NGILEHILELƐ ƐLƐKA 1B
Yizikeɛle Edwɛkɛ Ne Sikalɛpɛlɛ
Yɛbahola yɛahyɛ Yizikeɛle buluku ne anu zɛhae:
TILE 1 KƆDWU 3
Wɔ 613 K.Y.M., mekɛ mɔɔ ɛnee Yizikeɛle nee Dwuuma mɔɔ wɔ akɛlɛzonlenlɛ nu de Babelɔn la, ɔnwunle Gyihova anwo ɛnyelɛzodeɛnwunlɛ dɔɔnwo na bɛhanle bɛhilele ye kɛ ɔha ngapezo ɔhile Dwuuma mɔɔ de azule Kibaa ne anloa la.
TILE 4 KƆDWU 24
Ɔvi 613 kɔdwu 609 K.Y.M., Yizikeɛle hanle ndɛnebualɛ ngapezo tiale Gyɛlusalɛm nee ye atuadelɛma, ye awozonlezonlenlɛ menli ne titili.
TILE 25 KƆDWU 32
Ɔvi 609 K.Y.M., ɛvolɛ ɛhye anu a Babelɔnoma bɔle ɔ bo bɛngale Gyɛlusalɛm yiale mɔɔ li awieleɛ a, na Yizikeɛle ndɛnebualɛ edwɛkɛ ne hakyile vile Gyɛlusalɛm anwo zo hɔle agbɔvolɛ maanle mɔɔ ɛbɛnga bɛ ɛyia la anwo zo—Amɔn, Yidɔm, Yigyibiti, Mowabe, Filisitia, Saedɛn yɛɛ Taya.
TILE 33 KƆDWU 48
Ɔvi 606 K.Y.M., mɔɔ ɛnee Gyɛlusalɛm nee ye ɛzonlenlɛsua ne ɛdɔ mgbane wɔ moamoa nehane la, Yizikeɛle hanle anyelazo bie anwo edwɛkɛ—Gyihova Nyamenle nɔhalɛ ɛzonlenlɛ ne mɔɔ bɛbava bɛazie ɛkɛ ne bieko la.
Ɔti bɛnleanle mekɛ mɔɔ edwɛkɛ ne sisile nee ninyɛne mɔɔ bɛhanle nwolɛ edwɛkɛ la azo a bɛhyehyɛle Yizikeɛle buluku ne a. Bɛhanle ngapezo ne mɔɔ fale Gyɛlusalɛm nee ye ɛzonlenlɛsua ne ɛzɛkyelɛ nwo la kolaa na bɛaha nɔhalɛ ɛzonlenlɛ mɔɔ bɛbava bɛazie ɛkɛ ne bieko la anwo ngapezo dɔɔnwo ne. Ɔluakɛ ɛhye maa ɔda ali kɛ ɛnee bɛzonle nɔhalɛ nu wɔ ɛkɛ ne ɛlɛ.
Bieko, ɛnee Yizikeɛle ngapezo ne mɔɔ tia agbɔvolɛ maanle mɔɔ ɛbɔ bɛ ɛyia (ɔvi tile 25 kɔdwu 32) la zia ndɛnebualɛ mɔɔ tia Gyɛlusalɛm nee nɔhalɛ ɛzonlenlɛ mɔɔ bɛbava bɛazie ɛkɛ ne bieko la avinli. Abɔlɔba bie hanle Yizikeɛle ndɛnebualɛ ne mɔɔ tia maanle maanle ne mɔ la anwo edwɛkɛ kɛ: “Kɛzi ɔye yɛ adwenle ɔfi Nyamenle ɛya ne azo ɔkɔ kɛzi ɔzele Ye menli ne anwunvɔne azo la le nzenzaleɛ kɛnlɛma, ɔluakɛ bɛ agbɔvolɛ anzohwenlɛ ne le Ye menli ne ɛlielɛ ne foa.”
