Ɔkola Ɔkile “ɛbulɛ nee ɛlɔlɛ mɔɔ bɛda ye ali bɛkile nyamenle bie la.” Wɔ Baebolo ne anu, Hibulu nee Giliki edwɛkɛ agbɔkɛ mɔɔ bɛhilele ɔ bo “ɛzonlenlɛ” la kola kile kɛ awie ɛlɛda ɛbulɛ kpole ali amaa abɔdeɛ bie mɔ anzɛɛ ɔlɛbɛlɛ ɔ nwo aze yeamaa bɛ. (Mat. 28:9) Eza bɛkola bɛkile ɛzonlenlɛ nu nyɛleɛ mɔɔ bɛyɛ bɛmaa Nyamenle anzɛɛ bozonle bie la. (Dwɔn 4:23, 24) Edwɛkɛ mɔɔ boka nwo la a maa bɛte edwɛkɛ agbɔkɛ ne mɔ abo a.

Gyihova, Bɔvolɛ ne nee Anwuma Nee Aze Belemgbunli ne ala a ɔfɛta kɛ yɛsonle ye a. (Yek. 4:10, 11) Yɛsonle Gyihova ɔlua ɛbulɛ mɔɔ yɛkile yɛmaa ye tumililɛ ne na yɛdi ye duma ne eni la azo. (Edw. 86:9; Mat. 6:9, 10) Bɛha Gyihova tumililɛ ne nee ye duma ne anwo edwɛkɛ dɔɔnwo wɔ Yizikeɛle buluku ne anu. Edwɛkɛ “Tumivolɛ Awulae Gyihova” finde nu fane 217 yɛɛ edwɛkɛ “na bɛanwu kɛ medame a mele Gyihova a” noko finde nu fane 55.​—Yiz. 2:4; 6:7.

Noko yɛ ɛzonlenlɛ ne ɛnle nganeɛdelɛ bie ala; emomu ɔka yɛ nyɛleɛ noko. (Gye. 2:26) Saa yɛyila yɛ ngoane zo yɛmaa Gyihova a, ɛnee yɛbɔ ɛwɔkɛ kɛ wɔ yɛ ɛbɛlabɔlɛ kɔsɔɔti anu, yɛbadie ye kɛ yɛ Tumivolɛ na yɛabu duma ne kpalɛ. Kakye kɛ, mekɛ mɔɔ Gyisɛse bua sɔnea mɔɔ tɔ zo nsa la, ɔhilele kɛ ɛzonlenlɛ foa bie a le “ɛzonlenlɛ nwuanzanwuanza.” (Mat. 4:10, ɔbdw.) Kɛmɔ yɛle Gyihova sonvolɛma la ati, yɛ nye die nwolɛ kɛ yɛbazonle ye. * (Dit. 10:12) Saa yɛfa yɛ nwo yɛwula gyima mɔɔ fale yɛ ɛzonlenlɛ nwo na ɔhyia afɔlebɔlɛ la anu a, ɛnee yɛlɛfa ɛzonlenlɛ nwuanzanwuanza yɛamaa yɛ Nyamenle ne. Gyima boni mɔ ɔ?

Ɛzonlenlɛ nwuanzanwuanza gua ye ngakyile, ɔ muala sonle bolɛ maa Gyihova. Saa yɛdi awie mɔ daselɛ, yɛfa yɛ nwo yɛwula debiezukoalɛ nu wɔ yɛ Belemgbunlililɛ Asalo, yɛsi azua mɔɔ yɛyɛ debiezukoalɛ wɔ ɛkɛ ne la na yɛnea zolɛ boɛ a, ɛnee yɛlɛfa yɛ nwo yɛawula ɛzonlenlɛ zɛhae anu. Bieko, saa yɛyɛ abusua ɛzonlenlɛ, yɛboa moalɛ gyima mɔɔ bɛyɛ bɛmaa yɛ mediema diedima, yɛtu yɛ nwo yɛmaa wɔ maanzinli nyianu bo anzɛɛ yɛyɛ gyima wɔ Bɛtɛle a, ɛnee yɛlɛfa ɛzonlenlɛ ɛhye yɛamaa. (Hib. 13:16; Gye. 1:27) Saa nɔhalɛ ɛzonlenlɛ nwo hyia yɛ kpalɛ a, yɛbava yɛ nwo yɛawula ‘ɛzonlenlɛ nwuanzanwuanza nu alehyenlɛ nee aledwolɛ.’ Yɛ nye die yɛ Nyamenle Gyihova ɛzonlenlɛ nwo kpalɛ!​—Yek. 7:15.