NGILEHILELƐ ƐLƐKA 19A
Gyihova Ɛkɛ Ne Nyilalɛ Se Kɛ Azule
Suzu Baebolo nu edwɛkɛ ngakyile mɔɔ bɛfa edwɛkɛ agbɔkɛ “azudenle” nee “nzule” bɛyɛ nyilalɛ mɔɔ vi Gyihova ɛkɛ anwo nvoninli la anwo nea. Saa yɛkenga edwɛkɛ ɛhye mɔ a, bɛmaa yɛ anwosesebɛ wɔ kɛzi Gyihova yila yɛ la anwo. Adenle boni azo?
DWOWƐLE 3:18 Ngapezo ɛhye maa yɛnwu nzubula bie mɔɔ vi ɛzonlenlɛsua ne anu ɛlɛse la. Ɔkɔdoɔloa “Akasea Mbaka Bɔnza” anu resee ne anu. Ɔti, Dwowɛle nee Yizikeɛle nwunle kɛ azudenle ne maanle azɛlɛ ne hakyile azɛlɛ mɔɔ kye aleɛ. Wɔ ɔ mu nwiɔ anu, ɛnee azudenle ne vi Gyihova ɛzonlenlɛsua ne anu.
ZƐKALAYA 14:8 Zɛkalaya nwunle “ngoane nzule” mɔɔ vi suakpole Gyɛlusalɛm azo ɛlɛse la. Ye foa ko se kɔ aduduleɛ nyevile, anzɛɛ Nyevile Wulera ne anu yɛɛ foa ko se kɔ adɔleɛ nyevile, anzɛɛ Mɛdetɛlenia Nyevile ne anu. Ɛnee Gyɛlusalɛm le Gyihova Nyamenle, “Belemgbunli kpole ne suakpole.” (Mat. 5:35) Ɔti suakpole zɔhane mɔɔ Zɛkalaya bɔle ye duma la, kakye yɛ tumi mɔɔ Gyihova bali ye wɔ ewiade amuala la. Yɛde ɔ bo mekɛ tendenle kɛ nzule ne mɔɔ wɔ ngapezo ɛhye anu la kile kɛ Gyihova bayila alesama ekpunli nwiɔ mɔɔ bɛdi nɔhalɛ la wɔ Paladaese, bɛdabɛ mɔɔ bɛbapɛ anwongyelelɛ kpole ne yɛɛ bɛdabɛ mɔɔ bɛbadwazo bɛ la.
YEKILE 22:1, 2 Dwɔn nwunle sɛkɛlɛneɛ adenle zo azudenle bie mɔɔ ɔzɔho mɔɔ Yizikeɛle nwunle ye la. Noko ɔvi Gyihova belemgbunli ebia ne anu a ɔse a, na tɛ ɛzonlenlɛsua ne anu ɔ. Ɔti ɛnyelɛzodeɛnwunlɛ ɛhye le kɛ Zɛkalaya ɛdeɛ ne la, ɔbayɛ kɛ bɛsi Ɛvolɛ Apenle Ko tumililɛ ne anu nyilalɛ ne mɔ azo.
Ngakyile ekyi bie ala a wɔ nyilalɛ mɔɔ Gyihova tumililɛ ne bava ara nee mɔɔ azudenle ne mɔɔ Yizikeɛle nwunle ye la bava ara la avinli a. Nyilalɛ ɛhye mɔ amuala vi Gyihova na nɔhavoma amuala nyia bie.
EDWƐNE 46:4 Asɛɛ ngyɛnu ko ɛhye ka ninyɛne nwiɔ ne—ɛzonlenlɛ nee tumililɛ—nwo edwɛkɛ. Wɔ ɛke, yɛnwu azudenle mɔɔ fa anyelielɛ ba “Nyamenle suakpole ne” azo la, ɔkile Belemgbunlililɛ ne tumililɛ yɛɛ “Anwuma Anwumanli ne ɛdanlɛsua kpole nwuanzanwuanza ne” mɔɔ kile nɔhalɛ ɛzonlenlɛ la.
Edwɛkɛ ɛhye mɔ maa yɛnwu kɛ Gyihova bayila alesama mɔɔ di nɔhalɛ la wɔ ndenle nwiɔ azo. Yɛbanyia mɔɔ limoa la yɛavi ye tumililɛ ne anu, yɛɛ mɔɔ tɔ zo nwiɔ la yɛavi ye nɔhalɛ ɛzonlenlɛ ne anu. Ɔti bɛmaa yɛzi kpɔkɛ ɛnɛ yɛkpondɛ “ngoane nzule”—dahuu ngoane nwo nziezielɛ ne mɔɔ bɛvi ɛlɔlɛ nu bɛyɛ la—yɛvi Gyihova Nyamenle nee ɔ Ra ne ɛkɛ!—Gyɛ. 2:13; Dwɔn 4:10.
