Baebolo ngapezo nee tetedwɛkɛ maa ɔda ali wienyi kɛ Gyisɛse bɔle ɔ bo kɛ ɔdi Belemgbunli wɔ anwuma wɔ 1914, ɛhye a bɔle Seetan ngyehyɛleɛ ne mɔɔ wɔ azɛlɛ ye azo la awieleɛ mekɛ ne abo a. Gyisɛse rayɛle Belemgbunli la, duzu a ɔyɛle a? Asoo ɔliele ye sonvolɛma mɔɔ wɔ azɛlɛ ye azo la ɔvile Babelɔn Kpole ne anu ɛkɛ ne ala ɔ? Asoo ɔkpale ye “akɛlɛ nɔhavo nee badwema” ne wɔ 1914 na ɔbɔle ma ɛdelɛ gyima kpole ne abo ɔ?​—Mat. 24:45.

Kyɛkyɛ. Kakye kɛ ɛzoanvolɛ Pita hanle kɛ ndɛnebualɛ ne babɔ “ɔ bo wɔ Nyamenle sua nu.” (1 Pita 4:17) Ngapezonli Malakae noko hanle kɛ mekɛ bie bara mɔɔ Gyihova nee “ngyekyeleɛ ne anwo ɛbɔfoɔ ne,” Nyamenle Ara ne, bara Ye ɛzonlenlɛsua ne anu a. (Mal. 3:1-5) Mekɛ zɔhane, bɛbadu bɛ nu evinli na bɛazɔ bɛ bɛanlea. Asoo tetedwɛkɛ nee ngapezo zɔhane yia?

 Ɛhɛe! Ɛvolɛ 1914 kɔdwu 1919 mɔlebɛbo a le mekɛ mɔɔ anu yɛ se mɔɔ bɛzɔle Baebolo Sukoavoma, kɛ mɔɔ ɛnee bɛfɛlɛ Gyihova Alasevolɛ ne mɔ la bɛnleanle na bɛdule bɛ nuhua evinli a. Wɔ 1914, Nyamenle menli ne mɔɔ wɔ azɛlɛ ye azo la anu dɔɔnwo arɛle bɔle wɔ mekɛ mɔɔ ngyehyɛleɛ ɛhye amba awieleɛ kɛ mɔɔ ɛnee bɛ nye la ye ade la. Arɛlebɔlɛ ne anu yɛle se kpalɛ wɔ 1916, wɔ mekɛ mɔɔ Charles T. Russell, mɔɔ li Nyamenle menli ne anyunlu la wule la. Bɛ nuhua ne mɔ mɔɔ ɛnee bikye Adiema Russell kpalɛ la dwazole tiale Joseph F. Rutherford mɔɔ lile Russell agyakɛ anu lile bɛ nyunlu la mɔdenlebɔlɛ ne ɛsesebɛ. Mgbakyemgbakyenu rale na ɔhale kyɛkyɛ na ahyehyɛdeɛ ne anu ahyɛ wɔ 1917. Akee wɔ 1918, ɛsɔfoma ne wulowulale awie mɔ abo bɛmaanle bɛhyele Adiema Rutherford nee ɔ gɔnwo mɔ nsuu bie, bɛbuale bɛ mgbɔvodɛne na bɛguale bɛ efiade. Bɛdole ewiade amuala gyima ne ati mɔɔ wɔ Brooklyn la anu. Ɛnee bɛtɛyele Nyamenle menli ne bɛtɛfile Babelɔn Kpole ne anu!

Noko, duzu a zile wɔ 1919 a? Ɔyɛ, ninyɛne hakyile na bɛnyianle anyuhɔlɛ ndɛndɛ! Wɔ ɛvolɛ ne mɔlebɛbo, bɛyele Rutherford nee ɔ gɔnwo mɔ bɛvile efiade. Na bɛbɔle gyima bo ɛkɛ ne ala. Ndɛndɛ ne ala, bɛyɛle nyianu titili bie anwo ngyehyɛleɛ yɛɛ bɛbɔle ɔ bo kɛ bɛyɛ adwelie kɛlata fofolɛ bie, The Golden Age ne (ɛnɛ bɛfɛlɛ ye Awake!). Bɛyɛle kɛ bɛfa bɛabɔ nolo wɔ bagua nu ɛzonlenlɛ gyima ne anu. Eza bɛkpale neavolɛ wɔ asafo biala anu kɛ ɔnlea ɔyɛ ɛzonlenlɛ gyima ne anwo ngyehyɛleɛ na ɔmaa ɔhɔ zo. Wɔ ɛvolɛ ko ne ala anu, bɛyɛle Bulletin ne (ɛnɛ bɛfɛlɛ ye Yɛ Kilisiene Ɛbɛlabɔlɛ Nee Yɛ Ɛzonlenlɛ​—Nyianu Buluku) amaa yeaboa yeamaa bɛayɛ edwɛkɛhanlɛ gyima ne anwo ngyehyɛleɛ kpalɛ.

Duzu a zile a? Ɔda ali kɛ, ɛnee Kelaese ɛlie ye menli ne ɛvi akɛlɛzonlenlɛ nu wɔ Babelɔn Kpole ne anu. Yekpa ye akɛlɛ nɔhavo nee badwema ne. Ɛnee ma ɛdelɛ gyima ne ɛlɛkɔ zo. Ɔvi 1919 mɔɔ le ɛvolɛ titili mɔɔ ba la, gyima ne ɛnyia anyuhɔlɛ wɔ adenle mɔɔ yɛ nwanwane la azo.