KPUYA 3
Kɛzi Me Nee Me Awovolɛ Badendɛ Ɛ?
BONI A ƐBAYƐ A?
Suzu tɛnlabelɛ ɛhye anwo: Ɔle Maanle nɔsolɛ. Geoff mɔɔ ɛnyia ɛvolɛ 17 la ɛwie ye gyima yɛ, mekɛ ɛdwu kɛ ɔdie ɔ menle ekyii! Ɔsɔ TV ne na ɔtuto ɔ nwo ɔgua ebia ne mɔɔ ɔ nye die nwo la anu.
Ɛkɛ ne ala, ye Papa vindele ɛkɛ na ɛnee yeva ɛya.
“Geoffrey! Nzɔne ati a ɛlɛsɛkye mekɛ wɔanlea TV wɔ mekɛ mɔɔ ɛbahola wɔaboa ɛ diema nrenyia ekyi ne wɔamaa yeayɛ ye homework ne ɛ? Bɛka edwɛkɛ bɛkile wɔ a ɛnde!”
“Yebɔ ɔ bo bieko,” Geoff ka ye kpole ɔmaa ɔte.
Ye Papa twe ɔ ti na ɔka kɛ, “Kpavolɛ ye, ɛse nzɔne?”
“Papa, tɛ ɛhwe ɔ,” Geoff anyunlu kakyi na ɔgu ɛnwomenle.
Akee ye Papa ɛva ɛya. Ɔka ye anyebolo zo kɛ, “Mmatendɛ zɔhane ɛkile me!”
Saa ɛdawɔ a ɛle Geoff a, anrɛɛ boni a ɛbayɛ amaa bɛanyeye bɛ nloa zo ɛ?
GYINLA NA SUZU NWO!
Wɔ awovolɛ mɔɔ ɛ nee bɛ bɛali adwelie la le kɛ ɛlɛka kale la. Saa debie si wɔ adenle a, ɛbakpondɛ adenle fofolɛ.
NEAZO ƐNE:
Kakula raalɛ bie mɔɔ bɛfɛlɛ ye Leah la se, “Ɔyɛ se kɛ me nee me papa bali adwelie. Ɔyɛ na me nee ye ɛlɛdi adwelie a, ɔka kɛ, ‘Mmafa ɛya ɛnee ɛlɛka edwɛkɛ bie wɔahile me ɔ?’”
LEAH BAHOLA AYƐ NINYƐNE NSA.
-
1. Ɔbahola yeadea ye papa nu.
Leah tea nu kɛ, “Tie mɔɔ melɛka la na ɔhyia!”
-
2. Ɔ nee ye papa ɛnrɛdendɛ.
Leah ɛnrɛha ngyegyelɛ ne anwo edwɛkɛ ɛnrɛhile ye papa.
-
3. Ɔbahendɛ mekɛ kpalɛ nu, na yeaha edwɛkɛ ne bieko.
Nzinlii Leah nee ye papa tɛnla aze na bɛtendɛ, anzɛɛ ɔkɛlɛ ngyegyelɛ ne mɔɔ ɛra la wɔ kɛlata zo ɔmaa ye.
Nuhua boni a ɛbaha wɔahile Leah kɛ ɔyɛ a?
SUZU NWO: Ninyɛne ɛlɛtwehwe Leah papa adwenle
Kɛ mɔɔ ɛnrɛmaa debie ɛnrɛzi wɔ adenle la, zɔhane ala a, ɛbahola wɔakpondɛ adenle mɔɔ ɛbalua zo ɛ nee wɔ awovolɛ adendɛ a
Bie a 2 ne ɛyɛlɛ ɛnrɛyɛ se, noko nrɛlɛbɛ ɛnle nu. Nzɔne ati ɔ? Ɔluakɛ saa Leah kulo kɛ ɔdi ye ngyegyelɛ ne anwo gyima a, ɔwɔ kɛ ɔ nee ye papa tendɛ
Wɔ 3 ne anu, Leah ɛmmaa debie ɛnzi ye adenle kɛ ɔ nee ye papa bali adwelie. Emomu ɔbɔ mɔdenle kɛ ɔbaha edwɛkɛ ne mekɛ fofolɛ. Yɛɛ saa Leah kpa kɛ ɔbahɛlɛ ye papa kɛlata a, ɔbamaa ɔ nwo adɔ ye ɛkɛ ne ala.
