolɛ kɔsɔɔti di Ye tenlene ngyinlazo ne mɔ azo.