Bɛnwobɔlɛ le subane mɔɔ ɔnzɔ Nyamenle anye, ɔmaa awie dwenle ɔ ngomekye ɔ nwo na ɔsɛkye ye adwenle. * Awie mɔɔ bɔ ɔ nwo la bahola abu awie mɔ kɛ nla ti a bɛwɔ ɛkɛ a​—bɛle menli mɔɔ ɔwɔ kɛ awie fa bɛ dielie ɔ nye wɔ nla nu. Awie mɔɔ bɔ ɔ nwo la bu nla kɛ ɔngyi ɛlɔlɛ mɔɔ menli nwiɔ da ye ali kile bɛ nwo la azo, na emomu, nwonane nu debie mɔɔ awie kola yɛ fa dielie ɔ nye wɔ mekɛ ekyi bie anu maa ɔ nwo tɔ ye a. Noko zɔhane anwodɔlɛ ne le mekɛ ezinra nu debie ala. Nɔhalɛ nu, kɛ anrɛɛ ɔbahu nwonane nu atiakunluwɔzo ne mɔ mɔɔ le kɛ ‘nla nwo ɛbɛlatane, evinlinyɛleɛ, yɛɛ nla nwo atiakunluwɔzo ɛtane’ la, bɛnwobɔlɛ si nganeɛdelɛ ɛhye mɔ adua.​—Kɔlɔsaema 3:5.

Ɛzoanvolɛ Pɔɔlo hɛlɛle kɛ: “Ayi mɔ, . . . bɛmaa yɛwowo debie biala mɔɔ wɔ yɛ nwo mɔɔ gua yɛ sonlabaka ye anzɛɛ yɛ ɛkɛla ne mɔ anwo evinli la yɛgua, yɛzulo Nyamenle, na yɛmaa yɛ ɛbɛlabɔlɛ nwo ɛde bɔkɔɔ.” (2 Kɔlentema 7:1) Saa ɔyɛ se ɔmaa wɔ kɛ ɛkɛli edwɛkɛ ɛhye azo a, mmamaa ɛ sa nu to. Gyihova mɔɔ ‘fakyɛ wɔ ye afoa’ la ɛziezie ɔ nwo kɛ ɔbaboa wɔ. (Edwɛndolɛ 86:5; Luku 11:9-13) Nɔhalɛ nu, wɔ adwenle mɔɔ bua wɔ fɔlɛ nee mɔdenle mɔɔ ɛlɛbɔ kɛ ɛgyakyi zɔhane subane ne​—ɔnva nwo kɛ ɔkɔ a ɛnee yezia yera la​—kile kɛ ɛlɛ subane kpalɛ. Kakye noko kɛ, “Nyamenle le kpole tɛla yɛ adwenle, yɛɛ ɔze debie biala.” (1 Dwɔn 3:20) Nyamenle nwu dɔɔnwo tɛla yɛ ɛtane ne mɔ; ɔnwu kɛzi sonla ne de la. Adwenle ɛhye boa ye maa ɔte asɔne mɔɔ yɛ nye bolo yɛyɛ la abo na ɔse yɛ anwunvɔne. Ɛhye ati,  mmamaa ɔyɛ wɔ ɛvɛlɛ kɛ ɛkɛbɛlɛ ɛ nwo aze na nɔhalɛ nu ɛkɛva wɔ asɔneyɛlɛ ɛkɛdo Nyamenle anyunlu kɛ kakula mɔɔ yia ngyegyelɛ a ɔkɔ ɔ ze ɛkɛ la. Gyihova bayila wɔ na yeamaa wɔanyia adwenle mɔɔ anu te la. (Edwɛndolɛ 51:1-12, 17; Ayezaya 1:18) Nɔhalɛ nu, ɔwɔ kɛ ɛyɛ ninyɛne mɔɔ hyia mɔɔ nee wɔ asɔneyɛlɛ ne le ko la. Kɛ neazo la, ɔwɔ kɛ ɛbɔ mɔdenle kɛ ɛbahoati nlanwonvoninli nee agɔnwolɛ ɛtane biala. *

Saa bɛnwobɔlɛ kɔ zo gyegye wɔ a, ka nwolɛ edwɛkɛ kile Keleseɛne awovolɛ anzɛɛ ɛ gɔnwo mɔɔ ɛnyi wɔ sunsum nu na ɔdwenle sonla nwo la. *​—Mrɛlɛbulɛ 1:8, 9; 1 Tɛsalonaekama 5:14; Taetɛse 2:3-5.