Ɔkɛlɛ ye papa kɛlata ne a, ɔbamaa yeahɛlɛ edwɛkɛ mɔɔ ɔkulo kɛ ɔka la pɛpɛɛpɛ. Saa Leah papa kenga kɛlata ne a, ɔbade mɔɔ ɛnee ɔkpondɛ kɛ ɔka ɔkile ye la abo, ɛhye baboa papa yeamaa yeade ɔ ra ne ngyegyelɛ ne abo kpalɛ. Yemɔti 3 ne baboa Leah nee ye papa kpalɛ. Saa bɛtɛnla aze anzɛɛ ɔkɛlɛ ye kɛlata a, ɔ nee Baebolo nu folɛdulɛ ne mɔɔ se “yɛyɛ ninyɛne mɔɔ fa anzonudwolɛ ba” la le ko.
Boni bieko a anrɛɛ Leah bahola ayɛ a?
Nea saa ɛbahola wɔadwenle bie anwo a, na kɛlɛ ye wɔ ɔ bo ɛke. Akee kɛlɛ mɔɔ bahola avi nu ara la.
MMAMAA BƐNYIA ADWENLE NGAKYILE
Kakye kɛ, tɛ dahuu yɛɛ edwɛkɛ mɔɔ ɛka nee kɛzi wɔ awovolɛ te ɔ bo la le ko a.
NEAZO ƐNE:
Wɔ awovolɛ biza wɔ kɛ nzɔne ati a wɔyɛ basaa a. Ɛka kɛ, “Mengulo kɛ mebaha nwolɛ edwɛkɛ.”
Noko wɔ awovolɛ te ɔ bo kɛ ɛse: “Ɛnlie bɛ ɛnli ɛhye ati ɛnrɛhola ɛnrɛha ɛnrɛhile bɛ. Mebaha me ngyegyelɛ ne anwo edwɛkɛ meahile me gɔnwo mɔ na tɛ wɔ ɔ.”
Fa ye kɛ ɛlɛyia ngyegyelɛ bie yɛɛ wɔ awovolɛ kulo kɛ bɛboa wɔ. Noko ɛka kɛ: “Mmadwenle nwo. Mebahola meali nwolɛ gyima.”
-
Kɛzi wɔ awovolɛ bade ɔ bo ɛ?
-
Kɛzi ɛbahola wɔava mualɛ kpalɛ ɛhye wɔamaa ɛ?
Bie A Eza Ɛ Nye Balie
MƆƆ Ɛ TIPƐNEMA KA LA
Kɛzi Me Nee Me Awovolɛ Badendɛ Ɛ?
Bie nvasoɛ dɔɔnwo wɔ zo mɔɔ ɛtɛdwenlenle nwo a.
MGBAVOLƐ NEE MBƐLƐRA BIZA KƐ
Kɛ Ɔkɛyɛ Na Me Nee Me Awovolɛ Adɛnla Anzodwolɛ Nu Ɛ?
Kpondɛ ndenle nnu mɔɔ baboa wɔ yeamaa wɔade akɛsakɛsa zo na saa ɔba bɔbɔ a yeanyɛ kpole.
MGBAVOLƐ NEE MBƐLƐRA BIZA KƐ
Kɛzi Me Nee Me Awovolɛ Baha Mɛla Mɔɔ Bɛhyehyɛ La Anwo Edwɛkɛ Ɛ?
Sukoa kɛzi ɛbadendɛ wɔ ɛbulɛ nu wɔahile wɔ awovolɛ la, na mɔɔ bavi ara la bazi ɛ nwo.
NVONINLI MƆƆ BƐDOLƆ LA VIDIO
Kɛzi Me Nee Me Awovolɛ Bɛadendɛ Ɛ?
Kɛ ɔkɛyɛ na ɛ nee wɔ awovolɛ adendɛ wɔ mekɛ mɔɔ ɛngulo kɛ ɛtendɛ la ɛ?
